কেন্দ্ৰীয় গৃহমন্ত্ৰী অমিত শ্বাহে আজি নতুন দিল্লীত অনুষ্ঠিত তৃতীয় সংস্কৰণৰ ‘ন’ মানী ফৰ টেৰ’ৰ’ শীৰ্ষক মন্ত্ৰী পৰ্যায়ৰ সন্মিলনত ‘সন্ত্ৰাসবাদীক বিত্তীয় সাহায্য আৰু সন্ত্ৰাসবাদৰ বিশ্বব্যাপী প্ৰৱণতা’ বিষয়ক প্ৰথমখন অধিৱেশনৰ অধ্যক্ষতা কৰে। উদ্বোধনী ভাষণত কেন্দ্ৰীয় গৃহমন্ত্ৰীয়ে কয় যে সন্ত্ৰাসবাদ নিঃসন্দেহে বিশ্বশান্তি আৰু নিৰাপত্তাৰ বাবে আটাইতকৈ গুৰুতৰ ভাবুকি, কিন্তু সন্ত্ৰাসবাদৰ বিত্তীয় যোগান সন্ত্ৰাসবাদতকৈ অধিক বিপদজনক, কিয়নো সন্ত্ৰাসবাদৰ 'উপায় আৰু পদ্ধতি' এনে ধৰণৰ পুঁজিৰ পৰা প্ৰতিপালন কৰা হয়। তদুপৰি, সন্ত্ৰাসবাদৰ বিত্তীয় যোগানৰ ফলত বিশ্বৰ দেশসমূহৰ অৰ্থনীতি দুৰ্বল হৈ পৰিছে।

শ্ৰী অমিত শ্বাহে কয় যে ভাৰতে সকলো ধৰণৰ সন্ত্ৰাসবাদক গৰিহণা দিয়ে আৰু আমি বিশ্বাস কৰোঁ যে কোনো কাৰণতে নিৰীহ লোকৰ জীৱন কাঢ়ি লোৱাৰ দৰে কাৰ্য্যক ন্যায়সঙ্গত বুলি বিবেচনা কৰিব নোৱাৰি। সমগ্ৰ বিশ্বতে সন্ত্ৰাসবাদী আক্ৰমণৰ বলি হোৱা সকলৰ প্ৰতি সহানুভূতি প্ৰকাশ কৰি তেওঁ কয় যে আমি কেতিয়াও এই অপশক্তিৰ সৈতে আপোচ কৰা উচিত নহয়।

কেন্দ্ৰীয় গৃহমন্ত্ৰীয়ে কয় যে সীমান্তৰ সিপাৰৰ পৰা পৃষ্ঠপোষকতা কৰা ভাৰত কেইবা দশক ধৰি সন্ত্ৰাসবাদৰ বলি হৈ আহিছে। তেওঁ কয় যে ভাৰতীয় নিৰাপত্তা বাহিনী আৰু সাধাৰণ নাগৰিকে স্থায়ী আৰু সমন্বিতভাৱে সংঘটিত হোৱা অত্যন্ত ভয়াৱহ সন্ত্ৰাসবাদী হিংসাৰ ঘটনাৰ সৈতে মোকাবিলা কৰিবলগীয়া হৈছে। শ্ৰী শ্বাহে কয় যে আন্তঃৰাষ্ট্ৰীয় সমাজৰ এক সামূহিক দৃষ্টিভংগী আছে যে সন্ত্ৰাসবাদক সকলো ৰূপতে নিন্দা কৰিব লাগিব, কিন্তু, প্ৰযুক্তিগত বিপ্লৱৰ বাবে সন্ত্ৰাসবাদৰ ৰূপ আৰু প্ৰকাশ অবিৰতভাৱে বিকশিত হৈ আছে। তেওঁ কয় যে আজি সন্ত্ৰাসবাদী আৰু সন্ত্ৰাসবাদী গোটসমূহে আধুনিক অস্ত্ৰ আৰু তথ্য প্ৰযুক্তিৰ সূক্ষ্মতা, আৰু চাইবাৰ আৰু বিত্তীয় স্থানৰ গতিশীলতা অতি ভালদৰে বুজি পায়, আৰু সেইবোৰ ব্যৱহাৰ কৰে। তেওঁ কয় যে "ডাইনামাইটৰ পৰা মেটাভাৰ্ছলৈ" আৰু "এ কে-৪৭ৰ পৰা ভাৰ্চুৱেল এচেটছলৈ" সন্ত্ৰাসবাদৰ এই ৰূপান্তৰ নিশ্চিতভাৱে বিশ্বৰ দেশসমূহৰ বাবে চিন্তাৰ বিষয়, আৰু, আমি সকলোৱে একেলগে কাম কৰি ইয়াৰ বিৰুদ্ধে এক উমৈহতীয়া কৌশল প্ৰস্তুত কৰিব লাগিব। শ্ৰী শ্বাহে লগতে কয় যে আমি এইটোও স্বীকাৰ কৰোঁ যে সন্ত্ৰাসবাদৰ ভাবুকি কোনো ধৰ্ম, জাতি, বা গোটৰ সৈতে জড়িত হ’ব নোৱাৰে আৰু হ’বও নালাগে।

