ইনফোর্মেসন এন্দ ব্রোদকাস্তিংগী কেন্দ্র মন্ত্রী শ্রী অনুরাগ থাকুর, সিভিল এভিএসনগী কেন্দ্র মন্ত্রী শ্রী জ্যোতিরঅদিত্য সিন্দিয়া অমদি সিভিল এভিএসনগী কেন্দ্রগী রাজ্য মন্ত্রী জেনেরেল ভি.কে. সিংহনা ঙসি ইন্দিগো এয়রলাইনগী অহানবা দিল্লী-ধরমসালা-দিল্লী ফ্লাইত লমথাখ্রে‍।

থৌরমদুদা ৱা ঙাঙলদুনা, ইনফোর্মেসন অমদি ব্রোদকাস্তিংগী কেন্দ্র মন্ত্রী শ্রী অনুরাগ থাকুরনা সিভিও এভিএসন মন্ত্রালয়বু হিমাচল প্রদেশতা ইন্দিগো কন্নেক্তিবিতী য়ৌহনবগীদমক থাগৎপা ফোঙদোকখি অমদি ইন্দিগো অসি চীংগী স্তেত অসিদা য়ৌদনা লৈবাকসিগী ওইবা এয়রলাইন অমা তশেংনা ওইবা য়ারোই হায়খি‍। শ্রী থাকুরনা হেন্না চাউবা এয়রপোর্ত অমগী ৱাফম পুথোকখি অমদি হৌজিক হৌজিক্কী ওইনা ভারত পুম্বদগী হিমাচল প্রদেশতা লাকপা পেসেঞ্জরশিংনা দিল্লী ফাওদুনা লাক্লি অমদি স্তেত অসিদা য়ৌরক্নবগীদমক দিল্লীদগী কন্নেক্তিং ফ্লাইত তোংলি হায়খি‍। হেন্না চাউবা এয়রপোর্ত অমনা অপনবা লৈতবা কন্নেক্তিবিতী পেসেঞ্জরশিংদা পীগনি হায়বা ৱাফমসু থমখি‍।

শ্রী থাকুরনা লৈবাকসিদা এয়রপোর্ত ইনফ্রাস্ত্রকচর খোঙলৈ থুনা পাকথোক চাউথোকপগী ক্রেদিৎ প্রধান মন্ত্রী নরেন্দ্র মোদীদা পীখি অমদি তেনখ্রবা মতমসিদা এয়রপোর্ত মশিং ৭৪দগী ১৪০দা হেনগৎলে হায়খি‍। হৱাই চপ্পল তোংবা মীওইশিংনা হৱাই জহাজ তোংদুনা চৎপা ঙম্লিবসি উরান স্কীম্না ঙমহনবনি হায়না মহাক্না মখা তাখি‍।

এয়রপোর্ত অসিনা পীরিবা সর্ভিসকী পাক চাউবগী মতাঙদা পল্লদুনা, শ্রী থাকুরনা ধরমসালা এয়রপোর্তনা দিস্ত্রিক্ত মঙাবু ইজ ওফ কন্নেক্তিবিতীনা শম্নহল্লি অমদি স্তেত অসিগী মীশিং তঙ্খায় অমদা কান্নবা পীরি হায়খি‍। ইন্দিগো ফ্লাইত অমখকসিনা স্তেত অসিগী তঙ্খায় অমা অমদি পঞ্জাবকী মফম খরবু লৈবাক্কী অতৈ মফমশিংগা শম্নহনবদা চাউনা থৌদাং লৌরি হায়খি‍।

কেন্দ্রগী রাজ্য মন্ত্রী জেনেরেল ভি.কে. সিংহনা মহাক্কী ৱারোলদা ধরমসালা এয়রপোর্ততা মাগী অহানবা ফ্লাইত ১৯৯০দা তাখি, মতুং তারকপদা মাগী ওপরেসন পাকথোক চাউথোরক্তুনা হৌজিক্তি মসিদা মিতর ১৩৭৬ শাংবা রনৱে লৈরে হায়খি‍। করিমগুম্বা মফম লৈরগদি রনৱে অসি মখা তানা শাংদোকপা য়াগনি হায়না মন্ত্রীনা হায়খি‍। এয়রপোর্ত অসিদা, দলাই লমা লৈবা মরম্না, ত্রাফিক য়াম্না লৈ, অমদি অৱাং-নোংচুপ থংবা হিমাচল প্রদেশ পুম্বদা এয়র কন্নেক্তিবিতী ফংহল্লি হায়না মহাক্না হায়খি‍। ইন্দিগো ফ্লাইত অসিনা হিমাচল প্রদেশতা তুরিস্ত মশিং হেন্না পুরক্কনি অমদি মসিনা স্তেত অসিগী মীয়ামদা কান্নহনগনি হায়না মহাক্না হায়খি‍।

