প্রধানমন্ত্রীগী লোইশঙ
পি.এম.না ইন্দিয়া গেত্তা ‘কর্তব্য পথ’ শঙ্গাখ্রে অমদি নেতাজী সুভাস চন্দ্র বোসকী মীতম মায়খুম হাংদোকখ্রে
“কিংসৱে হায়বদি রাজপথ, মীখা পোনবগী খুদম অসি ঙসিদগীদি পুৱারী ওইখ্রে অমসুং মতম চুপ্পগী ওইনা মুত্থৎখ্রে”
“নেতাজীগী ইনর্জী অদুনা ঙসি লৈবাক অসিবু লমজিংনবা ঐখোয়না হোৎনগদবনি। ‘কর্তব্য পথ’তা লৈরিবা নেতাজীগী মীতম অসিনা মসিগী মিদিয়ম অমা ওইরগনি”
“নেতাজী সুভাসনা ১৯৪৭কী মমাংদা অন্দমানবু মনীং তমহনখিবা অখন্দ ভারতকী অহানবা লুচিংবা ওইখি অমসুং মচু অহুমগী ফিরাল চীংখৎখি”
“ঙসি ভারতকী ৱাখল্লোনশিং অমসুং দাইমেন্সনশিং অসি মশাগীনি। ঙসি ভারতকী ফিরেপ অসি মশাগীনি অমসুং মসিগী পান্দমশিংসু মশাগীনি। ঙসি ঐখোয়গী লম্বীশিং অসিসু ঐখোয়গীনি, ঐখোয়গী খুদম-চাংদমশিং অসিসু ঐখোয়গীনি”
“ইরৈবাকচাশিংগী ৱাখল্লোন অমসুং লমচৎ-শাজৎ অনিমক অসি মীখা পোনবগী ৱাখল্লোনদগী মনীং তমহল্লি”
“রাজপথকী ইমোসন অমসুং স্ত্রকচর অসি মীখা পোনবগী খুদম অমনি অদুবু ঙসি আর্কিতেকচরগী অহোংবগা লোয়ননা মসিগী ৱাখল্লোন অসিদসু অহোংবা পুরকখি”
“সেন্ত্রেল বিস্তাগী শ্রমজীবিশিং অমসুং মখোয়গী ইমুং মনুংশিং অসি মথংগী রিপব্লিক দে পরেদতা ঐহাক্কী অখন্নবা মীথুংলেনশিং ওইগনি”
“অনৌবা পার্লিয়ামেন্ত বিল্দিং শাবদা য়াওরিবা শিন্মীশিংবু গেলরিশিং অসিগী মনুংদা অমদা ইকাই খুম্ন
Posted On:
08 SEP 2022 9:36PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি ‘কর্তব্য পথ’ শঙ্গাখ্রে। মসিনা হান্নগী রাজপথনা পাঙ্গলগী খুদম ওইরম্বদগী কর্তব্য পথনা মীয়াম্না মপু ওইবগী অমসুং মপাঙ্গল কলহনবগী খুদম ওইবা মায়কৈদা হোংলকপগী অহোংবা অদু তাক্লি। থৌরম অদুদা প্রধান মন্ত্রীনা ইন্দিয়া গেত্তা নেতাজী সুভাস চন্দ্র বোসকী মীতমসু মায়খুম হাংদোকখি।
থৌরম অদুদা ৱা ঙাংলদুনা প্রধান মন্ত্রীনা হায়খি আজাদী কা অমৃত মহোৎসবকী মতমদা জাতিনা ঙসি অনৌবা ইথিল অমসুং থৌনা ফাওখি। “ঙসি ঐখোয়না হয়েংগীদমক অনৌবা মচুশিংনা থনবা মমিশিং শেমগৎলি, হৌখ্রবা মতমদা তুংওইন্দুনা থনম্লি। ঙসিগী অনৌবা মতিক-ময়াই অসি মফম খুদিংমক্তা ময়েক শেংনা উবা ফংলি মসি অনৌবা ভারতকী থাজবগী মতিক-ময়াই অদুনি” হায়না মহাক্না ফোঙদোকখি। মহাক্না মখা তারদুনা “কিংসৱে হায়বদি রাজপথ, মীখা পোনবগী খুদম অসিনা ঙসিদগীদি পুৱারী ওইখ্রে অমসুং মতম চুপ্পগী ওইনা মুত্থৎখ্রে। ঙসি ‘কর্তব্য পথ’কী মওংদা অনৌবা পুৱারী অমা শেমখ্রে। ঐহাক্না ইরৈবাকচা পুম্নমক্তা নীংতম্বগী অমৃত কাল অসিদা মীখা পোনবগী অতোপ্পা খুদম অমদগী মখোয়না মনীংতম্বা ফংজবগীদমক নুংঙাইবা ফোঙদোকচরি”।