শ্ৰী অমিত শ্বাহে কয় যে সন্ত্ৰাসবাদৰ মোকাবিলা কৰিবলৈ আমি নিৰাপত্তাৰ স্থাপত্যক সুদৃঢ় কৰাৰ লগতে আইনী আৰু বিত্তীয় ব্যৱস্থাও সুদৃঢ় কৰাৰ ক্ষেত্ৰত যথেষ্ট অগ্ৰগতি লাভ কৰিছো। ইয়াৰ পিছতো সন্ত্ৰাসবাদীয়ে হিংসা সংঘটিত কৰা, যুৱক-যুৱতীসকলক উগ্ৰপন্থী কৰি তোলা আৰু আৰ্থিক সম্পদ সংগ্ৰহৰ বাবে অহৰহ নতুন নতুন উপায় বিচাৰিছে। সন্ত্ৰাসবাদীয়ে মৌলবাদী সমল বিয়পাবলৈ আৰু তেওঁলোকৰ পৰিচয় লুকুৱাবলৈ ডাৰ্ক নেট ব্যৱহাৰ কৰি আছে; ক্ৰিপ্টোকাৰেন্সীৰ দৰে ভাৰ্চুৱেল সম্পদৰ ব্যৱহাৰ বৃদ্ধি পাইছে, আমি এই ডাৰ্ক নেট কাৰ্যকলাপৰ আৰ্হিবোৰ বুজিব লাগিব আৰু সেইবোৰৰ সমাধান বিচাৰিব লাগিব।

কেন্দ্ৰীয় গৃহমন্ত্ৰীয়ে কয় যে দুৰ্ভাগ্যজনকভাৱে এনে কিছুমান দেশ আছে যিয়ে সন্ত্ৰাসবাদৰ বিৰুদ্ধে যুঁজিবলৈ আমাৰ সামূহিক সংকল্পক ভেঙুচালি কৰিব বিচাৰে, আনকি বাধা দিব বিচাৰে। তেওঁ কয় যে আমি দেখিছো যে কিছুমান দেশে সন্ত্ৰাসবাদীক সুৰক্ষা আৰু আশ্ৰয় দিয়ে, এজন সন্ত্ৰাসবাদীক সুৰক্ষা দিয়াটো সন্ত্ৰাসবাদক উদগনি যোগোৱাৰ সমতুল্য। তেওঁ কয় যে এনে দুষ্ট চক্ৰ যে কেতিয়াও নিজৰ উদ্দেশ্যত সফল নহয় সেয়া আমাৰ সামূহিক দায়িত্ব হ’ব। শ্ৰী শ্বাহে কয় যে আগষ্ট, ২০২১ৰ পিছত দক্ষিণ এছিয়া অঞ্চলৰ পৰিস্থিতি সলনি হৈছে আৰু শাসন ব্যৱস্থা পৰিৱৰ্তন আৰু আল কায়দা আৰু আইছিছৰ ক্ৰমবৰ্ধমান প্ৰভাৱ আঞ্চলিক নিৰাপত্তাৰ বাবে এক উল্লেখযোগ্য প্ৰত্যাহ্বান হিচাপে আত্মপ্ৰকাশ কৰিছে। তেওঁ কয় যে এই নতুন সমীকৰণসমূহে সন্ত্ৰাসবাদৰ বিত্তীয় সাহায্যৰ সমস্যাটো অধিক গুৰুতৰ কৰি তুলিছে। শ্ৰী শ্বাহে কয় যে তিনি দশকৰ আগতে এনে এটা শাসন ব্যৱস্থা পৰিৱৰ্তনৰ গুৰুতৰ পৰিণতি সমগ্ৰ বিশ্বই বহন কৰিবলগীয়া হৈছে, যাৰ ফল আমি সকলোৱে ৯/১১ৰ ভয়ানক আক্ৰমণত দেখিছো। তেওঁ কয় যে এই পটভূমিত দক্ষিণ এছিয়া অঞ্চলত যোৱা বছৰৰ পৰিৱৰ্তন আমাৰ সকলোৰে বাবে চিন্তাৰ বিষয়। তেওঁ লগতে কয় যে আল কায়দাৰ লগতে দক্ষিণ এছিয়াত লস্কৰ-ই-তৈবা আৰু জৈছ-ই-মহম্মদৰ দৰে সংগঠনে সন্ত্ৰাস বিয়পাবলৈ চেষ্টা অব্যাহত ৰাখিছে।

