খুরুমজরী,

হরিয়ানাগী রাজ্যপাল শ্রী বন্দারু দত্তাত্রেয়া, কেন্দ্রগী মন্ত্রী-মন্দলদা মরুপ ওইরিবা নরেন্দ্র সিংহ তোমরজী, হরদীপ সিংহ পুরীজী, রামেশ্বর তেলীজী, এম.পি.শিং, এম.এল.এ.শিং, পানীপত্তা তিল্লীবা মশিং য়াম্লবা ঐগী নুংশিরবা লৌমী ইচিল-ইনাওশিং, থৌরম অসিগা মরী লৈনবা অতোপ্পা মশক নাইবা মীওইশিং, নুপী অমসুং নুপাশিং, পুম্নমক্তা ঐহাক্না মালেমগী বাইওফ্যুল নুমিৎনা লাকপদা য়াইফ-পাউজেল পীজরি!

ঙসিগী থৌরম অসি হরিয়ানাগী পানীপত য়াওনা লৈবাক পুম্বগী লৌমীশিংগীদমক য়াম্না মরু ওই। বাইও-ফ্যুল প্লান্ত অমা ওইরিবা পানীপতকী মোদর্ন ইথানোল প্লান্ত অসি শুপ্নগী অহৌবা অমনি। প্লান্ত অসিনা দিল্লী, হরিয়ানা অমসুং এন.সি.আর.দা পোলুসন থোকপা হন্থহনবদা মতেংসু পাংলগনি। ঐহাক্না হরিয়ানাগী মীয়াম মরু ওইনা লৌমী ইচিল ইনাওশিংদা নুংঙাইবা ফোঙদোকচরি। অমরোমদা হরিয়ানা অসি মরম অমগীসু থাগৎফম থোকই। কম্মনৱেল্থ গেমসতা হরিয়ানাগী মমোম অমসুং মপারীশিংনা শীংথানীংঙাই ওইরবা পর্ফোরমেন্স উৎতুনা লৈবাক অসিবু চাউথোকচাবা পোকহনখি, লৈবাক অসিগীদমক মেদল কয়া লৌরকখি। স্পোর্তসকী লমদা হরিয়ানাগী শান্নরোয়শিংনা উৎখিবা থৌনা অদুগা চপ মান্ননা হরিয়ানাগী লৌবুকশিংনা হৌজিক ইনর্জী পুথোক্লগনি।

