পিপলস মজলিসকী ইকাই খুম্নরবা স্পীকর, মালদ্বীপকী হান্নগী রাস্ত্রপতি অমসুং ঐহাক্কী নুংশিরবা মরুপ য়োর এক্সিলেন্সী, শ্রী মোহমদ নশীদ, পিপলস মজলিসকী ইকাই খুম্নরবা মেম্বরশিং।

এক্সিলেন্সীস,
অখন্নবা মীথুংলেনশিং,

খুরুমজরি!

ঐহাক্না ভারত মচা বিলিয়ন ১.৩ অমসুং ঐহাক ইশাগী মহুৎ শিন্দুনা পুম্নমকপু খুরুমজরি। ইদ-উল-ফিতরগী শেংলবা কুহ্মৈগী হরাও তয়াম্বা হৌজিকসু থল্লি। থৌরম অসিদা ঐহাক্না মালদ্বীপকী মীয়ামদা থমোয় শেংনা য়াইফ-পাউজেল পীজরি।

ইকাই খুম্নরবা স্পীকর,

মালদ্বীপ অসি ঈথৎ ১০০০ হেনবগী লৈ পরেং অমনি। মসি ইন্দিয়ন ওসীন রিজনগী খক্তা নত্তনা মালেম পুম্বগী অতাংবা মনী অমনি। মাগী ঙমখৈ লৈত্রবা ফজবা অমসুং মহৌশাগী লনশিং অসিনা চহিচা কয়াদগী পুক্নিং চীংশিল্লিবা মফম অমা ওইদুনা লাকখি। লৈবাক অসিনা মহৌশাগী শক্তিগী মায়োক্না লেপ্পীবা হনবা লৈত্রবা মীওইবগী থৌনাগী ফজরবা খুদম অমনি। মালদ্বীপনা ললোন-ইতিক, মীয়াম অমসুং নাৎকী লেপ্পা লৈত্রবা ইচেল উবা ফংলি। অমসুং মালে, মসিগী ফজরবা কোনুং অসি ব্ল্যু ওসীনশিংদা তুরিস্তশিংনা লাক্নবা সুপ্নগী গেৎৱা খক্তা নত্তে। মসিনা তংদু লৈতাবা, শান্তি ওইবা অমসুং চাউখৎপা ইন্দিয়ন ওসীন রিজন ওইহনবদা মালেম পুম্বগী ওইনা থৌদাং লৌরি।

ইকাই খুম্নরবা স্পীকর,

মালদ্বীপ অমসুং মজলিসতা ঙসি নখোয়গা লোয়ননা মসিদা শরুক য়াজবা অসি ঐহাক্কীদমক য়াম্না নুংঙাইবা ৱাফম অমনি। মজলিসনা ইকাই খুম্নরবা শ্রী নশীদনা স্পীকর ওইনা মীখল মাইপাক্লবা মতুংদা অহানবা মীফমগীদমক পুন্না য়ান্নদুনা চেবাও পীবীরকপা অসি ঐহাক্কী লাইবক ফবনি। নখোয়গী মতৌ অসিনা ভারত মচা খুদিংমক্কী থমোয় পেলহল্লি অমসুং মখোয়গী ইকাই খুম্নবা হেনগৎহনখি। অমসুং ইকাই খুম্নরবা স্পীকর, মসিগীদমক ওগস্ত হাউস অসিগী ইকাই খুম্নরবা মেম্বরশিংবু ঐহাক্না ভারত পুম্বগী মহুৎ শিন্দুনা ঐহাক্না থমোয় শেংনা থাগৎপা ফোঙদোকচরি।

ইকাই খুম্নরবা স্পীকর,

মসি মালদ্বীপতা লাকপা ঐহাক্কী অনিশুবা খোঙচৎনি। অমসুং অমরোমদা মসি ঐহাক্না মজলিসকী পুৱারী ওইরবা প্রোসীদিংশিং উবা ফংজবা অনিরক শুবনি। মমাং নবেম্বরদা রাস্ত্রপতি সোলিহগী ইনওগ্যুরেসন সেরমনীদা য়াওবা ফংজখিবা ঐহাক্না য়াম্না নুংঙাইখি অমসুং য়াম্না লাইবক ফবনি। মীওই লিশিং কয়ানা তিনবা ওপন স্তেদিয়ম অমদা থৌরম অদু পালন তৌখি, মমিং লৈরবা অমসুং পুৱারী ওইরবা দেমোক্রেসীগী মাইপাকপা অসিগী য়ুম্ফম থাজবা, থৌনা অমসুং ফিরেপনা ওইখি। থৌরম অদু য়াম্না নুংঙাইবা এক্সপরিয়েন্স অমা ওইখি। মালদ্বীপকী অশেংবা দেমোক্রেসী শক্তি হকথেংননা উবা ফংখি। নুমিৎ অদুদা ঐহাক্না দেমোক্রেসীগীদমক মালদ্বীপকী মীচম মীয়াম্না কত্থোকপা অমসুং ফিরেপ লৌখিবা অমসুং স্পীকরগুম্বা লুচিংবশিংগীদমক মখোয়না ফাওবা মীনুংশি অমসুং ইকাই খুম্নবা অদু উবা ফংখি। অমসুং ঙসি ঐহাকনা মালদ্বীপকী দেমোক্রেসীবু লমজিংলিবা পুম্নমকপু ইকাই খুম্নবা উৎলি।

