રક્ષા મંત્રી શ્રી રાજનાથ સિંહે 19 સપ્ટેમ્બર, 2022 ના રોજ કૈરોમાં ઇજિપ્તના સંરક્ષણ પ્રધાન જનરલ મોહમ્મદ ઝાકી સાથે દ્વિપક્ષીય વાટાઘાટો કરી હતી. શ્રી રાજનાથ સિંહ, જેઓ ઇજિપ્તની સત્તાવાર મુલાકાતે છે, તેમને કૈરોમાં દ્વિપક્ષીય વાટાઘાટોની શરૂઆત પહેલા સંરક્ષણ મંત્રાલયમાં ઔપચારિક ગાર્ડ ઓફ ઓનર આપવામાં આવ્યું હતું. બેઠક દરમિયાન, બંને પક્ષોએ સંરક્ષણ સંબંધોને મજબૂત કરવાના પગલાઓ પર ચર્ચા કરી અને સંયુક્ત કવાયત અને ખાસ કરીને બળવાખોરી વિરોધી ક્ષેત્રમાં તાલીમ માટે કર્મચારીઓના આદાન-પ્રદાનને વધારવા માટે સર્વસંમતિ પર પહોંચી હતી.

બંને મંત્રીઓ ભારત અને ઇજિપ્તના સંરક્ષણ ઉદ્યોગો વચ્ચે સમયબદ્ધ રીતે સહયોગ વિસ્તરણ કરવા માટેની દરખાસ્તોને ઓળખવા માટે પણ સંમત થયા હતા. તેઓએ પ્રાદેશિક સુરક્ષા પર પણ મંતવ્યોનું આદાન-પ્રદાન કર્યું અને વિશ્વમાં શાંતિ અને સ્થિરતા માટે ભારત અને ઇજિપ્તના યોગદાનને સ્વીકાર્યું. બંને પક્ષોએ કોવિડ-19 રોગચાળા છતાં, છેલ્લા વર્ષમાં સઘન સંરક્ષણ જોડાણ અને આદાનપ્રદાન પર ખુશી વ્યક્ત કરી હતી.

ઇજિપ્તના રાષ્ટ્રપતિ શ્રી અબ્દેલ ફતાહ અલ-સીસી સાથે રક્ષા મંત્રીની મુલાકાત બાદ, બંને મંત્રીઓ દ્વિપક્ષીય સહયોગના સુરક્ષા અને સંરક્ષણ પાસાઓને એકીકૃત કરવા અને તેના પર ધ્યાન કેન્દ્રિત કરવા સંમત થયા હતા. બંને સંરક્ષણ પ્રધાનો દ્વારા સંરક્ષણ ક્ષેત્રે સહકાર પર એમઓયુ પર હસ્તાક્ષર એ મુલાકાત દરમિયાન એક સીમાચિહ્નરૂપ ઘટના હતી, જે પરસ્પર હિતના તમામ ક્ષેત્રોમાં સંરક્ષણ સહયોગ વધારવાનો માર્ગ મોકળો કરશે.

શ્રી રાજનાથ સિંહે તેમના ઇજિપ્તીયન સમકક્ષને ભારત-આફ્રિકા સંરક્ષણ સંવાદ અને IOR સંરક્ષણ મંત્રીઓના કોન્ક્લેવમાં પણ આમંત્રણ આપ્યું હતું, જે 12મા ડિફેન્સ એક્સપો, ગાંધીનગરમાં 18-22 ઓક્ટોબર, 2022 વચ્ચે યોજાનાર છે.

તેમના દિવસની વ્યસ્તતાના ભાગ રૂપે, રક્ષા મંત્રીએ કૈરોમાં ઇજિપ્તના દિવંગત રાષ્ટ્રપતિ અનવર અલ-સદાતના અજ્ઞાત સૈનિક સ્મારક અને સમાધિસ્થળ પર શ્રદ્ધાંજલિ આપી હતી.

YP/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com