প্রধানমন্ত্রীগী লোইশঙ
তুর্কিয়ে অমসুং সিরিয়াদা ‘ওপরেসন দোস্ত’ শরুক য়ারুবা এন.দি.আর.এফ পর্সোনেলগা প্রধান মন্ত্রীগা উনখ্রে
“য়ুহা হাবা মনুংদা ভারতনা অথুবা মতমদা মতেং পাংখিবা অদুদা মালেম পুম্নমক্কী পুক্নিং চিংশিনখ্রে। মসি ঐখোয়গী মী কনবা অমসুং মতেং পাংবা কাংবুগী থৌরাং তৌদুনা লৈবা অদুগী মমি অমনি”
“লৈবাক অসিগী মশাগী ওক্নবা লৈজবগা লোয়ন্না লৈবাক অসিগী কৎথোকপা অদু ভারতনা য়োকখৎতুনা থম্লি”
“মালেমগী মফম অমদা খুদোংথিবা অমা থোকপদা, অহানবা মতেং পাংবা লৈবাক অমা ওইনবা ভারতনা থৌরাং তৌদুনা লৈরি”
“মচু অহুমগী ফিরালগা লোয়ন্না ঐখোয়না থুংলুবা মফমদা, হৌজিক ভারতকী কাংবু য়ৌরক্লে, ফিবম ফগৎলক্লগনি হায়বগী থাজবা অমা লৈরে”
“লৈবাক্কী মীয়াম মরক্তা এন.দি.আর.এফকী অফবা মিংচৎ অমা থম্লে। লৈবাক্কী মীয়াম্না অদোম থাজরে”
“মালেমদা খ্বাইদগী ফবা মী কনবা অমসুং তেংবাং পীবা কাংবুনি হায়না ঐখোয়না ঐখোয়গী শক্তম মপাঙ্গল কনখৎহনগদবনি। ঐখোয় ইশাগী ফজনা থৌরাং তৌবনা, ঐখোয়না মালেমগী ফজনা থবক তৌবা ঙমগনি”
Posted On:
20 FEB 2023 7:48PM by PIB Imphal
তুর্কিয়ে অমসুং সিরিয়াদা ‘ওপরেসন দোস্ত’ শরুক য়ারুবা নেসনেল দিজাস্তার রেসপোন্স ফোর্স(এন.দি.আর.এফ)পর্সোনেলগা প্রধান মন্ত্রীগা উনখ্রে।
য়ুহা হাবনা শোকহল্লবা তুর্কিয়ে অমসুং সিরিয়াদা ‘ওপরেসন দোস্ত’তা মখোয়না শিংথানিঙাই ওইবা থবক পাংথোকপগীদমক প্রধান মন্ত্রীনা মখোয় থাগৎখি। প্রধান মন্ত্রীনা বসুধাইবা কুতুম্বকামগী ৱাখল্লোন অদু শন্দোক্না তাকখি। প্রধান মন্ত্রীনা হায়খি মালেম পুম্বা অসি ইমুং অমনি হায়বা ঐখোয়গী ৱাখল্লোন অদু ভারতকী কাংবুনা তুর্কিয়ে অমসুং সিরিয়াদা উৎখ্রে।
মহৌশাগী ওইবা অমাং-অতা থোরকপা মতমদা অথুবা মতমদা মতেং পাংবগী মরুওইবা অদু পল্লদুনা, ‘গোল্দন অৱার’গী মতাংদা প্রধান মন্ত্রীনা হায়খি “য়ুহা হাবা মনুংদা তুর্কিয়েদা ভারতনা অথুবা মতমদা মতেং পাংখিবা অদুদা মালেম পুম্নমক্কী পুক্নিং চিংশিনখ্রে। অথুবা মতমদা চংশিন্নবা কাংবু অদু থৌরাং তৌবা অমসুং স্কিলশিং ত্রেনিং পীবা মথৌ তাই।
মখোয়না পাংথোকখিবা থবকশিং অদুগীদমক মমা অমনা তিমগী মীওইশিংদা বর পীরকখিবগী ফোতোশিং অদু নিংশিংলদুনা, প্রধান মন্ত্রীনা হায়খি অৱাবা নংলবা মফমশিংদা ঐখোয়না মী কনবা অমসুং মতেং পাংবগী চৎথখিবা থবকশিংগী ফোতো খুদিংমক্না ভারতমচা খুদিংমক চাউথোকচবা পোকহল্লে। লাম্বা লৈতনা শীনফম অসিগী লমদা খঙবা অমসুং মীওইবগী মমল খঙনা থবক তৌবা অসিনা অৱাবা তারবা মতমদা মীওই অমা মতেং পাংবা মতমদা মরুওইবা থৌদাং অমা লৌরি। কাংবু অসিনা উৎখিবা মীনুংশি লৈবা থবকশিং অদুশু প্রধান মন্ত্রীনা থাগৎখি।
২০০১দা গুজরাত্তা থোকখিবা য়ুহা হাবা অমসুং মফম অদুদা মহাক্না ভোলুন্তিয়ার ওইখিবা অদু নিংশিংলদুনা প্রধান মন্ত্রীনা হায়খি মখাদা ননখ্রবা মীওইশিং থিবদা অমসুং অতেক-অকায় লৌথোকপদা খুদোংথিবা কয়া মায়োক্নখি অমসুং ভুজতা হোস্পিতাল নিংখায়খিবদগী অনা-লায়য়েংগী থবকশিং খুদোংচাদবা কয়া মায়োক্নখি। ১৯৭৯দা থোকখিবা মাছু দামগী খুদোংথিবা থৌদোক অদুশু প্রধান মন্ত্রীনা নিংশিংখি। মহাক্না হায়খি হায়রিবা খুদোংথিবশিং অদুদা ঐনা থেংনখিবশিং অদুদা য়ুম্ফম ওইরগা, অদোমগী থবক,থৌনা অমসুং পুক্নিংগী ইহুল অদু ঐনা থাগৎলি। ঙসি ঐনা ময়াম পুম্নমক ইকায়খুম্নবা উৎচরি।