ইকাই খুম্নরবা স্পীকর,

হাউস অসি, মজলিস অসি শুপ্নগী চেক অমসুং সিমেন্তনা শাবা বিল্দিং অমা খক্তা নত্তে। ইচম চম্বা মীয়ামগী তিবফম নত্তে। মসি জাতিগী মীহুল হুল্লিবা দেমোক্রেসীগী ইনর্জী সেন্তর অমনি অমসুং মাগী থমোয়গী ইহুল অসি হাউসকী মেম্বর খুদিংমক্কী ৱাখল্লোন অমসুং খোঞ্জেলদা খোন্থাং য়ৈরি। নখোয়গী খোঙথাংশিংগী খুত্থাংদা মফম অসিদা মীয়ামগী মঙলানশিং অমসুং অনীংবা অপাম্বশিং থুংহনবা ঙম্লি। তোঙান-তোঙানবা আইদিওলোজীশিং অমসুং পার্তীশিংগী মেম্বরশিংনা পুনশিন্দুনা মখোয়গী অপুনবা থৌনা অদু লৈবাক অসিগী দেমোক্রেসী, চাউখৎ-থৌরাং অমসুং শান্তিগীদমক লোইনাইদ্রবা মাইপাকপশিং পুরক্লগনি।

চপ মান্নবা মওংদা থা খরগী মমাংদা মালদ্বীপকী মীয়াম্না মালেম পুম্বদা দেমোক্রেসীগী ফজরবা খুদম অমা পুন্না উৎখি। নখোয়গী খোঙচৎ অদু শীংনবনা থনখি। অদুবু মসলদ্বীপনা উৎখি, নখোয়না উৎখি মদুদি মীওইবনা অদুমক থোইগনি। মদু অচম্বা মাইপাকপা নত্তে। নখোয়গী মাইপাকপা অসিনা মালেম পুম্বদা দেমোক্রেসীগী মপাঙ্গলগী অচৌবা হৌরকফম ওইরি। অমসুং মালদ্বীপকী মাইপাক অসিগীদমক কনানা খ্বাইদগী হরাওগনি অমসুং খ্বাইদগী চাউথোকচবা পোক্কনি?

মসিগী পাউখুম ময়েক শেংই। মসি নখোয়গী খ্বাইদগী নক্নবা মরুপ অমসুং য়ুমলোন্নরিবা, অমসুং মালেমগী খ্বাইদগী চাউবা দেমোক্রেসী, ভারতনি। ঙসি থৌরম অসিদা ঐহাক্না হায়জনীংবদি ভারত অমসুং ভারত মচা পুম্নমক্না মালদ্বীপকী দেমোক্রেসী মপাঙ্গল কনখৎহন্নবগীদমক নখোয়গীদমক মতম চুপ্পদা লেপ্পি।

ইকাই খুম্নরবা স্পীকর,

ভারত্তসু ঐখোয়না হন্দক্তা মীওইবা জাতিগী পুৱারীদা খ্বাইদগী চাউবা দেমোক্রেতিক এক্সর্সাইজ পাঙথোকখি। ভারত মচা করোর ১৩০গীদমক মসি অচম্বা মীখল ওইবতা নত্তনা মসি দেমোক্রেসীগী নুংঙাইবা ফোঙদোকপা অমসুং মেগা ফেস্তিবেল অমা ওইখি। ইলিজিবল ভোত্তরগী শরুক অহুম থোকপগী অনিনা, হায়বদি মীওই মিলিয়ন ৬০০ হেনবনা ভোৎ থাদনবা থোরকখি। মখোয়না চাউখৎপা অমসুং তংদু লৈতানা লৈনবগীদমক অচৌবা মেন্দেৎ অমা পীখি।

ইকাই খুম্নরবা স্পীকর,

ঐহাক্কী সরকারগী মরু ওইবা মন্ত্র “সবকা সাথ, সবকা বিকাস অমসুং সবকা বিশ্বা অসি ভারত খক্তগী নত্তে। মসি ঐখোয়গী সরকারগী ফোরেন পোলিসী অমসুং এপ্রোচকী, মরু ওইনা ঐখোয়গী য়ুমলোন্নরিবাশিংগীদমক কোর্নরস্তোনসু ওইরি।

