মথেন বন্দামি‍।

মালেম শিনবা থুংনা লৈরিবা জৈন লাইনিংবু থাজবশিং অমসুং ভারতকী লম্বোইবগী চৎনবী ঙাক্লিবা মীওইশিংগী মফমদা ঙসিগী তাঞ্জাম অসিদা ইকোক নোঞ্জরি‍। থৌরম অসিদা ইকায়খুম্নরবা লম্বোইবা কয়া শরুক য়ারি‍। অদোমগা উনজবা, থৌজাল ফংজবা অমদি তোৎন তিন্নবগী তাঞ্জা কয়া লাইবক ফদুনা ফংজরে‍। ঐনা গুজরাত্তা লৈরিঙৈদা, ভদোদরা অমদি ছোতা উদয়পুরগী কনৱৎ খুঙ্গঙদা লম্বোইবশিংগী পাউজেল তাজনবগী খুদোংচাবা ফংজখি‍। অচার্য় পুজ্য শ্রী বিজয় বল্লভ সুরিস্বর জীগী ১৫০শুবা মপোক কুমওন হৌরকপদা, ঐনা লাইবক ফদুনা অচার্য় জী মহারাজগী মীতম মায়খুম হাংদোকপগী খুদোংচাবা ফংজখি‍। ঙসি অমুক্কা হন্না তেক্নোলোজীগী মতেংনা ঐ লম্বোইবা ময়ামগী মরক্তা তিনবা ফংজরি‍। ঙসি অচার্য় শ্রী বিজয় বল্লভ সিরিস্বর জীদা কত্থোকচবা নীংশিং খুদম ওইগদবা পোস্তেজ স্তাম্প অমসুং শেনয়েক ফোঙখি‍। অসুম্না ঙসিগী মীকুপ অসিনা শরুক অনি থোক্না নুংঙাইবগী তাঞ্জা পুরক্লি‍। নীংশিং খুদম ওইনা পোস্তেজ স্তাম্প অমসুং শেনয়েক ফোঙলিবা অসি ইকায়খুম্নরবা অচার্য় জীনা মপুন্সি চুপ্পা পাঙথোকখিবা থবক থৌরমশিং, পাউজেলশিং অমসুং উনবদা ফোঙদোকখিবা মীয়ামবু নুংগী ৱাখল্লোনগা মরী শম্নহনবা হায়বদুগী মরুওইবা থৌরাং অমনি‍।

চহি অনি চুপ্না চত্থরক্লিবা থৌরম অসি হৌজিক্তি অরোইবা মতম লাক্লে‍। থৌরম অসিগী মনুংদা লাইনিংদা থাজবা, নুংগী ৱাখলদা লুপ্নবা, মরৈবাক নুংশিবগী ইথিল পোকহন্নবা অমদি লৈবাক্কী মতিং হেনগৎহন্নবা অদোম্না হৌদোকখিবা কেম্পেন শিংথানিংঙাইনি‍। লম্বোইবা ময়াম, ঙসি মালেম অসিনা লাল, অকি তুজুংবা অমদি হাৎন-শুনবগী লাংফম কয়া থেংনরি‍। অসিগুম্বা তমথিরবা চগোয় অসিদগী থোরক্নবগীদমক মালেম অসিনা পুক্নিং থৌগৎনিংঙাইগী মচাকশিং থিরি‍। অসিগুম্বা ফীভম অসিদা, ভারতকী অরিবা চৎনবী, ভারতকী ৱাঙুলোন অমসুং ঙসিগী ভারতকী মতিক মালেমগী থাজবগী অচৌবা মফম অমা ওইরক্লি‍। অচার্য় শ্রী বিজয় বল্লভ সিরিস্বর মহারাজনা তাকপিরম্বা লম্বী, জৈন গুরুশিংনা তম্বিরম্বশিংনা হায়রিবা মালেমগী লাংফমশিং অসিগী পাম্বৈ ওইরি‍। অচার্য়না অহিংসা, পুন্না হিংমিন্নবা অমদি ওইজবা থাদোকপগী ৱাখল্লোন থাগোন্নদুনা হিংলম্বা মওং, অমদি হায়রিবা লীচৎ অসিদা মীয়ামবু চিংশিন্নবা লেপ্পা লৈতনা হোৎনরম্বশিংনা, ঙসিফাওবা ঐখোয় পুম্নমকপু পুক্নিং থৌগৎলি‍। মহাক্না ইং তপ্না অমদি নুংশি চান্ননা লৈমিন্ননবা পাউজেল্লম্বশিং পার্তিসনগী তমথিরবা মতমদুদসু ময়েক শেংনা উখি‍। ভারত শেত্তোক্নখিবনা মরম ওইরগা অচার্য় শ্রীনা মহাক্কী চতুর্মাসকী চরা হেনবা তোকখি‍।

