ভারত ইমানা য়াইফরে।

ভারত ইমানা য়াইফরে।

ভারত ইমানা য়াইফরে।

জগদগুরু বস্বেশর অবরেগী নন্না নমস্কারাগনু।

কলে, সহিত্য মত্তু সংস্কৃতিয় ই নদিগে,

কর্নাতক দা এল্লা সহোদরা সহদরিয়ারিগে নন্না নমস্কারাগনু।

মরুপশিং,

হন্দক্কী চহি হৌরকপদা ঐহাক্না হুব্বালীদা লাকপগী খুদোংচাবা ফংজখি। হুব্বালীগী নুংশিরবা ইচিল ইনাওশিংনা লম্বী মতাইদা লেপ্তুনা ঐহাকপু তরাম্না ওকখিবা, ঐহাক্কী মফমদা থৌজাল পীবিখিবা, পুংফমশিং অদু ঐহাক্না কৈদৌনুংদা কাওবা ঙম্লোই। অদুক য়াম্বা মীনুংশি অমসুং থৌজালশিংবু ঐহাক্না মতম পুম্বদা নিংশিংগনি। হৌখিবা মতম কয়াদা ঐহাক্না কর্নাতকাগী জিলা কয়াদা চৎপগী খুদোংচাবা ফংজখি। বেঙ্গালুরুদগী বেলগাৱি ফাওবা, কলবুর্গীদগী শিমোগা ফাওবা, মৈসুরদগী তুমকুর ফাওবা, ঐহাক্কী মফমদা কন্নাদিগা মীয়াম্না শৌগৎপীখিবা, ঐহাকপু মখোয় মশেলনি খনখিবা, অদোমগী অদুগুম্বা নুংশিবা অদুনা ঐহাক্কী পুক্নিং শুমহৎখিবনি। পুম্নমক অসিগীদমক্তা ঐহাক্না অদোমগী লমন তোনশিল্লবনি, ঐহাক্না মসি কর্নাতকাগী মীয়ামগী সেবা তৌদুনা হন্দোক্কনি। কর্নাতকাগী মীপুম খুদিংনা নুংঙাই য়াইফবা পুন্সি মহিঙ্গমা হিংহন্নবা, মফমসিগী নহাশিংনা তুং লমচত্তা মায় পাক্না চঙশিনবা ঙম্নবা তঙাই ফদবা খুদোংচাবা ফংহনবা, থবক্কী অনৌবা খুদোংচাবা কয়া ফংহনবা হায়বসিগী মতাংদা ঐখোয়না অহিং নুংথিল নাইদনা থবক তৌরিবনি। বি.জে.পি.গী দবল ইঞ্জিন সরকার, কর্নাতকাগী জিলা খুদিংমক, মফম খুদিংদা চাউখৎপগী মঙাল ফংহন্নবা ঐখোয়না লেপ্তনা হোৎনরি। ঙসিদি, ধরৱাদকী লমদমসিদা চাউখৎ-থৌরাংগী অনৌবা মরু হুল্লে। চাউখৎ থৌরাংগী মরু অসিনা হুব্বালী, ধার্ৱারকা লোয়ননা কর্নাতকা অপুনবগী তুংগী মতমবু চাউখৎপগী মাইকৈদা পুশিনবগী থৌদাং লৌরগনি, মরু অসিনা মপুং মরৈ ফাবা চাউখৎপগী উপাল অমা ওইহনগনি।

