অকোইবগী ফিভম অমসুং ঊমংগী মন্ত্রালয়
azadi ka amrit mahotsav

শকখঙলবা সিঙ্গল য়ুজ প্লাস্তিক আইতেমশিং জুলাই ১, ২০২২দগী অথিংবা থম্বা


আইন কায়না অথিবা থম্লবা প্লাস্তিক্কী আইতেমশিং পুথোকপা, পুশিল্লকপা, পৈশিনবা, য়েন্থোকপা, য়োনবা অমসুং শীজিন্নবা য়েংশিন্নবা জাতি অমসুং রাজ্যগী থাক্তা লৈবাক কন্ত্রোল রুমশিং হাংগদৌরি

অথিংবা থম্বা অসি মায় পাক্নবগী অমত্তা ঙাইরবা উপাইদি স্তেকহোল্দর খুদিংমক্না মপুং ফানা অমসুং অপুনবা ওইনা হোৎনমিন্নরবা খক্তদা ঙমগনি

এস.য়ু.পি.শিং অসি থিংবদা মীয়াম্না শরুক য়াবা অদুক্কী মতীক চঙই

Posted On: 28 JUN 2022 1:04PM by PIB Imphal

ইকাইখুম্নজরিবা ভারতকী প্রধান মন্ত্রী, শ্রী নরেন্দ্র মোদীনা ২০২২ ফাওবদা সিঙ্গল য়ুজ প্লাস্তিক আইতেমশিংবু মুত্থৎনবা খোলাও লাওখিবগী মখা তারকপা ওইনা, এনভাইরোনমেন্ত, ফোরেস্ত অমসুং ক্লাসিমেৎ চেঞ্জ মন্ত্রালয়, ভারত সরকারনা ওগস্ত ১২, ২০২১দা প্লাস্তিক ৱেস্ত মেনেজমেন্ত এমেন্দমেন্ত রুল, ২০২১ লাওথোকখি। 'অজাদি কা অম্রিৎ মহোৎসব'কী ৱাখল্লোন্না মাংদা থমদুনা চাইদুনা লৈরিবা অমসুং লোইশিন খমজিনবীদ্রবা প্লাস্তিক ফত্তবশিংনা থোকহনবা পোলুসনবু লাকশিনবা ঙম্নবগীদমক লৈবাক অসিনা মতীক চাবা খোঙথাং কয়া লৌখৎলি। ভারতনা শীজিন্নফম কয়া লৈতবা, চাইবগী চাং ৱাংবা শকখঙলবা সিঙ্গল য়ুজ প্লাস্তিক আইতেমশিং পুথোকপা, পুশিল্লকপা, পৈশিনবা, য়েন্থোকপা, য়োনবা অমসুং শীজিন্নবা লৈবাক পুম্বদা জুলাই ১, ২০২২দগী অথিংবা থম্লগনি।

কংফাল অমসুং ঈশিংগী একোসিস্তেম অমসুং শমুদ্রগী এনভাইরোনমেন্ত য়াওনা সিঙ্গল য়ুজ প্লাস্তিক আইতেমশিংনা চাইবদগী থোকহল্লকপা ফত্তবা শাফুশিং অসি মালেম পুম্বনা খঙনরে। সিঙ্গল য়ুজ প্লাস্তিক আইতেমশিংনা থোকহনবা পোলুসন থেংনবা হায়বসি লৈবাক পুম্বনা থেংনরিবা য়াম্না মরুওইবা এনভাইরোনমেন্তকী শীংনবা অমা ওইরে।

২০১৯দা পাঙথোকখিবা ৪শুবা য়ুনাইতেদ নেসন্স এনভাইরোনমেন্ত এসেমব্লীদা, মসিগী য়াম্না মরুওইবা শমস্যা অসিদা মালেম পুম্বগী কম্ম্যুনিতীশিংনা মীৎয়েং চঙবগী তঙাইফদবা লৈরিবসি উরদুনা ভারতনা সিঙ্গল য়ুজ প্লাস্তিক আইতেমশিংনা থোকহনবা পোলুসন থেংননবগী ৱারেপ অমা লৌখি। হায়রিবা ৱারেপ অসিবু য়ু.এন.ই.এ. ৪দা লৌখিবা অসি য়াম্না শীংথানিংঙাই ওইবা খোঙথাং অমনি। হন্দক্তা মার্চ ২০২২দা নৌনা লোইশিনখিবা ৫শুবা য়ুনাইতেদ নেসন্স এনভাইরোনমেন্ত এসেমব্লীদা, প্লাস্তিক পোলুসন্দা মালেম পুম্বগী ওইবা য়ানরবা ৱারেপ অমা লৌমিন্ননবা মেম্বর ওইরিবা স্তেৎশিংগা অচুম্বা মাইকৈদা ৱারী শানখি।

