প্রধান মন্ত্রী, শ্রী নরেন্দ্র মোদীনা অহমেদবাদকী জি.এম.দি.সি. গ্রাউন্দদা ঙসি নুমিদাংদা নবরাত্রীগীদমক্তা পাংথোকপা নুংঙাইবা ফোংদোকপগী কুহ্মৈদা শরুক য়াখ্রে।

প্রধান মন্ত্রীনা কুহ্মৈ পাংথোকফমদা গুজরাতকী রাজ্যপাল, শ্রী অচার্য়া দেবব্রত অমসুং মুখ্য মন্ত্রী, শ্রী ভুপেন্দ্র ভাই পতেলগা লোয়ননা থুংলখি। গুজরাতকী রাজ্যপাল, মুখ্য মন্ত্রী অমসুং লাইনীংবা লাখ কয়াগা লোয়ননা প্রধান মন্ত্রীনা মহা আর্তী কৎখি। ভারতকী চৎনবী অমসুং গুজরাত লমদমগী থৌওং কয়াগী শক্তম তাকপা নবরাত্রীগী কুহ্মৈদা প্রধান মন্ত্রীনা শরুক য়াখিবদা লাইনীংবা কয়ানা শেংলবা থৌরম অসিদা হরাও নুংঙাইবা ফাওনখি। মুখ্য মন্ত্রীনা প্রধান মন্ত্রীগী মফমদা ইমা অম্বাজী শ্রী য়ন্ত্রা অমবু য়াইফরবা খুদোলপোৎ ওইনা পীখি। প্রধান মন্ত্রীনা নাৎকী থৌরম কয়া অমসুং গর্বা মিৎয়েং তাখি।

নুমিৎ নিনিগী খোঙচৎকীদমক্তা গুজরাত্তা লৈরিবা প্রধান মন্ত্রীনা ঙসি সুরত অমসুং ভবনাগরদা পাংথোকপা থৌরম কয়াদা শরুক য়াখি অমসুং প্রোজেক্ত কয়া শঙ্গাখি/মীয়ামদা খুৎশিন্নখি/উরেপ উয়ুং তমখি। মহাক্না ঙসি অহমেদবাদতা ৩৬শুবা নেস্নেল গেম্স ২০২২বুসু হৌদোকখি।

প্রধান মন্ত্রীনা হয়েং শক্তি পীথ ৫১গী মনুংদা অমা ওইরিবা অম্বাজীদা লৈবা লাইনীংবগী মফমদা অমদা পাংথোকপা থৌরমদা শরুক য়াগনি। প্রধান মন্ত্রীনা অম্বাজীদা লুপা করোর ৭২০০ হেন্না চঙনা শাবা চাউখৎ-থৌরাংগী তোঙানবা প্রোজেক্ত কয়াগী উরেপ উয়ুং তম্বগা লোয়ননা লৈবাক মীয়ামদা খুৎশিন্নগনি। প্রধান মন্ত্রীনা পি.এম. অৱস য়োজনাগী মখাদা শাবা য়ুম ৪৫,০০০ হেনববু মীয়ামদা খুৎশিন্নদুনা উরেপ উয়ুং তমগনি। প্রধান মন্ত্রীনা তরঙ্গা হিল-অম্বাজী-অবু রোদ ন্যু ব্রোদ গেজ লাইন অমসুং প্রসাদ স্কিমগী মখাদা পায়খৎপা অম্বাজী লাইশঙগী লাই নীংবগী ফেসিলিতীশিং চাউখৎহনবগী থবক্কী উরেপ উয়ুং তমগনি। অনৌবা রেল লাইন অসিনা শক্তি পীথ ৫১গী মনুংদা অমা ওইরিবা অম্বাজীদা লাকপা লাইনীংবা লাখ কয়াদা কান্নবা পীগনি, অমসুং হায়রিবা মফমশিংদা অসিদা লাইনীংবশিংনা লাই নীংবগী নুংঙাইরবা এক্সপেরিএন্স ফংহনগনি। উরেপ উয়ুং তমগদবা অতোপ্পা প্রোজেক্তশিংগী মনুংদা দীসাগী এয়রফোর্স স্তেসনগী রনৱে অমসুং মরী লৈনবা ইনফ্রাস্ত্রকচর; অম্বাজী বাইপাস রোদশিং য়াওরি।

প্রধান মন্ত্রীনা ৱেস্তর্ন ফ্রৈত কোরিদোরগী কিলোমীতর ৬২ শাংবা অনৌবা পালনপুর-ন্যু কহেসানা সেক্সন অমসুং কিলোমীতর ১৩ শাংবা ন্যু পালনপুর-ন্যু চতোদর সেক্সন (পালনপুর বাইপাস লাইন) অসিসু মীয়ামদা খুৎশিন্নগনি। মসিনা পিপাবব, দীন্দয়াল পোর্ত ওথোরিতী (কান্দলা), মুন্দ্রা অমসুং গুজরাতকী অতোপ্পা হিংথাংফমশিং চৎপগী কন্নেক্তিবিতী হেন্না ফগৎহনগনি। সেক্সনশিং অসি হাংদোকপদগী, ৱেস্তর্ন দেদিকেতেদ ফ্রৈত কোরিদোরগী কিলোমীতর ৭৩৪ মথৌ তৌবা হৌগনি। লম্বী অসি হাংদোকপনা গুজরাতকী মেহসানা-পালনপুর; রাজস্থানগী স্বরুপগঞ্জ, কেশবগঞ্জ, কিশনগর; হরিয়ানাগী রেৱারী-মনেসর অমসুং নার্নাউলগী ইন্দস্ত্রীশিংদা কান্নবা য়াম্না পীগনি। প্রধান মন্ত্রীনা মিথা-থারদ-দীসা শোরোক পাকথোক চাউথোকহনবা য়াওনা অতোপ্পা রোদ প্রোজেক্ত কয়াসু মীয়ামদা খুৎশিন্নগনি।

*****