ভারত ইমানা – য়াইফরে!

ভারত ইমানা – য়াইফরে!

ভারত ইমানা – য়াইফরে!

খুরুমজরি ঐগী নুংশিজরবা মুম্বাইগী ইচিল ইনাও পুম্নমক!

মহারাস্ত্রগী গভর্নর শ্রী ভগৎ সিংহ কোস্যারী জী, মুখ্য মন্ত্রী শ্রী একনাথ সিন্দে জী, উপ মুখ্য মন্ত্রী শ্রী দেবেন্দ্র ফদ্নাবিস জী, কেন্দ্র মন্ত্রী মন্দলগী ঐগী খোঙবুশিং, এসেমব্লী স্পীকর শ্রী রাহুল নার্বেকর জী, মহারাস্ত্র লৈঙাক্কী মন্ত্রীশিং, এম.পি.শিং অমদি এম.এল.এ.শিং অমদি মশিং য়াম্না তিনবিরিবা ঐগী নুংশিজরবা ইচিল ইনাওশিং!

ঙসি, লুপা করোর ৪০,০০০গী ওইগদবা মুম্বাইগী চাওখৎ থৌরাংগী প্রোজেক্তশিং মফমসিদা মীয়ামদা কত্থোক্লি অমদি উরেপ উয়ুং তম্লি‍। মুম্বাইগী য়াম্না মরুওইবা মেত্রো ওইরবসু, ছত্রপতী সিবাজী তর্মিনস মতমগা চুনহনবা, লম্বী ফগৎহন্নবগী অচৌবা প্রোজেক্ত অমা, অমদি বালাসাহেব থাকরেগী মমিং লৌরগা থোনবা আপ্লা দৱাখানা হাংদোকপা ওইরবসু, হায়রিবা প্রোজেক্ত পুম্নমকসিনা মুম্বাই সহরগী ফীভম ফগৎহনবদা অতৌবা শক্লোন অমা লৌগদৌরি‍। ঙাইহাক্কী মমাঙদা মুম্বাইগী স্ত্রীৎ ভেন্দরশিংনা পি.এম. স্বানিধী য়োজনাগী মখাদা মখোয় মখোয়গী বেঙ্ক একাউন্তশিংদা শেল ফংখ্রে‍। অসিগুম্বা বিনিফিসরী পুম্নমক অমদি মুম্বাইকার খুদিংমক্কী মফমদা ঐনা নুংঙাইবা ফোঙদোকচরি‍।

ইচিল ইনাওশিং,

ঙসি ভারতনা মঙ চাউনা মঙবা অমদি হায়রিবা মঙলানশিং অদুবু মঙফাওনহনবা নীংতম্লবা মতুংদা অহানবা ওইনা ঙম্লি‍। মসিগী মহুত্তা, হৌখিবা চহিচাগী শাংলবা মতম অমা লায়রবগী মরমদা খন্নবদা, মালেমগী মফমদগী মতেং নিবদা, অমদি অৱাৎ অপাশিং পাম্বৈ অমা তৌদুনা মেনখৎনবা হোৎনবদে লেনখিবনি‍। মালেম্না ভারতকী অচৌবা ফিরেপশিংদা থাজবা থম্বগী মতৌসু নীংতম্লবা ভারতকী পুৱারীদা অহানবা ওইরি‍। মরম অদুনা, নীংতম্বগী ‘অমৃৎ কাল’ অসিদা ভারত মচাশিংগী মফমদা চাওখৎপা ভারত অমা শেমগৎপা পাম্বগী মতৌ লৈবগুম, হায়রিবা থাজবা অদুমক মালেমগী মফমদসু লৈরি‍। অদুগা হৌজিকৱাইদা সিন্দে জীনা দেবোসকী মতাঙদা মহাক্না থেংনরকপশিং তম্লম্মী‍। হায়রিবা মীৎয়েঙ অসি মফম খুদিংদা লৈ‍। ঙসি মালেমসিদা ভারতকীদমক থাজবা কয়া অমা লৈরক্লিবসি, ভারতনা মাগী মতিং মপুং ফানা শিজিন্নরি হায়না খুদিংমক্তা ফাওবদুননি‍। ঙসি মীওই খুদিংমক্না ভারতনা খোঙলৈ থুনা চাওখৎপা পুরক্নবগীদমক তৌফম থোকপা খুদিংমক তৌরি হায়বা খঙলে‍। ঙসি ভারতকী মফমদা হান্না লৈরম্বদা থাজবা কয়ানা থল্লি‍। ছত্রপতী সিবাজী মহারাজগী পুক্নিং থৌগৎ ৱারীশিংগা লোয়ননা, ঙসিগী ভারত্তা অমদি দবল ইঞ্জিন লৈঙাক্কী মফমদা স্বরাজ (ইরোমদোম লেপচবা) অমদি সুরজ (অফবা লৈঙাক) হায়রিবা ৱাখল্লোন অসি চাউনা মমি তারি‍।

