কেন্দ্রগী কম্মর্স অমসুং ইন্দস্ত্রী, কঞ্জুমর এফিয়র্স, ফুদ অমসুং পব্লিক দিস্ত্রিব্যুসন অমসুং তেক্সতাইল মন্ত্রী শ্রী পিয়ুশ গোয়লনা ঙসি হায়খি মদুদি 'ভারত' হায়বদি 'খুদোংচাবা' হায়বনি, অমসুং মখা তানা হায়খি মদুদি মসি ভারতকী দিকেৎ অমা ওইবখক্তা নত্তে, মসি ভারতকী সেঞ্চুরীনি। মহাক্না সানফ্রান্সিস্কোদা ঙসি স্তানফোর্দ গ্রেজুএৎ স্কুল ওব বিজিনেস মহৈরোইশিংগা ৱারী শানখি।

শ্রী গোয়লনা ফোংদোকখি মদুদি ভারতনা হৌখিবা চহি খরসিদা খোঙজেল য়াঙনা অহোংবা পুরকপা য়ানবা, শেন্মিৎলোন চাউখৎনবা, সিস্তেম ফগৎনবা, তেক্নোলোজীগা শম্নবা হেনগৎনবা অমসুং মালেমগী খ্বাইদগী ফরবশিংদগী তম্বা য়ানবা ফাউন্দেসন শেমখ্রে। মন্ত্রীনা ফোংদোকখি মদুদি ভারতনা লৈবাক অসিগী মীপুম খুদিং, লৈবাক অসিদা পোক্লিবা অঙাং খুদিংমক্না অফবা পুন্সি অমসুং মঙম শানবা তুংলমচৎ অমা লৈনবা হোৎনরি।

মমাংগী শেনবা চহিদা মাংজৌননা য়ু.এস.দি. ৬৭৫ বিলিয়ন লানখ্রবা ভারতকী এক্সপোর্তকী মতাংদা পল্লদুনা মহাক্না হায়খি মদুদি লৈবাক অসিনা ২০৩০ ফাওবদা ইন্তর্নেসনেল ত্রেদতা য়ু.এস.দি. ত্রিলিয়ন ২ য়ৌনা পুখৎপা পাম্লি অমসুং ভারতনা নীংতম্বগী ১০০শুবা পালন পাঙথোকপা মতমদদি য়ু.এস.দি. ৩০ ত্রিলিয়ন একনোমী ওইরগনি। মসিগী খুদোংচাবা অসিনি ভারতনা মালেম মমাংদা পুথোকপা পাম্লিবসি। মসি ভারতকী দিকেৎ অমা ওইবখক্তা নত্তে, মসি ভারতকী সেঞ্চুরীনি হায়না মহাক্না হায়খি।

ওন্ত্রপ্রিন্যুর অমসুং স্তার্তঅপ চেম্পিয়ন্সতা মায় ওনশিল্লক্লিবা ভারতকী নহাশিংদা থম্লিবা থাজবগী মতাংদা পল্লদুনা শ্রী গোয়লনা হায়খি মদুদি ভারতকী অনৌবা এজুকেসন পোলিসীনা লিবরেল এজুকেসন্দা পুক্নিং থৌগৎলি অমসুং মালেমদা খ্বাইদগী ফরবা স্কুলশিংগা হকচিনবা মরী শেম্নবা হোৎনরি।

