প্রধানমন্ত্রীগী লোইশঙ
প্রধান মন্ত্রীনা ‘বানিজ্য ভবন’ শঙ্গাবগা লোয়ননা নিরয়াত পোর্তেল হৌদোকখ্রে
“মীচম মীয়ামদা মিৎয়েং চঙবা লৈঙাকপগী মাইকৈদা লৈবাক্না চঙশিল্লি”
“দাঃ শ্যামা প্রসাদ মুকর্জীগী থৌশিল-থৌরাং, ৱারেপ, পান্দম অমসুং পুম্নমক অসিবু ফংবা হায়বসিনা নীংতম্বা ভারত্তা লম্বী তাকপগী য়াম্না মরু ওইবা থৌওং ওইখি”
“সরকার অমসুং মসিগী খুদোংচাবশিং ফংবদা লাইহনবা হায়বসিনা খ্বাইদগী অহানবা মিৎয়েং চঙফম ওইরি”
“প্রোজেক্ত অমসুং স্কিমশিংনা পান্দমগী মনুং চনবা মতমদা লোইশিনবা মতমদা খক্তা তেক্সপেয়রশিংবু ইকায় খুম্নৈ”
“বানিজ্য ভবনগী উরেপ উয়ুং তম্বদগী শঙ্গাবা ফাওবগী মনুংদা লৈবাক অসিদা মশক থোকপা অহোংবগা লোয়নবা চাউখৎ-থৌরাং কয়া লৈখ্রে”
“লৈবাক অমনা দিভেলপিংদগী দিভেলপ ওইবগী থাক্তা লাকপদা এক্সপোর্তনা মরু ওইবা থৌদাং লৌই”
Posted On:
23 JUN 2022 12:31PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি নই দিল্লীদা ‘বানিজ্য ভবন’ শঙ্গাবগা লোয়ননা নিরয়াত পোর্তেলসু হৌদোকখ্রে। কেন্দ্র মন্ত্রী, শ্রী পিয়ুশ গোয়ল, শ্রী সোম প্রকাশ অমসুং শ্রীমতি অনুপ্রিয়া পতেলসু অতোপ্পা মীওইশিংগা লোয়ননা থৌরম অসিদা শরুক য়াখি।
প্রধান মন্ত্রীনা থৌরমসিদা তিল্লিবা মীয়ামদা ৱা ঙাঙবদা মমাংগী চহি ৮দগী চত্থদুনা লাক্লবা অনৌবা ভারতকী মীয়ামদা মিৎয়েং চঙবা লৈঙাকপগী খোঙচত্তা মরূ ওইবা অতোপ্পা খোঙথাং অমা ঙসি পায়খৎলে হায়না ফোংদোকখি। লৈবাক অসিনা অনৌবা অমসুং মতমগা চুনবা কম্মর্সিএল বিলদিংগা লোয়ননা এক্সপোর্ত পোর্তেল, ফিজিকেল ইনফ্রাস্ত্রকচর অমা অমসুং অতোপ্পা দিজিতেল ইনফ্রাস্ত্রকচর কয়াগী খুদোল অমা ফংলে হায়না মহাক্না ফোংদোকখি।
ঙসি অসি লৈবাক্কী খ্বাইদগী অহানবা ইন্দস্ত্রী মন্ত্রী, দাঃ শ্যামা প্রসাদ মুকর্জীগী লৈখিদবগী কুমওন নুমিৎনি হায়না প্রধান মন্ত্রীনা পনখি। “দাঃ শ্যামা প্রসাদ মুকর্জীগী থৌশিল-থৌরাং, ৱারেপ, পান্দম অমসুং পুম্নমক অসিবু ফংবা হায়বসিনা নীংতম্বা ভারত্তা লম্বী তাকপগী য়াম্না মরু ওইবা থৌওং ওইখি। লৈবাক্না ঙসিদি, মহাক্কী মফমদা ইকায় খুম্নবা উৎলি”, হায়না মহাক্না হায়খি।
প্রধান মন্ত্রীনা মন্ত্রালয়গী অনৌবা ইনফ্রাস্ত্রকচরগী মতাংদা পল্লদুনা হৌজিক্কী মতমসিদি ‘পুন্সি মহিং লাইথোকহনবা’ হায়বসিগী খুত্থাংদা কারবার তৌবদা লাইহনবা হায়বা ৱারেপ্পু নৌহৌননা অমুক লৌবগী মতম্নি হায়না ফোংদোকখি। খুদোংচাবা ফংবদা লাইহনবা হায়বসিনা ৱাফম অনিগী মরক্তা শম্নহন্নবা থোং ওইগনি হায়না মহাক্না হায়খি। সরকারগা পাউ ফাওনবদা অয়েৎপা অমত্তা লৈহল্লোইদবনি অমসুং সরকারগা পাউ ফাওনবদা লাইহনবা হায়বসিনা সরকারগী খ্বাইদগী অহানবা মিৎয়েং চঙফম ওইরি হায়না মহাক্না ফোংদোকখি। হায়রিবা পান্দমশিং অসি সরকারগী থৌশিল থৌরাংশিংদা ময়েক শেংনা মমি তারি হায়না মহাক্না মখা তাখি।