মরুপশিং,

মহৌশাবু থৌনিজরিবা ঐখোয়গুম্বা লৈবাক অমদা বাইওফ্যুল অসি মহৌশাবু ঙাকশেনবগী পাংখক ওই। ঐখোয়গী লৌমী ইচিল-ইনাওশিংনা মসিগী মরমদা হেন্না নীংথিনা খঙই। ঐখোয়গীদমক্তা বাইওফ্যুল হায়বা অসি গ্রীন-ফ্যুল, অকোইববু কল্লিবা ফ্যুল হায়বনি। লৌমি ইচিল-ইনাওশিংনা চহি লিশিং কয়াদগী খঙনরক্লি মদুদি মহৈ-মরোংগী মরু হুনবদগী হৌরগা মহৈ-মরোং লোকপা ফাওবা অমসুং মদুগী মতুংদা কৈথেলদা পুথোক-পুশিন তৌবা ফাওবা, অদোম্না করিগুম্বা অমত্তা মাংহন তাকহনদে। লৌমিশিংনা মখোয়গী লৌবুক্তা থাবা পোৎ খুদিংমক মতৌ করম্না শীজিন্নগদগে হায়বদু খঙই। মীয়ামগীদমক চানবা থাবা লৌবুক্তা, শা-শনশিংগী মচিঞ্জাকসু লাকই। ঐখোয়গী লৌমি অয়াম্বনা লৌরোক লোইরবা মতুংদা লৌবুক্তা লেমহৌরিবা চরুখোকশিং অদু মতৌ করম্না অফবা মওংদা শীজিন্নগদগে হায়বদু খঙই। চরুখোকশিং অসি শা-শনগী মচিঞ্জাক শেম্বদা শীজিন্নৈ, খুঙ্গং কয়াদা চরুখোক অসি মৈ থানবগীদমক্তসু শীজিন্নৈ। অদুবু মসিসু অচুম্বনি মদুদি হরিয়ানাগুম্বা মফমশিংদা ফৌ অমসুং গেহু হেন্না পুথোকপা মফমশিংদা লৌউ-শিংউগী পোত্থোকশিং অসি মপুং ফানা শীজিন্নবা ঙমখিদে। হৌজিক্ মফম অসিদা লৈরিবা লৌমিশিংনা লৌউ-শিংউগী পোত্থোকশিং শীজিন্নবগী অতোপ্পা পাম্বৈ অমা ফংলে। অমসুং মদুদি - মোদর্ন ইথানোল প্লান্ত, বাইও-ফ্যুল প্লান্ত অসিনি। পানীপত্তা লৈরিবা বাইওফ্যুল প্লান্ত অসিনা চরুখোকশিংবু মৈ থাদোক্তনা মাঙহনবা ঙম্লগনি। মসিদগী অমা অনিখক্তং কান্নবদা নত্তনা হীরম কয়াদা কান্নবা ফংমিন্নরগনি। অহানবা কান্নবা অসি চরুখোকশিং মৈ থাবনা পীরিবা অৱা-চৈথেংদগী মালেম ইমাবু মনীং তমহল্লগনি। মালেম ইমানা চরুখোকশিং অসি মফম চানা শীজিন্নখ্রে হায়না নুংঙাইবা পোক্লগনি। অনিশুবা কান্নবা অসিনা চরুখোক ককপগী অমসুং মসিবু মাংহনবগী অনৌবা সিস্তেমশিং, পুথোক-পুশিন তৌবগী অনৌবা ফেসিলিতীশিং অমসুং অনৌবা বাইওফ্যুল প্লান্তশিং অসিনা খুঙ্গংশিং অসিদা অনৌবা থবক্কী খুদোংচাবশিং পীরগনি। গ্রীন জোবশিংগী লম অসি মপাঙ্গল কনখৎলগনি। অহুমশুবা কান্নবা অসিনা লৌমীশিংদা পোৎলুম অমা ওইরম্বা, অৱাবা পোৎশক অমা ওইরম্বা চরুখোকশিং অসি মখোয়দা অহেনবা শেন্থোক লৈনবা পাম্বৈ অমা ওইরগনি। মরিশুবা কান্নবনা পোলুসন হন্থহল্লগনি অমসুং অকোইববু ঙাক-শেনবদা লৌমীশিংনা লৌরিবা থৌদাং অসি হেনগৎলগনি। অমসুং মঙাশুবা কান্নবনা লৈবাক অসিনা অতোপ্পা ফ্যুল অমা ফংলগনি। হায়বদি মমাংদা অমাং-অতা থোকহনখিবা চরুখোক অদু, মদুদগী অমৃত মঙা অসি পুথোক্লগনি। লৈবাক অসিঈ তোঙান-তোঙানবা মফমশিংদা অসিগুম্বা বাইওফ্যুল প্লান্ত কয়া অমা লিংখৎনবা থবক পাইখৎলিবা অসিদা ঐহাক নুংঙাইবা ফাওই।