মরুপশিং,

ধার্ৱার মলেনাদু অমসুং বয়ালু ঙমখৈগী মরক্কী লমদম অসিবু গেতৱে তাউন, হায়বদি সনথোং হায়না মতম কয়াদগী খঙনদুনা লাক্লি। তোঙান-তোঙানবা লমদমশিংদা লাকপা মীওইশিংগী ওইনা নগর অসি মখোয়গী খোঙচৎকী তাঙ্কক অমা ওইদুনা লাক্লি। ঐখোয়না মীপুম খুদিংবু থম্মোই শেংনা তরাম্না ওকখি অমসুং মখোয়দগী হীরম কয়া তমজদুনা চাউখৎচনবসু হোৎনখি। মরম অদুনা, ধার্ৱার অসি গেতৱে অমখক ওইদ্রে, কর্নাতকা অমসুং ভারতকী মতিক মগুনগী মমি অমসু ওইরবনি। মসিবু কর্নাতকাগী সংস্কৃতীগী কোনুং হায়নসু খঙনরিবনি। ধার্ৱারকী শক্তাক অসি সহিত্যগসু মরী লৈনৈ, লমদমসিদগী দাঃ দি.আর. বেন্দ্রেগুম্বা সহিত্যকার কয়া অমসু থোকখ্রিবনি। ধার্ৱারকী শক্তাক অসি নিংথীরবা ঈশৈ নোংমাইগসু মরী লৈনৈ, লমদমসিদগী পন্দিত ভিমশেন জোশী, গঙ্গুভাই হঙ্গল অমসুং বাসবরাজ গুরুগুম্বা ঈশৈ নোংমাইগী মীওইশিংসু থোক্লকখ্রবনি। ধার্ৱারকী লমদম অসিনা পন্দিত কুমার গন্ধর্বা, পন্দিত মল্লিকঅর্জুন মান্সুরগুম্বা শক্নাইরবা মনি কয়া অমসু পীখ্রবনি। অদুগা ধার্ৱারকী শক্তাক অসি মহাওগসু মরী লৈনৈ। ‘ধার্ৱার পেরা’ চাদবা মীওই কনাবু লৈরমগদগে, মসিবু অনিরক হন্না চানিংদবা মীওই কয়াবু লৈরম্লোইদবগে। অদুবু, ঐখোয়গী মরুপ, প্রহলাদ জোশীনা ঐহাক্কী হকশেলগী য়াম্না খঞ্জখি, মরম অদুনা মহাক্না ঙসি ঐহাক্কী ইফমদা পেরাবুদি পীবিরে, অদুবু বোক্সতা য়োম্লগা ওইনা পীবিরে।

মরুপশিং,

ঙসিদি, ধার্ৱারকী আই.আই.তি. কেম্পস অসিনসু ঐহাকপু হেন্না নুংঙাইবা ফাওহল্লে। মফমসিদা হিন্দি লোইনা খঙই। মসিগী কেম্পস অসিনা ধার্ৱারকী শক্তাকপু মপাঙ্গল হেন্না লৈহল্লগনি।

মরুপশিং,

ঐহাক্না মফমসিদা লাক্ত্রিঙৈগী মমাংদা মান্দ্যাদা চৎলুই। ঐহাক্না মান্দ্যাদা ‘বেঙ্গালুরু-মৈসুর এক্সপ্রেসৱে’বু কর্নাতকা অমসুং লৈবাক্কী মফমদা কত্থোকপগী খুদোংচাবা ফংজখি। মসিগী এক্সপ্রেসৱে অসিনা কর্নাতকাবু মালেমগী সোফৱেয়র অমসুং তেক্নোলোজীগী হব অমা ওইনা হান্নদগী হেন্না মাঙজিল থানা পুরক্নবা লম্বী য়াৎলগনি। অদুগা নুমিৎ খরনিগী মমাংদা, বেলগাৱিদা চাউখৎ থৌরাংগী প্রোজেক্ত কয়াগী উরেপ উয়ুং তম্বা অমসুং শঙ্গাবগী থৌরম পাংথোকখ্রে। শিমোগাদা কুবেম্পু এয়রপোর্তকী উরেপ উয়ুংসু তমখ্রে। অদুগা হৌজিক্না, ধার্ৱারকী আই.আই.তি.গী অনৌবা কেম্পস অসিনা কর্নাতকাগী চাউখৎ থৌরাংগী খোঙচত্তা অনৌবা তাঙ্কক অমা হাংদোক্লে। মফমসিগী হাই-তেক ফেসিলিতীশিংনা আই.আই.তি. ধার্ৱারবু মালেমগী খ্বাইদগী ফবা ইন্সতিত্যুতশিংগী থাক্তা য়ৌহন্নবা ইথিল পীগনি।