ঙসি লৈবাক অসিগী অথৌবা মপারি নেতাজী সুভাস চন্দ্র বোসকী অচৌবা মীতম অমা ইন্দিয়া গেত্তা খিনখ্রে হায়না প্রধান মন্ত্রীনা ফোঙদোকখ্রে। মহাক্না মখা তারদুনা হায়খি, “মীখা পোল্লিঙৈ মতমদা ব্রিতিশ শাসনগী মীহুৎকী মীতম লৈরমখি। ঙসি লৈবাক অসিনা চপ মান্নবা মফম অদুদা নেতাজীগী মীতম অমা খিন্দুনা অনৌবা, মপাঙ্গল কনবা ভারত অমা পুরকখি”। নেতাজীগী মতিক-ময়াইবু নীংশিংলদুনা প্রধান মন্ত্রীনা হায়খি “সুভাস চন্দ্র বোস অসি পোজিসন অমসুং রিসোর্সশিংনা পীবা শীংনবা মায়োক্নবা ঙম্বা অথৌবা মীশক অমনি। মহাকপু অদুক্কী মতিক নুংশিবীখিবনা মালেম পুম্বনা মহাকপু লুচিংবা অমা ওইনা উখি। মহাক থৌনা লৈ অমসুং মশাগী ইকাই খুম্নবা ঙাক্না চৎলি। মহাক ৱাখল লৈ, মহাক্কী মঙলানশিং লৈ। মঙোন্দা লুচিংবগী মগুনশিং চেল্লি অমসুং পোলিসীশিং হৈ।”
মহাক্না হায়খি মদুদি লৈবাক অসিনা মাগী মতিক-মঙাল লৈরবা হৌখ্রবা মতম অদুবু কাওফদে। ভারতকী মতিক-মঙাল লৈরবা পুৱারী অসি ভারত মচা খুদিংমক্কী ঈদা অমদুং চৎবীদা লেংদনা লৈ। নেতাজীনা ভারতকী হেরিতেজকীদমক চাউথোকচবা পোকখি অমসুং মসিগা লোয়ননা মহাক্না ভারতপু মতমগা চুনবা ওইহনবা পামখি হায়না প্রধান মন্ত্রীনা নীংশিংখি। “নীংতম্বা ফংলবা মতুংদা ভারতনা সুভাস বাবুগী লম্বী তুং ইন্দুনা চৎলম্বা তারবদি ঙসি লৈবাক অসিনা করম্বা পনখৈশিং য়ৌবা ঙমগনি! অদুবু লাইবক থীবদি ঐখোয়গী অথৌবা মীশক অসি নীংতম্বা ফংলবা মতুংদা কাওথোকখি। মহাক্কী ৱাখল্লোনশিং, মখোয়গা মরী লৈনবা খুদম-চাংদমশিং অদু নাথৈদুনা থমখি”, হায়না প্রধান মন্ত্রীনা নীংঙমদবা ফোঙদোকখি। নেতাজীগী ১২৫শুবা মপোক কুমওনগী থৌরমদা কোলকতাদা লৈবা নেতাজীগী ময়ুমদা চৎখিবা অমসুং মতম অদুদা মহাক্না ফাওখিবা ইনর্জী অদুবু নীংশিংখি। “নেতাজীগী ইনর্জী অদুনা ঙসি লৈবাক অসিবু লমজিংনবা ঐখোয়না হোৎনগদবনি। ‘কর্তব্য পথ’তা লৈরিবা নেতাজীগী মীতম অসিনা মসিগী মিদিয়ম অমা ওইরগনি”, হায়না মহাক্না ফোঙদোকখি। প্রধান মন্ত্রীনা হায়খি, “হৌখিবা চহি নিপান্দা ঐখোয়না নেতাজীগী ৱাখল্লোনশিং অমসুং মঙলানশিংগী মমিং তানা অসিগুম্বা