সিভিল এভিএসনগী কেন্দ্র মন্ত্রী শ্রী জ্যোতিরঅদিত্য সিন্দিয়ানা, তিল্লিবা মীয়ামগী মফমদা ৱা ঙাঙলদুনা, সিভিল এভিএসনগী লমদা মমাঙগী চহি ৬৫দা ফংবা ঙমখিদবশিং হৌখিবা চহি ৯সিদা এয়রপোর্ত, ৱাতরদ্রোম অমদি হেলিপোর্ত ১৪৮ শেমগত্তুনা ফংবা ঙম্লে হায়খি‍। মন্ত্রালয় অসিনা মশিং অসি লাক্কদৌরিবা চহি অহুমদগী মরি ফাওবসিদা ২০০গী মথক্তা হেনগৎহন্নবা থবক পায়খৎলি হায়না মহাক্না মখা তাখি‍। হোৎনরিবা অসিনা অচৌবা মেত্রো এয়রপোর্তশিং লোয়ননা মনুং হঞ্জিনবা এয়রপোর্তশিংদা লাস্ত মাইল কন্নেক্তিবিতী পীবদা মান্নবা মীৎয়েঙ য়েঙলি হায়নসু মহাক্না মখা তাখি‍।

শ্রী সিন্দিয়ানা স্তেত অসিদা শান্ন-খোৎনবগী ইনফ্রাস্ত্রকচর শেমগৎপদা শ্রী অনুরাগ থাকুরনা লৌরিবা থৌদাংবু থাগৎখি অমদি মহাক্না কন্না হোৎনবনা মরম ওইরগা ঙসিদি ধরমসালা অসি রীজনেল নৎত্রগা লৈবাক্কীদা নত্তনা মালেমগী ক্রিকেৎকী মফম অমা ওইবা ঙম্লিবনি হায়খি‍। মহাক্না ধরমসালাগী চীং-লেম্লবা স্তেদিয়মবু মালেমগী খ্বায়দগী ফবা স্তেদিয়মগা মান্নবা ৱাফম কয়া পুথোকখি‍। ক্রিকেৎনা স্তেত অসিগী শেন্মিৎলোনগী থবক থৌওংদা ইনোৎ অমা হাপ্লি হায়না মহাক্না হায়খি, অমদি মসিগী ক্রেদিৎ শ্রী অনুরাগ থাকুরগীনি হায়বা ৱাফমসু থমখি‍।

শ্রী অনুরাগ থাকুরনা ধরমসালা এয়রপোর্ত পাকথোক চাউথোকহন্নবগী থম্লকখিবা ৱাফমবু মন্ত্রীনা লৌশিনখি অমদি মন্ত্রালয়না মসিগীদমক ফেজ ২গী থৌরাং অমা মাঙজৌননা পায়খত্তুনা লৈরে হায়খি‍। অহানবা তাঙ্কক্তা লোদ পেনালতী য়াওবা তর্বোপ্রোপ এয়রক্রাফ্ত লেন্দিং অসিগুম্বা পেনালতীশিং লৈহন্দনা তাবা য়াহন্নবগীদমক হৌজিক লৈরিবা রনৱে অসি মিতর ১৯০০দা শাংদোকহনবগী থবক য়াওরি‍। ২শুবা তাঙ্কক্তা এয়রপোর্ত অসিদা বোইং ৭৩৭ অমদি এয়রবস এ.৩২০ তাবা য়াহন্নবগী মঙলান মঙফাওনহন্নবগীদমক রনৱে অসিবু মিতর ৩১১০দা শাংদোকহন্নবগী থবক য়াওরি হায়না মহাক্না পাউদমখি‍।