মরুপশিং,

মসিগী ইন্সতিত্যুত অসিদি বি.জে.পি. সরকারগী ৱাখল্লোনবু থবক্তা ওন্থোকপগী মতিক চারবা খুদম অমনি। ঐহাক্না চহি মরিগী মমাংদা, ফেব্রুৱারী ২০১৯দা মসিগী মোদর্ন ইন্সতিত্যুত অসিগী উরেপ উয়ুং তমখি। মদুগী মরক্তা কোরোনাগী মতম লাকখি, থবক তৌবদা অয়েৎপা কয়া পীখি। মদু ওইরবসু, চহি ৪গী মনুংসিদা আই.আই.তি. ধার্ৱারনা ফ্যুচরিস্তিক ইন্সতিত্যুসন অমগী মওংদা শেম শাবা লোইরকপা অসিদা ঐহাক্না য়াম্না নুংঙাইবা ফাওই। উরেপ উয়ুং তম্বদগী শঙ্গাবা ফাওবদা দবল ইঞ্জিন সরকার অসিনা অঙকপা খোঙজেলদা থবক পাংথোকখি অমসুং ঐখোয়না উরেপ উয়ুং তম্বা থবক খুদিংমক ঐখোয়না শঙ্গাবা ঙমগদবনি হায়বা ঐহাক্কী ৱাখল্লোন লৈজৈ। উরেপ উয়ুং তম্লো, নুং অমা য়ুংলম্লো অদুগা অদুম কাওথোক্লো, মসিগুম্বা চৎনবীসু লৈতবা নত্তে।

মরুপশিং,

নিংতম্বা ফংলবা মতুংগী দিকেদ কয়া ফাওবদা, করিগুম্বা মহৈ-মশিংগী অফবা ইন্সতিত্যুসন শারবদি, মখোয়গী ব্রান্দদা অশোকপা লাক্কনি হায়বগী ৱাখল্লোন লৈরম্মি। মসিগুম্বা ৱাখল্লোন অসিনা লৈবাক্কী নহা কয়াদা অৱাবা কয়া পীদুনা লাকখি, অদুবু অনৌবা অমসুং নহা ওইবা ভারতনা মসিগুম্বা ৱাখল্লোনবু মনিংদা থনম্লে। অফবা এজুকেসন হায়বসি মফম খুদিংদা য়ৌগদবনি, মীপুম খুদিংনা ফংগদবনি। ইন্সতিত্যুত মশিং য়াম্না লৈরিবমখৈ, মীওই মশিং য়াম্বদা অফবা এজুকেসন ফংহনবা ঙমগনি। মসিনা মরম ওইরগা, ভারত্তা মমাংগী চহি ৯দা অফবা ইন্সতিত্যুৎকী মশিং য়াম্না হেনগৎখ্রিবনি। ঐখোয়না এমসকী মশিং শরুক অহুম হেন্না হেনগৎহনখ্রে। নিংতম্বা মতুংগী দিকেদ ৭তা লৈবাক অসিদা মেদিকেল কোলেজ শুপ্নগী ৩৮০ লৈরম্মি, ঐখোয়না চহি ৯গী মনুংদা অনৌবা মেদিকেল কোলেজ ২৫০ হাংদোকখি। মসিগী চহি ৯ অসিদা ঐখোয়না অনৌবা আই.আই.তি. অমসুং আই.আই.এম. কয়াসু হাংদোকখি। ঙসিগী থৌরম অসিসু বি.জে.পি.গী মদুগুম্বা ৱাখল্লোন অমসুং হোৎনজমনগী খুদম অমনি।