ৱারেপশিং অমগী মতুংদা অমা লৌখি। নেতাজী সুভাসনা ১৯৪৭কী মমাংদা অন্দমানবু মনীং তমহনখিবা অখন্দ ভারতকী অহানবা মকোক ওইখি অমসুং মচু অহুমগী ফিরাল চীংখৎখি। মতম অদুদা মহাক্না লাল কিলাদা মচু অহুমগী ফিরেল চীংখবদা করি ফাওগদগে হায়না ৱাখল শাগৎচখি। আজাদ হিন্দ সরকারগী চহি ৭৫ শুরকপগী থৌরমদা লাল কিলাদা মচু অহুমগী ফিরাল চীংখৎপগী ঐহাক্না খুদোংচাবা ফংবদা ঐহাক ইশাবু মসিদা ফাওখিবা ইথিল অদু ফাওখি।” মহাক্না লাল কিলাদা লৈবা নেতাজী অমসুং আজাদ হিন্দ ফৌজতা কত্থোক্লবা ম্যুজিয়ম অদুগী মতাংদসু ফোঙদোকখি। ২০১৯গী রিপব্লিক দেগী পরেদতা বেতরেনশিং অসিগীদমক মতম শাংনা ঙাইদুনা লৈরক্লবা, আজাদ হিন্দ ফৌজকী কন্তিঞ্জেন্তনা মার্চ পাস্ত চৎখিবা অদু নীংশিংখি। মতৌ অসুম্না অন্দমান ইথৎকা মরী লৈনবা মশক অমসুং থবক-থৌরম অদু মপাঙ্গল কনখৎহনখি।
‘পঞ্চ প্রন’গী জাতিগী ফিরেপ অদু নৌহৌনা ফোঙদোক্লদুনা প্রধান মন্ত্রীনা হায়খি, “ঙসি ভারতকী ৱাখল্লোনশিং অমসুং দাইমেন্সনশিং অসি মশাগীনি। ঙসি ভারতকী ফিরেপ অসি মশাগীনি অমসুং মসিগী পান্দমশিংসু মশাগীনি। ঙসি ঐখোয়গী লম্বীশিং অসিসু ঐখোয়গীনি, ঐখোয়গী খুদম-চাংদমশিং অসিসু ঐখোয়গীনি”। মহাক্না মখা তারদুনা হায়খি “ঙসি রাজপথ মুত্থৎলবা মরমদা কর্তব্য পথ ওইখি। ঙসি নেতাজীগী মীতমনা জোর্জ ভি.গী মীতমগী মহুৎ শিল্লি, মসি মীখা পোনবগী ৱাখল্লোন থাদোকপগী অহানবা খুদম নত্তে। মসিনা অহৌবা নত্ত্রগা অরোইবা নত্তে। ৱাখল অমসুং থৌনাদা নীংতম্বগী পান্দম ফংদ্রিবা ফাওবা মসিগী অখাং কনবগী খোঙচৎ অসি মখা চত্থখিগনি”। মহাক্না পি.এম. লৈফম অসিবু রেসকোর্স রোদ ওইরম্বদগী লোক কল্যান মার্গ হায়না মমিং ওনখিবা, নীংতম্বগী নুমিৎকী থৌরম অমসুং বীতিং দি রিত্রীৎ সেরমনীদা ভারতকী ঈশৈগী জন্ত্রশিং শীজিন্নবগী শীংথানীংঙাই ওইরবা অহোংবশিংগী মরমদা ফোঙদোকখি। মহাক্না লোইলম লৈঙাক্কী ইন্দিয়ন নেভীগী এনসাইনবু ছত্রপতি শিবাজীগী এনসাইন্দা ওন্থোকখিবা অদুসু পনখি। “মতৌ অসুম্না নেস্নেল ৱার মেমোরিএল অসিনা লৈবাক্কী মতিক-মঙালগী মশকসু তাক্লি”, হায়না মহাক্না মখা তাখি।