মরুপশিং,

রাজনিতীগী ওইবা খুদোংচাবা লৌনবগীদমক অশম্বা লম্বেল থিদুনা সমস্যাশিংবু নাথৈদুনা থম্নবা হোৎনরিবা মীওইশিংনদি করিগুম্বা সমস্যা অমত্তা মতম চুপ্পগী ওইনা কোকহনবা ঙম্লোই। অশম্বা লম্বেলশিং অদু মতম খরগী ওইনা শীংথারম্বা য়াই, অমসুং রাজনিতীগী ওইবা খুদোংচাবা খরা ফংখিবদি য়াই, অদুবু সমস্যা অদুদি কৈদৌনুংদা কোকপা নাইরোই। অশম্বা লম্বেল থিবনা শোর্ত সর্কিৎ শোইদনা থোক্কনি। অশম্বা লম্বেল চৎপগী মহুত্তা, ঐখোয়গী লৈঙাক অসিনা সমস্যাশিংবু মতম চুপ্পগী ওইনা কোকহন্নবা কন্না হোৎনরি। চহি কয়াগী মমাংদগী চরুখোকশিংগী মতাংদা পন্নদুনা লাক্লি। অদুবু অশম্বা লম্বেল থীবগী ৱাখল্লোন অসিনদি কোকহনবা ঙমলমদ্রে। লৌমিশিংগী চরুখোক্কা মরী লৈনবা সমস্যাশিংগী মতাংদা ঐখোয়না খঙই, মরম অদুনা ঐখোয়না মখোয়দা মসিদগী অৱাবা কোকহন্নবা ইচম চম্বা ওপ্সনশিংসু পীরি।

চরুখোক্কীদমক শেলগী তেংবাং পীনবা ফার্মর্স প্রদ্যুসর ওর্গনাইজেসন (এফ.পি.ও.)দা ক্রোপ রেসিদ্যুগী মোদর্ন মেছিনরীদা চাদা ৮০গী সবসিদী পীখি অমসুং হৌজিক মসিগী মোদর্ন প্লান্ত অসিনা সমস্যা অসিগী মতম চুপ্পগী ওইবা ৱারোইশিন অমা পীবদা মতেং পাংলগনি। মসিগী মোদর্ন প্লান্ত অসিদা, চেং অমসুং গেহুগী থাউগা লোয়ননা, লেমহৌরিবা চরু, চুগি বাগাস, অপুম্বা চেং, হায়রিবা পুম্নমক অসি ইথানোল পুথোকপদা শীজিন্নগনি। হায়বদি লৌমীশিংগী অৱাবা কোকহল্লগনি হায়বনি। চুরুখোক মৈ থাদবা য়াদবনা মরম ওইদুনা চৈবীরম্বা লৌমীশিং অদুনা হৌজিক্তি বাইও-ফ্যুল পুথোকপা অমসুং জাতি শেমগৎপদা শরুক তম্বা অসিদা চাউথোকচবা পোক্লগনি। পানীপত্তা লৈরিবা সরকারনা অতোপ্পা স্কিম অমা হৌদোকখ্রে, গোবরধন স্কিম, শন-ইরোইশিংগী শনথী অদু হুনদোক্নবা গোবর ধন য়োজনাসু লৌমীশিংগী শেন্থোক হেনগত্হন্নবা অতোপ্পা পাম্বৈ অমা ওইরক্লি।

মরুপশিং,

হার ওইরো, কেমিকেল ওইরো, অচাথাও ওইরো, ক্রুদ ওইল ওইরো, গ্যাস ওইরো, ঐখোয়না নিংতম্বগী চহি তরাগী খুজিং কয়াদগী মপান লৈবাকশিংদা য়াম্না মখা পোল্লি। মরম অদুনা মালেমগী ফিভমশিংনা মরম ওইদুনা সপ্লাই চেন অসি খুদোংথিবা থোকহল্লবা মতমদা ভারতসু অৱাবা অসিদগী নান্থথোকপা ঙমদে। হৌখিবা চহি ৮দগী লৈবাক অসিনা শীংনবশিং অসিগী মতম চুপ্পগী ওইবা ৱারোইশিন পুরক্নবা হোৎনরি। লৈবাক অসিদা অনৌবা ফর্তিলাইজর প্লান্তশিং লিংখৎলি, নেনো ফর্তিলাইজরশিং পুথোক্লি, অচাথাওগীদমক অনৌবা মিসনশিংসু হৌখ্রে। লাক্কদৌরিবা মতম অসিদা, মসি পুম্নমক অসিনা লৈবাক অসিবু সমস্যাশিং অসি মতম চুপ্পগী ওইনা কোকহনবগী মায়কৈদা চংশিল্লি।

