রাস্ত্রপতি বাইদন, ইহান হানবদা অদোমগী ফজরবা ৱারোলশিংবু ঐহাক্না তরাম্না ওকচরি। ঙসিদি, ঐখোয়গী ঙাকশেল অমসুং ফোরেন মন্ত্রীশিংনা অতেনবা মতমসিদা "২+২" ফোর্মেৎতা উন্নরগনি। মসিগী মাংওইননা, ঐখোয়গী মীফম অসিনা মখোয়গী মাইয়োন অমা পীনবগীদমক য়াম্না মরুওইবা ওইরি। অমসুং অদোম্না ভর্চুএল মীতিং অসি হৌদোকপীরকপগীদমক থাগৎচরি।

এক্সিলেন্সী,

ঐহাক্না মমাং চহিগী সেপ্তেম্বরদা ৱাশিংতনগী খোঙচৎ অমা চৎখিবা মতমদা, অমসুং অদোম্না হৌজিক্তা পনখিবদা হায়বীখি মদুদি ভারত-য়ু.এস.কী মরী অসিনা মালেমগী ওইবা খুদোংচাদবা কয়া কোকহন্নবা হোৎনবদা মতেং পাংগনি। ঐহাকসু অদোমগী ৱাফম অসি মপুং ফানা য়াজনিংই। মালেমগী খ্বাইদগী চাউবা অমসুং খ্বাইদগী লিরবা গনতন্ত্র ওইবগা লোইননা ঐখোয়না ন্যুত্রেল পার্তনর অমা ওইদুনা লাক্লি। হৌখিবা চহি খরসিদা ঐখোয়গী মরীদা খুমাং চাউশিল্লক্লিবা অসিনা অনৌবা খোঙজেল অমা শেম্বা ঙম্লে, মসিমক তশেংবদি ঙসিদগী চহি কুনলোমগী মমাংদদি অসুম্না ওইরক্কনি হায়বা কনা অমত্তনা থাজবা পোক্লমগনি থাজদে।

এক্সিলেন্সী,

ঙসিগী মীফম অসি য়ুক্রেন্দা ওইরিবা ফিভম অসিনা য়াম্না ৱানিংঙাই ওইবা মতমদা ফম্বসু ওইরি। চয়োল খরগী মমাংদা, ভারত মচা ২০,০০০ হেন্না য়ূক্রেন্দা লমদন্দুনা লৈখি। কন্না হোৎনরবা মতুংদা, ঐখোয়না মফমদুদগী অশোই অঙাম য়াওদনা লৌথোকপা ঙমখি, অদুমওইনমক মহৈরোই অমগী পুন্সিদি মাঙখি। অসিগুম্বা খুমাং চাউশিনবা কয়া অসিগী মরক্তা, ঐহাক্না য়ুক্রেন অমসুং রসিয়াগী রাস্ত্রপতিগা ফোন্দা ৱারী কয়া শানখি। ঐহাক্না শান্তি পুরক্নবা আপিল তৌখিবদা নত্তনা রাস্ত্রপতি পুতিন্দা য়ুক্রেনগী রাস্ত্রপতিগা হকথেংননা ৱারী তৌবীনবা হৌদোকচখি। য়ূক্রেনগী মতাং অসি ঐখোয়গী পার্লিয়ামেন্ততসু চাউনা খন্ন-নৈনখি।

হন্দক্তা নৌনা বুচা শহরদা মীচম প্রজা কয়া হাৎখিবগী পাউদু তাবদা নুংনাংনিংঙাই ওইর। ঐখোয়না খুদক্তা য়ানিংদবা ফোংদোকখি অমসুং মদুবু অচুম্বা মওংদা থিজিন্নবা তকশিনখি। ঐখোয়না আসা তৌজরি মদুদি রসিয়া অমসুং য়ুক্রেননা ৱারী শানবনা শান্তিগী লম্বী পুরক্কনি।

এক্সিলেন্সী,

ঐখোয়না য়ুক্রেন্দা লৈরিবা মীচম মীয়ামগী সেক্যুরিতীদা মীৎয়েং থম্লি অমসুং হ্যুমেনিতরিয়ান এদ অতৎ অখম লৈতনা পীনবা মীৎয়েং থম্লি, মসিসু অদোম্না পনবদা য়াওখ্রে। ঐখোয়না হিদাক লাংথক অমসুং অতোপ্পা রিলিফশিং য়ূক্রেন অমসুং থংনবা লৈবাকশিংদা থাখ্রে। অমসুং য়ুক্রেন্দা তাকপীরকপগী মতুং ইন্না ঐখোয়না অতোপ্পা হিদাক লাংথক্কী কন্সাইনমেন্ত অমসু থারগনি।

এক্সিলেন্সী,

অদোম্না অদোমগী তার্ম হেক হৌরকপা মতমদা য়াম্না মরুওইবা খোলাও অমা লাওবীখি – দিমোক্রেসীজ কেন দেলিভর। ভারত অমসুং য়ু.এস. অনিগী মপাংনা হায়রিবা খোলাও অসিবু ফংহনবা ঙম্নবগী খ্বাইদগী ফবা লম্বীনি।

হন্দক্কী চহি অসিদা, ভারতনা নীংখা তমখিবগী ৭৫শুবা কুম্মোন পাঙথোক্লি।

অমসুং ঐখোয়না ঐখোয়গী দিপ্লোমেতিক ওইবা মরীশিংগী ৭৫শুবা কুম্মোন পালনসু তৌরি। ঐহাক্না থাজবা থমজরি মদুদি য়ুনাইতেদ স্তেৎসনা লাক্কদবা চহি ২৫ রোমগী চাউখৎ খোঙজেলদা মরুওইবা শরুক অমা ওইগনি হায়না।

অমুক্কা হন্না ঙসিগী মীফম অসিগীদমক থাগৎপা ফোংদোকচরি।

খঙহঞ্জবাঃ পাউদম অসি প্রধান মন্ত্রীনা পীবীখিবা ৱারোল অদুগী চাউরাক্না হন্দোকপা ৱারোলনি। অশেংবা ৱারোলদি হিন্দিদা পীবীখি।

*****