ভাৰতৰ ৰাষ্ট্ৰপতি শ্ৰীমতী দ্ৰৌপদী মূৰ্মু, উপ-ৰাষ্ট্ৰপতি শ্ৰী জগদ্বীপ ধনখৰ, কেন্দ্ৰীয় গৃহ আৰু সহযোগিতা মন্ত্ৰী শ্ৰী অমিত শ্বাহ আৰু দিল্লীৰ লেফটেনেণ্ট গৱৰ্ণৰ শ্ৰী বিনয় কুমাৰ ছাক্সেনাই নতুন দিল্লীত চৰ্দাৰ বল্লভভাই পেটেলৰ জন্ম জয়ন্তী উপলক্ষে লৌহপুৰুষ চৰ্দাৰ পেটেলক পুষ্পাঞ্জলি জ্ঞাপন কৰে।

গৃহমন্ত্ৰীয়ে দিল্লীৰ মেজৰ ধ্যানচান্দ ষ্টেডিয়ামত ৰান ফৰ ইউনিটীৰ শুভাৰম্ভ কৰে। অনুষ্ঠানত বৈদেশিক পৰিক্ৰমা মন্ত্ৰী শ্ৰী এছ জয়শংকৰ, বৈদেশিক পৰিক্ৰমা ৰাজ্যিক মন্ত্ৰী শ্ৰীমতী মীনাক্ষী লেখী আৰু কেন্দ্ৰীয় গৃহ ৰাজ্যিক মন্ত্ৰী শ্ৰী নিশিথ প্ৰামাণিক উপস্থিত আছিল। শ্ৰী অমিত শ্বাহে সমবেত লোকসকলক ৰাষ্ট্ৰীয় ঐক্যৰ শপত বাক্য পাঠ কৰোৱায়।

শ্ৰী অমিত শ্বাহে কালি গুজৰাটৰ মৰবিত সংঘটিত দলং দুৰ্ঘটনাত নিহতসকলৰ পৰিয়াললৈ সমবেদনা জ্ঞাপন কৰে।

কেন্দ্ৰীয় গৃহমন্ত্ৰীয়ে কয় যে আজিৰ কাৰ্যসূচীটোৰ এক বিশেষ গুৰুত্ব আছে কিয়নো এতিয়া আমি আজাদী কা অমৃত মহোৎসৱ উদযাপন কৰি আছো। তেওঁ কয়, "আজি স্বাধীনতাৰ পিছত আধুনিক ভাৰত গঢ়াৰ ভেঁটি স্থাপন কৰা আৰু এই দৃষ্টিভংগী বাস্তৱায়িত কৰাত সমগ্ৰ জীৱন উৎসৰ্গা কৰা এজন ব্যক্তিৰ জন্মজয়ন্তী।" শ্ৰী শ্বাহে কয় যে আমি চৰ্দাৰ বল্লভভাই পেটেলৰ নাম লোৱাৰ লগে লগে আজি যিখন ভাৰতৰ মানচিত্ৰ আমাৰ সন্মুখলৈ আহে আৰু যদি চৰ্দাৰ চাহাব নাথাকিলহেঁতেন, তেন্তে আজি বিশ্বৰ সন্মুখত থকা বৃহৎ, দৃঢ়, শক্তিশালী ভাৰতৰ অস্তিত্ব নাথাকিলহেঁতেন।

শ্ৰী অমিত শ্বাহে কয় যে স্বাধীনতাৰ পিছত দেশৰ আটাইতকৈ ডাঙৰ সমস্যাটো আছিল এয়াই যে ৫০০ত কৈও অধিক ৰাজশাসনৰ ৰাজ্য আৰু ৰজা ক একত্ৰিত কৰা আৰু এই নিৰ্মাণত দেশৰ প্ৰথমজন গৃহমন্ত্ৰী আৰু উপ-প্ৰধানমন্ত্ৰী চৰ্দাৰ চাহেবে যথেষ্ট অৰিহণা যোগাইছিল। "এয়াই আছিল চৰ্দাৰ চাহাব যাৰ দক্ষ আৰু অসাধাৰণ ৰাজনৈতিক সামৰ্থ্যই সমগ্ৰ দেশক একত্ৰিত কৰিছিল। শ্ৰী শ্বাহে কয় যে সেই সময়তো দেশবিৰোধী শক্তিয়ে দেশক বিভক্ত কৰাৰ ক্ষেত্ৰত কোনো ধৰণৰ ক্ৰুটি ৰখা নাছিল, তথাপিও চৰ্দাৰ চাহাবৰ প্ৰচেষ্টা আজি আমাৰ সন্মুখত বিদ্যমান হৈছে।

