প্রধানমন্ত্রীগী লোইশঙ
প্রধান মন্ত্রীনা ৪৪শুবা চেস ওলিম্পিয়াদ হৌদোকখ্রে
ভারতনা অহানবা ওইনা চেস ওলিম্পিয়াদকী য়ুম্বু ওইরি; ভারতনা কম্পিতিসন অসিদা হৌজিক ফাওবগী মশাগী খ্বাইদগী চাউবা কন্তিঞ্জেন্ত পুথোক্কনি
“চেসকী খ্বাইদগী ইকায় খুম্ননীংঙাই ওইবা তুর্নামেন্তনা চেসকী ময়ুম ওইরিবা ভারত য়ৌরক্লে”
“৪৪শুবা চেস ওলিম্পিয়াদ অসিদি অহানবা অমসুং রেকোর্দ কয়াগী তুর্নামেন্তনি”
“তমিল নাদু অসিদি ভারতকী চেসকী পাৱরহাউসনি”
“তমিল নাদুদি খ্বাইদগী থৌবা ৱাখল্লোন, মতিক লৈবা চৎনবী অমসুং মালেমগী খ্বাইদগী লিরবা লোল, তমিলগী মরমদম্নি”
“ভারকী শান্ন-খোৎনবগী হৌজিক্কী মতমদগী হেন্না ফবা মতম লৈখিদ্রি”
“নহারোলশিংগী শক্তি অমসুং মখোয়গী মতিক ফুদোকপা ঙমহনবা অকোয়বগী ফিভম অনিগী অপুনবনা মরম ওইরগা ভারতকী শান্ন-খোৎনবগী চৎনবীনা মপাঙ্গল হেন্না লৈরক্লি”
“শান্ন-খোৎনবদা মায়থীবা হায়বা লৈতে। মসিদা মায় পাকপা অমসুং তুংগী মতমদা মায় পাক্লক্কদবদি লৈ”
Posted On:
28 JUL 2022 8:22PM by PIB Imphal
প্রধান মন্ত্রী, শ্রী নরেন্দ্র মোদীনা চেন্নৈগী জে.এল.এন. ইন্দোর স্তেদিয়মদা ৪৪শুবা চেস ওলিম্পিয়াদ ঙসি হৌদোকখ্রে। তমিল নাদুগী রাজ্যপাল, শ্রী আর.এন. রবী; মুখ্য মন্ত্রী, শ্রী এম.কে. স্তালিন; য়ুথ এফিয়র্স অমসুং স্পোর্তকী কেন্দ্র মন্ত্রী, শ্রী অনুরাগ থাকুর অমসুং ইন্তর্নেস্নেল চেস ফেদেরেসন (এফ.আই.দি.ই.)গী প্রসিদেন্ত, শ্রী এল. মুরুগনগা লোয়ননা শ্রী অর্কাদী বোর্কোভিচনা ঙসিগী থৌরমদা শরুক য়াখি।
প্রধান মন্ত্রীনা ঙসিগী তিল্লিবা মীয়ামদা ৱা ঙাঙবদা মালেম শিনবা থুংবদগী ভারত্তা লাক্লিবা চেসকী শান্নরোই অমসুং মশান্না অসিবু পামজবা মীওইশিংবু তরাম্না ওকখি। “নীংতম্বগী অমৃত মহোৎসব”কী মতমদা পাংথোকপনা মরম ওইরগা থৌরম অসিগী মরু ওইববু মহাক্না পনখি। চেসকী খ্বাইদগী ইকায় খুম্ননীংঙাই ওইবা তুর্নামেন্তনা চেসকী ময়ুম ওইরিবা ভারত য়ৌরক্লে হায়না মহাক্না ফোংদোকখি।
প্রধান মন্ত্রীনা ৪৪শুবা চেস ওলিম্পিয়াদ অসিদি অহানবা অমসুং রেকোর্দ কয়াগী তুর্নামেন্তনি হায়না ফোংদোকখি। চেসকী হৌরকফম ওইরিবা লৈবাক, ভারত্তা চেস ওলিম্পিয়াদ পাংথোকপসি হন্দক্কী অসিনা অহানবনি হায়না মহাক্না হায়খি। তুর্নামেন্ত অসি দিকেদ অহুমগী মতুংদা এসিয়াদা অহানবা ওইনা লাক্লিবনি। হন্দক্কী তুর্নামেন্ত অসিদা শরুক য়ারিবা লৈবাক মশিংনা হান্নদগী ইহেন হেল্লি। নুপীগী সেক্সনগী এন্ত্রী মশিংনা খ্বাইদগী অমুক হেল্লি। চেস ওলিম্পিয়াদকী খ্বাইদগী অহানবা তোর্চ রিলেসু হন্দক হৌদোকখিবনি, হায়না মহাক্না হায়খি।