ইচিল ইনাওশিং,

লায়রবশিংগী য়াইফ-থৌরাংগী শেনফমশিং স্কামশিংদা মাঙখিবা মতম ঐখোয়না থেংনখ্রে‍। তেক্সপেয়রশিংদগী খোমগৎলক্লিবা খাজনাশিংগী মতাঙদা সেন্সিতিবিতীগী খুদম চাংদম অমত্তা লৈরমদে‍। লৈবাক মীয়াম করোর কয়ানা অৱাবা খাঙদুনা লেল্লম্মী‍। হায়রিবা থৌওং অসি ঐখোয়না হৌখিবা চহি নিপানসিদা হোংদোক্লে‍। ঙসিদি, ভারতনা মাগী ফীজিকেল অমদি সোসিএল ইনফ্রাস্ত্রকচরদা তুংগী ৱাখল খন্দুনা অমদি মতমগা চুননবা মওংদা শেমগৎপদা শেল থাদরি‍। ঙসি, লৈবাকসিদা য়ুম, তোইলেৎ, ইলেক্ত্রিসিতী, ঈশিং, চাকথোং গ্যাস, লেম্না লায়েংবা, মেদিকেল কলেজ, এইমস, আই.আইধ.তি.শিং, আই.আইধ.এম.শিং খোঙজেল য়াঙনা শেমগৎপগা লোয়ননা, নাকল অমদনা মতমগা চুনবা লম্বী থোং শেমগৎপদসু চপ চানা মীৎয়েঙ থম্লি‍। মতম অমদা মঙগুম খল্লম্বা মতমগা চুনবা ইনফ্রাস্ত্রকচরশিং, ঙসিদি অসিগুম্বা ইনফ্রাস্ত্রকচরশিং অসি লৈবাকসিদা শেমগৎলি‍। শম্না হায়রবদা, ঙসি লৈবাকসিগী মথৌ তাবশিং শেমগৎপগা ইরোয়ননা তুংগী নুংঙাই য়াইফনবগীদমক শেমগৎ শাগৎপগী থবকসু চপ মান্ননা চঙশিল্লি হায়বনি‍। ঙসি মালেমগী অচৌবা শেন্মিৎলোনশিং অৱাবা ফীভম মায়োক্নরি, অদুবু অসিগুমবা খুদোংচাদ্রবা মতমসিদসু, ভারতনা লৈবাক মীয়াম করোর ৮০ হেনবদা লেম্না চেং হৱাই য়েন্থোক্তুনা য়ুম খুদিংদা চাকখুম মৈ মুৎহন্দ্রি‍। অসিগুম্বা ফীভম অসিদা ফাওবা, ভারতনা ইনফ্রাস্ত্রকচর শেমগৎপদা হান্না পানরুদবা চাংদা শেল থাদরি‍। মসিনা ঙসিগী ভারতকী খোঙফম, চাওখৎপা ভারত অমগীদমক ঐখোয়দা লৈরিবা ফিরেপকী মমি উৎলি‍।

