প্রধান মন্ত্রী, শ্রী নরেন্দ্র মোদীনা ঙস ভিদিও কন্ফরেন্সিংগী খুত্থাঙদা গোরখপুর সানসদ খেল মহাকুম্ভ থৌরমদা ৱা ঙাঙখ্রে‍।

তিল্লিবা মীয়ামদা ৱা ঙাঙলদুনা, প্রধান মন্ত্রীনা শান্নরোয় খুদিংমক্না থাক অসি য়ৌরক্নবগীদমক কন্না হোৎনরকখিবনি হায়বা ৱাফম থমখি‍। শান্ন-খোৎনবগী লমদা মায় পাকপা অমদি মায়থিবা হায়বসি শরুক অমা ওইদুনা লৈরবনি হায়বা ৱাফম থম্লদুনা শান্নরোয় পুম্নমক্না মায় পাকপগী পারা ফারবনি হায়না মহাক্না হায়খি‍। শান্ন-খোৎনবগী ইথিলনা তুংলমচত্তা শান্নরোয় পুম্নমক্কী থোঙ হাংদুনা থমগনি হায়না প্রধান মন্ত্রীনা হায়খি‍।

থাগৎনিংঙাস অমদি পুক্নিং থৌগৎনিংঙাই ওইরবা খেল মহাকুম্ভগী থৌরাংগী মরমদা পল্লদুনা, প্রধান মন্ত্রীনা মুক্না, কবদ্দী অমদি হোকীনচিংবা মশান্নশিংগা লোয়ননা লাই য়েকপা, নাৎকী ঈশৈ, নাৎকী জগোয় অমদি তব্লা-বাসিনচিংবা লমশিংদা লৈরিবা কলাকার কয়ানসু অথোই অহেন তান্নবা অসিদা শরুক য়ারি হায়বা ৱাফম থমখি‍। “শান্ন-খোৎনবগী নৎত্রগা কলা-ঈশৈগী হৈ-শিংবা ওইরবসু মদুগী ইথিল অমদি মতিংদি চপ মান্নৈ”, হায়না প্রধান মন্ত্রীনা হায়খি‍। ভারতকী চৎনবী অমদি নাৎকী, কলাগী মওং মতৌশিং মাঙদা পুদুনা চঙশিনবগী থৌদাংগী মরুওইবা ৱাফমশিংসু মহাক্না থমখি‍। প্রধান মন্ত্রীনা গোরখপুরদগী মেম্বর ওফ পার্লিয়ামেন্ত, শ্রী রবী কিসন সুক্লাবু মহাক্না আর্তিস্ত অমা ওইনা অমদি থৌরম অসি শিনবদা লৌরিবা থৌদাংগীদমক মহাক্না শিংথাখি‍।

হৌখিবা চয়োল খরসিদা প্রধান মন্ত্রীনা অহুমলক শুবা ওইনা সানসদ খেল মহাকুম্ভদা শরুক য়াবনি‍। ভারতনা মালেমগী শান্না-খোৎনবগী লমদা মতিক ময়াই ফুদোক্কে হায়রবদি অনৌবা লম্বী অমদি থৌওং শেমগৎপা মথৌ তাই হায়বা ৱাখল্লোনসু মহাক্না অমুক হন্না থমখি‍। প্রধান মন্ত্রীনা হৈ-শিংবশিং য়োকখৎনবা লোকেলগী থাক্তা শান্ন-খোৎনবগী অথোই অহেন তান্নবগী মরুওইবা ৱাফম থমখি অমদি রিজনেলগী থাক্তা অথোই অহেন তান্নবনা লোকেল তেলেন্তশিং হেনগৎহনবতা নত্তনা লমদম পুম্বদুগী শান্নরোয়শিংগী পুক্নিংসু থৌগৎলি‍। “সানসদ খেল মহাকুম্ভ অসি অনৌবা পরিং, অনৌবা সিস্তেম অমনি”, হায়না প্রধান মন্ত্রীনা হায়খি‍।