মরুপশিং,

২১শুবা চহি-চাগী ভারতনা মশাগী শহরশিংবু মতমগা চুনবা ওইহন্দুনা তুংলমচত্তা চঙশিল্লি। বি.জে.পি. সরকারনা হুব্বালী-ধার্ৱারবুসু স্মার্ত সিতী স্কিমগী মনুং চলহনখ্রে। মসিগী মখা পোন্না, ঙসি স্মার্ত প্রোজেক্ত কয়া মীয়ামদা খুৎশিন্নরে। মসিদা নত্তনা, স্পোর্ত কমপ্লেক্স অমগী উরেপ উয়ুংসু তমখ্রে। তেক্নোলোজী, ইনফ্রাস্ত্রকচর অমসুং স্মার্ত গবর্নেন্সকী মরম ওইদুনা হুব্বালী ধার্ৱারনা লাক্কদৌরিবা মতমশিং অসিদা চাউখৎপগী অনৌবা থাক্তা য়ৌবা ঙম্লগনি।

মরুপশিং,

অপুনবা কর্নাতকা অসিনা শ্রী জয়দেব হোস্পিতাল ওফ কার্দিওভেস্ক্যুলর সাইন্স এন্দ রিসর্চ ইন্সতিত্যুত অসিদা থাজবা য়াম্না থম্মি। মখোয়গী সেবাশিং অসি বেঙ্গালুরু, মৈসুর অমসুং কলবুর্গীদা ফংই। মখোয়গী ব্রাঞ্চ অমা ঙসি হুব্বালীদসু হাংদোক্লে, মসিনা মরম ওইরগা লমদম অসিগী মীয়াম্না খুদোংচাবা য়াম্না ফংলগনি। লমদম অসিদি হান্নদগী হৌনা হেল্থ কেয়রগী হব অমা ওইদুনা লাক্লিবনি। অদুগা, অনৌবা হোস্পিতাল অসিনা হৌজিক্তি মফমসিগী অহেনবা মীয়ামদা কান্নবা হেন্না পীরগনি।

মরুপশিং,

ধার্ৱার অমসুং মনাক নকপা মফমশিংদা থক্নবা অশেংবা অমসুং অফবা ঈশিং পীনবা কেন্দ্র অমসুং রাজ্য সরকার পুন্দুনা থবক কয়া পায়খৎমিন্নরি। মফম অসিদা জল জীবন মিসনগী মখাদা লুপা করোর লিশিং অমদগী হেনবা শেনফমগী স্কিম কয়া হৌদোক্লে। মসিগী মখাদা, রেনুকা সাগর জলাশয় অমসুং মালাপ্রভা তুরেলগী ঈশিংবু তোতি-পাইপকী খুত্থাংদা য়ুম লাখ ১.২৫ হেনবদা ঈশিং ফংহল্লগনি। ধার্ৱারদা অনৌবা ৱাতর ত্রিতমেন্ত প্লান্ত শেম-শাবা লোইদুনা মথৌ তৌরকপা হৌবা মতমদা মসিনা জিলা অসিদা কান্নবা য়াম্না পীগনি। ঙসি, তুপরিহল্লা ফ্লদ দেমেজ কন্ত্রোল প্রোজেক্তকী উরেপ উয়ুংসু তমখ্রে। প্রোজেক্ত অসিনা ঈশিং ইচাউগী মরমদগী থোকপা খুদোংথীবা কয়াসু য়াম্না হন্থহনবা ঙম্লগনি।