মফম অমদা লেঙদনা লৈদুনা চরা হেন্দুনা হীরি কোনবা কয়া য়াম্না মরু ওইবগে হায়বসি অদোমদগী হেন্না অতৈ কনানা খঙলমগনি‍। অদুবু ইকায়খুম্নরবা অচার্য় মশামক ভারত্তা লাক্তুনা পুম্নমক থাদোক্লমদুনা মফমসিদা লাকখিবা মীওইশিংগী নুংঙাই য়াইফনবা অমদি থৌগলগীদমক তৌবা য়াবা পুম্নমক মহাক্না তৌখি‍।

মরূপশিং,

অচার্য়শিংনা ওইজবা থাদোকপগী লম্বীদা চৎলিবা অদুগুম নীংতম ঈহৌদা ইকায়খুম্নরবা মহাত্মা গান্ধীনা লম্বী অদুদা চৎখি‍। ওইজবা থাদোকপা হায়বসি শুপ্নতগী কত্থোকপখক নত্তে, মখল খুদিংমক্কী অপাম মীহৌ পুম্নমক থাদোকপদুবুনি‍। ইশাগী নাৎ, ইশাগী চৎনবী ঙাক্নবগীদমক পুকচেল শেংনা থবক তৌদুনা পুম্নমক্কী য়াইফনবা থবক হেন্না নীংথিনা পায়খৎপা ঙম্মী হায়বা অচার্য় শ্রীনা উৎপিরম্মী‍।

মরূপশিং,

গচ্ছাধিপতি জৈনাচার্য় শ্রী বিজয় দিত্যানন্দ সুরিস্বর জীনা লৈবাকসিদা গুজরাতনা বল্লব ২ খুদোল তম্লি হায়না হন্না হন্না পনবিরম্মী‍। ঙসি অচার্য় জীগী ১৫০শুবা মপোক কুমওন পাঙথোকপা লোইশিল্লক্লি, অমদি নুমিৎ খরনিগী মতুংদা ঐখোয়না সরদার পতেলগী মপোক কুমওন, নেস্নেল য়ুনিতী দে হায়না পাঙথোক্কদৌরিবা অসিসু তাঞ্জা চানবা অমনি‍। ঙসি ‘স্তেচু ওফ পীসনা লম্বোইবশিংগী খ্বাইদগী চাউবা মীতম ওইরি অদুগা স্তেচু ওফ য়ুনিতীনা মালেমগী খ্বাইদগী ৱাংবা মীতম ওইরি‍। মখোয়শিং অসি অৱাংবা মীতমখক্তা ওইবতা নত্তনা এক ভারত, স্রেস্থ ভারতকী খ্বাইদগী চাউবা খুদমসু ওইরিবনি‍। সরদার সাহবনা মচেৎ মচেৎ তারম্বা, নিংথৌ পানবা লৈবাক মচা মচা ওইনা লৈরম্বা ভারতবু পুনশিনবিরম্মী‍। অচার্য় জীনা লৈবাক্কী তোঙান তোঙানবা মফমশিংদা চত্তুনা ভারতকী লিংজেল মান্নবা, অমত্তা ওইবা, ভারতকী নাৎপু মপাঙ্গল কনখৎহল্লম্মী‍। লৈবাকসিগী নীংতম ঈহৌ মতমদসু মহাক্না তোঙান তোঙানবা নীংতম লান্মীশিংগা নক্ননা থবক তৌমিন্নখি‍।