স্তেত অসিদা মহাক্কী মন্ত্রালয়না ফংবা ঙমখ্রবা অতোপ্পা ৱাফমশিংগী মতাঙদা ঙাঙলদুনা, শ্রী সিন্দিয়ানা সিম্লা এয়রপোর্তকী রনৱে রেস্তোরেসনগী থবক লোইশিল্লে অমদি মন্দীদা গ্রীনফীল্দ এয়রপোর্ত অমা শেমগৎনবগী মফমগী ক্লিয়রেন্স পীরক্লে হায়খি‍। মন্ত্রালয় অসিনা স্তেত অসিদা সিভিল এভিএসন ইনফ্রাস্ত্রকচর শেমগৎনবগীদমক খোঙফম চেৎনা লেপ্লি হায়না মন্ত্রীনা মখা তাখি‍।

“সিভিল এভিএসন সেক্তরদা মপুং ফানা দিমোক্রেতাইজেসন তৌবা উবা ফংলে, অমদি এয়রক্রাফ্ত পাইবখক উরম্বা মীওইশিংসু ঙসিদি মসিদা তোংদুনা পাইরি”, হায়না মন্ত্রীনা হায়খি অমদি উরান স্কীমগী মওংদা পায়খৎলিবা প্রধান মন্ত্রী শ্রী নরেন্দ্র মোদীগী মঙলান অসিদা অসিগুম্বা মীওই করোর ১ লাখ ১৫ ভারতকী এয়র পেসেঞ্জরগী মশিংদা হাপচিল্লে হায়না মখা তাখি‍।

হিমাচল প্রদেশ স্তেতনা উরানগী মখাদা রুৎ ৪৪ পীরি, মসিগী মনুংদা ২২দি মথৌ তৌদুনা লৈরবনি‍। স্তেত অসিদা মন্ত্রালয় অসিনা ফংবা ঙমখ্রবশিং পল্লদুনা, মন্ত্রীনা কন্নেক্তিবিতী অসি ২০১৩-১৪দা এয়রক্রাফ্ত ৪০ লৈরম্বদগী চহি ৯ অসিদা এয়রক্রাফ্ত মশিং ১১০দা হেনগৎলক্তুনা ১৭৫% হেনগৎলকপা ঊরি হায়না হায়খি‍। অখন্ননা ধরমসালাদা লৈরিবা এয়র ত্রাফিক্কী পাইথোক পাইশিনগী থবক হৌখিবা চহি ৯সিদা ১১০% হেনগৎলক্তুনা ২০১৩-১৪দা চয়োলদা ২৮ ওইরম্বদগী ঙসিদি ৫০ য়ৌরে হায়না মহাক্না ফোঙদোকখি‍।

হিমাচল প্রদেশগী কঙ্গ্রাদগী মেম্বর ওফ পার্লিয়ামেন্ত শ্রী কিসন কাপুরনা এয়রক্রাফ্ত অসি স্তেত অসিগী মীয়ামগী এয়র কন্নেক্তিবিতীদা চাউনা হাপচিল্লকপা অমনি হায়খি‍। স্তেত অসিনা কোবিদ ১৯ লাইচৎ মনুংদা তুরিস্ত এক্তিবিতীঈ শাথিনা হন্থবা থেংনখ্রে অমদি হৌজিক অমুক হিঙ্গৎলকপা উরি‍। শ্রী কাপুরনা সিভিল এভিএসন মন্ত্রালয়গী মফমদা ধরমসালাদা তাবা এয়রক্রাফ্ত মশিং মখা তানা হেনগৎহন্নবা ৱাফম খন্নবিনবা হায়খি‍।

ইন্দিগো এয়রলাইন্না ধরমসালাদগী দিল্লী ফাওবগী নুমিৎ খুদিংগী ফ্লাইত চলাইগনি‍। হায়রিবা অনৌবা ফ্লাইত সেক্তর অসিনা ইন্দিগোগী নুমিৎ খুদিংগী ফ্লাইত মশিং ১৭৯৫তা হেনগৎহল্লে অমদি মসিবু দিপার্চরগী লমদা মালেমগী তরেৎশুবা খ্বায়দগী চাউবা এয়রক্রাফ্ত ওইহল্লে হায়খি‍।

*****