‘য়ুমলোন্নবা হান্না’ হায়বা অসি ঐখোয়গী মরু ওইবনি। অমসুং য়ুমলোন্নবা মালদ্বীপ অসি মরু ওইরি। মসিনা মরম ওইদুনা ঐহাক্না ঙসি নখোয়গী নরক্তা লেপ্পা ঙম্মি।

মমাং চহিগী দিসেম্বরদা ভারত অসি রাস্ত্রপতি সোলিহনা চৎখিবা অহানবা লৈবাক ওইখি। অমসুং হৌজিক মফম অসিদা মালদ্বীপকী নুংশিরবা চেবাওনা ঐহাকপু পুদুনা লাক্লি, মসিনা অনৌবা তর্ম অসিদা ঐহাক্কী অহানবা মপাল লৈবাক্তা চৎপা লমথুং ওইখি। অমসুং মীকুপ খরগী মমাংদা ঐহাক্না ফোরেনরশিংদা পীবা মালদ্বীপকী খ্বাইদগী ৱাংবা ইকাই খুম্নবা অদু রাস্ত্রপতি সোলিহনা ঐঙোন্দা পীবিখিবা অসি লাইবক ফবনি। ঐহাক্না ৱাহৈনা তৌবীমল খঙবা উৎপা ঙমদ্রে।

ইকাই খুম্নরবা স্পীকর,

ভারত অমসুং মালদ্বীপকী মরক্তা লৈনরিবা মরীশিং অসি পুৱারীদগী হেন্না লিরে। নীংশিংবা থোক্ত্রবা মতমদগী হৌনা হিগোক মচুগী ঈশিংনা ঐখোয়গী সমুদ্র তোর্বান্দা য়ৈদুনা লাকখি। পাক চাউরবা সমুদ্রগী ঈথকশিংনা ঐখোয়গী মীয়ামগী মরক্তা লৈনরিবা মরুপ ওইবগী মরীগী পাউজেল পুরিবা ওইনা শম্নহন্দুনা লাকখি। মখোয়না ঐখোয়গী নাৎ অমসুং সভ্যতা য়োখৎহনখি। মালদ্বীপ অমসুং ভারতকী মরক্তা, ঐহাক্কী পোক্নফম লমদম গুজরাত য়াওনা ললোন-ইতিক চাউনা চাউখৎখি। চহি ২৫০০গী মমাংদগী মালদ্বীপনা মালেমগী খ্বাইদগী অরিবা হীথাংফমশিংগী মরক্তা অমনি হায়না লৌনরিবা লোথালগী ললোন-ইতিক তৌনখি। মসিগী মতুংদা সুরতকুম্বা সহরশিংগা লোয়ননা মখা তানা ললোন ইতিক তৌখি। ভারতকী অঙাংশিংনা মালদ্বীপকী কাওরীশিং পাম্নৈ। ঈশৈ-নোংমাই, ঈশৈগী জন্ত্র, চৎনবী অসি ঐখোয়গী অপুনবা হেরিতেজকী খুদমশিংনি।

খুদম ওইনা দিবেহি লোল। ‘ৱীক’ অসি ভারত্তা ‘হফতা’ হায় অমসুং দিবেহিদসু হায়। চয়োলগী মমিংশিং য়েংবীয়ু। দিবেহিদা নোংমাইজিং অসি আদিতথা হায়বদি আদিত্য নত্ত্রগা সুর্য়গা মরী লৈনৈ। নীংথৌকাবা অসি হোমো কৌই সিদা ‘সোমা’ নত্তগা থাগা মরী লৈনৈ।

দিবেহিগী ‘ধুনিয়ে’ অসি ভারতকী ‘দুনিয়া’গা চপ মান্নৈ, মালেম হায়বনি। অমসুং মালদ্বীপকী ওইনা ‘দুনিয়া’ অসি পাম্নরবা মমিং অমসু ওইরি। অমসুং মসি মালেম হায়বগী ৱাফম খক্তা নত্তে। দিবেহিগী ৱাহৈশিং ‘সুভুরুগে’ অমসুং নারাকা অসি হিন্দীগী ‘স্বারগ’ অমসুং ‘নরক’কা ৱাহন্থোক মান্নৈ।

মান্নবশিংগী লিস্ত অসি য়াম্না শাংলনি। করিগুম্বা ঐহাক্না মখা তাদুনা লৈরবদি দিক্সনারী অমা থোরক্লগনি।