চাইখাইদুনা লৈরিবা সিঙ্গল য়ুজ প্লাস্তিকশিংনা থোকহল্লিবা পোলুসন অসিবু লাকশিন্নবা ভারত সরকারনা অচেৎপা ফিরেপ অমগা লোইননা খোঙথাং কয়া লৌখৎলে। অথিংবা থম্লিবা আইতেমশিং অসিগী মনুংদা – প্লাস্তিক স্তিক য়াওবা ইয়র বদ, বেলুনশিংগী প্লাস্তিক স্তিক, প্লাস্তিক ফ্লেগ, কেন্দি স্তিক, আইস-ক্রিম স্তিক, দেকোরেসনগী পোলিস্তরিন (থর্মোকোল), প্লাস্তিক প্লেৎ, প্লাস্তিক কপ, গ্লাস, ফোর্ক, স্পুন, নাইফ, স্ত্রো, ত্রেগুম্বা কৎলরি, স্বীত বোক্স য়োম্ননবা রাপিং ওর পেক্কিং ফিল্ম, বার্তোনগী কার্দ, চুরুপ পেকেৎ, মাইক্রোন ১০০দগী তাবা প্লাস্তিক নৎত্রগা পি.ভি.সি. বেন্নর স্তিররশিংনি।

প্লাস্তিক ৱেস্ত মেনেজমেন্ত এমেন্দমেন্ত রুল, ২০২১নসু সেপ্তেম্বর ৩০, ২০২১দগী হৌদুনা মাইক্রোন হুম্ফুতরা মঙাদগী তানা থাবা, প্লাস্তিক্কী পুনবা খাউশিং শাবা, পুশিল্লকপা, পৈবা, য়েন্থোকপা, য়োনবা অমসুং শীজিন্নবদা অথিংবা থমখ্রে, অমসুং দিসেম্বর ৩১, ২০২২দগীনা মাইক্রোন চাম্মা কুন্দগী তানা থাবশিংবু থিংগদৌরি।

এনভাইরোনমেন্ত, ফোরেস্ত অমসুং ক্লাইমেৎ চেঞ্জ মন্ত্রালয়নসু প্লাস্তিক পেকেজিংগী গাইদলাইন্স ওন এক্সতেন্দেদ প্রদ্যুসর রেস্পোন্সিবিলিতীবু প্লাস্তিক ৱেস্ত মেনেজমেন্ত এমেন্দমেন্ত রুলস, ২০২২ হায়না ফেব্রুৱারী ১৬, ২০২২দগী লাউথোকখ্রে। এক্সতেন্দেদ প্রদ্যুসর রেস্পোন্সিবিলিতী (ই.পি.আর.) হায়বসি পোত্থোক অদুগী মপুন্সি লোইবা ফাওবদা অকোইবদা কায়হন্দনা য়েংশিন্দুনা লৈনবআ পুথোক্লিবদুনা লৌবা দাইত্যদুনি। গাইদলাইন অসিনা প্লাস্তিক পেকেজিং ৱেস্তকী সার্কুলার একনোমীদা হেন্না মপাঙ্গল কনখৎনবা ফ্রেমৱার্ক অমা পীগনি, প্লাস্তিক পেকেজিংগী মহুৎ শিনবা য়াবা লম্বী অমা পুথোক্কনি অমসুং লল্লোন ইতীক্তা তুং কোইনা চৎপা য়াবা প্লাস্তিক পেকেজিংগী মথংগী খোঙথাং অমা পীগনি।

