مرکزی وزیر تعلیم اور ہنرمندی کی ترقی اور صنعت کاری کے وزیر جناب دھرمیندر پردھان اور نوجوانوں کے امور اور کھیل کود کے مرکزی وزیر جناب انوراگ ٹھاکر نے آج نئی دہلی میں یووا سمواد ’’انڈیا@2047‘‘ سے خطاب کیا۔ اس موقع پر نوجوانوں کے امور اور کھیلوں کے وزیر مملکت جناب نشیت پرمانک بھی موجود تھے۔ باکسر نکہت زرین، ریس واکر پرینکا گوسوامی، ہندوستانی ہاکی ٹیم کے کھلاڑی جناب  پی آر سری جیش، کوہ پیما محترمہ ارونیما سنہا اور موٹیویشنل اسپیکر محترمہ  ابھا مریادا بنرجی نے بھی اس تقریب میں شرکت کی۔ اس موقع پر نوجوانوں کے امور کے سکریٹری جناب سنجے کمار اور دیگر معززین بھی موجود تھے۔

اس موقع پر خطاب کرتے ہوئے جناب  پردھان نے کہا کہ ہماری ہزاروں سالوں کی تاریخ میں ہماری یووا شکتی نے ہمارے ملک کی تقدیر کو تشکیل دینے میں قیادت کی ہے۔ انہوں نے مزید کہا کہ شہید بھگت سنگھ، شہید باجی راوت، رانی گائڈنلیو اور ان جیسے لاتعداد لوگوں نے اپنی ابتدائی جوانی کے دوران ہمیں متاثر کیا اور اگلی صف میں رہ کر قیادت کی۔

انہوں نے کہا کہ 21ویں صدی میں ہندوستانی اقدار، اخلاقیات، علم اور ماڈلوں کو دنیا تک لے جانے کی ذمہ داری ہمارے نوجوانوں پر عائد ہوتی ہے۔ جس جذبے اور خلوص کے ساتھ ہمارے مجاہدین آزادی ہماری آزادی کے لیے لڑے، آج ہندوستان کو مزید بلندیوں پر لے جانے کے لیے ہمارے نوجوانوں کو بھی اسی جذبے اور خلوص سے پُر  ہونا چاہیے، خاص طور پر امرت کال کے ان 25 سالوں میں۔ انہوں نے مزید کہا کہ دنیا ہندوستان کو بڑی امید سے دیکھتی ہے۔

جناب پردھان نے کہا کہ ہمارے نوجوانوں کی قابلیت، استقامت اور جذبہ متاثر کن اور حوصلہ افزا ہے۔ انہوں نے یووا سمواد کے انعقاد کے لیے وزارت کھیل اور نوجوانوں کے امور کی تعریف کی، خاص طور پر ایسے اہم وقت میں جب ہم ’آزادی کا امرت مہوتسو‘ اور اپنی آزادی کا 75 واں سال منا رہے ہیں۔

اس موقع پر خطاب کرتے ہوئے جناب انوراگ ٹھاکر نے کہا کہ جیسا کہ وزیر اعظم جناب نریندر مودی ہمیشہ کہتے ہیں کہ نوجوان وہ انجن ہے جو ملک  کو کامیابی کی طرف لے جاتا ہے۔ اب یہ ہمارے نوجوانوں کا فرض ہے کہ وہ امرت کال کے دوران ملک کو کامیابی کی چوٹی کی جانب لے جائیں۔ امرت کال میں، نوجوانوں کو امرت گولز کا تعین کرنا چاہیے اور ان گولز کو حاصل کرنے کے لیے اپنے فرائض کو ذمہ داری کے ساتھ ادا کرنا چاہیے۔ انہوں نے مزید کہا کہ نوجوانوں کو قوم کی تعمیر میں سب سے بڑا  تعاون کرنا ہوگا اور ملک کو وشو گرو بنانا ہے۔