খোঙথাং খুদিংমক্তা ঐখোয়না নীংশিংগদবনি ঐখোয় অসি চপ মান্নবা লৈকোলগী লৈরাং ঙাক্তনি। মরম অসিনা মালদ্বীপকী কলচরেল হেরিতেজ ঙাকশেনবদা, মাগী অইবা লাইরিকশিং ঙাকশেনবদা অমসুং দিবেহিগী দিক্সনারী শেম্বদা নখোয়গা তেংবাং পীনবা অসি ঐখোয়গী ওইনসু য়াম্না মরু ওই। অমসুং মরম অসিনা ঐহাক্না ঙসি পুৱারী ওইরবা ফ্রাইদে মোস শেমগৎপদা ভারতনা তেংবাং পীগনি লাউথোকপা ফংজবদা য়াম্না নুংঙাইবা পোকই। মালদ্বীপ নত্তনা মফম অমত্তদা অসিগুম্বা কোরেল মোস লৈতে। চহি কয়াগী মমাংদা লৌশিং লৈবা মালদ্বীপ মচাশিংনা সমুদ্রগী লন শীজিন্নদুনা তোপ-তোপ্পা আর্কিতেকচর অসি শেমখি। মসিনা মখোয়না মহৌশাবা ইকাই খুম্নবা অমসুং ইংনা চিক্না লৈবা পাম্বগী খুদম ওইরি।

লাইবকথিবদি ঙসি পোলুসন্না মরম ওইদুনা হায়রিবা সমুদ্রগী লন অসি খুদোংথিনীংঙাই ওইরে। ফজরবা কোরেল মোস শেমগৎপা অসিনা মালেম পুম্বদা ঐখোয়গী অকোইবগী ফীভম ঙাকশেন্নবগী পাউজেল অমা পীরি।

ইকাই খুম্নরবা স্পীকর,

ভারতনা মালদ্বীপকী নীংতম্বা ফংনবা হোৎনবদা, দেমোক্রেসী, চাউখৎ খোঙচৎ অমসুং শান্তি লৈহনবদা মতেং পাংদুনা খুৎশম্ননা চৎমিন্নখি। ১৯৮৮গী থৌদোক নত্ত্রগা ২০০৪গী সুনামীগুম্বা মহৌশাগী খুদোংথিবা মায়োক্নবা নত্ত্রগা হন্দক্কী ঈশিং ফংদবগী সমস্যা ওইরবসু ঐখোয়না নখোয়গীদমক লেপখি অমসুং মতম চুপ্পদা অমদি খোঙথাং খুদিংদা নখোয়গী মতেং পাংখি।

অমসুং হৌজিক ঐখোয়গী লৈবাক অনিগী মপাঙ্গল কনবা মেন্দেৎ অসিনা চাউখৎ-থৌরাং, চাউখৎপা অমসুং তংদু লৈতানা লৈনবগী ঐখোয়গী কোওপরেসনগী অনৌবা লমশিং হাংদোকখি। রাস্ত্রপতি সোলিহনা ভারত্তা লাকপদা য়ান্নখিবা য়ু.এস.কী দোলর বিলিয়ন ১.৪গী ইকনোমিক পেকেজ ইমপ্লিমেন্ত তৌবদা চাউনা খুমাং চাউশিল্লি।

নখোয়গী লৈবাক্কা লোয়ননা ভারতকী দিবেলপমেন্তেল কোওপরেসন্না লেংদনা মীৎয়েং থম্লিবা অসি মালদ্বীপকী মীয়ামগী খুন্নাই অমসুং শেন্মীৎলোন চাউখৎহন্নবনি। ঈথৎশিংদা ঈশিং সপ্লাই তৌবা অমসুং সেনিতেসন লৈহনবা, ইনফ্রাস্ত্রকচর শেমগৎপা অমসুং হেল্থ অমদি এজুকেস্নেল ফেসিলিতীশিং লৈহনবা ওইরবসু ভারতকী কোওপরেসন অসিনা মতম চুপ্পদা মীয়ামগী য়াইফনবা হোৎনবদা মীৎয়েং থমদুনা লাকখি অমসুং মালদ্বীপকী মথৌ তাবা অমসুং মরু ওইবশিংদা য়ুম্ফম ওইদুনা লাকখি।

ঐখোয়গী সোসিএল ইম্পেক্ত অমসুং অতোপ্পা কোওপরেসন প্রোজেক্ত কয়ানা লৈবাক অসিগী মীচল মীয়ামগী পুন্সিদা কান্নবা পীখি অমসুং মসিনা মখোয়গী পুন্সি ফগৎহন্নবা নখোয়গী খোঙথাংশিংদা শরুক তমখি। ভারতনা মালদ্বীপকী দেমোক্রেসী অমসুং চাউখৎপগী থাজবা য়াবা, মপাঙ্গল কনবা অমসুং মাংজিল থারিবা পার্তনর অমা মখা তানা ওইখিগনি। অমসুং মসিগী কোওপরেসন অসিনা মালদ্বীপ মীয়ামগী মীহুৎশিং ওইনা নখোয়গী শক্তি হেনগৎহল্লগনি।