আমি কেতিয়াও সন্ত্ৰাসবাদীৰ সুৰক্ষিত আশ্ৰয় বা তেওঁলোকৰ সম্পদক উপেক্ষা কৰা উচিত নহয়; যিসকলে তেওঁলোকক পৃষ্ঠপোষকতা আৰু সমৰ্থন কৰে তেওঁলোকৰ দুমুখীয়া স্থিতি আমি উদঙাই দিব লাগিব।

শ্ৰী শ্বাহে কয় যে এই দিশত ভাৰতে সন্ত্ৰাসবাদ আৰু ইয়াৰ বিত্তীয় যোগানৰ বিৰুদ্ধে যুঁজ শক্তিশালী কৰিছে, বেআইনী কাৰ্যকলাপ প্ৰতিৰোধ আইন (ইউএপিএ) সংশোধনৰ জৰিয়তে, ৰাষ্ট্ৰীয় অনুসন্ধান সংস্থাক শক্তিশালী কৰিছে আৰু বিত্তীয় বুদ্ধিমত্তাক এক নতুন দিশ প্ৰদান কৰিছে। তেওঁ কয় যে আমাৰ নিৰন্তৰ প্ৰচেষ্টাৰ ফলস্বৰূপে ভাৰতত সন্ত্ৰাসবাদী ঘটনা সমূহ যথেষ্ট হ্ৰাস পাইছে, যাৰ ফলত সন্ত্ৰাসবাদৰ ফলত হোৱা অৰ্থনৈতিক লোকচানও যথেষ্ট হ্ৰাস পাইছে।

কেন্দ্ৰীয় গৃহমন্ত্ৰীগৰাকীয়ে কয় যে ভাৰতে বিশ্বাস কৰে যে সন্ত্ৰাসবাদৰ মোকাবিলা কৰাৰ বাবে আটাইতকৈ কাৰ্যকৰী ৰণনীতি হৈছে আন্তঃৰাষ্ট্ৰীয় সমন্বয় আৰু ৰাষ্ট্ৰসমূহৰ মাজত বাস্তৱ-সময় আৰু স্বচ্ছ সহযোগিতা। তেওঁ মত প্ৰকাশ কৰে যে সন্ত্ৰাসবাদৰ বিৰুদ্ধে যুঁজত প্ৰত্যৰ্পণ, গোচৰ, চোৰাংচোৱা আদান-প্ৰদান, ক্ষমতা নিৰ্মাণ আৰু "সন্ত্ৰাসবাদৰ বিত্তীয় যোগানৰ বিৰুদ্ধে যুঁজ দিয়া"ৰ দৰে ক্ষেত্ৰত দেশসমূহৰ মাজত সহযোগিতা গুৰুত্বপূৰ্ণ। শ্ৰী শ্বাহে কয় যে সন্ত্ৰাসবাদী আৰু সন্ত্ৰাসবাদী গোটসমূহে সহজে সীমাৰ ওপৰেৰে তেওঁলোকৰ সম্পদৰ সমন্বয় আৰু সংযুক্তি ৰখাৰ বাবে আমাৰ পাৰস্পৰিক সহযোগিতা আৰু অধিক গুৰুত্বপূৰ্ণ হৈ পৰিছে।

শ্ৰী অমিত শ্বাহে কয় যে নিচাজাতীয় সামগ্ৰীৰ অবৈধ ব্যৱসায়ৰ বৰ্ধিত প্ৰৱণতা আৰু নাৰ্কো-সন্ত্ৰাসৰ প্ৰত্যাহ্বানে সন্ত্ৰাসবাদীৰ বিত্তীয় যোগানক এক নতুন মাত্ৰা প্ৰদান কৰিছে। তেওঁ কয় যে ইয়াৰ পৰিপ্ৰেক্ষিতত সকলো ৰাষ্ট্ৰৰ মাজত ঘনিষ্ঠ সহযোগিতাৰ প্ৰয়োজন আছে। শ্ৰী শ্বাহে কয় যে ৰাষ্ট্ৰসংঘৰ দৰে বহুপাক্ষিক প্ৰতিষ্ঠান আৰু ফাইনেন্সিয়েল একছন টাস্ক ফৰ্চ(এফএটিএফ) দৰে মঞ্চৰ উপস্থিতি সন্ত্ৰাসবাদৰ বিত্তীয় যোগানৰ বিৰুদ্ধে যুঁজ দিয়াৰ ক্ষেত্ৰত আটাইতকৈ কাৰ্যকৰী। তেওঁ কয় যে এফ.এ.টি.এফ.-এ প্ৰতিৰোধ আৰু যুঁজ, মানি লণ্ডাৰিং আৰু সন্ত্ৰাসবাদীৰ বিত্তীয় যোগান ৰখাৰ বাবে বিশ্বব্যাপী মানদণ্ড নিৰ্ধাৰণ আৰু ৰূপায়ণত এক গুৰুত্বপূৰ্ণ ভূমিকা পালন কৰি আছে।