মরুপশিং,

ঐহাক্না ঙসি য়াম্না থাগৎনিংবা ৱাফম অমা লৈ। কন্নেক্তিবিতীগী মতাংদা কর্নাতকানা মশক থোকপা তাঙ্কক অমা য়ৌবা ঙম্লে। কর্নাতকাগী মফমদা মসিগুম্বা মায় পাকপা অমা পীবগী খুদোংচাবা অসিনা হুব্বালীনা ফংলি। সিদ্ধরুধা স্বামীজী স্তেসন অসিদা মালেমগী খ্বাইদগী চাউবা প্লেতফোর্ম লৈরে। মসি শুপ্নগী রেকোর্দ অমখক নত্তে। প্লেতফোর্ম অমখক লৈবগী ৱাফম নত্তে। মসিদি ঐখোয়না ইনফ্রাস্ত্রকচরদা অহেনবা মিৎয়েং চঙলিবা ৱাখল্লোন অদুগী মায় পাকপনি। হোস্পেত-হুব্বালী-তিনাইঘাত স্তেসনবু ইলেক্ত্রিফিকেসন তৌবা অমসুং হোস্পেত স্তেসনবু অপগ্রেদ তৌখিবা অসিনা ঐখোয়গী মিৎয়েংদা পাঙ্গল হেন্না হাপ্লে। রুত অসিদা কোয়লাগী চাং য়াম্না ইন্দস্ত্রীশিংনা শিজিন্ননবা পুথোক পুশিন তৌই। লাইন অসিবু ইলেক্ত্রিফিকেসন তৌরবা মতুংদা দিজলগী মখা পোল্লম্বগী মতৌ য়াম্না হন্থরে অমসুং অকোয়বগী ফিভমসু ঙাক শেনবা ঙম্লে। মসিগুম্বা হোৎনজমন কয়া অসিদগী শেন্মিৎলোন চাউখৎপদা মতেং য়াম্না ফংলগনি অমসুং তুরিজমসু চাউখৎহনবা ঙম্লগনি।

ইচিল ইনাওশিং,

অফবা ইনফ্রাস্ত্রকচর, মতমগা চুনবা ইনফ্রাস্ত্রকচর অসি মিৎনা য়েংবদা ফজহন্নবা খক নত্তে, মসিদি পুন্সিবু হেন্না লাইথোকহনগদবা পাম্বৈ অমনি। মসিনা মঙলান মঙফাওনহন্নবা লাম্বী য়াৎলি। ঐখোয়গী নাক্তা অফবা লম্বী-শোরোক লৈরমদবা মতম, অফবা হোস্পিতাল লৈরমদবা মতমদা মফম খুদিং অমসুং চহি কাঙলুপ খুদিংগী মীওইশিংনা অৱাবা কয়া মাইয়োক্নৈ। অদুবু, অনৌবা ভারত অসিদা মতমগা চুনবা ইনফ্রাস্ত্রকচর লৈরক্লিবা অসিদগী মীপুম খুদিংনা কান্নবা ফংনরে। অফবা লম্বী শোরোক লৈবদগী স্কুল অমদি কোলেজতা চৎপদা হেন্না নুংঙাইহল্লে। অফবা হাইৱে লৈবদগী লৌমী অমসুং শিন্মীশিংনা কারবার তৌবা, ওফিস চৎপদা নুংঙাইরে, মিদ্দল ক্লাস অমসুং মীপুম খুদিংনা মসিগী কান্নবা ফংনরে। মমাংগী চহি ৯ অসিদা পি.এম. শরক য়োজনাগী মতেংদগী শোরোক্কী নেতৱর্ক্না শরুক অনি হেন্না চাউথোক্লে। নেস্নেল হাইৱে নেতৱর্ক্তা ৫৫%দগী হেন্না পাকথোক চাউথোক্লে। লৈবাক অসিদা লম্বী শোরোক খক্তা নত্তনা রেলৱে অমসুং এয়রপোর্তকী মশিংসু য়াম্না হেনগৎলে। মমাংগী চহি ৯ অসিদা লৈবাক্কী এয়রপোর্তকী মশিংদা শরুক অনিদগী হেন্না হেনগৎখ্রবনি।