মরুপশিং,

নীংতম্বগী অমৃতকাল অসিদা লৈবাক অসিনা মরোমদোম লেপচবা ঙম্বা ভারতকী ৱারেপ অদু মংফাওনহন্নবগী মায়কৈদা খোঙজেল য়াংনা চংশিল্লি। ঐখোয়গী খুঙ্গংশিং অমসুং ঐখোয়গী লৌমীশিং অসি আত্মনির্ভরগী খ্বাইদগী চাউবা খুদমনি। লৌমীশিংনা মখোয়গী দরকার ওইবশিং অদু মখোয়গী খুঙ্গংশিংদা খোমজিল্লি। খুঙ্গংগী সোসিও-ইকোনোমিক সিস্তেম অসি অসিগুম্বা মখলগী ওইরি মদুদি মীপুম খুদিংমক্না অমনা অমগী দরকার ওইবশিং অদু মপুং ফাহন্নবা পুন্না চুংশিন্নরি। মসিনা মরম ওইদুনা খুঙ্গংগী মীয়ামগী মরক্তা সেভিং তৌবগী তেন্দেন্সিসু য়াম্না কনখৎহল্লি। মখোয়গী তেন্দেন্সি অসিনা লৈবাক অসিগী শেলসু কনবা ঙম্লি। পেত্রোলদা ইথানোল য়ানশিন্দুনা হৌখিবা চহি ৭-৮ অসিদা মপান্দা লুপা করোর লিশিং ৫০ হেন্না চৎখিগদবদগী কনবা ঙমহৌরে। অমসুং ইথানোল য়ানশিনবসিনা মরম ওইদুনা ঐখোয়গী লৈবাক অসিগী লৌমীশিংদা ওইনা হায়রিবা শেনফম অসিগা মান্নবা চাংদা ফংহনখি।

মরুপশিং,

২১সুবা চহিচাগি অনৌবা ভারত্তা অতোপ্পা অচৌবা অহোংবা অমা লাক্লে। ঙসি লৈবাক অসিনা অচৌবা ফিরেপশিং লৌরি অমসুং মদু মংফাওনহল্লি।  চহি খরগী মমাংদা লৈবাক অসিনা পেত্রোলদা ইথানোল চাদা ১০ ফাওবা য়ানশিন্নবা পান্দম ফংনবা ৱারেপ লৌখি। ঐখোয়গী লৌমী ইচিল-ইনাওশিংগী মতেংনা লৈবাক অসিনা পান্দম অসি মতম চানা ফংবা ঙম্লে। চহি ৮ ফাওবগী মমাংদা লৈবাক অসিদা ইথানোল লিতর করোর ৪০ খক্তা পুথোক্লমখি; হৌজিক্না লিতর করোর ৪০০ পুথোকপা ঙম্লে। অসিগুম্না চাউনা ইথানোল পুথোক্নবগী রো মেতরিয়েল অসি ঐখোয়গী লৌমীশিংগী লৌবুকশিংদগী লাকই। মরুওইনা চুগী লৌমীশিংনা মসিদগী কান্নবা কয়া অমা ফংলে।

