جی-20 مالیات اور مرکزی بینکوں کے سربراہان (ایف سی بی ڈی) کی پہلی میٹنگ 13 تا 15 دسمبر 2022 کے دوران بنگلورو میں ہونے والی ہے۔ یہ میٹنگ، جو بھارت کی جی20 صدارت کے تحت فائنانس ٹریک ایجنڈا پر بات چیت کا آغاز کرے گی، اس کی میزبانی وزارت خزانہ اور ریزرو بینک آف انڈیا مشترکہ طور پر کریں گے۔

جی-20 فائنانس ٹریک، جس کی قیادت جی 20 ممالک کے وزرائے خزانہ اور مرکزی بینک کے گورنرز کرتے ہیں، اقتصادی اور مالیاتی امور پر توجہ مرکوز کرتے ہیں۔ یہ عالمی اقتصادی گفتگو اور پالیسی کوآرڈینیشن کے لیے ایک موثر فورم فراہم کرتا ہے۔ 23 تا 25 فروری 2023 کے دوران بنگلورو میں وزرائے خزانہ اور مرکزی بینک کے گورنروں کی پہلی میٹنگ ہوگی۔

وزیر اعظم نریندر مودی نے بالی جی 20 چوٹی کانفرنس میں اپنے خطاب میں کہا کہ آج ضرورت اس بات کی ہے کہ ترقی کے فوائد ہمہ گیر اور سبھی کے لئے ہوں۔ وزارت خزانہ نے اس خیال کو جی 20 فائنانس ٹریک ایجنڈا میں شامل کیا ہے۔ اس نے ہمیں ایک وژن بھی دیا ہے کہ بھارت اس بات کو یقینی بنانے کی کوشش کرے گا کہ جی 20 ایک عالمی ‘‘کلیدی محرک’’ کے طور پر کام کرے تاکہ نئے خیالات کا تصور کیا جا سکے اور اگلے ایک سال میں اجتماعی کارروائی کو تیز کیا جا سکے۔

جی-20 مالیات اور مرکزی بینک کے نائبین کی آئندہ میٹنگ کی مشترکہ صدارت اقتصادی امور کے محکمے کے سکریٹری جناب اجے سیٹھ اور ریزرو بینک آف انڈیا کے ڈپٹی گورنر ڈاکٹر مائیکل ڈی پاترا کریں گے۔ جی 20 کے رکن ممالک اور کئی دوسرے ممالک کے ان کے ہم منصب  اور ہندوستان کی طرف سے مدعو بین الاقوامی تنظیمیں دو روزہ اجلاس میں شرکت کریں گی۔

جی-20 فائنانس ٹریک عالمی اقتصادی نقطہ نظر، بین الاقوامی مالیاتی ڈھانچے، بنیادی ڈھانچے کی ترقی اور فنانسنگ، پائیدار مالیات، عالمی صحت، بین الاقوامی ٹیکسیشن اور مالیاتی شعبے کے مسائل بشمول مالیاتی شمولیت کو شامل کرتے ہوئے عالمی معیشت کے لیے مطابقت کے اہم مسائل پر تبادلہ خیال کرتا ہے۔

ہندوستان کی جی 20 صدارت کے تحت بنگلورو میٹنگ میں بات چیت فائنانس ٹریک کے ایجنڈے پر مرکوز ہوگی۔ اس میں 21 ویں صدی کے مشترکہ عالمی چیلنجوں سے نمٹنے کے لیے بین الاقوامی مالیاتی اداروں کو نئے سرے سے ترتیب دینا، کل کے شہروں کی مالی اعانت، عالمی قرضوں کی کمزوریوں کا انتظام، مالی شمولیت اور پیداواری فوائد کو آگے بڑھانا، موسمیاتی کارروائی اور پائیدار ترقیاتی مقاصد کے لیے فنانسنگ، غیر حمایت یافتہ کرپٹو اثاثوں کے لیے عالمی سطح پر مربوط نقطہ نظر اور بین الاقوامی ٹیکس ایجنڈے کو آگے بڑھانا اہم امور ہیں۔

اجلاس کے موقع پر ‘21ویں صدی کے مشترکہ عالمی چیلنجز سے نمٹنے کے لیے کثیر جہتی ترقیاتی بینکوں کو مضبوط بنانے’ پر ایک پینل مباحثہ کا انعقاد کیا جائے گا۔ ‘گرین فنانسنگ میں مرکزی بینکوں کا کردار’ کے موضوع پر ایک سیمینار بھی منعقد کیا جائے گا۔

ہندوستان کی جی 20 کی صدارت کا موضوع ‘‘ایک کرہ ارض، ایک کنبہ، ایک مستقبل’’ جی-20 فنانس ٹریک کے مباحثوں کی رہنمائی کرے گا۔ فنانس ٹریک کی تقریباً 40 میٹنگیں بھارت میں کئی مقامات پر ہوں گی، جن میں جی 20 کے وزرائے خزانہ اور مرکزی بینک کے گورنرز کی میٹنگیں شامل ہیں۔ جی 20 فنانس ٹریک میں ہونے والی بات چیت بالآخر جی20 رہنماؤں کے اعلامیے میں ظاہر ہوگی۔

ہندوستان نے متعدد چیلنجوں کے وقت جی 20 کی صدارت سنبھالی ہے، جس میں کووڈ-19 وبائی امراض کے داغ، تیز جغرافیائی سیاسی تناؤ، خوراک اور توانائی کے تحفظ کے بڑھتے ہوئے خدشات، قرضوں کی بڑھتی ہوئی پریشانی، مہنگائی کے دباؤ اور مالیاتی سختی شامل ہیں۔ جی 20 کا ایک کلیدی کردار ایسے چیلنجوں سے نمٹنے میں رہنمائی فراہم کرنا ہے۔

بھارت کی جی20 صدارت کے دوران سب سے زیادہ ضرورت مند ممالک کی مدد کرنا اور ترقی پذیر ممالک کے خدشات اور خواہشات کی عکاسی کرنا جی 20 کی کوششوں میں سب سے آگے ہوگا۔ وزارت خزانہ اور ریزرو بینک آف انڈیا جی 20 فنانس ٹریک ایجنڈا کو ایک جامع انداز میں آگے بڑھائیں گے جس کا مقصد آج کی عالمی اقتصادی ضروریات کو پورا کرنے کے ساتھ ساتھ ایک بہتر کل کے لیے تیاری کرنا ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ش ح۔ م ع۔ع ن

 (U: 13638)