ইকাই খুম্নরবা স্পীকর,

লৈবাক অনিগী মরক্তা লৈরিবা মরীশিং অসি মখোয়গী সরকারশিংগী খক্তগী মখা পোন্দে। মখোয়গী মীয়ামগী মরক্তা লৈনরিবা মরীশিংদগী শক্তি লাকখি। মরম অসিনা ঐহাক্না পিপল-তু-পিপল একচেঞ্চশিং থৌগৎনবগী খোঙথাং পুম্নমক অসি ঐহাক্না মরু ওইবা মীৎয়েং চংলি। মরম অসিনা ঐখোয়গী লৈবাকশিংগী মরক্তা অনৌবা ফেরী সর্ভিস অমা হৌনবা ঐহাক্না অয়াবা পীখি। মমাং চহিদা লোইশিনখিবা বিজা ফেসিলিতেসন এগ্রীমেন্তনা ললোন-ইতিক, মেদিকেল ক্যের, কোইবা, তুরিজম, অসিনচিংবগীদমক মালদ্বীপতগী ভারত্তা লাকপদা লায়থোকহনখি।

ইকাই খুম্নরবা স্পীকর,

ঐখোয়গী ম্যুচুএল কোওপরেসন অসি মাংদা পুখৎলদুনা ঐখোয়না ঙসি ঐখোয়গী অকোইবদা লৈরিবা তম্বা ঙমদবশিং অমসুং শাথীরবা শীংনবশিং অসিগী মরমদসু খনখি। তেক্নোলোজী চাউখৎপা, মলতি-পোলর ৱর্ল্দ, অথোই-অহেন তানরিবা অমসুং য়েংশিন্নবা অসিদা ইকনোমিক অমসুং স্ত্রেতেজিক পাৱরগী একজিস্তা অহোংবশিং লাকপনা থোকহনবা অপনবশিংদগী থোরকপা শীংনবা কয়া লৈ।

অদুম ওইনমক ঐহাক্না ঐখোয়গী লৈবাক অনিগীদমক খ্বাইদগী মরু ওইবা অদুগুম্বা হীরম অহুমগী মতাংদা থমজগে।

ইকাই খুম্নরবা স্পীকর,

ঐখোয়গী মতম অসিগী ওইনা তেরোরিজম অসি য়াম্না চাউবা শীংনবনি। মসিগী শীংনবা অসি জাতি অমা নত্ত্রগা লমদম অমা খক্তনা মায়োক্নবা শীংনবা অমা নত্তে। মসি মীওইবা জাতি পুম্নমক্না মায়োক্নবা শীংনবনি। তেরোরিজমগী ফত্রবা শক্তম অসি উৎতবা নুমিৎ অমত্তা য়াওদে অমসুং মসিনা মফম অমদা নত্ত্রগা অমদা চমজরবা পুন্সি লৌই। তেরোরিস্তকী মশাগী বেঙ্ক লৈতে। মখোয়গী মশাগী খুৎশু খুৎলাই শানবা ফেক্তরীশিং লৈতে। অদুবু মখোয়দা শেল নত্ত্রগা খুৎশু খুৎলাইগী অৱাৎপা অমত্তা লৈতে। মদু কদাইদগী লাকপনো? কনানা মখোয়দা ফেসিলিতীশিং অসি পীরিবনো?

তেরোরিজমগী স্তেৎ স্পোন্সরশিপ অসিনা খ্বাইদগী চাউবা খুদোংথিবা ওইরি।

হৌজিকসু মীওই খরনা ‘অফবা’ অমসুং ‘ফত্তবা’ তেরোরিস্ত হায়না খাইদোকপগী ৱাখল্লোন চেনবা অসি য়াম্না লাইবক থীবনি। ঐখোয়না খুৎশম্নবা শাবা খেন্নবা অসিগী মতাংদা দিবেৎ তৌদুনা মতম কয়া মাংহনখ্রে। হৌজিক্তি মসি খাংদুনা লৈররোই।

ঙসিগী লুচিংবা ওইবগী লিৎমস তেস্ত অসি তেরোরিজম অমসুং রেদিকেলাইজেসনগী ফত্রবা শক্তশিং মায়োক্নবগী মওংনি। মালেমগী ফুরুপনা ক্লাইমেৎ চেঞ্জকী তমথীরবা অকিবা অসিগী মতাংদা গ্লোবেল কনভেন্সন অমসুং কনফরেন্স কয়া থৱায় য়াওনা পাঙথোকখি। তেরোজিমগী মতাংদসু পাঙথোকপা য়াদব্রা?