এম.এস.এম.ই. য়ুনিৎশিংগীদমক মখোয়দা অথিংবা থম্লবা সিঙ্গল য়ুজ প্লাস্তিক আইতেমশিং অসিগী মহুৎ পুথোকপদা মতেং ওইননবা সি.পি.সি.বি./এস.পি.সি.বি./পি.সি.সি.শিংগা য়াওদুনা স্মোল মাইক্রো এন্দ মীদিয়ম এন্তর্প্রাইজেস অমসুং সেন্ত্রেল ইন্সতিত্যুৎ ওব পেত্রোকেমিকেলস ইঞ্জিনীয়রিং (সিপেৎ) অমসুং মখোয়গী রাজ্যগী সেন্তরশিংনা কেপাসিতী বিল্দিং ৱার্কশোপ কয়াসু পাঙথোক্লি। হায়রিবা এন্তর্প্রাইজেসশিং অসিনা অথিংবা থম্লবা সিঙ্গল য়ুজ প্লাস্তিকশিং অসিদগী মায়কৈ অমদা হোংলকপদা মতেং ওইনবা প্রোভিজনশিংসু শেমখ্রে।

ভারত সরকারনা অনৌবা ৱাখল ময়োল চোংনবা অমসুং হেন্না খুৎ থিংজিনবদা খোঙজেল য়াঙনবা অমসুং মহুৎশিংবু লৈবাক শীনবা থুংনা ফংহন্নবা খোঙথাং কয়া অমসু লৌখৎলে।

শকখঙলবা এস.য়ু.পি. আইতেমশিং অসিল্বু জুলাই ১, ২০২২দগী অথিংবা থম্বদা মপুং ফানবগীদমক জাতি অমসুং রাজ্যগী থাক্তা লৈবা কন্ত্রোল রুমশিং শেমগৎলগনি, অমসুং আইন কায়না অথিবা থম্লবা প্লাস্তিক্কী আইতেমশিং পুথোকপা, পুশিল্লকপা, পৈশিনবা, য়েন্থোকপা, য়োনবা অমসুং শীজিন্নবা য়েংশিন্নবা অখন্নবা এনফোর্সমেন্ত তিমশিংসু লিংখৎলগনি। রাজ্য অমসুং য়ুনিয়ন তেরিতোরিশিংদা অথিংবা থম্লিবা সিঙ্গল য়ুজ প্লাস্তিক আইতেমশিং অসিবু ইন্তর-স্তেৎতা পুথোক পুশিন তৌবা য়েংশিন্নবা বোর্দর চেক পোইন্তশিং লিংখৎনবা খঙহনখ্রে।

সি.পি.সি.বি. গ্রিভান্স রিদ্রেসেল এপশু প্লাস্তিক্কী শমস্যা থেংনবদা মীয়ামদা শক্তি পীনবগীদমক হৌদোকখ্রে। মীপুম তিংনা য়ৌহন্নবগীদমক প্রকৃতী – মাস্কোতসু এপ্রিল ৫তা হৌদোকখ্রে।

লৈঙাক্না সিঙ্গল য়ুজ প্লাস্তিকশিংবু মুৎথৎনবা হোৎনবদা মীয়াম পুম্বনা ভাপ তানবগীদমক খোঙথাং কয়া লৌখৎলি। মীয়াম ভাপ তাহন্নবা কেম্পেন্না ওন্ত্রপ্রিনর অমসুং স্তার্তঅপশিং, ইন্দস্ত্রী, সেন্ত্রেল, রাজ্য অমসুং লোকেল গবর্নমেন্ত, রিগুলেতরী বোদী, এক্সপর্ত, সিতিজেন ওর্গানাইজেসন, আর. এন্দ. দি. অমসুং একাদেমিক ইন্সতিত্যুসনশিংবু অমত্তা ওইনা পুনশিলহল্লে।

অথিংবা থম্বা অসি মায় পাক্নবগী অমত্তা ঙাইরবা উপাইদি স্তেকহোল্দর খুদিংমক্না অমসুং মীয়াম পুম্বনা শরুক য়ারবতদা মপুং ফানা অমসুং অপুনবা ওইনা হোৎনমিন্নরবা খক্তদা ঙমগনি হায়না মন্ত্রালয় অসিনা থাজরি।

*****



(Release ID: 1837556) Visitor Counter : 158