নমস্কার মরুপশিং।

ইং ২০২৩গী বজেত সেসন ঙসিদগী হৌরগনি অমসুং ইকোনোমিক্সকী মালেমদা শকখঙলবা মীওই কয়ানা অফবা পাউতাক্কা লোয়ননা মাইকৈ খুদিংদগী ঙসিগী অহৌবসিদা থোক্লক্লি, থাজবগী মঙাল পদুনা লাক্লি, হরাও-নুংঙাইবগী মতম অমা পুরক্লি। ঙসি অসিদি য়াম্না মশক নাইবা পুঙফম অমনি। ভারতকী হৌজিক্কী রাস্ত্রপতিনা ঙসি হাউস্তা ৱাফম থম্বীগনি। রাস্ত্রপতিগী ৱারোল অসিদি ঐখোয়গী সংবিধানগী চাউথোকচফম্নি। ভারতকী পার্লিয়ামেন্তকী পথাপসিদি চাউথোকচিংঙাই ওইবনি, ঙসিনা অমুক্কা হেন্না চাউথোকচনিংঙাই ওই, মরমদি ঙসি ঐখোয়না নুপীশিংবু ইকায় খুম্নবা, মনুং হঞ্জিনবা মফমশিংদা লৈবা ত্রাইবেলশিংবু ইকায় খুম্নবগী থৌরম অমা ওইরি। ভারতকী হৌজিক্কী রাস্ত্রপতিনা মশাগী ৱারোল থম্বীরিবা অসিদা হাউসকী মীয়ামখক নত্তনা লৈবাক পুম্নমক্না চাউথোকচফম থোকই।  ঐখোয়গী পার্লিয়ামেন্ততা দিকেদ কয়াদগী চৎনবী অমা মখা চত্থদুনা লাক্লি। অনৌবা সন্সদ অমনা হাউস্তা খ্বাইদগী অহানবা ওইনা ৱা ঙাংনবা লেপখৎলকপা মতমদা, হাউস অপুনবনা, অতোপ্পা রাজনিতী দলদগী ওইরবসু, ইকায় খুম্নবা উৎনবা অমসুং মহাক্কী মশাগী থাজবা হেনগৎহন্নবা অকোয়বগী ফিভম শাগৎনবা হোৎনবগী মতৌ ঐখোয়না উদুনা লাক্লে। ঙসি রাস্ত্রপতিনা অহানবা ওইনা ঙাংগদৌবা ওইবনা ঐখোয়না মহাক্কীদমক্তা অসুম্না পাংথোকপা হায়বসি ঐখোয়গী থৌদাংনি। হাউসকী মীপুম খুদিংনা মসিমক তৌবীগনি হায়না ঐহাক্না থাজবা থম্মি। ঐখোয়গী লৈবাক্কী ফাইনান্স মন্ত্রীসু নুপীনি, মহাকসু হয়েং বজেত পুদুনা লাক্কনি। হৌজিক ওইরিবা ফিভম অসিদা ভারতকী বজেৎপু ভারতখক নত্তনা মালেম পুম্বনা মিৎয়েং তারি। দামাদোল মালেমগী হৌজিক ওইরিবা শেন্মিৎলোনগী ফিভমসিদা পুথোক্কদৌরিবা ভারতকী বজেৎনা মীচম মীয়ামগী অপাম্বা পীনবা হোৎনগনি অমসুং মসিদা মিৎয়েং তারিবা মালেমসু থাজবগী মঙাল অমদি উগনি। নিরমলাজীনা থাজবশিং অসি পাংথোক্নবা হোৎনগনি হায়না ঐহাক্না খঞ্জৈ। ভারতিয় জনতা পার্তীনা লুচিংবা এন.দি.এ. সরকারগী পান্দম অমা লৈদুনা লাক্লি, মোত্তো অমা লৈদুনা লাক্লি। ঐখোয়না মতম পুম্বদা মিৎয়েং থমদুনা থবক থৌরম কয়া পাংথোক্লিবা অসিদি “ইন্দিয়া ফর্স্ত, সিতিজন ফর্স্ত” হায়বা ৱাফম অসিনি। মসিনা হায়বদি লৈবাক্না হান্না, লৈবাক মীয়াম্না হান্না হায়বনি। মান্নবা ইথিলবু ঐখোয়না মখা তানা পুদুনা, হাউস্তা দিবেত পাংথোক্কনি, মসিদা ঐখোয়গী ওপোজিসনগী মরুপশিংনা নিংথিনা শেম-শাদুনা লাকপীদুনা মশাগী ৱাখল্লোন লান্থোকপীগনি হায়বগী ঐহাক্না থাজবা থমজরি। হাউস অসিনা লৈবাক্কী পোলিসী শেম্বগী মতৌ নিংথিনা নৈনগনি অমসুং লৈবাক্কী কান্নগদবা অমৃত পুরক্কনি। ঐহাক্না অদোম্বু অমুক্কা হন্না তরাম্না ওকচরি।

য়াইফ পাউজেল কয়া পীজরি। থাগৎচরি।

***