মরুপশিং,

ইং ২০১৪গী মমাংদা লৈবাক অসিদা ইন্তর্নেত অমসুং দিজিতেল পাঙ্গলগী মতাংদা ৱারী কয়া শান্নরমদে। অদুবু ঙসিদি, ভারতনা মপাঙ্গল খ্বাইদগী লৈবা দিজিতেল ইকোনোমীশিংগী মরক্তা অমা ওইরে। ঐখোয়না ইন্তর্নেত চাউখৎহনবা, খুঙ্গং-খুঙ্গং খুদিংদা ইন্তররেন্ত য়ৌহনবদগী পুম্নমক অসি ওইথোকপা ঙম্লিবনি। মমাংগী চহি ৯ অসিদা নুমিৎ খুদিংগী ওইনা চাংচত্তা ইন্তর্নেত কন্নেক্সন লাখ ২.৫ হেন্না পীখি।

ইনফ্রাস্ত্রকচরগী হীরমদা অসুম্না চাউখৎপা ঙম্লিবসিগী মরমদি লৈবাক অমসুং লৈবাক মীয়ামগী অপাম্বগী মতুং ইন্না ইনফ্রাস্ত্রকচর শেমগৎপগীনি। মমাংগী মতমদদি, রাজনিতীগী কান্নবা য়েংদুনা রেল, লম্বী শোরোক্কী প্রোজেক্ত লাউথোক্লম্বনি। ঐখোয়না লৈবাক অপুনবা অসিগীদমক্তা পি.এম. গতিশক্তী নেস্নেল মাস্তর প্লান পুদুনা লাকখি, মসিনা মরম ওইরগা, তঙাই ফদবা মফমশিংদা ইনফ্রাস্ত্রকচর খোঙজেল য়াঙনা শেমগৎলি।

মরুপশিং,

ঙসিদি, লৈবাক অসিদা মমাংদা অমুক্তা পাংথোকখিদ্রিবা মওংদা ইনফ্রাস্ত্রকচরদা থবক পায়খৎলি। ইং ২০১৪ ফাওবদা লৈবাক্কী মশিং য়াম্লবা মীওইশিংগী মনাক্তা মশাগী য়ুম লৈরমদে। অমাংশঙ লৈতবনা মরম ওইরগা ঐখোয়গী ইচে-ইচল কয়ানা খুদোংচাদবা কয়া মাইয়োক্নখি। শিং অমসুং ঈশিংগীদমক্তা শীন-লাঙবদা নুপীমচা কয়াগী অয়াম্বা মতম হৌখ্রবনি। হোস্পিতাল লাইয়েংবদা শেল য়াম্না চঙলম্মি। লাইরবশিংগী লাইয়েংনবা হোস্পিতাল মশিং য়াম্লমদে। ঐখোয়না খুদোংচাদবা পুম্নমক্কী ৱারোইশিন পুরকখি। লাইরবশিংদা মশাগী ময়ুম লৈহনখি, মৈ, ঈশিং, গ্যাস পীখি অমসুং অমাংশঙ শাবীখি। হৌজিক্তি য়ুম্থোং খুদিংদা তোতি ঈশিং য়ৌবগী খুদোংচাবসু ফংলে। খুঙ্গং-য়ুমগী অনকপদা হোস্পিতাল শারে, অফবা কোলেজ অমসুং য়ুনিভর্সিতী শারে। হায়বদি, ঐখোয়না ঙসি নহাশিংদা মখোয়গী অপাম্বা খুদিংমক পীরে, মসিনা মথংগী চহি ২৫ অসিগী পান্দম অমসুং অপাম্বা ফংহনবদা তেংবাংগনি।