ঐহাক্না গ্লোবেল ইন্সতিত্যুসনশিং অমসুং মাংজিল থারিবা লৈবাকশিংদা অপীবা তাইমফ্রেম অমগী মনুংদা তেরোরিজমগী ওইবা গ্লোবেল কনফরেন্স অমা পাঙথোক্তুনা তেরোরিস্তশিং অমসুং মখোয়বু শৌগৎলিবশিংনা খুৎ থিংজিল্লিবা লুপহোলশিং অসি মেনশিন্নবা কান্নরবা অমসুং রিজল্ত ওরিয়েন্তেদ দিস্কসনশিং পাঙথোক্নবা ঐহাক্না হায়জরি। করিগুম্বা মখা তানা থিন্থবা তারবদি ঐখোয়গী হৌজিক লৈরিবা অমসুং তুংগী মীরোলশিংনা ঐখোয়বু কৈদৌনুংদা ঙাকপীরোই।

ইকাই খুম্নরবা স্পীকর,

ঐহাক্না ক্লাইমেৎ চেঞ্জ পনখ্রে। মসি ঐখোয়গী মতমগী রিএলিতী অদুনি হায়বদা হায়মনবা থোক্লোই।

 তুরেল কংশিল্লকপা অমসুং নোংজু-নুংশা তম্বা ঙমদবা অসিনা ঐখোয়গী লৌউ-শিংউ অমসুং লৌমীশিংদা চাউনা চৈথেং পীরি। অদুবু মসিগী হেনবদা গ্লেসিয়রশিং মহী লাংথোরকপা অমসুং সী-লেবেলশিং ৱাংখৎলকপা অসিনা মালদ্বীপগুম্বা লৈবাকশিংগীদমক খুদোংথিনীংঙাই ওইরক্লি। মেরাইন পোল্লুসন্না কোরেল আইলেন্দ অমসুং সমুদ্রদা হিংনবগী মীপাল তাংজবশিংদা চাউনা চৈথেং পীরি।

ইকাই খুম্নরবা স্পীকর,

মালেমগী মীৎশিং চীংশিন্নবগীদমক সমুদ্র ইরোলনুংদা মালেমগী অহানবা কেবিনেৎ মীফম পাঙথোকপা ঙম্বগী নখোয়গী থৌনা ফরবা খোঙথাং অদু কনানা কাওগনি?

মালদ্বীপনা সস্তেনবেল দিবেলপমেন্ত চাউখৎহন্নবা অতোপ্পা শীংথানীংঙাই ওইরবা থৌশিল কয়ামরুম পাইখৎখি।

ইন্তর্নেসনেল সোলর এলাইন্সতা য়াওরকপা অসিদা ঐহাক্না নুংঙাইবা ফাওই। ভারতনা পুন্না পাইখত্পা এলাইন্স অসি হৌদোক্নবগী ইনিসিয়েতিব অসিনা মালেমগী লৈবাক কয়াদা ঐখোয়গী প্রথিবি অসি কন্নবা প্রেক্তিকেল ওইবা খোঙথাংশিং লৌখৎনবা প্লেৎফোর্ম অমা পীরি। রিন্যুএবল ইনর্জি অসি ক্লাইমেৎ চেঞ্জকী চৈথেং কয়া হন্থহন্নবগী মপাঙ্গল কনবা অলতর্নেতিব অমনি।

মীতিন অসি ২০২২ ফাওবদা রিন্যুএবল ইনর্জীগী জি.দবল্যু. ১৭৫ য়ৌনবগী ভারতকী অচৌবা তার্গেৎ থম্লিবা অসিগা মান্নৈ অমসুং মসিদা ফংলকপা কান্নবা অসিনা থমখিবা আশাদগী হেল্লি।

অমসুং হন্দক্তা ভারতকী কোওপরেসন অসিনা ইনর্জী-ইফিসিএন্ত অমসুং এনভাইর্নমেন্ত-ফ্রেন্দলী এল.ই.দি. স্ত্রীৎ লাইৎ ২,৫০০ হেন্না মালেগী লম্বীশিংদা থানখি। অমসুং এল.ই.দি. ব্লব লিশিং তরানিথোই হেন্না মালদ্বীপকী য়ুমশিং অমসুং দুকানশিংদা থানখি। মসিনা মমল য়াম্লবা ইলেক্ত্রিসিতী অমসুং এনভাইর্নমেন্ত কনবা ঙমগনি অমসুং ইলেক্ত্রিসিতী বিল হন্থহনবা ঙমগনি।

ভারতনা অপীকপা ঈথৎশিংগী মথৌ তাবশিং অমসুং সমস্যাশিংদা অখন্নবা মীৎয়েং চংখি। ঐখোয়না মখোয়গী অৱাবশিং কোকহন্নবা থোরকপা নত্তে তোঙান-তোঙানবা গ্লোবেল ফোরাদা ঐখোয়গী খোঞ্জেল তাহন্নবনি। মদুদা অৱাবশিং পুথোক্তুনা মদু কোকহন্নবা হোৎনবনি। অদুম ওইনমক মীপুম খুদিংমক্না মসিদা য়াওশিন্দুনা অপুনবগী খোঙথাংগী মথৌ তাবা থাক অদু য়ৌনবা হোৎনবা তাই। অদুবু ঐখোয়না তেক্নোলোজিকেল সোল্যুসনশিং খক্তা ক্লাইমেৎ চেঞ্জকী শীংনবা কোকহনবা ঙমগনি হায়না খনবনি লানগনি। মসি ঐখোয়গী ভেল্যুশিং, এপ্রোচ, লাইফ-স্তাইল অমসুং খুন্নাইদা অহোংবা পুরক্তনা ক্লাইমেৎ চেঞ্জকী অচৌবা চৈথেংশিং নীংথিনা কোকহন্নবা হোৎনবনা ওইথোকপা ঙমহনগনি। ঐখোয়না মসিগী য়ুম, ঐখোয়গী পৃথিবী অসি ঐখোয়গী তুংগী মীরোলশিংগীদমক ঐখোয়না থম্লিবা লেগেসীনি অমসুং মসি ঐখোয়গী ইশাগী প্রোপর্তী নত্তে।

