ભારતના રાષ્ટ્રપતિ શ્રીમતી દ્રૌપદી મુર્મુએ આજે (14 ડિસેમ્બર, 2022) રાષ્ટ્રીય ઉર્જા સંરક્ષણ દિવસ નિમિત્તે નવી દિલ્હીમાં રાષ્ટ્રીય ઉર્જા સંરક્ષણ પુરસ્કારો, રાષ્ટ્રીય ઉર્જા કાર્યક્ષમતા ઈનોવેશન એવોર્ડ્સ અને રાષ્ટ્રીય ચિત્ર સ્પર્ધાના ઈનામો અર્પણ કર્યા. તેમણે આ પ્રસંગે 'EV-યાત્રા પોર્ટલ' પણ લોન્ચ કર્યું. બ્યુરો ઓફ એનર્જી એફિશિયન્સી દ્વારા નજીકના સાર્વજનિક EV ચાર્જર સુધી વાહનમાં નેવિગેશનની સુવિધા આપવા માટે ‘EV-યાત્રા પોર્ટલ’ વિકસાવવામાં આવ્યું છે.

સભાને સંબોધતા રાષ્ટ્રપતિએ જણાવ્યું હતું કે ભાવિ પેઢીઓ પ્રદૂષણ મુક્ત વાતાવરણમાં શ્વાસ લે, સારી પ્રગતિ કરે અને સ્વસ્થ જીવન જીવે તે સુનિશ્ચિત કરવું એ આપણા સૌની સર્વોચ્ચ પ્રાથમિકતા છે. સ્વચ્છ હવામાં શ્વાસ લેવો એ મૂળભૂત માનવ અધિકાર છે. પર્યાવરણનું રક્ષણ કરીને આપણે ઘણા માનવ અધિકારોનું રક્ષણ કરી શકીએ છીએ.

રાષ્ટ્રપતિએ કહ્યું કે આબોહવા પરિવર્તન અને ગ્લોબલ વોર્મિંગના પડકારોનો સામનો કરતી વખતે ઉર્જા સંરક્ષણ વૈશ્વિક તેમજ રાષ્ટ્રીય પ્રાથમિકતા છે. ભારતનું માથાદીઠ કાર્બન ઉત્સર્જન અને ગ્રીનહાઉસ વાયુઓનું ઉત્સર્જન વિશ્વની સરેરાશના એક તૃતીયાંશ કરતાં ઓછું હોવા છતાં, ભારત એક જવાબદાર દેશ તરીકે પર્યાવરણ સંરક્ષણમાં નોંધપાત્ર યોગદાન આપી રહ્યું છે.

રાષ્ટ્રપતિએ કહ્યું કે, COP-26માં ભારતે ‘લાઇફસ્ટાઇલ ફોર એન્વાયરમેન્ટ’ એટલે કે લાઇફનો સંદેશ આપ્યો હતો અને વિશ્વ સમુદાયને પર્યાવરણને અનુકૂળ જીવનશૈલી અપનાવવા વિનંતી કરી હતી. ભારતીય સંસ્કૃતિ અને પરંપરામાં, આપણી જીવનશૈલી હંમેશા LiFE ના સંદેશ સાથે સુસંગત રહી છે. કુદરતનો આદર કરવો, કુદરતી સંસાધનોનો બગાડ ન કરવો અને કુદરતી સંપત્તિને વધારવાના પગલાં લેવા એ આવી જીવનશૈલીનો અભિન્ન ભાગ છે. તેમણે કહ્યું કે ભારત સમગ્ર વિશ્વ સમુદાયને આવી જીવનશૈલી અપનાવવા તરફ લઈ જવાના પ્રયાસો કરી રહ્યું છે.

G20ના ભારતના પ્રેસિડન્સીનો ઉલ્લેખ કરતા રાષ્ટ્રપતિએ કહ્યું કે G20 દેશો વિશ્વના કુલ GDPમાં 85 ટકા અને આંતરરાષ્ટ્રીય વેપારમાં 75 ટકા યોગદાન આપે છે. આ ઉપરાંત, વિશ્વની 60 ટકા વસ્તી પણ જી20 દેશોમાં રહે છે. તેમણે કહ્યું કે ભારતે તેના પ્રમુખપદ દરમિયાન 'વસુધૈવ કુટુંબકમ'ના આદર્શ અનુસાર 'એક પૃથ્વી, એક પરિવાર, એક ભવિષ્ય'ની થીમ અપનાવી છે અને અમે તેનો વિશ્વ મંચ પર પ્રચાર પણ કરી રહ્યા છીએ.

રાષ્ટ્રપતિએ તમામ એવોર્ડ વિજેતાઓની, ખાસ કરીને બાળકોની પ્રશંસા કરી હતી. તેમણે રાષ્ટ્રીય ઉર્જા કાર્યક્ષમતા ઇનોવેશન એવોર્ડના વિજેતાઓને તેમની નવીન વિચારસરણી અને કાર્યપદ્ધતિ માટે બિરદાવી હતી. તેમણે કહ્યું કે તેમની નવીનતાઓનો વ્યાપકપણે ઉપયોગ થવો જોઈએ, જેથી વધુને વધુ લોકો પ્રેરણા મેળવી શકે અને પર્યાવરણીય સંરક્ષણ માટે નવી પદ્ધતિઓ વિકસાવી શકે. તેમણે સૌને એવો સંકલ્પ લેવા વિનંતી કરી કે આપણે જે કંઈપણ કરીએ તે હંમેશા પ્રકૃતિની તરફેણમાં રહેશે, ક્યારેય પ્રકૃતિની વિરુદ્ધ નહીં. તેમણે કહ્યું કે પ્રકૃતિ અને વિકાસ વચ્ચે સંતુલન જાળવવામાં માનવ કલ્યાણ રહેલું છે.

રાષ્ટ્રપતિના સંબોધન માટે કૃપા કરીને અહીં ક્લિક કરો -

YP/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com