ইচিল ইনাওশিং,

চাওখৎপা ভারত অমা শেমগৎপদা ঐখোয়গী ময়োল্লমশিংগী শক্লোন য়াম্না মরু ওই‍। অদুগা মহারাস্ত্রগী মতাঙদা হায়রগদি, স্তেত অসিগী ময়োল্লম কয়া অমসু মথঙগী চহি ২৫সিদা ভারতকী চাওখৎ খোঙজেল য়াঙখৎহনবদা থৌদাং লৌগদৌরি‍। মরম অদুনা, মুম্বাইবু তুংলমচৎকীদমক শেমগৎপা হায়বসি দবল ইঞ্জিন লৈঙাক অসিগী খ্বায়দগী মরুওইবা থৌরাংনি‍। ঐখোয়গী খোঙফম মুম্বাইগী মেত্রো নেৎৱর্ক পাকথোক চাউথোকহনবদসু মমি তারি‍। মুম্বাইদা ২০১৪ ফাওবদা মেত্রো অসি শুপ্নতগী কিলোমিতর ১০-১১খক চেল্লম্মী‍। ঐখোয়না দবল ইঞ্জিন লৈঙাক হেক শেম্লকপগা, মসি থুনা পাকথোক চাউথোরক্লি‍। থবক অসি মতম খর থিন্থররুরে, অদুবু সিন্দে জী অমদি দেবেন্দ্র জী পুন্না লাকপগা লোয়ননা, হৌজিক্তী থবক্কী খোঙজেল অমুক য়াঙখৎলক্লে‍। ঐখোয়না কিলোমিতর ৩০০ শাংবা মুম্বাইগী মেত্রো নেৎৱর্ক্কী থবক খোঙজেল য়াঙনা পায়খৎলি‍।

মরূপশিং,

ঙসি, লৈবাক শিনবা থুংনা রেলৱে মতমগা চুনহন্নবা থবক মিসন মোদতা পায়খৎলি‍। মসিদগী মুম্বাই লোকেল অমদি মহারাস্ত্রগী রেল কন্নেক্তিবিতীনসু কান্নবা ফংলি‍। দবল ইঞ্জিন লৈঙাক অসিনা মতম অমদা শেঞ্জা পায়বা মীওইশিংখক্তনা ফংলম্বা মতমগা চুনবা ফেসিলিতীশিং, লু-নানবা অমদি খোঙজেল য়াঙবা এক্সপরিএন্স মীচম মীয়ামগী মফমদা ফংহনবা পাম্মী‍। মরম অদুনা, ঙসিদি রেলৱে স্তেসনশিংসু এয়রপোর্তকুম শেমগৎলি‍। হৌজিক্তি ছত্রপতী সিবাজী মহারাজ তর্মিনস, লৈবাকসিগী খ্বায়দগী লিরবা রেলৱে স্তেসনশিংগী মরক্তা অমা ওইরিবা অসি, মশক মওং হোংদোক্কদৌরে‍। ঐখোয়গী হেরিতেজ অসি ২১শুবা চহিচাগী ভারতকী চাউথোকচফম ওইনা শেমগৎকদৌরি‍। মফমসিদা লমদমসিগী অমদি লমশাং চেনবা ত্রেনশিংগী তোখায়বা ফেসিলিতীশিং লৈগনি‍। মসিগা পান্দমদি মীচম মীয়ামদা হেন্না ফবা ফেসিলিতীশিং ফংহনবা অমদি লায়না চত্থোক চৎশিন য়াহন্নবনি‍। স্তেসন অসি রেলৱে ফেসিলিতীশিংখক্তগী ওইহল্লোই, মসি মল্তিমোদেল কন্নেক্তিবিতীগী হব অমসু ওইহনগনি‍। হায়বদি, বস, মেত্রো, তেক্সি, ওতো, চত্থোক চৎশিনগী পাম্বৈ অমা হেক্তবু ওইরবসু মফম অমত্তদা ফংহল্লগনি‍। মসিনা পেসেঞ্জরশিংদা অপনবা লৈতবা চত্থোক চৎশিনগী ফীভম ফংহনগনি‍। মসি লৈবাকসিগী ময়োল্লম খুদিংদা ঐখোয়না শেমগৎকদৌরিবা মল্তিমোদেল কন্নেক্তিবিতী অদুনি‍।