ইকাই খুম্নরবা স্পীকর,

অহুমশুবা হীরম অসি ইন্দো-পেসিফিক, ঐখোয়গী অপুনবা লমদম। মসিদা মালেমগী মীশিংগী শরুক ৫০% লৈ অমসুং ধর্ম, নাৎ, লোল, পুৱারী অমসুং রাজনিতী অমসুং শেন্মীৎলোনগী মখল কয়াগী সিস্তেমশিং লৈরি। অদুবু মসিদা ৱাহং কয়াগী পাউখুম লৈতবা অমসুং ৱারোইশিন পুরকপা ঙমদ্রবা সমস্যা কয়া লৈরি। ইন্দো-পেসিফিক রিজন অসি ঐখোয়না হিংলিবা অসিগী তৎন-থানবা য়াদ্রবা শরুক অমনি। মসিনা ঐখোয়গী লাইফলাইন ওইরি অমসুং ললোন ইতিক অমদি চাউখৎপগী হায়ৱেসু ওইরি। হীরম খুদিংমক্তা মসিনা ঐখোয়গী অপুনবা তুংলমচৎনি। মরম অসিনা ঐহাক্না সিঙ্গাপুরদা ২০১৮দা হায়খি মদুদি মীপুম খুদিংমক্না অমত্তা ওইনা থবক তৌদুনা ইন্দো-পেসিফিক্তা ওপননেস, ইন্তিগ্রেসন অমসুং বেলেন্স পুরক্কদবনি। মসিনা জাতিশিংগী মরক্তা থাজবা হেনগৎহনগনি। মসিনা রুল-বেজ ওর্দর অমসুং মলতিলেতরেলিজম মখা চত্থহনগনি।

ইকাই খুম্নরবা স্পীকর,

চহি ৪গী মমাংদা ঐহাক্না সাগরগী মওংদা, মসি হিন্দী ৱাহৈদা ‘সমুদ্র’ হায়বনি, ইন্দিয়ন ওসীন রিজনগীদমক ভারতকী বিজন অমসুং কম্মিৎমেন্ত অদু ফোঙদোকখি, মসিগী এক্রোনিম অসিনা সেক্যুরিতী এন্দ গ্রোথ ফোর ওল ইন দি রিজন হায়বনি। মসি ইন্দো-পেসিফিক্তা পীনরিবা কোরোপরেসনগী ব্ল্যুপ্রিন্ত ওইরি।

ঙসি ঐহাক্না অমুক হন্না ইনক্লুসিবনেসকী প্রিন্সিপলগী মতাংদা অমুক হন্না থম্বা পাম্মি। ঐহাক্না ভারতনা মাগী মতিক-ময়াই অমসুং মপাঙ্গল অসি মহাক্কী য়াইফনবা অমসুং ঙাকশেল খক্তগী শীজিন্নরোই হায়বা ৱাফম অসি অমুক হন্না থমজনীংই। ঐখোয়না লমদম অসিদা লৈরিবা অতোপ্পা লৈবাকশিংগী মতিক-ময়াই হেনগৎহন্নবগীদমক, হ্যুমেনিতরিয়ন এসিস্তেন্সকা লোয়ননা খুদোংথিবা থোকপা মতমদা মতেং পাংনবা অমসুং পুম্নমক্কী সেক্যুরিতী, প্রোস্পরিতী অমসুং অফবা তুংলমচৎকীদমক থবক তৌনবগী হোৎনগনি। খা এসিয়া অমসুং ইন্দো-পেসিফিক্তা মতিং লৈবা, মপাঙ্গল কনবা অমসুং চাউখৎপা ভারতনা শান্তি, চাউখৎপা অমসুং সেক্যুরিতী মপাঙ্গল কনবা য়ুম্বী ওইবতা নত্তনা মালেম পুম্বগীসু ওইরি।