প্রধান মন্ত্রীনা হায়খি মদুদি অহোংবশিং অসিনা খুদম-চাংদমশিং ওইবা খক্তা নত্তনা লৈবাক্কী পোলিসীশিং অদুসু য়াওহনখি। “ঙসি লৈবাক অসিদা ব্রিতিশকী মতমদগী লৈরকপা আইন কয়া অহোংবা পুরকখি। দিকেদ কয়াদগী ব্রিতিশ পার্লিয়ামেন্তগী মতমদগী চৎনদুনা লাকপা ভারতকী বজেৎকী মতম অমসুং তাংসু শেমদোকখি। নেস্নেল এজুকেসন পোলিসীগী খুত্থাংদা লৈবাক্কী হৌজিক লৈরিবা নহারোলশিংবু মীরৈবাক্কী লোল তম্বগী কম্পলজন অসিদগী মনীং তমহনখি”, হায়না মহাক্না ফোঙদোকখি। “মসিনা তাকপদি ইরৈবাকচাশিংগী ৱাখল্লোন অমসুং লমচৎ-শাজৎ অসি মীখা পোনবগী ৱাখল্লোনদগী মনীং তমহল্লে হায়বনি”, হায়না মহাক্না মখা তাখি।
প্রধান মন্ত্রীনা কর্তব্য পথ অসি শুপ্নগী চেক অমসুং নুংনা শাবা লম্বী অমা ওইবা খক্তা নত্তনা ভারতকী দেমোক্রেসীগী হৌখ্রবা মতম অমসুং মতম পুম্বদা লৈখিবা ৱাখল্লোনশিং অদুগী হিংদুনা লৈরিবা খুদম অমা ওইরি হায়না ফোঙদোকখি। লৈবাক অসিগী মীয়াম্না মফম অসিদা লাকপা মতমদা নেতাজীগী মীতম অমসুং নেস্নেল ৱার মেমোরিএলনা ইথিল পীনবগী হৌরকফম অমা ওইরগনি অমসুং মখোয়দা থৌদাং য়াবগী ৱাখল্লোন পোকহনগনি হায়না মহাক্না নৌহৌনা ফোঙদোকখি। প্রধান মন্ত্রীনা রাজপথ অসি ব্রিতিশ শাসনগী মতমদা ভারতকী মীয়ামবু মীনাই ওইনা খনখিবা অদুনি হায়না ফোঙদোকখি। মহাক্না রাজপথকী ইমোসন অমসুং স্ত্রকচর অসি মীখা পোনবগী খুদম অমনি, ঙসি আর্কিতেকচরগী অহোংবগা লোয়ননা মসিগী ৱাখল্লোন অসিদসু অহোংবা পুরকখি। নেস্নেল ৱার মেমোরিএলদগী রাস্ত্রপতি ভবন ফাওবা শাংবা মসিগী কর্তব্য পথ অসি থৌদাং য়াবগী ৱাখল্লোন্না থলহনগনি, হায়না মহাক্না মখা তাখি।
প্রধান মন্ত্রীনা শ্রমিকশিংগী মাইকৈদা অখন্ননা তৌবিমল খঙবা উৎখি অমসুং শিন্মীশিং অসিনা কর্তব্য পথ নৌহৌনা শেমগৎপদা হকথেংননা শরুক তম্বা খক্তা নত্তনা জাতিগীদমক কর্তব্যগী হিংদুনা লৈরিবা খুদম অমা ওইরিবা মখোয়গী মথৌগী অৱাংবা পনখৈ অদু উৎলি। শ্রমজীবিশিংগা লোয়ননা মহাক্না উন্নখিবা অদুগী মতাংদা প্রধান মন্ত্রীনা মখোয়গী থমোয়দা লৈবাক অসিগী মতিক-মঙালগী মঙলান পুদুনা চৎলিবা অদুবু থাগৎপা ফোঙদোকখি। সেন্ত্রেল বিস্তাগী শ্রমজীবিশিং অমসুং মখোয়গী ইমুং মনুংশিং অসি মথংগী রিপব্লিক দে পরেদতা প্রধান মন্ত্রীগী অখন্নবা মীথুংলেনশিং ওইগনি। প্রধান মন্ত্রীনা ঙসি লৈবাক অসিদা শ্রম (লেবর) অমসুং শ্রমজীবি (ৱার্কর)গীদমক ইকাই খুম্নবগী চৎনবী লৈরিবা অসিদা নুংঙাইবা ফোঙদোকখি। মহাক্না হায়, পোলিসীশিংদা সেন্সিতিবিতী লৈবগা লোয়ননা ৱারেপশিংদা সেন্সিতিবিতী লৈরি অমসুং ‘শ্রমেব জয়তে’না লৈবাক অসিগী মন্ত্র ওইরক্লি। মহাক্না কাশি বিশ্বানাথ ধাম, বিক্রান্ত অমসুং প্রয়াগরাজ কুম্ভগী শিন্মীশিংগা লোয়ননা ৱারী শাখিবগী থৌদোকশিং অদু নীংশিংখি। অনৌবা পার্লিয়ামেন্ত বিল্দিং শাবদা য়াওরিবা শিন্মীশিংনা গেলরিশিং অসিগী মনুংদা অমদা ইকাই খুম্নবা উৎকনি হায়না মহাক্না ফোঙদোকখি।