মরূপশিং,

মতমগা চুনরবা লোকেল, পাকথোক চাউথোক্লবা মেত্রোগী নেৎৱর্ক, বন্দে ভারত অমদি বুলেৎ ত্রেন্নচিংবা অতোপ্পা ময়োল্লমশিংগা খোঙজেল য়াঙনা মতমগা চুনবা মওংদা শম্নহনগদৌরিবা কয়া অসিনা মরম ওইরগা চহি খরগী মতুংদা মুম্বাইদা অওনবা অমা লাক্লগনি‍। মসি লায়রবা শিন্মীদগী হৌরগা অতৈ শিন্মীশিং, দুকান ফম্বা অমদি অচৌবা বিজিনেস তৌরিবশিংদগী হৌরগা মফমসিদা লৈরিবা মীওইশিং ফাওবদা মীপুম খুদিংদা নুংঙাইহনগনি‍। মনাক নকপা দিস্ত্রিক্তশিংদগী মুম্বাইদা লাকথোক লাকশিন তৌবা ফাওবা লায়হল্লগনি‍। কোস্তেল লম্বী, ইন্দু মিল মেমোরিএল, নাবি মুম্বা এয়রপোর্ত, ত্রান্স হার্বর লিঙ্কনচিংবা প্রোজেক্তশিংনা মুম্বাইদা অনৌবা মপাঙ্গল হাপ্লি‍। ধরাবীবু নৌনা শেমগৎপদগী হৌরগা অরিবা চোল শেমগৎপা ফাওবদা লৈরিবা থবক থৌরম খুদিংমক অচুম্বা পরিংদা অমুক হঞ্জিলক্লি‍। মসিগীদমক ঐনা সিন্দেজী অমদি দেবেন্দ্র জীগী মফমদা নুংঙাইবা ফোঙদোকচরি‍। মুম্বাইগী লম্বীশিং পাক চাউনা ফগৎহন্নবগী প্রোজেক্ত হৌদোক্লিবা অসিনসু দবল ইঞ্জিন লৈঙাক্কী খোঙফমবু উৎলি‍।

ইচিল ইনাওশিং,

ঙসি ঐখোয়না লৈবাকসিগী ময়োল্লমশিংদা মপুং ফানা অওনবা পুরক্নবগী থবক পায়খৎলি‍। মোৎশিলহনবদগী হৌরগা লু-নানবা ফাওবদা ময়োল্লমশিংগী পরৈ চেনবা ৱাফম খুদিংমক্কী পাম্বৈশিং পুথোক্লি‍। মরম অসিননি ঐখোয়না ইলেক্ত্রিক মোবিলিতীদা মীৎয়েঙ কন্না চঙলিবা অমদি মসিগী ইনফ্রাস্ত্রকচরশিং শেমগৎলিবা‍। ঐখোয়না বাইওফুএলদা য়ুম্ফম ওইবা ত্রান্সপোর্ত সিস্তেম অমা থুনা পুরকপা পাম্মী‍। হায়দ্রোজেন থাউ শীজিন্নবা ত্রান্সপোর্ত সিস্তেম পুরক্নবগীদমক লৈবাকসিদা মিসন মোদতা থবক চঙশিল্লি‍। মসিদসু নত্তনা, ঐখোয়না অনৌবা তেক্নোলোজীগী মতেঙগা লোয়ননা ঐখোয়গী ময়োল্লমশিংগী ফত্ত-হৌদি অমদি অমোৎ অকায় লোইশিন খমজিন্নবা লেপ্পা লৈতবা খোঙতাঙ কয়া থাংজিল্লি‍। ৱেস্ত তু ৱেল্থ হায়বা অচৌবা কেম্পেন অমসু লৈবাকসিদা চঙশিল্লি‍। অমোৎপা ঈশিং তুরেলদা তাহন্দনবগীদমক ৱাতর ত্রীৎমেন্ত প্লান্তশিংসু শেমগৎলি‍। মরূপশিং,