প্রধান মন্ত্রীনা ইকুই কুইদ্রিবা মতমশিংগী খুদম পীরদুনা অনৌবা ভারতকী থবক পাংথোকপগী অনৌবা চৎনবীদা থবক লোইশিনবগী তারিখনা এস.ও.পি.গী শরুক অমা ওইরে অমসুং মসিবু অহকপা মওংদা ইন্নরি হায়না পাউদমখি। সরকারগী প্রোজেক্তশিংনা চহি কয়া পন্দুনা লৈতনা মতম চানা লোইশিল্লকপা মতমদা সরকারগী স্কিমশিংনা মখোয়গী পান্দম ফংগনি, মসিগী মতমসিখক্তদা লৈবাক্কী তেক্সপেয়রশিংবু ইকায় খুম্নবা হৌরক্কনি হায়না মহাক্না ফোংদোকখি। ঐখোয়না পি.এম. গতিশক্তি নেস্নেল মাস্তর প্লানগী মওংদা অনৌবা মতমগা চুনবা প্লেতফোর্ম অমা ঙসিদি লৈরে। মসিগী বানিজ্য ভবন্না লৈবাক্কী ‘গতি শক্তি’দা শাফু পীগনি হায়না মহাক্না ফোংদোকখি।
প্রধান মন্ত্রীনা বানিজ্য ভবনবু মহাক্কী সরকারনা মতমসিগী মনুংদা কম্মর্সকী লমদা মায় পাকপগী খুদম অমনি হায়না ফোংদোকখি। মসিগী উরেপ উয়ুং তমখিবগী মতমদা মহাক্না ইন্নোভেসন পাংথোকপা অমসুং গ্লোবেল ইন্নোভেসন ইন্দেক্সতা ফগৎপগী তঙাই ফদবা লৈ হায়না ফোংদোকখিববু মহাক্না ঙসি অমুক্কা হন্না নীংশিংখি। ঙসিদি, ভারত অসি গ্লোবেল ইন্নোভেসন ইন্দেক্সতা ৪৬শুবা থাক্তা লৈরে অমসুং লেপ্পা লৈতনা ফগৎলি। মহাক্না মতমদুদা কারবার তৌবদা হেন্না লাইথোকহনবগী মতাংদসু ৱাফম থমখিবনি, অদুগা ঙসিদি, কান্নদবা কমপ্লাইএন্স ৩২০০০ হেনববু লৌথোকখ্রে। মান্নবা অমা ওইনা, বিলদিং অসিগী উরেপ উয়ুং তম্বা মতমদা জি.এস.তি. অসি য়াম্না নৌরি, অদুবু, থা অমদা লুপা করোর লাখ ১গী জি.এস.তি. খোমগৎপা হায়বসিদি মফম খুদিংদা পাংথোক্নরে। জি.ই.এম.গী মতাংদা পল্লগসু, লুপা করোর লিশিং ৯গী ওরদরসু মতমদুদা অদুমক পাংথোক্লম্মি, অদুগা হৌজিক, পোর্তেল অসিদা স্মোল ওন্তোপ্রিনর লাখ ৪৫ হেনবনা রেজিস্তর তৌরে অমসুং লুপা করোর ২.২৫ হেনবগী ওর্দর পীরকখ্রে। ইং ২০১৪দা মোবাইল য়ুনিত ২খক লৈরম্বদগী মতমদুদা মোবাইল য়ুনিত ১২০ য়ৌখিবগী মতাংদসু প্রধান মন্ত্রীনা ৱাফম থমখিবনি। মসিগী মশিংনা হৌজিক্তি ২০০ হেনখ্রে। ঙসিদি, ভারত্তা চহি ৪গী মমাংদা লৈরম্বা রেজিস্তর তৌরবা ফিন্তেক মশিং ৫০০দগী য়াম্না হেনগত্তুনা ২৩০০ লৈরে। বানিজ্য ভবনগী উরেপ উয়ুং তমখিবা মতমদা ভারতা স্তার্তঅপ ৮০০০ চহি খুদিংগী শকখঙলম্মি, অদুবু ঙসিদি, মসিগী মশিংনা ১৫০০০ হেল্লে হায়না প্রধান মন্ত্রীনা ফোংদোকখি।