লৈবাক অসিনা মতৌ করম্না অচৌবা পান্দমশিং ফংলিবনো হায়বগী অতোপ্পা খুদম অমা ঐহাক্কী লৌমী ইচিল-ইনাওশিংদা পীজগে। ২০১৪ ফাওবদা লৈবাক অসিদা এল.পি.জি. গ্যাস কন্নেক্সন করোর ১৪রোমতমক লৈরম্মি। লৈবাক অসিগী মীশিং তংখাই, ইমাশিং অমসুং ইচল ইচেশিংনা চাকখুমগী মৈখু মরক্তা লৈরমখি। হকচাংগী ফিভম ফৎলক্তবা অমসুং খুদোংচাদবা কয়ানা শোকহল্লবা ইচল ইচাশিংবু মমাংদা নীংথিনা য়েংশিনবীরমদে। উজ্জ্বলা স্কিম খক্তগী মখাদা লাইরবা নুপীশিংদা গ্যাস কন্নেক্সন করোর ৯ হেন্না পীবা ঙমখিবসিগীদমক নুংঙাইবা পোকচৈ। হৌজিক্তি লৈবাক অসিদা এল.পি.জি. পুশিনবগী চাং অসি ১০০% য়ৌরক্লে। ঙসিদি লৈবাক অসিদা গ্যাস কন্নেক্সন করোর ১৪দগী হেনগৎতুনা করোর ৩১ রোম লৈরে। মসিনা ঐখোয়গী লাইরবা ইমুং, মিদল ক্লাসকী মীওইশিংদা খুদোংচাবা কয়া অমা ফংহল্লি।

মরুপশিং,

লৈবাক অসিদা সি.এন.জি.গী নেৎৱার্ক পাকথোক-চাউথোকহন্নবা অমসুং য়ুমথোং খুদিংদা শেল য়াম্না চংদবা পাইপ গ্যাস ফংহন্নবা থবকসু খোঙজেল য়াংনা চত্থরি। ঐখোয়গী লৈবাক অসিদা ৯০গী মতমদা সি.এন.জি.গী থবক পাইখৎপা হৌখি। চহি ৮গী মমাং ফাওবদা লৈবাক অসিদা সি.এন.জি. স্তেসন ৮০০দগী তানা লৈরমখি। পাইপকী গ্যাস কনেক্সনশিংসু লাখ খরা খক্তমক লৈরমখি। ঙসি লৈবাক শিনবা থুংনা সি.এন.জি.গী স্তেসন লিসিং ৪.৫ হেন্না লৈরে অমসুং পাইপকী গ্যাস কনেক্সনগী ফিগর অসি করোর ১ য়ৌরি। ঙসি ঐখোয়না নীংতম্বগি চহি ৭৫ শুরকপা মতমদা লৈবাক অসিনা মথংগী চহি খরদা লৈবাক অসিগী ইমুং চাদা ৭৫ হেন্না পাইপকী গ্যঅস ফংহন্নবা পান্দম অদুদা থবক পাইখৎলি।

মরুপশিং,

ঙসি ঐখোয়না শারিবা কিলোমিতর লিশিং কয়া শাংবা গ্যাস পাইপলাইনশিং, মোদর্ন প্লান্তশিং, ঐখোয়না লিংখৎলিবা ফেক্তরিশিং হায়রিবশিং অসিদগী ঐখোয়গী অনৌবা মীরোলনা খ্বাইদগী চাউনা কান্নবা ফংলগনি। লৈবাক অসিদা লেপ্তনা গ্রিন জোবকী অনৌবা খুদোংচাবশিং লৈহল্লগনি, থবক ফংবগী খুদোংচাবা হেনগৎহল্লগনি। ঙসিগী সমস্যাশিং অসিনা ঐখোয়গী তুংগী মীরোলশিংদা অৱাবা পীররোই। মসি তশেংবা চাউখত্পনি।

মরুপশিং,

করিগুম্বা রাজনিতীদা মশাগী ওইজবা থিনরক্লগদী, পেত্রোল অমসুং দিজল ফাওবা লেম্না পীগনি হায়না লাউথোকপা ঙম্নগনি। অসিগুম্বা খোঙথাংশিং অসিনা ঐখোয়গী হৌরক্লিবশিংদগী হক মৎপীগনি অমসুং লৈবাক অসিনা মরোমদোম লেপচনবা হোৎনরিবসিসু মায় পাক্লোই। অসিগুম্বা ওইজবতা থিবা থৌশিলশিং অসিনা লৈবাক অসিগী থম্মোই শেংনা তেক্স পীজরিবা মীওইশিংদা অৱাবা পোৎলুম হেনগৎহনগনি। অসিগুম্বশিং লাউথোকখিবশিংনা মখোয়গী রাজনিতীগী ওইবা ওইজবা থীবনা মরম ওইরগা অনৌবা তেক্নোলোজীদা ইনভেস্তমেন্ত তৌরোই। মখোয়না লৌমীদা মীনমগনি, অদুবু লৌমীশিংগী শেন্থোক হেনগত্হন্নবা ইথানোলগুম্বা প্লান্তশিং লিংখৎলোই। মখোয়না পোলুসন হেনগৎলকপগী মতাংদা নুংশিৎকী মতাংদা ৱা ঙাংগনি, অদুবু মসি থিংনবা মখোয়না তৌগদবা থবকশিংদগীদি লাপথোক্কনি।