তমিল নাদুনা চেসকা পুৱারীগী অচেৎপা মরী লৈনৈ হায়না প্রধান মন্ত্রীনা পাউদমখি। মসিনা মরম ওইদুনা, ভারতকী চেসকী পাৱরহাউস ওইরিবনি। রাজ্যসিনা ভারতকী চেস গ্রান্দমাস্তর কয়া অমসু পুথোকখ্রবনি। তমিল নাদুদি খ্বাইদগী থৌবা ৱাখল্লোন, মতিক লৈবা চৎনবী অমসুং মালেমগী খ্বাইদগী লিরবা লোল, তমিলগী ময়ুম্নি।
শান্ন-খোৎনবনা নীংথিরবা মগুন অমা চেল্লিবসি মসিনা মীয়াম্বু অমত্তা ওইনা পুন্সিনবা ঙম্লিবা অসিননি হায়না প্রধান মন্ত্রীনা হায়খি। শান্ন-খোৎনবনা মীওইবা অমসুং খুন্নাইবু নকশিন্নহল্লি। মসিনা তীমৱর্ক্কী চৎনবী অমা শেমগৎলি। প্রধান মন্ত্রীনা ভারকী শান্ন-খোৎনবগী হৌজিক্কী মতমদগী হেন্না ফবা মতম লৈখিদ্রি হায়খি। “ভারতনা ওলিম্পিক্স, পেরালিম্পিক্স অমসুং দীফলিম্পিক্সতা খ্বাইদগী নীংথিজবা পর্ফোরমেন্স উৎখি। শান্ন-খোৎনবগা মরী লৈননা ঐখোয়না মমাংদা ফংবা ঙমদবা মায় পাকপা কয়া হন্দক ফংলে”, হায়না মহাক্না ফোংদোকখি। নহারোলশিংগী শক্তি অমসুং মখোয়গী মতিক ফুদোকপা ঙমহনবা অকোয়বগী ফিভম হায়রিবা মরু ওইবা ৱাফম অনিগী অপুনবনা মরম ওইরগা ভারতকী শান্ন-খোৎনবগী চৎনবীনা মপাঙ্গল হেন্না লৈরক্লি হায়না মহাক্না মখা তাখি।
শান্ন-খোৎনবদা মায়থীবা হায়বা লৈতে। মসিদা মায় পাকপা অমসুং তুংগী মতমদা মায় পাক্লক্কদবদি লৈ হায়না প্রধান মন্ত্রীনা হায়খি। মহাক্না তীম অমসুং শান্নরোই খুদিংনা ৪৪শুবা চেস ওলিম্পিয়াদ অসিদা মায় পাকপা ওইসনু হায়না য়াইফ পাউজেল পীখি।
বেকগ্রাউন্দ
প্রধান মন্ত্রীনা জুন ১৯, ২০২২দা নই দিল্লীগী ইন্দিরা গান্ধী নেস্নেল স্তেদিয়মদা খ্বাইদগী অহানবা চেস ওলিম্পিয়াদ তোর্চ রিলে হৌদোকখিবনি। তোর্চ অসিনা লৈবাক্কী আইকোনিক ওইবা মফম ৭৫দা নুমিৎ ৪০নিদা চৎখি অমসুং তোর্চ অসিবু স্বিতজর্লেন্দগী এফ.আই.দি.ই. ময়াই লোইশঙদা খুৎশিন্নদ্রিঙৈ মমাংদা মসিনা চাউরাকপা কিলোমীতর ২০,০০০ চত্তুনা মহাবলিপুরমদা লোইশিনখিবনি।
৪৪শুবা চেস ওলিম্পিয়াদ অসি জুলাই ২৮দগী ওগস্ত ৯, ২০২২ ফাওবা চেন্নৈদা পাংথোক্লি। ইং ১৯২৭তগী শীন্দুনা লাক্লবা ইকায় খুম্ননীংঙাই ওইরবা তুর্নামেন্ত অসি ভারত্তা খ্বাইদগী ইহান হান্না অমসুং এসিয়াদা চহি ৩০গী মতুংদা পাংথোকপনি। মসিনা লৈবাক ১৮৭না শরুক য়াদুনা, চেস ওলিম্পিয়াদ অমদা শান্নরোই খ্বাইদগী য়াম্না শরুক য়াবা থৌরম ওইগনি। ভারতনা তীম ৬তা শান্নরোই ৩০গা লোয়নবা খ্বাইদগী চাউবা কন্তিঞ্জেন্ত পুথোক্লি।
***
(Release ID: 1845997)
Visitor Counter : 177
Read this release in:
Tamil
,
Telugu
,
Kannada
,
Malayalam
,
Assamese
,
Odia
,
English
,
Urdu
,
Marathi
,
Hindi
,
Bengali
,
Punjabi
,
Gujarati