মরুপশিং,

ঐহাক্না ঙসি ভগ্বান বশ্বেশ্বরগী লমদমদা লাকপসিদা ইশাবু মপুনা থৌজানবীরে হায়না খঞ্জরি। ভগ্বান বশ্বেশ্বরনা কত্থোক্লম্বা থবকশিংগী মনুংদা খ্বাইদগী মরু ওইবদি অনুভব মন্দপম হৌদোক্লম্বা অসিনি। মসিগুম্বা লোকতন্ত্রিক ওইরবা পথাপ অসি মালেম খুদিংনা শিংথানরি। মসিগুম্বা ৱাফম কয়া লৈ, অদুগা মসিগুম্বা কয়া অসিনা মরম ওইরগা ভারত অসি খ্বাইদগী চাউবা গনতন্ত্রা ওইবখক নত্তনা গনতন্ত্রগী মমানি হায়না ঐখোয়না চাউথোকচনা হায়জবা ঙম্লিবনি। চহি খরগী মমাংদা ঐহাক্না নোংপোক লন্দন্দা ভগ্বান বশ্বেশ্বরগী মীতম অমা মীয়ামদা খুৎশিন্নবগী খুদোংচাবা ফংজখিবা অদু ঐহাক্কী লাইবক ফবনি। ভগ্বান বশ্বেশ্বর অমসুং অনুভব মন্তপ্পানা লন্দন্দা মপাঙ্গল লৈবা গনতন্ত্রা অমগী খুদম তাক্লি। লন্দন্দা ভগ্বান বশ্বেশ্বরগী মীতম অমা লৈরি, অদুবু লন্দন অসিমক্তদা ভারতকী গনতন্ত্রগী মতাংদা ৱাহং হংবা অসিদি য়াম্না লাইবক থীবনি। ভারতকী গনতন্ত্রগী মরাদি ঐখোয়গী চহি চা কয়াগী পুৱারীদগী লৈরক্লবনি। মালেমগী শক্তি অমত্তনা ভারতকী গনতন্ত্রদা অকায়বা পীবা ঙম্লোই। মসিগুম্বা মতৌ লৈজরবসু, মীওই খরনা ভারতকী গনতন্ত্রগী মতাংদা ৱাহং হংলি। মসিগুম্বা মীওই অসিনা ভগ্বান বশ্বেশ্বরবু থওই-উইশিত্ত্রি। মসিগুম্বা মীওই অসিনা কর্নাতকাগী মীয়াম, ভারতকী মতিক লৈরবা চৎনবী অমসুং ই-পাউ নিংথীনা খঙলবা ভারতকী মীওই করোর ১৩০বু থওই উইশিত্রিবনি। কর্নাতকাগী মীয়াম্না মখোয়গুম্বা মীওইশিং অসিদগী চেকশিনবগী মথৌ য়াম্না তাই।

মরুপশিং,

কর্নাতকানা মমাংগী চহি খরা অসিদা ভারতপু তেক-ফ্যুচর অমগী শক্তকা পীরিবা অসিবু ঐখোয়না মখা তানা চাউখৎহনবগী মথৌ তারবনি। কর্নাতকা অসি হাই-তেক ভারতকী ইঞ্জিন অমনি। মসিগী ইঞ্জিন অসিনা দবল ইঞ্জিন সরকারগী শাফু ফংবা হায়বসি য়াম্না মরু ওইবা ৱাফম অমনি।

মরুপশিং,

ঐহাক্না হুব্বালী- ধার্ৱারগী মীয়াম্বু চাউখৎ-থৌরাংগী প্রোজেক্তশিং অসিগীদমক্তা অমুক্কা হন্না থাগৎচরি। ঐহাক্কা লোয়ননা হৌনা অমুক্তা লাওমিন্নসি – ভারত ইমানা য়াইফরে। খুৎ অনিমক থাগত্তুনা ঐহাক্না হৌনা অমুক্তা লাওমিন্নসি – ভারত ইমানা য়াইফরে, ভারত ইমানা য়াইফরে, ভারত ইমানা য়াইফরে।

অদোম্বু অমুক্কা হন্না থাগৎচরি।

***