ঐগী নুংশিরবা ইচিল-ইনাওশিং,

মসি পোলিসি নত্তে, মসি কাংলোন চুমদবনি। মসি জাতিগী য়াইফনবা নত্তে, মসি জাতিগী মাংনবনি। মসি জাতি শেমগত্পা নত্তে, মসি জাতিবু শোত্থনবা হোৎনবনি। লৈবাক অসিনা মায়োক্নরিবা শীংনবশিং অসি থেংননবা ময়েক শেংবা ৱাখল্লোন অমা, পুকচেল শেংবা, পোলিসি অমা মথৌ তাই। মসিগীদমক কন্না হোৎনবা তাই অমসুং সরকারনা শেল য়াম্না থাদগদবনি। করিগুম্বা সরকারদা শেল লৈতবা তারবদি ইথানোল, বাইওগ্যাস অসিগুম্বা প্লান্তশিং অমসুং সোলর প্লান্তশিং অসি লেপখিগনি। ঐখোয়না নীংশিংগদবনি ঐখোয় লৈত্রবসু জাতি অসিদা মতম চুপ্পদা লৈহৌখিগনি, মসিদা হিংলিবা অঙাংশিং অসিদা মতম চুপ্পদা লৈহৌখিগনি। ঐখোয়গী তুংগী মীরোলশিংগী তুংলমচৎ মাংহন্নবগী হক ঐখোয়দা লৈতে।

মরুপশিং,

নীংতম্বগীদমক মখোয়গী থৱায় থাখ্রবশিংনা মসিগী মুৎনাইদ্রবা ৱাখল্লোন অসিগা লোয়ননা থবক তৌখি। মখোয়না মতম অদুদা মখোয় মশাগী খল্লম্বা তারবা, মখোয়না ওইজবা থীবা তারবদি মখোয়গী পুন্সিদা অৱাবা থেংনরমলোই। মখোয়না অৱাবা, নোংমৈ মরু, মীওৎ-মীনৈদগী নান্থোক্লমগনি, অদুবু মখোয়গী মচাশিং, হায়বদি ভারতকী মীয়ামনা ঙসি আজাদী কা অমৃত মহোৎসব অসি পাঙথোকপা ঙম্লমলোই। ওগস্তকী থা অসি নীংতম লানগী থানি। জাতি অমা ওইনা ঐখোয়না অসিগুম্বা মওং অমদা লাক্তনাবা হোৎনগনি হায়না ঐখোয়না ৱাশক অমা লৌরসি।