ময়োল্লমশিং শেমগৎনবগীদমক লৈবাকসিদা পাঙ্গল অমদি রাজনিতীগী ফিরেপ্তা অৱাৎপা অমত্তা লৈতে‍। অদুবু ঐখোয়না মরুওইবা ৱাফম অমদি খঙজিনবা তাই‍। মুম্বাইগুম্বা ময়োল্লম অমদদি, লোকেল বোদীশিংনা খোঙজেল থুনা চাওখৎপা পুরক্নবা মায়কৈদা মীৎয়েঙ চঙদ্রগদি প্রোজেক্তশিং অসি থুনা থবক পায়খৎপা ঙম্লোই‍। চাওখৎপা পুরক্নবগীদমক কত্থোক্লবা লৈঙাক অমা স্তেৎসিদা লৈরবা, অফবা লৈঙাক পুরক্নবগীদমক কত্থোক্লবা লৈঙাক অমা ময়োল্লমশিংদা লৈরবা মতমদা থবকশিং অসি খোঙজেল য়াঙনা পায়খৎপা ঙমগদৌরিবনি‍। মরম অদুনা, মুম্বাই চাওখৎহনবদা লোকেল বোদীশিংগী থৌদাং য়াম্না মরু ওই‍। মুম্বাই চাওখৎহন্নবগী শেলথুমগী অৱাৎপা লৈতে‍। মুম্বাইগী ওইজবা শেনফমশিং মফম চানা শীজিন্নগদবনি‍। শেলশিং অসি শেঞ্জা থুমজাদা মাঙহল্লবা, নৎত্রগা বেঙ্ককী ভোল্ততা শো লোন্দুনা থম্লবা অমদি চাওখৎ থৌরাংগী থবকশিং থিংজিনবগী থৌওং লৈরগা কমদৌনা মুম্বাইগী তুংলমচৎ তরং তরংহনগদৌরিবনো? মুম্বাইগী মীচম মীয়াম্না অৱাবা খাঙদুনা লৈরবা অমদি ময়োল্লম অসিনা চাওখৎপগী ইখৌ লাংবা ফীভমদা লৈবা হায়বা ফীভমসি ২১শুবা চহিচাগী ভারত্তা অমদি সিবাজী মহারাজগী মহারাস্ত্রদা কৈদৌঙৈদসু য়ারোই‍। মুম্বাইগী মীয়ামগী পরৈ চেনবা ৱাফম পুম্নমক খঙলবা মতুংদা ঐনা ৱাফমশিং অসি অহকপা থৌদাংগা লোয়ননা ফোঙদোক্লিবনি‍। বি.জে.পি. লৈঙাক নৎত্রগা এন.দি.এ. লৈঙাক্না কৈদৌঙৈদসু চাওখৎ থৌরাংগী থবকপু রাজনিতীনা নমথদুনা থমদে‍। চাওখৎপা পুরকপা হায়বসিনা ঐখোয়গী খ্বায়দগী মরুওইবা মীৎয়েঙনি‍। বি.জে.পি. লৈঙাক নৎত্রগা এন.দি.এ. লৈঙাক্না কৈদৌঙৈদসু চাওখৎ থৌরাংগী থবকপু রাজনিতীগী খুদোংচাবা লৌঔনবগীদমক ফাজিন্দুনা থমদে‍। পি.এম. স্বানিধী য়োজনানা মসিগী খুদম অমসু ওইরি‍। অহানবা ওইনা ঐখোয়না লৈবাকসিগী শেন্মিৎলোনগী মরুওইবা শরুক অমা ওইরিবা স্ত্রীৎ ভেন্দরশিংগী স্কীম অমা ঐখোয়না হৌদোক্লে‍। ঐখোয়না হায়রিবা অপীকপা লল্লোন ইতিক তৌজরিবা মীওইশিং অসিদা বেঙ্কশিংদগী অতাবা মমলদা অমদি কোলেতরেল য়াওদবা লোনশিং ফংহল্লি‍। লৈবাক শিনবা থুংবদগী স্ত্রীৎ ভেন্দর লাখ ৩৫রোম্না মসিগা কান্নবা ফংখ্রে‍। স্কীম অসিগী মখাদা, মহারাস্ত্রদসু এসোসিএৎ লাখ মঙাদা লোনশিং সেংসন তৌখ্রে‍। ঙসিমকসু, মরূপ লাখ অমা হেনবগী বেঙ্ক একাউন্তশিংদা শেনফমশিং অসি হকথেংননা দিপোজিৎ তৌরি‍। মসি মতম কয়াগী মমাঙদগী তৌরম্বা য়ারবনি‍। অদুবু শরক শিবা তাঞ্জা অমদা, দবল ইঞ্জিন লৈঙাক লৈতবনা মরম ওইরগা থবক খুদিংদা খুরৌ থাংখি‍। মসিগী মহৈ অমা ওইনা, হায়রিবা বিনিফিসরী পুম্নমক অসিনা অৱাবা খাঙদুনা লাকখি‍। মসি অমুক হন্না থোকহন্দনবা হোৎনবা হায়বসি দিল্লীদগী মহারাস্ত্র অমদি মুম্বাই ফাওবদা লৈরিবা মীপুম খুদিংমক্না হোৎনফম থোকপনি অমদি হেন্না ফবা কোওর্দিনেতেদ ওইবা সিস্তেম অমা লৈহনগদবনি‍।