কেন্দ্ৰীয় গৃহমন্ত্ৰীগৰাকীয়ে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত আজি ভাৰতে স্বাধীনতাৰ ৭৫তম বৰ্ষ উদযাপন কৰিছে আৰু প্ৰধানমন্ত্ৰী মোদীয়ে চলিত বছৰত ১৩০ কোটি ভাৰতীয়ৰ সন্মুখত ২০৪৭ বৰ্ষত ভাৰতৰ স্থিতি কি হ'ব সেয়া ঐক্যবদ্ধভাৱে সমাধান কৰাৰ লক্ষ্য নিৰ্ধাৰণ কৰিছে। তেওঁ কয় যে দেশৰ ১৩০ কোটি লোক আৰু ৰাজ্যৰ সংকল্পই নিশ্চিতভাৱে ২০৪৭ চনত চৰ্দাৰ চাহাবৰ কল্পনাৰ ভাৰত গঢ়ি তোলাত সফল কৰি তুলিব। শ্ৰী শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত যোৱা ৮ বছৰত দেশখনে বহুতো গুৰুত্বপূৰ্ণ সাফল্য অৰ্জন কৰিছে আৰু দাসত্বৰ সকলো লক্ষণৰ পৰা মুক্তি লাভ কৰি এক স্বাভিমানী, সমৃদ্ধ, শক্তিশালী আৰু সুৰক্ষিত ভাৰত গঢ়ি তোলাৰ দিশত আগবাঢ়িছে।

কেন্দ্ৰীয় গৃহমন্ত্ৰীগৰাকীয়ে কয় যে দেশক একত্ৰিত কৰাৰ বাবে লৌহ পুৰুষ চৰ্দাৰ বল্লভভাই পেটেলৰ দৃষ্টিভংগী উপলব্ধি কৰি আজি ভাৰতে বিশ্বৰ মানচিত্ৰত গৌৰৱময় স্থানত থিয় দিছে। তেওঁ কয় যে বহু বছৰ ধৰি চৰ্দাৰ পেটেলক পাহৰি যোৱাৰ প্ৰচেষ্টা কৰা স্বত্বেও তেওঁ নিজৰ গুণাগুণৰ বাবে সদায় অমৰ হৈ থাকিল আৰু আজি চৰ্দাৰ পেটেল দেশৰ সমূহ যুৱপ্ৰজন্মৰ বাবে এক অনুপ্ৰেৰণা হৈ পৰিছে। তেওঁ কয় যে চৰ্দাৰ বল্লভভাইৰ পথ অনুসৰণ কৰাৰ প্ৰতিশ্ৰুতি ল'বলৈ আজি সমগ্ৰ দেশতে একতাৰ বাবে এক দৌৰৰ আয়োজন কৰা হৈছে।

লৌহপুৰুষ চৰ্দাৰ পেটেলৰ মহান কৰ্মৰাজিৰ কথা স্মৰণ কৰি শ্ৰী অমিত শ্বাহে দেশবাসীক চৰ্দাৰ পেটেলে দেখুওৱা পথ অনুসৰণ কৰিবলৈ আৰু ২০৪৭ চনৰ ভিতৰত নিজৰ সংকল্প প্ৰমাণ কৰি দেখুৱাবলৈ আহ্বান জনায়।

***

NW/RK/AY/SM/AK/RR//AS/MANN