রাস্ত্রপতিগী লোইশঙ
ভারতকী রাস্ত্রপতিনা গজ উৎসব-২০২৩ হৌদোকখ্রে
Posted On:
07 APR 2023 2:19PM by PIB Imphal
ঙসি ভারতকী রাস্ত্রপতি, শ্রীমতি দ্রৌপতি র্মুমুনা কাজিরঙ্গা নেসনেল পার্কতা গজ উৎসব-২০২৩ হৌদোকখ্রে।
থৌরম অদুদা ৱা ঙাংবদা রাস্ত্রপতিনা হায়খি মহৌশা অমসুং মীওইবগী মরক্তা শেংলবা মরী অমা লৈনরি। মহৌশা ইকায়খুম্নবগী চৎনবী অসি ঐখোয়গী লৈবাক্কী শক্তম্নি। ভারত্তা, মহৌশা অমসুং নাৎ অমগা অমগা শম্নৈ অমসুং অমনা অমদগী খুদোংচাবা ফংনরি। ঐখোয়গী চৎনবীদা শামুশিং য়াম্না ইকায়খুম্নৈ। মসি নুংঙাই-য়াইফবগী খুদম অমা ওইনা লৌনৈ। শামু অসি ভারতকী নেসনেল হেরিতেচ এনিমেলনি। মরম অদুনা ঐখোয়গী জাতিগী হেরিতেচ ঙাক্নবা শামুশিং ঙাক-শেনবা হায়বসি ঐখোয়গী লৈবাক্কী থৌদাংগী মরুওইবা শরুক অমনি।
রাস্ত্রপতিনা হায়খি মহৌশা অমসুং শা-উচেকশিং য়াইফনবা থবকশিং অসি মীওইবা খুন্নাই অমসুং মালেম ইমাগী য়াইফনবা থবকশিংনি। শামুশিংগী লৈফম ওইরিবা উমংশিং অমসুং পাম্বীশিং হৌবা মফমশিং অসি কার্বোন চুপশিনবদা য়াম্না কান্নৈ। মরম অদুনা শামু ঙাক-শেনবা হায়বসি ঐখোয় খুদিংমক্কী কান্নবনি অমসুং মসিনা নোংচু-নুংশাগী খল কাইরকপা থেংনবদা মতেং পাংগনি। অসিগুম্বা থবকশিং অসিদা সরকারগা লোয়ন্না মীয়াম শরুক য়াবা দরকার ওই।
রাস্ত্রপতিনা হায়খি শামুশিং অসি য়াম্না হৈ-শিংবা শানি হায়না খন্নৈ। মখোয় মীওইবগুম্না সোসিএল এনিমেলশিংনি। ঐখোয়না মীওইবদা মীনুংশিং অমসুং ইকায়খুম্নবা উৎলিবা অদুগুম্না শামুশিং অমসুং অতোপ্পা শা-উচেকশিংদশু উৎকদবনি। ঐখোয়না শা-উচেকশিংদগী মশাগী ওইজবা থিদবগী ৱাখল্লোন অদু তমগদবনি।
রাস্ত্রপতিনা হায়খি ‘মীওইবা-শামু মুক্নবা’ অসি চহিচা কয়াদগী ৱাথোক অমা ওইদুনা লাক্লি। মসিগী মুক্নবা অসি ঐখোয়না নৈনবা মতমদা, শামুশিংগী লৈফম নত্ত্রগা চৎফমশিংদা অপনবা পীবদগী মুক্নবা অসি ওইহল্লকপনি। মরম অদুনা মুক্নবা অসিগী দাইত্বদি মীওইবা খুন্নাইনি। শামুশিং ঙাক-শেনবা, মখোয়গী মহৌশাদগী লৈরক্লবা লৈফমশিং কনবা অমসুং শামুনা লম্বীশিং অপনবা পীদবা হায়বসি প্রোজেক ইলিফেন্তগী মরুওইবা পান্দমশিংনি। মীওইবা-শামু মুক্নবগী ৱাথোকশিং লোইশিনবা হায়বসিশু প্রোজেক অসিগী পান্দম্নি। হায়রিবা পান্দমশিং অসি অমগা অমগা মরী লৈনৈ।
রাস্ত্রপতিনা হায়খি অসামগী কাজিরঙ্গা অমসুং মনাস নেসনেল পার্কশিং অসি ভারতকী মমল নাইদ্রবা লন ওইবা খক নত্তনা মালেম পুম্বগী লন্নি। মরম অদুনা হায়রিবা পার্কশিং অসি য়ুনেস্কোনা ‘ৱার্ল্দ হেরিতেচ সাইত’ ওইনা শকখঙলে। লৈবাক অসিদা অনিশুবা ওইনা লম্লক্কী শামু খ্বাইদগী য়াম্না লৈবা রাজ্য অসামনা ওইরি। মরম অদুনা গজ উৎসব পাংথোক্নবা কাজিরঙ্গা অসি খ্বাইদগী চুনরবা মফম্নি। প্রোজেক ইলিফেন্ত অমসুং গজ উৎসব মাইপাক্নবা মরীলৈনবা খুদিংমক পুন্না থবক তৌমিন্নগদবনি।
*****
(Release ID: 1914726)
Visitor Counter : 122