মরূপশিং,

স্বানিধী য়োজনা অসি লোন পীনবা স্কীম অমখক্তা নত্তনা ঐখোয়গী মরূপ স্ত্রীৎ ভেন্দরশিংগী শেন্মিৎলোনগী মতিক হেনগৎহন্নবগী কেম্পেন অমসুনি হায়বসি ঐখোয়গী পুক্নিংদা থমগদবনি‍। স্বানিধী হায়রিবসি মশানা মশাবু ইকায়খুম্নজবদুনি‍। স্বানিধী বিনিফিসরীশিংবু দিজিতেল ত্রাঞ্জেক্সনগী মরমদা তাকপি তম্বিনবগীদমক মুম্বাইদা কেম্প ৩২৫ পাঙথোকখ্রে হায়না ঐঙোন্দা পাউদম্লকই‍। মসিগী মহৈ ওইনা, ঐখোয়গী স্ত্রীৎ ভেন্দর লিশিং কয়ানা দিজিতেল ত্রাঞ্জেক্সন শীজিন্নবা হৌরে‍। লৈবাক শিনবদা লৈরিবা স্বানিধী য়োজনাগী বিনিফিসরীশিং অসিনা তেনখ্রবা মতমসিদা লুপা করোর ৫০,০০০রোমগী ওইগদবা দিজিতেল ত্রাঞ্জেক্সন তৌখ্রে হায়বসি তাবদা মীওই কয়া অমদি ঙক্নগনি‍। ঐখোয়না লাইরিক হৈতবনি খন্দুনা, ইকায়বা পীবিরিবা মখোয়না, ঙসি ঐগী মাঙদা লেঙশিনবিরিবা মরূপশিং অসিনা মখোয়গী মোবাইল ফোনশিংগী খুত্থাঙদা লুপা করোর ৫০,০০০গী ওনলাইন ত্রাঞ্জেক্সন তৌখ্রে‍। হায়রিবা ফীভম অমদি অহোংবা অসি স্ত্রীৎ ভেন্দরশিংনা দিজিতেল পেমেন্ত শীজিন্নবদা মায় পাক্কদ্রা হায়না ৱাহং হংলম্বা, ফনা খনবা ঙমদবশিংগী মফমপা অচৌবা পাউখুম অমনি‍। দিজিতেল ইন্দিয়া মায় পাকপসি মীপুম খুদিংমক্না হোৎনমিন্নরবদি ওইথোক্লোইদবা করিসু লৈতে হায়বগী খুদম অমনি‍। ‘সবকা প্রয়াস’ (পুম্নমক্না হোৎনমিন্নবা) হায়রিবা ৱাখল্লোন অসিগা লোয়ননা, ঐখোয়না মুম্বাইবু চাওখৎপগী অনৌবা পন্দোল য়ৌনা পুদুনা চৎকনি‍। ঙসি ঐগী স্ত্রীৎ ভেন্দর ইচিল ইনাওশিংগী মফমদা ঐগা লোয়ননা চৎমিন্নসি হায়জনিংই‍। অদোম্না খোঙথাঙ ১০ থাংবা মতমদা ঐনা অদোমগীদমক খোঙথাঙ ১১ থাংজগে‍। ঐনা ৱাফম অসি ফোঙদোক্লিবসিগী মরমদি মমাঙদদি ঐখোয়গী স্ত্রীৎ ভেন্দর ইচিল ইনাওশিংনা শেন্দোয় চাবা মীশিংগী মফমদা শেন্দোয় চাউনা থীদুনা শেল পুরম্বদুননি‍। কনাগুম্বা মীওই অমনা নোংমখক্কী বিজিনসে অমা তৌনবগীদমক লুপা লিশিং অমা মথৌ তারবদি, শেন্দোয় চাবদুনা মাঙজৌননা লুপা ১০০ ককহৌরগা মঙোন্দা লুপা ৯০০খক পীরক্কনি‍। অদুগা করিগুম্বা মহাক্না নুমিদাংৱাইরম ফাওবা শেলদু শিংদোরকপা ঙমদ্রবদি, মহাক মথংগী নুমিত্তা শেল পুবা ফংলোই‍। করিগুম্বা নুমিৎ অমদা মহাক্কী পোৎশিং য়োনবা ঙমদদুনা লুপা লিশিং অমদু থিদোকপা ঙমদ্রবদি, মঙোন্দা শেন্দোয়গী অহেনবা পোৎলুম অমসু পুগদৌরিবনি‍। মহাক্কী অঙাংশিং নুমিদাংদা চরা হেন্দুনা তুমগদৌরিবনি‍। হায়রিবা খুদোংথিবা পুম্নমকসিদগী মখোয়বু ঙাকথোক্নবগীদমক স্বানিধী য়োজনা হৌদোক্লিবনি‍।