মরুপশিং,

অমৃত মহোৎসব অসিদা লৈবাক অসিবু মচু অহুমগী মচুনা শংলিবা মতম অসিদা মহাক্না লৈবাক অসিগী মীয়ামগী পুক্নিং চিংশিনজনিংবা করিগুম্বা অমা লৈরে।  অসিগুম্বা শেংলবা থৌরম অসিবু লৈখা তাহন্নবা থৌরাং অমসুং ঐখোয়গী থৌনা ফরবা লৈবাক অসিগী নীংতম লান্মীশিংবু ইকাই ফীরুক খুম্নবা থৌরাং অমা শিনলক্লে। লৈবাক অসিদা লৈরিবা অসিগুম্বা মীওইশিংগী ৱাখল্লোন অসিসু খঙদোকপা য়াম্না তঙাইফদে। ঐখোয়না খঙই মদুদি করিগুম্বা মতমদা অনাবা অমনা মহাক্কী মতম শাংনা অনাবা লায়েংবা ৱানা থোকই, ৱাখল নুংঙাইতবা ফাওই, অফবা দোক্তরশিংগী পাউতাক লৌরবসু, মহাক্না কান্নবা ফংদবা মতমদা, মদুগী মতুংদা মহাক কয়া য়াম্না লাইরিক হৈবা ওইরবসু, অরানবা থাজবগী মায়কৈদা চংশিনবা হৌরকই। মহাক্না জাদু-মন্ত্র তৌবা হৌই, কালা জাদুদা থাজবা হৌই। মতৌ অসুম্না ঐখোয়গী লৈবাক অসিদা মীওই খরা অমসু ফত্তবা ৱাখলদা লুপতুনা অমসুং অৱাবা ঈপাক্তা ইরাক্নদুনা লৈরি।  লৈঙাক অসিগী মাইয়োক্তা ওইদবা কয়া ঙাংদুনসু মীচম মীয়াম্নদি অসিগুম্বা মীওইশিং অসিবু অমুক হন্না থাজবা ঙম্লরোই। উপাই লৈত্রবা মতমসিদদি মখোয়না কালা জাদুদা মায় ওনশিল্লকপা উরি।

হৌজিক ঐখোয়না ওগস্ত ৫দা উবা ফংলে মদুদি মতৌ করম্না কালা জাদু শন্দোক্নবা হোৎনবগে। মীওইশিং অসিনা মখোয়গী অৱাবা মতম অসি অমুবা ফি শেৎলগা কোক্কনি হায়না খল্লি, মখোয়না কালা জাদু অমসুং অমম্বদা থাজবা থমজরবসু মীয়াম্না মখোয়দা অমুক হন্নদি থাজবা থম্লরোই। অদুগা ঐহাক্না মসিমসু হায়গনি মদুদি কালা জাদু অসিগী মমাংদা, আজাদীকা অমৃত কা মহোৎসব অসিবু লান্না লমজিংবীগনু, মচু অহুমগী ফিরালবু খোঙ্গোইনবীগনু।

মরুপশিং,

রাজনিতিগী দল খরগী মশাগী ওইজবা থীবগী থৌশিলগা মান্নদনা ঐখোয়গী সরকারনা সবকা সাথ- সবকা বিকাস, সবকা বিশ্বাস অমসুং সবকা প্রয়াসকী মন্ত্রদা মখা তানা থবক তৌগনি। চাউখৎ-থৌরাংশিংগীদমক পোজিতিব ওইবা থাজবগী ইনর্জি অসি মখা তানা অসিগুম্না শেমগৎকনি হায়না ঐনা থাজৈ। অমুক হন্না হরিয়ানাগী মরুপ কয়া, লৌমী অমসুং শা-শন লোইবা কয়া অমদি ইচিল-ইনাওশিংদা নুংঙাইবা ফোঙদোকচরি। হয়েং অসি রক্ষা বন্ধনগী শেংলবা কুম্মৈনি। কুহ্মৈ অসুদনা মচিল-মনাওগী নুংশিবা অদু তাক্লি মপুং/মৌপা খুদিংমক্না মখোয়গী থৌদাং অদু পাঙথোক্নবা নৌহৌনা দিরেপ হয়েং প্রজা অমা ওইনা ঐখোয়না লৈবাক অসিগীদমক ঐখোয়গী থৌদাং অদু মপুং ফাহন্নবা ঐখোয়গী ৱারেপ্ অদু অমুক হন্না ফোঙদোক্কদবনি। মসিগী অপাম্বা অসিগা লোয়ননা ঐহাক্না ঐহাক্কী ৱা ঙাংবা অসি লোইশিনজরি। হন্না-হন্না থাগৎচরি!

*****