প্রধান মন্ত্রীনা হায়খি মদুদি ভারতনা ঙসি ফিজিকেল, দিজিতেল অমসুং ত্রান্সপোর্ত ইনফ্রাস্ত্রকচরগা লোয়ননা কলচরেল ইনফ্রাস্ত্রকচরদা থবক তৌরি। সোসিএল ইনফ্রাস্ত্রকচরগী ওইনা মহাক্না অনৌবা এম্স অমসুং মেদিকেল কোলেজশিং, আই.আই.তি.শিং, ৱাতর কন্নেক্সনশিং অমসুং অমৃত সরোভরশিং অসি খুদম ওইনা পীখি। খুঙ্গংগী লম্বীশিং অমসুং মতমগা চু্নবা এক্সপ্রেসৱেশিং, রেলৱেজশিং অমসুং মেত্রো নেৎৱার্কশিং অমসুং অনৌবা এয়রপোর্তশিংগী রেকোর্দ ওইবা মশিংনা ত্রান্সপোর্ত ইনফ্রাস্ত্রকচরদা অমুক্তা ওইখিদ্রিবা মওংদা পাকথোক-চাউথোকহনখি। পঞ্চায়তশিং ফাওবা ওপ্তিকেল ফাইবর অমসুং রেকোর্দ ওইবা মশিংদা দিজিতেল পেমেন্তশিং তৌবনা ভারতকী দিজিতেল ইনফ্রাস্ত্রকচর অসি মালেমনা শীংথানরিবা হীরম অমা ওইরি। কলচরেল ইনফ্রাস্ত্রকচরগী মতাংদা প্রধান মন্ত্রীনা হায়খি মসি লাইনিং-লাইশোনগী ওইবা মফমশিংগা মরী লৈনবা ইনফ্রাস্ত্রকচর খক্তা নত্তে মসিদা ঐখোয়গী পুৱারী, ঐখোয়গী জাতিগী অথৌবশিং অমসুং ঐখোয়গী জাতিগী হেরিতেজকা মরী লৈণবা ইনফ্রাস্ত্রকচর য়াওরি। মহাক্না হায়খি মদুদি অসিগুম্বা মফমশিং শেমগৎ-শাগৎপা অসি চপ মান্ননা মরু ওইনা লৌবগা লোয়ননা পাঙথোক্লি। “সরদার পতেলগী স্তেচু ওফ য়ুনিতী নত্ত্রগা ত্রাইবেল নীংতম লান্মীশিংদা কত্থোকখিবা ম্যুজিয়ম ওইরবসু, পি.এম ম্যুজিয়ম নত্ত্রগা বাবাসাহেব অম্বেদকর মেমোরিএল, নেস্নেল ৱার মেমোরিএল নত্ত্রগা নেস্নেল পুলিস মেমোরিএল ওইরবসু মসি কলচরেল ইনফ্রাস্ত্রকচরগী খুদমশিংনি” হায়না প্রধান মন্ত্রীনা মখা তাখি। শ্রী মোদীনা মখা তারদুনা হায়খি মদুদি মখোয়না ঐখোয়গী নাৎ অসিবু অপুনবা জাতি অমা ওইনা মশক তাক্লি। মসিনা ঐখোয়গী ভেল্যুশিং অসি করিনো অমসুং মখোয়বু ঐখোয়না করম্না ঙাকশেনবগী তাক্লি। প্রধান মন্ত্রীনা হায়খি মদুদি সোসিএল ইনফ্রাস্ত্রকচর, ত্রান্সপোর্ত ইনফ্রাস্ত্রকচর, দিজিতেল ইনফ্রাস্ত্রকচর অমসুং কলচরেল ইনফ্রাস্ত্রকচর অপুনবদা শাহৌ পীরবা খক্তদা এস্পিরেস্নেল ইন্দিয়ানা চাউনা খুমাং চাউশিনবা ঙমগনি। “ঙসি লৈবাক অসিনা কর্তব্য পথকী মওংদা কলচরেল ইনফ্রাস্ত্রকচরগী অচৌবা খুদম অমা উবা ফংবদা ঐহাক্না নুংঙাইবা পোকই” হায়না প্রধান মন্ত্রীনা মখা তাখি।