মহাক্না হায়খি মশানা মশাবু মতেং পাংবা ঙমজবা অদু মশাগী ওক্নবা পুথোকচবা কৌই অদুগা অতোপ্পশিংনা মতেং দরকার ওইরকবা মতমদা মতেং পাংবা ঙম্বা অদুবুনা মশাগী ওইজনাম থাদোকপা কৌই। মসি লনাই মীওইশিং খক নত্তনা লৈবাক্কী ওইনশু চৎনগদবনি। মরম অদুনা হৌখিবা চহি খর অসিদা ভারতনা মশাগী ওইজনাম থাদোকপগা লোয়ন্না মশাগী ওক্নবা পুথোক্নবশু হোৎনরে। য়ুক্রেনদা মচু অহুমগী ফিরালনা লৌখিবা থৌদাং পল্লদুনা প্রধান মন্ত্রীনা হায়খি মচু অহুমগী ফিরালগা লোয়ন্না ঐখোয়না থুংলুবা মফমদা, হৌজিক ভারতকী কাংবু য়ৌরক্লে, ফিবম ফগৎলক্লগনি হায়বগী থাজবা অমা লৈরে।
মফম অদুগী মীয়াম্না মচু অহুমগী ফিরাল ইকায়খুম্নবা উৎপা অদুশু প্রধান মন্ত্রীনা ফোঙদোকখি। ওপরেসন গঙ্গা মনুংদা কমদৌনা মচু অহুমগী ফিরালনা মীওই খুদিংমক্কী চুঙ্গোই অমা ওইনা থবক তৌখিবগে হায়বগী মতাংদশু প্রধান মন্ত্রীনা নিংশিংখি। মসিগা মান্নবা মওংদা, ওপরেসন দেবী শক্তিদা অফগানিস্থানদা য়াম্না অরুবা ফিবমশিংদগী মী কনবগী থবকশিং পাংথোকখি। প্রধান মন্ত্রীনা হায়খি কোরোনা লাইচৎ মনুংদা নাগরিক খুদিংমক ভারত্তা পুরকখিবা অদুনা খুদম্নি অমসুং হিদাক-লাংথকশিং অমসুং তিকাশিং পীদুনা মালেমগী য়াইফ-থৌজাল ফংখি।
প্রধান মন্ত্রীনা হায়খি তুর্কিয়ে অমসুং সিরিয়াদা য়ুহা হাবা মতমদা অহানবা মতেং পাংখিবশিংগী মনুংদা ভারত অমা ওইখি। ওপরেসন দোস্তকী মখাদা ভারতনা মীওইবা খুন্নাইগী খনবা অদু থবক ওইনা পাংথোকখি। নেপাল, মালদিবস অমসুং শ্রী লঙ্কাদা য়ুহা হাবা থোকখিবদা ভারতনা ইহান হান্না মতেং পাংখি। ভারতকী ফোর্সশিং অমসুং এন.দি.আর.এফতা অতোপ্পা লৈবাকশিংনা থাজবা হেনগৎলক্লি। লৈবাক্কী মীয়াম মরক্তা এন.দি.আর.এফকী অফবা মিংচৎ অমা থম্লে। লৈবাক্কী মীয়াম্না অদোম থাজরে। মসি ফোর্স অসিগী অচৌবা মাইপাকপনি। স্কিলগা লোয়ন্না ফোর্স অমদা মীকুপ-নাহুম শিংনা লৈবা হেনগৎহনবা মতমদা ফোর্স অদুগী থৌনা শরুক কয়া হেনগৎলি।
মহৌশাগী ওইবা অমাং-অতা থোরকপা মতমদা ভারতকী মী কনবা অমসুং তেংবাং পীবগী শক্তি হেনগৎহনবগী দরকার ওইবা অদু পল্লদুনা প্রধান মন্ত্রীনা হায়খি মালেমদা খ্বাইদগী ফবা মী কনবা অমসুং তেংবাং পীবা কাংবুনি হায়না ঐখোয়না ঐখোয়গী শক্তম মপাঙ্গল কনখৎহনগদবনি। ঐখোয় ইশাগী ফজনা থৌরাং তৌবনা, ঐখোয়না মালেমগী ফজনা থবক তৌবা ঙমগনি।
লোইশিল্লকপদা, প্রধান মন্ত্রীনা এন.দি.আর.এফ কাংবুগী থবকশিং থাগৎলদুনা হায়খি মখোয়না মী কনবগী থবকশিং পাংথোক্লবশু, মহাক্না থৱায়-হকচাং য়াওনা হৌখিবা নুমিৎ ১০ মতম পুম্নমক্তা মখোয়গা পাউ ফাউনখি।
*****
(Release ID: 1900927)
Visitor Counter : 142
Read this release in:
Kannada
,
English
,
Urdu
,
Hindi
,
Marathi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Malayalam