প্রধান মন্ত্রীনা গোরখপুর খেল মহাকুম্ভগী অহানবা ইদিসন্দা শান্নরোয় ২০,০০০ হেনবনা শরুক য়াখি অমদি মশিং অসি নুপী ৯০০০ য়াওনা শান্নরোয় ২৪,০০০দা হেনগৎলক্লে হায়বা ৱাফম থমখি‍। খেল মহাকুম্ভ অসিদা শরুক য়ারিবা নহা লিশিং কয়াদি অপীকপা ময়োল্লমশিং অমদি খুঙ্গঙদগী হৌরকপনি হায়বা ৱাফম থম্লদুনা, প্রধান মন্ত্রীনা সানসদ খেল মহাকুম্ভ অসি নহা ওইরিবা শান্নরোয়শিংদা খুদোংচাবা কয়া পীরিবা ফম্পাক অমা ওইরক্লি হায়বা ৱাফম থমখি‍।

“চহিগী খেন্নবা থমদনা, মীপুম খুদিংনা মশা মউ ফনা লৈনিংবগী অপাম্বা লৈ”, হায়না প্রধান মন্ত্রীনা হায়খি‍। শান্ন-খোৎনবনা খুঙ্গংদা পাঙথোকপা মেলাশিংগী শরুক ওইদুনা আখরাদা মশান্না কয়া পাঙথোক্নরম্বা মতম নীংশিংলদুনা, প্রধান মন্ত্রীনা অসিগুম্বা চৎনবীশিং অসি মাঙখিদুনা ইকুই কুইদ্রিবা মতমসিদা হোংলক্লিবা ফীভমশিংদা নুংনাংবা ফোঙদোকখি‍। মহাক্না হৌজিক্তি মতম লেন্নবগী পেরিয়দ ওইনা লৌনরবা স্কুলগী পি.তি. পেরিয়দকী মতাঙদসু পনখি অমদি মসিনা লৈবাক অসিনা শান্ন-খোৎনবগী লমদা মীরোল অহুম-মরি মাঙথরকপগী ফীভম পুরকই হায়খি‍। তি.ভি.দা শন্দোকপা, অপীকপা ময়োল্লমশিংদগী অঙাং কয়ানা শরুক য়ারিবা তেলেন্ত হন্ত প্রোগ্রামশিংগা মান্নবা ৱাফম পুথোক্লদুনা, প্রধান মন্ত্রীনা ভারত্তা হৈ-শিংবা য়াম্না লৈ অমদি সানসদ খেল মহাকুম্ভনা শান্ন-খোৎনবগী লমদা লৈবাক অসিগী লৈরিবা মতিং ফুদোক্নবগীদমক অচৌবা থৌদাং লৌগনি হায়খি‍।

লৈবাকসিদা অসিগুম্বা শান্ন-খোৎনবগী থৌরমশিং পার্লিয়ামেন্তকী মেম্বর চা কয়ানা পাঙথোক্লদুনা নহা ওইরিবা শান্নরোয় কয়ানা মাঙদা চঙশিন্নবগী খুদোংচাবা ফংলি হায়বা ৱাফম প্রধান মন্ত্রীনা পাউদমখি‍। শান্নরোয় কয়ানা স্তেত অমদি নেস্নেলগী থাক্তা শান্নরক্কনি অমদি ওলিম্পিক্সনচিংবা মালেমগী থাক্কী থৌরমশিংদা লৈবাকসিগীদমক মেদলশিংসু ফংলক্কনি‍। “শান্ন-খোৎনবগী তুংলমচৎকী ওইবা অচৌবা ইনফ্রাস্ত্রকচর অমগী চাউরবা য়ুম্ফম সানসদ খেল মহাকুম্ভনা থোল্লি”, হায়না প্রধান মন্ত্রীনা হায়খি‍।