মন্ত্রীনা হায়খি মদুদি ভারতকী প্রধান মন্ত্রী শ্রী নরেন্দ্র মোদীনা মহাক্কী মফমদা লৈরিবা অফবা মেনেজমেন্ত প্রিন্সিপলশিংদা য়ুম্ফম ওইবা ভারতকী মঙলান অমসুং তুংগী থৌরাংশিং ফোংদোকখ্রে। মহাক্না এল.ই.দি. লাইতিং রিভোলুসনগী খুদমশিং পনখি অমসুং ২০১৪দা প্রধান মন্ত্রীনা তুং কোইনা চৎপা য়াবা, ঐখোয়গী পাৱর সেক্তরদা লৈরিবা ইনভেস্তমেন্তকী পোৎলুম হন্থনবা অমসুং লাইরবশিংগী এনর্জী বিল হন্থনবা  এনর্জী কঞ্জর্বেসনদা মীৎয়েং থমখি অমসুং ২০১৫দা এল.ই.দি. লাইতিং প্রোগ্রাম অমা হৌদোকখি। শ্রী গোয়লনা মহাক্কী পুক্নিংগী ৱারোল থম্লদুনা হায়খি মদুদি অতাঙবা এল.ই.দি. লেম্প লৈবা মতমদা সবসিদী থাদোক্নবা লৌখিবা প্রধান মন্ত্রীগী ৱারেপ অসিসু ভারতকী এল.ই.দি. লাইতিং হেনগৎনবা মাইকৈদা অচৌবা মীকুপ অমা ওইখি। লৈঙাক অসিনা স্তেকহোল্দরশিংগা, ইম্পোর্তরশিংদগী দিস্ত্রিব্যুতরদগী সপ্লাইয়রশিংগা পুন্দুনা এল.ই.দি. বল্বকী মমল অসি থৌরম অসিগী অহানবা চহিদা, স্কেলগী একনোমী পুশিন্দুনা অমসুং সপ্লাইয়রশিংনা মাইয়োক্নরিবা খুদোংচাদবশিং কোকহন্দুনা মমল ৮৫% য়ৌনা হন্থখি।

মহাক্না হায়খি মদুদি ভারতনা এল.ই.দি. লাইতিং প্রোগ্রাম মায় পাকহন্নবগীদমক হৌরকফম থিবা, অনৌবা শেল থাদবগী মওং, একনোমীস ওব স্কেল অসিনচিংবা মেনেজমেন্তকী প্রিন্সিপল কয়া মায় পাক্না শীজিন্নবা ঙমখ্রে। মসিমসু পনবা য়াই মদুদি ভারতনা হায়রিবা প্রোগ্রাম অসিগী মখাদা সি.ও.২ মিলিয়ন তন ৮০ রোম থাদোকপদগী কনবা ঙমখ্রে। শ্রী গোয়লনা হায়খি মদুদি ভারতনা, মতম অমদা এল.ই.দি. লেম্পশিং ময়ান্দগী পুশিল্লক্লম্বদগী হৌজিক্তি মালেমগী অতৈ মফমশিংদা অফবা এল.ই.দি. লেম্পশিং থাদোকপা ঙম্লে।

থৌরাং অমখক্তনা পুরকপা ঙমখিবা অচৌবা অহোংবসিবু পল্লদুনা শ্রী গোয়লনা হায়খি মদুদি ভারতনা হৌজিক্তি অসিগুম্বা অহোংবা পুরকপা ঙম্বা থৌরাং চাম্মা-চাম্মা পায়খৎনবা থৌরাং তৌরি। ভারতকী ফিন্তেককী মায় পাকপগী মতাংদা পল্লদুনা মন্ত্রী অসিনা হায়খি মদুদি দিজিতেল ত্রাঞ্জেক্সনগী চাদা ৪০ রোমদি ভারততা ঙসি পাঙথোক্লি, মসিদা অপীকপা দুকান মচাশিংসু দিজিতেল পেমেন্ত তৌরি।

ভারতনা মালেমদা পীরিবা অঙকপা খুদোংচাবশিং অসিগী মতাংদা পল্লদুনা শ্রী গোয়লনা স্তানফোর্দকী মহৈরোইশিংবু ভারতকা পুন্দুনা অমসুং অচৌবা মঙলানগা লোইননা বিলিয়ন হেন্না লৈরিবা মীয়ামগা থবক পায়খৎমিন্ননবা বার্তন তৌখি।

*****