অদুগা মরূপশিং,

অদোম্না দিজিতেল ত্রাঞ্জেক্সন হেন্না শীজিন্নবা তাই‍। অদোম্না পোৎশিং য়াম্না লৈবা চৎপা মতমদা, মদুগীদমক দিজিতেল পেমেন্ত তৌবিয়ু‍। অদোম্না অদোমদগী পোৎ লৈরিবশিংগী মফমদসু দিজিতেল পেমেন্ত তৌনবগীদমক হায়বিয়ু‍। করিগুম্বা অদোম্না লেপ্তনা অসুম্না তৌরগদি, অদোমগী মফমদা শেন্দোয় পৈশা অমত্তা তিংলরোই‍। অদোমগী অঙাংশিংগী মহৈ মশিং অমদি তুংগীদমক অদোম্না শেল কয়া য়াম্না তুংশিঞ্জবা ঙমগনি হায়বদু অদোম খনবা ঙমবরা য়েংবিয়ু‍। মরম অসিননি মরূপশিং, ঐনা অদোমগা লোয়ননা লেপ্লি, অদোম্না খোঙথাঙ ১০ থাংবদা ঐনা অদোমগীদমক খোঙথাঙ ১১ থাংজগে হায়রিবা‍। মসি ঐগী ৱাশক্নি‍। মরূপশিং, ঙসি ঐনা মুম্বাইগী লৈমায়দা অদোমগী তরং তরংবা তুংলমচৎ অমগীদমক ৱাশক অসি পুদুনা লাক্লি‍। অদুগা হায়রিবা মীয়াম অসিগী থৌরাং অমদি হোৎনবা কনবসিনা, লৈবাক অসিনা অনৌবা পন্দোল লোম্বা ঙমগদৌরিবনি‍। হায়রিবা থাজবা অসিগা লোয়ননা ঐনা ঙসি অমুক্কা হন্না অদোমগী মফমদা লাকচরিবনি‍। ঐনা চাওখৎ থৌরাংগী থবকশিং অসিগীদমক বিনিফিসরী পুম্নমক, মুম্বাইকার পুম্নমক, মহারাস্ত্র অমদি মুম্বাই পুম্বগী মীওইশিংগী মফমদা নুংঙাইবা ফোঙদোকচরি‍। মুম্বাই লৈবাকসিগী ময়োলনি‍। সিন্দে জী অমদি দেবেন্দ্র জী অনিনা পুন্না অদোমগী মঙলানশিং মঙফাওনহনগনি হায়না ঐনা চপ চানা থাজবা থম্লি‍।

ঐগা লোয়ননা লাউবিয়ু:

ভারত ইমানা – য়াইফরে!

ভারত ইমানা – য়াইফরে!

হন্না হন্না থাগৎচরি!

দিসক্লেমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি‍। অশেংবা ৱারোলদি হিন্দীদা পীখিবনি‍।

***