মরূপশিং,

“লৈবাক্কী নুংঙাই য়াইফবা হায়বসি শেন্মিৎলোন্দা নুংঙাই য়াইফবগী মখা পোল্লি, স্বদেসীগী ৱাখল্লোন ঙাক্না চৎপনা ভারতকী কলয়, ভারতকী নাৎ অমসুং ভারতকী সিভিলাইজেসনবু হিংহন্দুনা থম্বা ঙমগনি”, হায়না অচার্য় জীনা হায়বিরম্মী‍। মহাক্না কমদৌনা লাইনিং লীচৎ অমসুং স্বদেসী পুন্না য়োকখৎমিন্নগদগে হায়বা তাকপিরম্মী‍। মখোয়গী ফিজোল অঙৌবা ওইরম্মী অদুগা খাদি ফিরোলখক্তমক শীজিন্নরম্মী‍। মহাক্না মদু মপুন্সি চুপ্পা শেৎখি‍। অসিগুম্বা স্বদেসী অমসুং ইরোমদোম লেপচবগী পাউজেল অসি ঙসিগী অজাদি কা অমৃৎ কাল অসিদসু চপ চানা ৱাহন্থোক লৈরি‍। মসিনা ইরোমদোম লেপচবা ভারত পুরক্নবগী মচং ওইবা লাইৱানি‍। মরম অসিনা, অচার্য় বিজয় বল্লভ সুরিস্বর জী মশামক্তগী হৌরগা ঙসিগী গচ্ছাধিপতি অচার্য় শ্রী নিত্যানন্দ সুরিস্বর জী ফাওবনা খোঙফম চেৎশিলহনবিরম্বা লম্বী অসি ঐখোয়না মখা তানা মপাঙ্গল কনখৎহনবা তাই‍। ইকায়খুম্নরবা লম্বোইবশিং, অদোম্না মমাঙথক্তগী শেমগৎপিরম্বা খুন্নাই য়াইফনবা, মীওইবা খুন্নাইগী থৌগল, মহৈ মশিং অমসুং মীয়ামদা ৱাখল তাহনবগী ইনাক খুল্লবা চৎনবী অসি মখা তানা পাকথোক চাউথোরকপা ওইরসনু‍। মসি ঙসি লৈবাকসিনা মথৌ তারিবনি‍। অজাদি কা অমৃৎ কাল অসিদা, ঐখোয়না চাওখৎলবা ভারত অমগী মায়কৈদা চঙশিল্লি‍। মসিগীদমক লৈবাক অসিনা ৱাশক মঙা শক্লি‍। হায়রিবা ৱাশক মঙা অসি ফংবা ঙম্নবা হোৎনবদা অদোমগুম্বা লম্বোইবা ময়ামগী থৌদাং য়াম্না মরুওই‍। ঐখোয়না মীয়ামগী থৌফম থোকপা থৌদাংশিং কমদৌনা মপাঙ্গল কনখৎহনগদগে হায়বসিদা লম্বোইবশিংগী লমজিং লমতাক মতম পুম্নমক্তা মরুওই‍। মসিগা লোয়ননা, লৈবাকসিদা ভোকেল ফোর লোকেল লৈহনবা তাই, ভারতকী মীয়াম্না পুথোকচবা পোৎলমশিং ইকায়খুম্নবিবা তাই, মসিগীদমক অদোমগী মায়কৈদগী মীয়ামদা ইথিল পীননবা কেম্পেন চত্থরিবা অসি লৈবাক্কী অচৌবা থৌগল অমনি‍। অদোমবু নীংজবা, থাজবা অয়াম্বনা লল্লোন ইতিক তৌবা মীওইশিংনি‍। মখোয়না ভারত্তা পুথোকপা পোৎলমশিংখক্তমক লল্লোনগনি, লৈগনি অমদি য়োনগনি, অমদি ভারত্তা পুথোকপা পোৎলমশিংখক্তমক শীজিন্নগনি হায়না ৱাশক শক্লগদি মদু মহারাজ সাহবকী মফমদা অচৌবা শ্রদ্ধাঞ্জলি অমা ওইগদৌরিবনি‍। পুম্নমক্কী, লৈবাক পুম্বগীদমক ময়াম চঙদুনা হোৎনমিন্নবা হায়রিবা লম্বী অসি অচার্য় শ্রীনা ঐখোয়না উৎপিরম্বা লম্বীনি‍। ঐখোয় পুম্নমক্না লম্বী অসিদা মখা তানা চৎমিন্নসি হায়বা ৱাফমসি থমজবগা লোয়ননা অমুক্কা হন্না লম্বোইবা পুম্নমকপু ঐনা খুরুমজরি !

ময়ামবু হন্না হন্না থাগৎচরি !

***