ইকাই খুম্নরবা স্পীকর,

বিজন অসি মঙফাওনবা ঙম্নবা অমসুং ব্ল্যু ইকনোমীদগী কান্নবা লৌনবা হোৎনবদা মালদ্বীপতগী হেন্না চুনবা পার্তনর ঐখোয়না ফংলোই। মরমদি ঐখোয় মরুপশিংনি। অমসুং মরুপশিংগী মরক্তা অচৌ-মচা, অকনবা অশোনবা লৈতে। শান্তি লৈবা অমসুং য়াইফবা য়ুমলোন্নবা অমা ওইবগী য়ুম্ফম অসি থাজবা, অফবা অমসুং মতেং পাংনবনা থোল্লি। অমসুং মসিগী থাজবা অসি ঐখোয়না অমনা অমগী সমস্যা অমসুং অপাম্বশিং খঙবা অসিদগী হৌরকখিবনি। অদুবু ঐখোয় অনিমক্না হেন্না চাউখৎপা অমসুং সেক্যুরিতী হেন্না লৈবা ঙম্লিবনি।

মসি ঐখোয়গী ম্যুচুএল ত্রস্ত অমসুং কনফিদেন্স অসিনা নুংঙাইবা মতমদা খক্তা নত্তনা অৱাবা মতমশিংদসু মপাঙ্গল কল্লবা মতমদা ওইথোক্কনি।

ইকাই খুম্নরবা স্পীকর,

‘বসুধৈব কুতুম্বকম’ অসি ঐখোয়গী ফিলোসোফী অমসুং পোলিসীনি। মসিগী ৱাহন্থোক্তি মালেম পুম্বা ইমুং অমত্তনি হায়বনি। ঐখোয়গী মতমগী খ্বাইদগী অথোইবা মীশক, মহাত্মা গান্ধীনা হায়খি, “ঐখোয়গী য়ুমলোন্নরিবশিংদা ঐখোয়না শেবা তৌবগী অকক্নবা লৈতে”। মালেমদা ভারতনা মাগী মাইপাকপশিং অসি মতম পুম্বদা শিয়র তৌরি অমসুং মরু ওইনা মহাক্কী য়ুমলোন্নরিবশিংদা শিয়র তৌরি। মরম অসিনা ঐখোয়গী দিবেলপমেন্ত পার্তনরশিপশিং অসিনা মীয়ামবু শক্তি পীরি মখোয়বু শোন্থহনবগী মহুৎ।

ইকাই খুম্নরবা স্পীকর,

মসি অচৌবা ত্রাঞ্জিসন, শীংনবনা থনবা মতম অমনি। অদুম ওইনমক শীংনবশিং অসিনা খুদোংচাবশিং পুরক্লি। ঙসি মালদ্বীপ অমসুং ভারত্তা খুদোংচাবশিং অসি লৈরে:

●  মালেমগীদমক অফবা য়ুমলোন্নবা অমসুং মরুপ ওইনবগী ফীদম্নফম ওইবা খুদম অমা ওইহনবা;

● ঐখোয়গী মীয়ামগী শেন্মীৎলোন, সমাজিক অমসুং রাজনিতীগী ওইবা অনীংবা অপাম্বশিং  থুংহন্নবা ঐখোয়গী কোওপরেসন পীনবগী খুত্থাংদা চাউখৎপা পুরকপা;

● ঐখোয়গী লমদমদা তংদু লৈতাবা, শান্তি অমসুং সেক্যুরিতী লৈনবা পুন্না হোৎনবা;

● মালেমগী খ্বাইদগী মরু ওইবা সী লেনগী সেক্যুরিতী লৈহনবা;

● তেরোরিজম মাইথিবা পীবা;

● তেরোরিজম অমসুং এক্সত্রিমিজম য়োকখৎলিবা শক্তিশিংবু ঐখোয়গী তোর্বানশিংদগী লাপ্না লৈহনবা;

● মশা মউ ফবা অমসুং লুনানবা এনভাইর্নমেন্ত অমগীদমক মথৌ তাবা অহোংবশিং পুরকপা।

পুৱারী অমসুং ঐখোয়গী মীয়াম্না খুদোংচাবশিং অসি মপুং ফানা লৌনবা অমসুং মসি মাংহনবা তৌদনবা আশা তৌরমগনি। ভারতনা খোঙথাংশিং অসিদা মপুং ফানা মতেং পীনবা খোঙফম চেৎনা লেপ্পি অমসুং মালদ্বীপকা লৈনরিবা মমল নাইদ্রবা মরুপ ওইবগী মরী অসি হেন্না চেৎশিনহনগনি। ঙসি ঐহাক্না অমুক হন্না ৱাশক্লি।

নখোয়গী নরক্তা শরুক য়াবা ফংহনবগীদমক অমসুং ঐঙোন্দা ইকাই খুম্নবা উৎপীবগীদমক ঐহাক্না অমুক্কা হন্না থাগৎচরি। নখোয়গী মরুপ ওইবগী মরী অসিগীদমক থাগৎচরি।

হন্না-হন্না থাগৎচরি।

**********