নমস্কার!

নহারোলশিংদা থবকী পীনবা ঙসি গোৱা সরকারনা মরু ওইবা খোংথাং অমা পায়খৎলে। গোৱা সরকারগী তোঙানবা বিভাগশিংদা থবক চঙনবগীদমক্তা ঙসি মশিং য়াম্লবা নহারোলশিংগী মফমদা থবক খনবগী চিথী খুৎশিন্নরি। থবক খনবগী চিথী ফংলবা নহারোল কয়া অমসুং মখোয়গী ইমুং-মনুংশিংবু ঐহাক্না থাগৎচরি। লাক্কদৌরিবা মথংগী মতমশিংদা পুলিস য়াওনা অতোপ্পা বিভাগশিংদসু থবক কয়া পীরগনি হায়না ঐহাক্কী ইফমদা পাউদম্লে। মসিদগী গোৱা পুলিসকী মপাঙ্গল হেল্লগনি অমসুং মীয়াম, মরু ওইনা লমকোয়বশিংবু ঙাক শেনবগী থৌওংদা অহেনবা খুদোংচাবা কয়া লৈরগনি।

মরূপশিং,

লৈবাক্কী তোঙানবা রাজ্যশিংদা মমাংগী চয়োল খরদগী রোজগার মেলা পাংথোক্তুনা লাক্লি। কেন্দ্র সরকারনসু রোজগার মেলাগী মতেংদগী ভারত সরকারদা নহারোল লিশিং কয়াবু থা খুদিংগী থবক হাপ্লি। বি.জে.পি. অমসুং দবল ইঞ্জিন সরকার লৈবা রাজ্য খুদিংনা মশাগী থাক্তা মসিগুম্বা রোজগার মেলাশিং শীন-লাঙলিবসিদা ঐহাক্না য়াম্না নুংঙাইবা ফাওই।

মরূপশিং,

কেন্দ্র সরকারনা মমাংগী চহি ৮সিদা গোৱাগী চাউখৎ-থৌরাংগীদমক্তা লুপা করোর লিশিং কয়া থাদদুনা লাক্লি। চাউরাক্না লুপা করোর ৩০০০ চঙনা মোপাদা শারিবা অনৌবা এয়রপোর্তসু য়াম্না থুনা শঙ্গারগনি। এয়রপোর্ত অসি শাবগা মরী লৈননা গোৱাগী মীওই লিশিং কয়ানা থবক ফংনখি। মতৌ অসুম্না, গোৱাদা ঙসি পায়খৎলিবা কন্নেক্তিবিতী প্রোজেক্ত, ইনফ্রাস্ত্রকচরগী প্রোজেক্তশিং, মসিদগীসু নহারোলশিংদা থবক্কী খুদোংচাবা কয়া পীরি। স্বয়ম্পুর্না গোৱাগী পান্দমদি পুন্সিদা তঙাই ফদবা খুদোংচাবশিং গোৱাগীদমক্তা ফগৎহনবা অমসুং রাজ্যসিগী ইনফ্রাস্ত্রকচরবুসু হেন্না ফগৎহনবনি। গোৱা তুরিজম মাস্তর প্লান অমসুং পোলিসীগী মতেংদগী রাজ্য সরকারনা গোৱাগী চাউখৎ থৌরাংগী অনৌবা লম্বী অমা শেম্লে। মসিদগী তুরিজম সেক্তরদা ইনভেস্তমেন্ত লাকপা অমসুং থবক মশিং য়াম্না পীবা ঙম্বগী ওইথোকপা কয়া হেনগৎলে।

মরূপশিং,

গোৱাগী খুঙ্গংশিংগী শেন্মিৎলোনগী ফিভম ফগৎহন্নবা অমসুং নেচরেল ফার্মিংদা থবক্কী খুদোংচাবা হেন্না লৈহন্নবা খোঙথাংশিং পায়খৎপা হৌখ্রে। ফুদ প্রোসেসিং তৌরিবা, ফৌ, য়ুবী, জুত অমসুং মসালা পুথোক্লিবা লৌমীশিংবু সেল্ফ হেল্প গ্রুপশিংগা মরী লৈনহল্লে। মসিগুম্বা খোঙথাংশিংনা গোৱাদা থবক্কী অনৌবা খুদোংচাবা কয়া লৈহল্লে।

মরূপশিং,

ঙসি থবক খনবগী চিথী ফংলিবা নহারোল খুদিংদা ঐহাক্না অদোমগী পুন্সিগী খ্বাইদগী মরু ওইবা চহি ২৫গী মতম হৌরগনি হায়জনীংই। গোৱাগী চাউখৎ থৌরাংগা লোয়ননা ইং ২০৪৭কী অনৌবা ভারতকী পান্দম অমা অদোমগী মাঙদা লৈরবনি। অদোম্না গোৱাগী চাউখৎ-থৌরাংগীদমক্তা থবক তৌগদবনি, লোয়ননা লৈবাক্কী চাউখৎ থৌরাংগীসু থবক তৌগদবনি। অদোম পুম্নমক্না ইশাগী থৌদাং থম্মোই শেংনা পাংথোক্কনি অমসুং কর্তব্যগী লম্বীদা চৎকনি হায়না ঐহাক্না অদোমগী মফমদা থাজবা থম্লি।

ঐহাক্না অদোম্বু অমুক্কা হন্না থাগৎচরি।

*****