ৱারোল পীবা লোইশিনবদা প্রধান মন্ত্রীনা লৈবাক অসিগী প্রজা খুদিংমক্তা নৌনা শাবা কর্তব্য পথ অসিগী মতিক-মঙাল অসি লাক্তুনা য়েংনবগী বর্তন তৌখি। “মসিগী দিবেলপমেন্ত অসিদা নখোয়না ভারতকী তুংলমচৎ উবা ফংগনি। মসিদা লৈরিবা ইনর্জী অসিনা নখোয়না ঐখোয়গী অচৌবা জাতি, অনৌবা থাজবগী অনৌবা মঙলান অমা পীগনি” হায়না প্রধান মন্ত্রীনা হায়খি। প্রধান মন্ত্রীনা নেতাজী সুভাস চন্দ্রগী পুন্সিদা য়ুম্ফম ওইবা দ্রোন শো অমা মথংগী নুমিৎ হুমনি অসিদা পাঙথোক্কদৌরি হায়না ফোঙদোকখি। প্রধান মন্ত্রীনা প্রজাশিংদা মসিদা লাক্নবা অমসুং পিকচরশিং নমদুনা #KartavyaPathকী হেস্তেগকা লোয়ননা সোসিএল মেদিয়াদা অপলোদ তৌনবা হায়খি। “অপুনবা মফম অসিনা দিল্লী মীয়ামগী থমোয়গী ইহুল ওইরি অমসুং ময়াম্লবা মীয়াম্না মখোয়গী ইমুং-মনুংশিংগা লোয়ননা নুমিদাংগী মতমদা লাক্তুনা মতম লেল্লি হায়বা হায়বা ঐহাক্না খঙই। কর্তব্য পথ অসিগী প্লান্নিং, দিজাইনিং অমসুং লাইতনিং অসি মসি খঙনা পাইখৎখি” হায়না মহাক্না ফোঙদোকখি। “কর্তব্য পথ অসিগী ইথিলনা লৈবাক অসিদা থৌদাং য়াবগী ইচেল অমা চেলহনগনি অমসুং ইচেল অসিনা ঐখোয়বু অনৌবা অমসুং চাউখৎপা ভারত অমগী ফিরেপ থুংহনবদা মতেং পাংগনি হায়না ঐহাক্না থাজৈ”, হায়না প্রধান মন্ত্রীনা ফোঙদোকখি।
হাউসিং অমসুং অর্বান এফিয়র্সকী কেন্দ্র মন্ত্রী, শ্রী হরদীপ সিংহ পুরি, তুরিজমগী কেন্দ্র মন্ত্রী, শ্রী জি. কিশন রেদ্দী, ভারতকী কলচরগী কেন্দ্রগী রাজ্য মন্ত্রীশিং, শ্রী অর্জুন রাম মেঘৱাল অমসুং শ্রীমতি মীনাক্ষি লেখি অমসুং হাউসিং অমসুং অর্বান এফিয়র্সকী কেন্দ্রগী রাজ্য মন্ত্রী, শ্রী কৌশল কিশোরনা থৌরম অসিদা শরুক য়াখি।
বেকগ্রাউন্দ
প্রধান মন্ত্রী শ্রী নরেন্দ্র মোদীনা ঙসি ‘কর্তব্য পথ’ শঙ্গাখ্রে। মসিনা হান্নগী রাজপথনা পাঙ্গলগী খুদম ওইরম্বদগী কর্তব্য পথনা মীয়াম্না মপু ওইবগী, মপাঙ্গল কলহনবগী খুদম ওইবা মায়কৈদা হোংলকপগী খুদম চাংদম ওইরি। থৌরম অদুদা প্রধান মন্ত্রীনা ইন্দিয়া গেত্তা নেতাজী সুভাস চন্দ্র বোসকী মীতমসু মায়খুম হাংদোকখ্রে। লৌখৎলিবা খোঙথাংশিং অসি ‘লোইলমগী ৱাখল্লোনগী মমি পুম্নমক মাংহনখিবা’ হায়বা পি.এম.গী ‘পঞ্চ প্রান’ শিংগী মরক্তগী অমগগী পরিংদনি।