কেন্দ্ৰীয় গৃহমন্ত্ৰীয়ে কয় যে আমাৰ সন্মুখত ভাৰ্চুৱেল সম্পত্তিৰ ৰূপত এক নতুন প্ৰত্যাহ্বান আছে কাৰণ সন্ত্ৰাসবাদীয়ে বিত্তীয় লেনদেনৰ বাবে ভাৰ্চুৱেল সম্পত্তিৰ নতুন পদ্ধতি ব্যৱহাৰ কৰি আছে। তেওঁ কয় যে ভাৰ্চুৱেল এচেট চেনেল, পুঁজিৰ আন্তঃগাঁথনি আৰু ডাৰ্ক নেটৰ ব্যৱহাৰ দমন কৰিবলৈ আমি “শক্তিশালী আৰু দক্ষ কাৰ্য্যকৰী ব্যৱস্থা” গঢ়ি তোলাৰ দিশত সুসংহতভাৱে কাম কৰিব লাগিব। শ্ৰী শ্বাহে কয় যে ৰাষ্ট্ৰসংঘ, আই এম এফ, ইন্টাৰপল আৰু অন্যান্য অংশীদাৰ যেনে আইন প্ৰয়োগকাৰী সংস্থা, বিত্তীয় অনুসন্ধানকাৰী, আৰু বিভিন্ন দেশৰ নিয়ন্ত্ৰকসকলে এই ক্ষেত্ৰত অধিক ইতিবাচক প্ৰভাৱ পেলাব পাৰে। তেওঁ কয় যে আমি এই প্ৰত্যাহ্বানসমূহ গভীৰভাৱে বুজিব লাগিব আৰু সন্ত্ৰাসবাদৰ বিত্তীয় সাহায্যৰ নতুন কৌশলসমূহ ৰোধ কৰাৰ বাবে বিশ্বজুৰি প্ৰচেষ্টা চলাব লাগিব, যিদৰে নতুন দিল্লীত শেহতীয়াকৈ অনুষ্ঠিত হোৱা ইন্টাৰপল সাধাৰণ পৰিষদত কৰা হৈছিল।

শ্ৰী অমিত শ্বাহে কয় যে ভাৰতে চোৰাংচোৱা তথ্যৰ ভাগ-বতৰা, ফলপ্ৰসূ সীমা নিয়ন্ত্ৰণৰ বাবে সামৰ্থ্য বিকাশ, আধুনিক প্ৰযুক্তিৰ অপব্যৱহাৰ ৰোধ, অবৈধ বিত্তীয় প্ৰবাহ নিৰীক্ষণ আৰু প্ৰতিৰোধ, আৰু তদন্ত আৰু ন্যায়িক প্ৰক্ৰিয়াত সহযোগিতা কৰি সন্ত্ৰাসবাদৰ বিৰুদ্ধে যুঁজিবলৈ সকলো প্ৰচেষ্টাৰ প্ৰতি দায়বদ্ধ হৈ আছে। তেওঁ কয় যে "নো মানি ফৰ টেৰ'ৰ"ৰ লক্ষ্যত উপনীত হ'বলৈ হ'লে বিশ্ব সম্প্ৰদায়ে টেৰ'ৰ ফাইনেন্সিঙৰ "পদ্ধতি, মাধ্যম আৰু প্ৰণালী" ভালকৈ বুজিব লাগিব আৰু সেইবোৰক প্ৰতিহত কৰাৰ ক্ষেত্ৰত 'এক মন, এক পন্থা'ৰ নীতি গ্ৰহণ কৰিব লাগিব।

কেন্দ্ৰীয় গৃহমন্ত্ৰীয়ে কয় যে আমি আজি ভাৰতৰ প্ৰধানমন্ত্ৰী শ্ৰী নৰেন্দ্ৰ মোদীৰ ভাষণেৰে এই সন্মিলন আৰম্ভ কৰিছো আৰু এই দুদিনত সন্ত্ৰাসবাদীৰ বিত্তীয় যোগানৰ বিভিন্ন দিশৰ ওপৰত এক অৰ্থপূৰ্ণ আলোচনা হ'ব আৰু বৰ্তমান আৰু ভৱিষ্যতৰ প্ৰত্যাহ্বানসমূহৰ বাবে অৰ্থপূৰ্ণ সমাধানৰ বিষয়ে ধাৰণা কৰা হ'ব।

***

NW/AY/AK/AS/MS