গোরখপুরদা লৈরিবা রিজনেল স্পোর্তস স্তেদিয়মগী খুদম পীরদুনা, প্রধান মন্ত্রীনা অপীকপা ময়োল্লমশিংদা লোকেলগী থাক্তা শান্ন-খোৎনবগী ফেসিলিতীশিং শেমগৎপগী লমদা লৈঙাক্না পায়খৎলিবা থৌরাংগী মরমদা ৱাফম কয়া থমখি‍। গোরখপুরগী খুঙ্গংগী লমদা লৈরিবা নহাশিংগীদমক শান্নবুং ১০০ হেন্না শেমগৎখ্রে অমদি চৌরী চৌরাদা মিনি স্তেদিয়ম অমসু শেমগৎলি হায়না মহাক্না পাউদমখি‍। “হৌজিক্তি লৈবাক অসিনা মায়কৈ শুবা মঙলান অমগা লোয়ননা মাঙদা চঙশিল্লি”, হায়না প্রধান মন্ত্রীনা হায়রদুনা, অতৈ শান্না-খোৎনবগী ফেসিলিতীশিংগী মথক্তা খেলো ইন্দিয়া মুভমেন্তকী মখাদা শান্নরোয়শিংদা ত্রেনিং পীবগী মতাঙদা ৱাফম কয়াসু থমখি‍।

চহি অসিগী বজেৎকী মরমদা পল্লদুনা, প্রধান মন্ত্রীনা শান্ন-খোৎনবগী মন্ত্রালয়গী বজেৎকী চাকথুং ২০১৪গা চাংদম্নবদা শরুক ৩লোম হেনগৎলে হায়না পাউদমখি‍। লৈবাকসিদা মতমগা চুনরবা স্তেদিয়ম কয়া শেমগৎলি অমদি শান্নরোয়শিংদা ত্রেনিংগদমক লুপা লাখ কয়াগী ওইগদবা তেংবাংশিং পীরিবা তোপ্স (তার্গেৎ ওলিম্পিক পোদিয়ম স্কীম)গী মরমদা মহাক্না পনখি‍। মহাক্না খেলো ইন্দিয়া, ফিৎ ইন্দিয়া অমদি য়োগনচিংবা কেম্পেন ক্য়াগী মরমদসু পনখি‍। লৈবাক অসিনা মিল্লেৎশিংবু শ্রী অন্ন হায়না মিংথোল্লে হায়বা ৱাফম থম্লদুনা, প্রধান মন্ত্রীনা জোৱার অমদি বজ্রানচিংবা মহৈ মরোংশিং সুপরফুদকী মনুংদা চল্লি হায়না ফোঙদোকখি‍। প্রধান মন্ত্রীনা নহাশিংগী মফমদা কেম্পেন অসিদা শরুক য়াশিন্নবা অমদি লৈবাক্কী মিসন অসিবু লমজিংনবা ৱাফম থমখি‍।

মহাক্কী ৱারোল লোইশিল্লকপদা, প্রধান মন্ত্রীনা, “ঙসি, ওলিম্পিক্সতগী হৌরগা অতৈ অচৌবা তুর্নামেন্তশিংদা, মেদল লৌরকপগী পরিং অসি অদোমগুম্বা নহা ওইরিবা শান্নরোয়শিংখক্তনা মাঙদা পুদুনা চৎকদৌরিবনি” হায়খি‍। নহাশিংনা তরং তরং মখা তানা ঙানখিগনি অমদি মখোয়গী মায় পাকপগী মশেক মঙালগা লোয়ননা লৈবাকসিগী মিংচৎ পুরকখিগনি হায়না মহাক্না থাজবা ফোঙদোকখি‍।

উত্তর প্রদেশগী মুখ্য মন্ত্রী, শ্রী য়োগী অদিত্যনাথ অমদি গোরখপুরদগী এম.পি. শ্রী রবী কিসন সুক্লা থৌরমদুদা অতৈ মীওই কয়াগা লোয়ননা শরুক য়াখি‍।

गोरखपुर में हो रहे सांसद खेल महाकुंभ स्पर्धा को संबोधित कर रहा हूं.... Live देखिए https://t.co/HeGLrpUGld

— Narendra Modi (@narendramodi) February 16, 2023

***