মমাংগী চহিদা, মালেমগী ওইবা পুৱারী ওইরবা অয়েৎপা কয়া লৈখ্রবসু, ভারতকী অপুনবা এক্সপোর্তনা বিলিয়ন দোল্লর ৬৭০, হায়বদি, লুপা করোর লাখ ৫০ য়ৌখি হায়না প্রধান মন্ত্রীনা ফোংদোকখি। লৈবাক অসিনা মমাংগী চহিদা, শিংনবা কয়া থেংনরবসু, বিলিয়ন দোল্লর ৪০০, হায়বদি লুপা করোর লাখ ৩০গী পোত্থোক এক্সপোর্ত তৌবগী থ্রেসহোল্দ শোইদনা লানগনি হায়বা ৱারেপ লৌখিবনি। ঐখোয়না মসিবু ৱাংমা লানখি অমসুং বিলিয়ন দোল্লর ৪১৮, হায়বদি, লুপা করোর লাখ ৩১গী এক্সপোর্ত তৌবগী অনৌবা রেকোর্দ থমখি। “মমাংগী চহিশিংগী মায় পাকপশিংনা পুক্নিং থৌগত্তুনা, হৌজিক্তি ঐখোয়না ঐখোয়গী এক্সপোর্তকী পান্দম হেনগৎলে অমসুং মদুবু ফংনবা হোৎনবগী চাংসু শরুক অনি হেনগৎলে। মসিগুম্বা অনৌবা পান্দমশিং ফংনবগীদমক্তা মীয়াম পুম্নমক্না হোৎনমিন্নবগী তঙাই ফদবা লৈ”, হায়না মহাক্না অতেনবা মতমগী পান্দম খক্তা নত্তনা অশাংবা মতমগী পান্দমসু থমগদবনি হায়না মখা তানা ফোংদোকখি।
প্রধান মন্ত্রীনা নিরয়াত- নেস্নেল ইম্পোর্ত-এক্সপোর্ত ফোর য়র্লী এনালাইসীস ওফ ত্রেদ পোর্তেলনা স্তেকহোলদরশিংগী রিএল তাইম দেতা পীদুনা সাইলোশিংবু লৌথোকপদা তেংবাংগনি হায়না ফোংদোকখি। “মালেমগী লৈবাক ২০০ হেনবদা এক্সপোর্ত তৌরিবা কম্মোদিতী গ্রুপ ৩০ হেনবগা মরী লৈনবা মরু ওইবা ই-পাউশিং পোর্তেল অসিদগী লৌবা য়াগনি। জিলাশিংগী এক্সপোর্ত তৌবগী ই-পাউশিংসু পোর্তেল অসিদগী মতুং তারকপা মতমশিংদা লৌবা য়ারগনি। মসিনা জিলাশিংবু এক্সপোর্ত তৌবগী মরু ওইবা সেন্তর ওইনা চাউখৎহন্নবা হোৎনরিবা থবকশিংবু হেন্না মপাঙ্গল লৈহনগনি”, হায়না প্রধান মন্ত্রীনা হায়খি।
লৈবাক অমনা দিভেলপিংদগী দিভেলপ ওইবগী থাক্তা লাকপদা এক্সপোর্তনা লৌবা মরু ওইবা থৌদাংশিংদা প্রধান মন্ত্রীনা মিৎয়েং চঙখি। মমাংগী চহি ৮দা, ভারতনা মশাগী এক্সপোর্ত লেপ্তনা হেনগৎহনবগা লোয়ননা এক্সপোর্তকী পান্দম কয়া ফংদুনা লাক্লি হায়না প্রধান মন্ত্রীনা ফোংদোকখি। এক্সপোর্ত হেনগৎহন্নবা হান্নদগী হেন্না ফবা থৌশিল থৌরাং, কাঙলোনশিং লাইথোকহনবা অমসুং পোত্থোকশিংবু অনৌবা কৈথেলদা পুবগী থৌওংনা মতেং চাউনা পাংখি। মন্ত্রালয়, বিভাগ খুদিংনা ‘হোল ওফ গভর্নমেন্ত এপ্রোচ’কা লোয়ননা এক্সপোর্ত হেনগৎহনবদা ঙসি খ্বাইদগী অহানবা মিৎয়েং চঙলি হায়না মহাক্না হায়খি। এম.এস.এম.ই. মন্ত্রালয় নত্ত্রগা এক্সতর্নেল এফিয়র্স, এগ্রিকলচর নত্ত্রগা কম্মর্স মন্ত্রালয় ওইরো, পুম্নমক্না মান্নবা পান্দম অমগীদমক্তা মান্ননা হোৎনরি। “অনৌবা লমদগী এক্সপোর্ত তৌবসু হেনগৎলক্লি। এস্পিরেস্নেল জিলাশিংদগীসু হৌজিক এক্সপোর্ত য়াম্না হেনগৎলক্লি। লশিং অমসুং হেন্দলুমগী পোত্থোক্কী এক্সপোর্ত্তা ৫৫%গী চাংদা হেনগৎলক্লিবা অসিনা গ্রাসরুত লেভেলদা করম্না থবক পায়খৎলি হায়বা তাক্লি”, হায়না মহাক্না অখন্ননা তমখি।
ভোকেল ফোর লোকেল কেম্পেন, ‘ৱান দিস্ত্রিক্ত, ৱান প্রদক্ত’ স্কিমগী খুত্থাংদা লোকেলগী পোত্থোকশিংদা সরকারনা অখন্নবা মিৎয়েং চঙলিবা অসিনসু এক্সপোর্ত হেনগৎপদা তেংবাংলি হায়না প্রধান মন্ত্রীনা ফোংদোকখি। ঐখোয়গী পোত্থোক কয়া অমা মালেমগী অনৌবা লৈবাকশিংদা অহানবা ওইনা এক্সপোর্ত তৌবা হৌরে। “ঐখোয়গী লোকেলনা খোঙজেল য়াঙনা গ্লোবেল ওইরক্লি”, হায়না মহাক্না সিতাভোগ, মিথাইবু বাহরেন্দা, নাগালেন্দগী অতেকপা কিং চিল্লীবু লন্দন্দা, অসমগী অতেকপা বর্মিজ অঙ্গুরবু দুবাইদা, ছতিসগরগী ত্রাইবেলগী মাহুৱা পোত্থোকপু ফ্রান্সতা অমসুং কার্গিলগী খুমানিবু দাইবাইদা এক্সপোর্ত তৌরিবশিংগী খুদম পীরদুনা হায়খি।
হন্দক্তা পায়খৎখিবা খোঙথাং কয়াবু নৌহৌননা পল্লদুনা প্রধান মন্ত্রীনা অসুম্না হায়খি, “ঐখোয়না ঐখোয়গী লৌমী, ফিশা-লোনশা তৌবা মীওই অমসুং ঐখোয়গী নাৎকী ওইবা পোত্থোকশিংবু এক্সপোর্ত ইকোসীস্তেমগা মরী লৈনহন্নবগীদমক্তা জি.আই. তেগগিং তৌবগী থৌওংদা তেংবাংবগা লোয়ননা অহেনবা মিৎয়েংসু চঙলি”। মহাক্না মমাংগী চহিদা য়ু.এ.ই. অমসুং ওস্ত্রলিয়াগগী মরক্তা খুৎয়েক পীনখিবা লল্লোন-ইতিক্কী য়ানচেগী মতাংদা পনখি অমসুং অতোপ্পা লৈবাকশিংগসু মরী লৈনবা হীরমদা চাউখৎ-থৌরাং কয়া লৈখ্রে হায়না ফোংদোকখি। মহাক্না মীরমদা লৈরিবা ভারতকী দিপ্লোমেতিক ইন্সতিত্যুসনশিংবু অচৌবা শিংনবা কয়াবু ভারতকী খুদোংচাবদা ওন্থোক্নবগীদমক্তা কন্না হোৎনখিবগীদমক্তা থাগৎপা ফোংদোকখি। “লৈবাক চাউখৎহন্নবগীদমক্তা অনৌবা কৈথেল কয়াবু কারবারগীদমক্তা মশক খঙদোকপা অমসুং মখোয়গী তঙাই ফদবশিং খঙলবা তুংদা চুনবা পোত্থোক পুথোকপা হায়বসি য়াম্না মরু ওই”, হায়না মহাক্না হায়খি।
প্রধান মন্ত্রীনা মহাক্কী ৱাফম লোইশিল্লকপদা হন্দক্তা শেমগৎ-শাগৎখিবা পোর্তেল অমসুং প্লেতফোর্মশিংবু বিভাগ খুদিংনা চাং নাইনা য়েংশিন্নবা হায়খি। “ঐখোয়না খুৎলায়শিং অসি শেমগৎ-শাগৎপগী পান্দম, পান্দম কয়া য়াম্না ফংলিবগে অমসুং করিগুম্বা খুদোংচাদবা থেংনরবদি, মখোয়গী ৱারোইশিন পুরক্নবা অথুবা মতমদা হোৎনগদবনি”, হায়না মহাক্না ফোংদোকখি।
***
(Release ID: 1836486)
Visitor Counter : 157
Read this release in:
Telugu
,
Tamil
,
English
,
Urdu
,
Hindi
,
Marathi
,
Bengali
,
Assamese
,
Punjabi
,
Gujarati
,
Odia
,
Kannada
,
Malayalam