جناب  ٹھاکر نے مزید کہا کہ نوجوانوں کے امور کا محکمہ ملک بھر میں نچلی سطح تک 750 یووا سمواد پروگرام منعقد کرے گا تاکہ انہیں قومی اور بین الاقوامی اہمیت کے مختلف مسائل پر اپنے خیالات کا اظہار کرنے اور اپنے خیالات سے دوسروں کو واقف کرانے کا پلیٹ فارم فراہم کیا جا سکے۔ وزیر موصوف نے کہا کہ ملک میں نوجوانوں کی ترقی اور فروغ کے لیے چار عناصر مرکزی حیثیت رکھتے ہیں یعنی تعلیم، روزگار، کاروباری اور بااختیار بنانا۔ رضاکاریت کی اہمیت پر روشنی ڈالتے ہوئے وزیر موصوف نے کہا کہ ہر نوجوان رضاکارانہ طور پر ملک کی مخلصانہ خدمت کر سکتا ہے۔ توانائی اور ماحولیات کے تحفظ، فٹ انڈیا، سووچھ بھارت، منشیات کی لت کے خلاف مہم، پوشن ابھیان جیسے شعبے ایسے اہم شعبے ہیں جن میں نوجوان اپنا قیمتی تعاوم دے سکتے ہیں۔

جناب  انوراگ ٹھاکر نے نوجوانوں پر زور دیا کہ وہ ہر گھر ترنگا مہم میں حصہ لیں۔ وزیر  موصوف نے کہا کہ ترنگا 130 کروڑ ہندوستانیوں کے اتحاد کی علامت ہے۔ انہوں نے مزید کہا کہ مجاہدین آزادی جنگ  آزادی کے دوران اپنی جانوں کا نذرانہ پیش کیا لیکن اب نوجوانوں سے ملک کو وشو گرو بنانے کے لیے ’’یوگدان نہیں بلیدان‘‘ کی ضرورت ہے۔

حاضرین سے خطاب کرتے ہوئے، نوجوانوں کے امور اورکھیلوں کے وزیر مملکت جناب نشیت پرمانک نے ملک کی تعمیر میں نوجوانوں کی شمولیت کی ضرورت پر زور دیا۔ جناب  پرمانک نے عالمی وبا کے دوران فرنٹ لائن واریئرز کے طور پر این وائی کے ایس اور این ایس ایس رضاکاروں کے رول کی تعریف کی۔ وزیر اعظم کے سنکلپ سے سدھی منتر سے تحریک لے کر، ہندوستان کا نوجوان اب نوکری کے متلاشی سے نوکری پیدا کرنے والا بن گیا ہے۔

نوجوانوں کے امور کے سکریٹری جناب سنجے کمار نے کہا کہ نوجوان پر  ہندوستان کی آبادی کا ایک بڑا حصہ ہونے کے ناطے ملک کی تعمیر میں اپنا تعاون کرنے کی ذمہ داری  ہیں۔

بات چیت کے سیشن میں، باکسر نکہت زرین، ریس واکر پرینکا گوسوامی، ہندوستانی ہاکی ٹیم کے کھلاڑی جناب  پی آر سری جیش، کوہ پیما محترمہ ارونیما سنہا اور موٹیویشنل اسپیکر محترمہ  ابھا مریادا بنرجی نے نوجوانوں کو اپنے تجربات سے واقف کرایا۔  جناب  انوراگ ٹھاکر نے بھی نوجوان شرکاء سے بات چیت کی اور ان کے سوالات کے جوابات دیئے۔

ملک بھر میں 750 یووا سمواد پروگراموں میں حصہ لینے والے نوجوانوں کو قومی اور بین الاقوامی اہمیت کے مختلف مسائل پر اپنے خیالات کا اظہار کرنے کا موقع فراہم کیا جائے گا۔ مزید یہ کہ یہ تقریب انہیں ایک دوسرے سے جڑنے اور اپنے خیالات سے دوسروں کو واقف کرانے  کا پلیٹ فارم فراہم کرے گی۔

۔۔۔۔۔۔۔۔۔۔۔

ش ح۔ا گ۔ن ا۔

U-9091