হৌখিবা চহিশিংদা, রাজপথ অমসুং থংনবা সেন্ত্রেল ভিস্তা এভেন্যুগী মফমশিংদা মফমসিদা লাকপা মীওইশিং চিনবা হেনগৎলকপা অমদি মফমসিগী ইনফ্রাস্ত্রকচরদা শাফু পীবগী ফীভম থেংদুনা লাক্লি। মফমসিদা পব্লিক তোইলেৎ, স্ত্রীত ফর্নিচর অমসুং মরাং কায়বা পার্কিং মফম্নচিংবা তঙাই ফদনা চঙদ্রবা য়াদ্রবা ফীভমশিং লৈতে। মখা তানা মফমসিদা সাইনেজ মতিক চাদবা, ঈশিংগী ফীচরশিং নীংথিনা য়েংশিনবিদবা অমদি মওং মরিল নাইদনা পার্কিং তৌবগী ফীভম লৈরম্মি। অদুগা গনতন্ত্র নুমিৎ অমসুং লৈবাক্কী ওইবা থৌরমশিং অয়েৎ অপন য়াম্না লৈহন্দনা অমদি মীয়াম চত্থোক চৎশিন্দা অপনবা কা হেন্না থোকহন্দনা শিনবগী মথৌ তাবসু লৈরি। নৌনা শেমগৎ শাগৎলিবা অসি অসিগুম্বা ৱাফমশিং অসি মাঙদা থম্লগা অর্কিতেকচরেল করেক্তরশিংগী মশক মওং থোইদোক্না কায়হন্দনা পায়খৎপনি।
কর্তব্য পথতা মশক ফজথোকহল্লবা লেন্দস্কেপ, খোঙ লম্বী য়াওবা লোন, অহেনবা অশং অমানগী মফমশিং, নৌনা শেমদোক্লবা কেনেলশিং, অনৌবা এমেনিতী ব্লোকশিং, ফীভম ফগৎহল্লবা সাইনেজ অমসুং ভেন্দিং কিওস্কশিং য়াওগনি। মসিগী মথক্তা খোঙনা চৎপা মীওইশিংগী অনৌবা অন্দরপাসশিং, ফীভম ফগৎহল্লবা পার্কিং মফমশিং, অনৌবা একজিবিসন পেনেলশিং অমসুং ফীভম ফগৎহল্লবা নুমিদাংগী মৈঙালগী ফীভম্নচিংবা ফীচরশিংনা মফমসিদা লাকপা মীওইশিংগী এস্কপিরিএন্স হেনগৎহল্লগনি। মফমসিদা সোলিদ ৱেস্ত মেনেজমেন্ত, শীজিন্নবা লোইরবা ঈশিং রিসাইকল তৌবা, নোংগী ঈশিং য়োকশিনবা অমসুং ইনর্জী য়াম্না চঙদবা লাইতিং সিস্তেম অমদি অতৈ অতৈনচিংবা য়াম্লবা তুং কোইনা চৎকদবা ফীচরশিং য়াওরি।
প্রধান মন্ত্রীনা মায়খুম হাংদোকখিবা নেতাজী সুভাস চন্দ্র বোসকী মীতম অসি চহিসিগী অঙনবা শরুক্তা প্রধান মন্ত্রীনা পরাক্রম দিবস (জনুৱারী ২৩)দা মায়খুম হাংদোকখিবা নেতাজীগী হোলোগ্রাম মীদম থম্লিবা মফমদুমক্তদা খিনবনি। গ্রেনাইতনা শাবা মীতম অসি ঐখোয়গী নীংতম ইহৌদা নেতাজীনা লৌরম্বা মমল নাইদ্রবা থৌদাংশিংগী চপ চারবা শ্রদ্ধাঞ্জলি অমনি, অমদি লৈবাকসিনা মহাক্কী লমন তোনশিন্দুনা লৈহৌবগী খুদম ওইরগনি। শ্রী অরুন য়োগিরাজনা মকোক চিংদুনা শাবা ফীত ২৮ ৱাংবা মীতম অসি মোনোলিথিক গ্রেনাইত নুঙ অমদগী শাবনি অমদি এম.তি. ৬৫ লুম্মী।
*****
(Release ID: 1857951)
Visitor Counter : 127
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam