“কোবিদ অসি লোইদ্রি। রাজ্য খরদা কোবিদ কেসশিং ৱাংখৎলকপা অসিগা লোয়ননা তানফম অসিদা চেকশিনবা অমসুং লাইনা অসি শন্দোকপা থিংনবা মাস্ক উপ্পা অমদি ফিজিকেল দিস্তেন্স থম্বা অসিগুম্বা কোবিদ এপ্রোপ্রিএৎ বিহেবিয়র (সি.এ.বি.) কাউদবা হায়বা অসি মরু ওই”। ৱাফম অসি হরঘরদস্তক ২.০ কেম্পেনগী চত্থরিবা তীকা থাদোকপগী খোঙজেল অসি য়েংশিন্নবা রাজ্যশিং অমদি য়ুনিয়ন তেরিরোরীশিংগী হকশেল মন্ত্রীশিং অমসুং মকোক থোংবা ওফিসিএলশিংগা লোয়ননা ঙসি ভিদিও কনফরেন্সকী থোংদা কেন্দ্রগী হকশেল অমসুং য়াইফ-য়ুম্বাল মন্ত্রী, দা. মনসুখ মন্দাবিয়ানা ময়াই তাংবল লৌদুনা পাঙথোকপা মীফম অমদা মহাক্না ফোঙদোকখি।

জিলা অমসুং রাজ্য খরদা পোজিতিব কেস হেনগৎলকপা অমসুং কোবিদ-১৯ তেস্ত তৌবা হন্থরকপা অসি য়েংলগা দা. মনসুখ মন্দাবিয়ানা তেস্ত তৌবা হেনগৎলকপা অমসুং মতম চানা তৌবা অসিনা কোবিদ কেসশিং ঙন্না খঙদোকপা ঙমহনগনি অমসুং মীয়ামগী মরক্তা লাইনা শন্দোকপা থিংবদা মতেং পাংগনি। মহাক্না রাজ্য/য়ু.তি.শিংনা সর্ভিলেন্স মখা চত্থনবা অমদি মপাঙ্গল কনখৎহন্নবা অমসুং লৈবাক অসিদা অনৌবা ম্যুতেন্ত/ভেরিয়েন্তশিং মশক খঙদোক্নবগীদমক জিনোম সিক্বেন্সিংদা মীৎয়েং চংনবা হায়খ্রে। মহাক্না তেস্ত, ত্রেক, ত্রীৎ, ভেক্সিনেসন অমসুং কোবিদ এপ্রোপ্রিএৎ বিহেবিয়র (সি.এ.বি.) ঙাক্না চৎপগী মরোং মঙা লোংবা লাংলো অসি মখা চত্থবা থৌ তাই অমসুং রাজ্য/য়ু.তি.শিংনা য়েংনিনবা মথৌ তাই হায়না ফোঙদোকখি। রাজ্যশিংদা মপালদগী চংলকপা ইন্তর্নেস্নেল ত্রেবেললরশিংগী সর্ভিলেন্স অমসুং হেল্থ ফেসিলিতীশিং, লেবশিং, কম্ম্যুনিতী অসিনচিংবগী খুত্থাংদা সর্ভিলেন্স চত্থবদা মীৎয়েং চংলিবা ওপরেস্নেল গাউদলাইন্স ফোর রিভাইজ সর্ভিলেন্স স্ত্রেতেজী ফোর কোবিদ-১৯ ইমপ্লিমেন্ত তৌবদা মীৎয়েং চংনবা হায়খ্রে।

খুদোংথিনীংঙাই ওইবা চহি কাংলুপশিংগী মরক্তা কোবিদ ভেক্সিনেসন তৌবগী মরু ওইবা অদু ফোঙদোক্লদুনা মহাক্না রাজ্যগী হকশেল মন্ত্রীশিংদা জুন ১দগী হৌখিবা অখন্ননা থা অমা চুপ্না চত্থরিবা হরঘরদস্তক ২.০ কেম্পেনগী ফীভম অমসুং খোঙজেল য়াংশিন্নবা হকথেংননা হায়খি। মহাক্না হায়খি, “ঐখোয়না অহানবা অমসুং অনিশুবা দোজকীদমক চহি কাংলুপ ১২-১৭কী মনুংদা লৈরিবা বেনিফিসরী পুম্নমক মশক খঙদোক্নবা ঐখোয়গী খোঙথাং অসি কনখৎহল্লসি, অসুম তৌবনা মখোয়না ভেক্সিনগী ঙাকলৌগা লোয়ননা স্কুলশিং কাবা ঙমগনি”। মহাক্না সম্মর ভেকেসন মনুংদা স্কুল চত্তবা অঙাংশিংগী তার্গেতেদ কবরেজ তৌবগা লোয়ননা রাজ্যশিংদা স্কুল-বেজ কেম্পেনশিং (সরকার/লনাই/ মদরসা, দে ক্যের স্কুলশিং অসিগুম্বা ইনদোর্মদ স্কুলশিং)গী খুত্থাংদা চহি কাংলুপ ১২-১৭কী কবরেজ তৌবদা মীৎয়েং চংনবা হায়খ্রে।

মহাক্না মখা তারদুবা চহি ৬০গী মথক্কী মীওইশিং অসি ভলনরেবল কেতগোরীদা চল্লি অমসুং প্রিকোসন দোজ কাপতুনা ঙাকথোকপা মথৌ তাই হায়না ফোঙদোকখি। “ঐখোয়গী হেল্থকিয়র ৱার্করশিংনা ভলনরেবল ওইবা মীওইশিংদা প্রিকোসন দোজ কাপ্নবা দোর-তু-দোর চৎলি”, হায়না মহাক্না ফোঙদোকখি। রাজ্যগী হকশেল মন্ত্রীশিংদা চাং নাইনা লনাই হোস্পিতালশিংগা লোয়ননা চহি কাংলুপ ১৮-৫৯ ফাওবগী মীওইশিংদা প্রিকোসন দোজ কাপ্লিবা অসি য়েংশিন্নবসু হায়খি। মহাক্না ঐখোয়না অহানবা হর ঘর দস্তক কেম্পেনদা কোবিদ ঙাকথোকপা হেনগৎহন্নবা ইলিজিবল পোপুলেসনগী মরক্তা ১০০% কবরেজ ফংনবা হোৎবদা খঙজিনখিবা লৌশিং অদু শীজিন্নবা য়াগনি হায়না ফোঙদোকখি। “লৈবাক অসিদা ভেক্সিন দোজ মরাং কাইনা লৈরি। ঐখোয়না হর ঘর দস্তক কেম্পেনগী অনিশুবা তাঙ্কক অসিগী মনুংদা কোবিদ ভেক্সিনেসনগী কবরেজ হেনগৎহন্নবা হোৎনরি”, হায়না মহাক্না হায়খি।

মখোয়দা কোবিদ-১৯ ভেক্সিন মাংহনদবা অকনবা পাউতাকসু পীখি। মসি এক্তিব মোনিতরিং তৌদুনা অমসুং মরম লোইদৌরবা দোজ অদু হান্না ভেক্সিনেসন তৌরিবা “ফর্স্ত এক্সপিয়রী ফর্স্ত আউত”কী প্রিন্সিপলদা য়ুম্ফম ওইরগা তৌনবসু কেন্দ্রগী হকশেল মন্ত্রীনা খঙহনখি।

হক ঘর দস্তক ২.০ কেম্পেনগী খুত্থাংদা রাজ্যশিংদা কোবিদ ভেক্সিনেসন কবরেজ খোঙজেল য়াংখৎহন্নবা দা. ভারতি প্রবিন পাৱর, এম.ও.এস. (ঐচ.এফ.দবল্যু.)নসু ফোঙদোকখি।

মীফম অসিদা রাজ্যগী হকশেল মন্ত্রীশিং দা. সাপম রঞ্জন সিংহ (মনিপুর), শ্রী অলো লিবাং (অরুনাচল প্রদেশ), শ্রী থাননীরু হরিশ রাও (তেলঙ্গানা), শ্রী অনিল বিজ (হরিয়ানা), শহরী রুশিকেশ গনেশভাই পতেল (গুজরাত), শ্রী বন্না গুপ্তা (ঝার্খন্দ), শ্রী মঙ্গল পান্দে (বিহার), দা. রেজেশ তোপে (মহারাস্ত্র), দা. প্রভুরাম চৌধুরী (মধ্য প্রদেশ), দা. কে সুধাকর (কর্নাতকা) অসিনা শরুক য়াখি।

এন.ঐচ.এম. মিসন দিরেক্তরশিং অমসুং রাজ্য/য়ু.তি.শিংগী অতোপ্পা ওফিসিএলশিংগা লোয়ননা ভর্চুএলগী ওইবা য়েংশিন মীফম অসিদা এদিস্নেল সেক্রেতরী দা. মনোহর অংনানি, এদিস্নেল সেক্রেতরী কুমারি রোলি সিংহ, জোইন্ত সেক্রেতরী শ্রী লব অগরৱাল অমসুং কেন্দ্রগী হকশেল মন্ত্রালয়গী অতোপ্পা মকোক থোংবা ওফিসিএলশিংসু শরুক য়াখি।

****