প্রধানমন্ত্রীগী লোইশঙ
পি.এম. মোদীনা পাবাগর চীংদা লৈবা শ্রী কালিকা মাতাগী নৌনা শেমগৎলবা লাইশঙ শঙ্গাখ্রে
“মসিগী “সিখর ধ্বজ” অসি চহি চা কয়া হৌখ্রবসু, চক কয়া হৌখ্রবসু ঐখোয়গী থাজবদি লেঙদনা লৈরি হায়বা তাক্লি”
“ঙসিদি অনৌবা ভারতনা মতমগী ওইবা মঙলানশিংগা লোয়ননা অরিবা মতমগী শক্তমবুসু লোয়নদুনা চাউথোকচনা চৎলি”
“মতিংগা লৈনা, কত্থোক্তুনা অমদি পুক্নিং লুপ্তুনা লৈবাকসিগী মীপুম খুদিংগী পাউখোল্লোই ওইদুনা মখোয়গী থৌগল মখা তানা তৌবা ঙম্নবা থৌজাল ইফমদা পীবিয়ু ইমা”
“গর্বি গুজরাত হায়বসি ভারতকী চাউথোকচনিংঙাইনি অমদি অথোইবনি”
“পাবাগর অসি ভারতকী পুৱারীগী ফজবা মশক্কা লোয়ননা মালেমগী ওইবা নুংশি চানননা লৈবগী মফম ওইদুনা লাক্লি”
Posted On:
18 JUN 2022 12:05PM by PIB Imphal
প্রধান মন্ত্রীনা পাবাগর চীংদা লৈবা শ্রী কালিকা মাতাগী নৌনা শেমগৎলপা লাইশঙ শঙ্গাখ্রে। মসি লমদম অসিগী খ্বাইদগী লিরবা লাইশঙশিংগী মনুংদা অমনি অমদি মশিং য়াম্লবা মীওই কয়ানা মফমসিদা লাই খুরুমবা লাকই। লাইশঙ অসি নৌনা শেমগৎপগী থবক তাঙ্কক অনি থোক্না পায়খৎখি। অহানবা তাঙ্কক্কী শেমগৎ শাগৎখিবা অদু চহি অসিগী এপ্রিল থাদা প্রধান মন্ত্রীনা শঙ্গাখ্রবনি। ঙসিগী থৌরমদা শঙ্গারিবা অনিসুবা তাঙ্কক্কী নৌনা শেমগৎ শাগৎপগী থবক অসিগী উরেপ উয়ুং প্রধান মন্ত্রীনা ২০১৭দা তমখিবনি। মসিদা লাইশঙ অসিগী য়ুম্ফম পাকথোক চাউথোকপা অমদি থাক অহুমদা শেমবা ‘পরিসার’, স্ত্রীত লাইত, সি.সি.তি.ভি. সিস্তেম্নচিংবা হাপচিনবনচিংবা য়াওরি।
প্রধান মন্ত্রীনা লাইশঙ অসিদা লাকপা ফংজবা লাইবক ফবনি হায়না ফোঙদোকখি। চহিচা মঙাগী মতুংদা অমদি নীংতম্লবা চহি ৭৫গী মতুংদা লাইশঙ অসিদা শেংলবা ‘ধ্বজ’ ফিরাল পাইহল্লিবা মীকুপ অসি য়াম্না মরুওইবা মীকুপ্নি হায়না মহাক্না ফোঙদোকখি। “ঙসি চহিচা কয়াগী মতুংদা ফিরাল অসি অমুক হন্না পাবাগর লাইশঙগী মথক্তা চিংখৎলে। হায়রিবা ‘সিখর ধ্বজ’ ফিরাল অসি ঐখোয়গী লাইনিং অমদি স্পিরিচুএলিতীগী খুদমখক্তা নত্তনা চহিচা কয়া হৌখ্রবসু, চক কয়া হৌখ্রবসু লাইনিংদি লেঙদনা লৈরি হায়বগী খুদম অমসুনি,” হায়না মহাক্না হায়খি। লাক্কদৌরিবা ‘গুপ্ত নবরাত্রি’গী হেক মাঙওইননা নৌনা শেমগৎ শাগৎলিবা অসি ‘শক্তি’না কৈদৌনুংদসু শিথদে অমদি মাঙখিবা লৈতে হায়বগী খুদম অমনি হায়না মহাক্না হায়খি।
অয়োধ্যাগী রাম লাইশঙ, কাসি বিস্বানাথ ধাম অমসুং কেদর ধামবু পল্লদুনা প্রধান মন্ত্রীনা ফোঙদোকখিবদা, “ঙসি ভারতকী নুংগী ৱাখল্লোনগী অমদি নাৎগী মতিং অমুক হন্না হঞ্জিনহল্লে। ঙসি অনৌবা ভারতনা মহাক্কী অরিবা মতমগী শক্তম অমসুং অনৌবা মতমগী মঙলানশিংগা লোয়ননা চাউথোকচবগা লোয়ননা চৎলি।” লাইনিংগী মফমশিংগা লোয়ননা ঐখোয়গী খোঙজেলগী অনৌবা ওইথোকপা য়াবশিং থোরক্লি অমদি পাবাগরগী চাউরবা লাইশঙ অসি হায়রিবা খোঙচৎ অদুগী শরুক অমনি হায়না মহাক্না হায়খি। লাইশঙ অসিনা সবকা সাথ, সবকা বিকাস, সবকা বিস্বাস অমসুং সবকা প্রয়াসপুসু মশক তাক্লি হায়না মহাক্না ফোঙদোকখি।
স্বামি বিবেকানন্দনা ইমা কালিগী থৌজাল ফংলবা মতুংদা মীয়ামগী থৌগলদা মপুন্সি কত্থোকখিবগে হায়বগী মতাঙদা প্রধান মন্ত্রীনা নৌহৌননা নীংশিংখি। ঙসি মহাক্না মীয়ামগী থৌগল তৌবা ঙম্নবা থৌনা পীবিয়ু হায়না লাইরেম্বীগী মফমদা থৌনিজখি। “ইমা, মতিং লৈনা, কত্থোকবা অমদি পুক্নিং লুপ্না মীয়ামগী পাউখোল্লোই ওইনা লৈবাক মীয়ামগী থৌগল মখা তানা তৌবা ঙম্নবা ঐবু থৌজানবিয়ু। ঐগী লৈজবা পাঙ্গল, লৈজবা অফবা ৱাখল্লোন পুম্নমক লৈবাকসিগী মমা ওইবী অমদি ইচে-ইচলশিংগী য়াইফনবগীদমক্তা কত্থোকচবা ঙমহনবিয়ু,” হায়না প্রধান মন্ত্রীনা থৌনিখি।
অজাদি কা অমৃৎ মহোৎসবকী মতাঙদা, গুজরাতনা নীংতম লালহৌদা অমদি লৈবাকসিগী চাওখৎ খোঙচত্তা মশক থোক্না থৌদাং য়াখি হায়না প্রধান মন্ত্রীনা ফোঙদোকখি। গর্বি গুজরাত হায়বসি ভারতকী চাউথোকচনিংঙাইনি অমদি অথোইবনি। সোমনাথ লাইশঙগী অথোইবা চৎনবীদা পঞ্চমহল অমসুং পাবাগরনা ঐখোয়গী চাউথোকচনিংঙাই ওইরবা নাৎকী লনগীদমক লেপ্পা লৈতনা হোৎনরি হায়না মহাক্না হায়খি। ঙসি ইমা কালিনা নৌনা শেমগৎ শাগৎপা অসিবু লোইশিনহনবিদুনা অমদি ধ্বজ নৌনা চিংখৎপা ঙমহন্দুনা খ্বাইদগী চাউবা থৌজাল পীনবিরে। মসিবু হান্নগী ফীভমদা লাক্নবা শেমজিনবদা, লাইশঙ অসিগী থাইনঙৈগী ওইবা মশক মওং অসি কায়হনখিদে হায়না মহাক্না ফোঙদোকখি। প্রধান মন্ত্রীনা লাইশঙ অসিদা লায়না য়ৌবা ঙম্লিবসিগী মতাঙদসু পনখি। “মমাঙদদি পাবাগর চৎপগী খোঙচৎ অসি য়াম্না খুদোংচারমদবনা মরম ওইরগা মীয়াম্না মপুন্সিদা অমুক্তং ওইরবসু ইমাগী মফমদা থৌনিবা ফংজরবদি হায়না খন্নরম্মি। ঙসিদি মফমসিদা হেনগৎলক্লিবা খুদোংচাবশিং অসিনা হান্না খুদোংচারমদবদু ইরায় লায়না য়ৌবা ঙম্লে,” হায়না মহাক্না ফোঙদোকখি। লাইফমসিবু থাজরিবা ময়ামগী মফমদা থকশি খাসি ঙাক্না চৎনবগীদমক মহাক্না হায়খি। “পাবাগরদা স্পিরিচুএলিতী লৈ, মফমসিদা পুৱারী, মহৌশা, কলা অমসুং নাৎসু লৈরি। মফমসিদা নাকল অমদা ইমা মহাকালিগী শক্তিপীথ লৈরি, অদুগা নাকল অমদনা জেন লাইশঙগী নাৎকী লন লৈরি। ৱাহৈ অমদা হায়রবদা, পাবাগর অসি ভারতকী পুৱারীগী খেন্নবা মশক অমসুং অমত্তা ওইনা নুংশিননা হিংমিন্নবগী মফম অমা ওইরি,” হায়না প্রধান মন্ত্রীনা হায়খি। মাতাগী তোঙান তোঙানবা লাইশঙশিংগী মতাঙদা পল্লদুনা, গুজরাত অসি মাতাগী থৌজালনা ঙাক শেন্দুনা লৈরি হায়না প্রধান মন্ত্রীনা ফোঙদোকখি।
লাইনিংগী মফমশিং শেমগৎপনা লমদম অদুদা লমকোয় লমথুংফমগী, থবক পীবগী অনৌবা খুদোংচাবা থোরকই অমদি লমদম অদুগী কলা অমসুং খুৎ-শা হৈবগী মরমদা খঙবা হেন্না পাক শন্না খঙনবা হেনগৎলকই হায়না প্রধান মন্ত্রীনা পনখি। পঞ্চমহল অসি মমিং লৈরবা ঈশৈ নোংমাইগী শক্নাইরবা বাইজু বাৱরাগী লমদম্নি হায়না পল্লদুনা, নাৎ অমসুং নাৎকী লন্না মপাঙ্গল কনখৎলক্লবদা কলা অমসুং খুৎ-শা হৈশিংবগী চাংসু হেনগৎলকই হায়না প্রধান মন্ত্রীনা ফোঙদোকখি। ইং ২০০৬তা ‘জ্যোতিগ্রাম’ স্কিম হৌদোকখিবসি চম্পানেরদগীনি হায়না প্রধান মন্ত্রীনা নীংশিংখি।
********
(Release ID: 1835112)
Visitor Counter : 184
Read this release in:
English
,
Urdu
,
Hindi
,
Marathi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam