প্রধানমন্ত্রীগী লোইশঙ
প্রধান মন্ত্রীনা নবসারীদা পাংথোকপা ‘গুজরাত গৌরব অভিয়ান’গী মনুংদা চাউখৎ-থৌরাংগী তোঙানবা প্রোজেক্ত কয়া হৌদোকখ্রে
প্রধান মন্ত্রীনা লুপা করোর ৩০৫০গী শেনফমগী চাউখৎ-থৌরাংগী তোঙানবা প্রোজেক্ত কয়া শঙ্গাবগা লোয়ননা উরেপ উয়ুং তমখ্রে
“দবল ইঞ্জিন সরকার অসিনা গুজরাতকী খোঙজেল থুবা অমসুং পুম্নমক মনুং চনবা চাউখৎ-থৌরাংগী মশক নাইরবা চৎনবীবু তুংলমচত্তা থম্মোই শেংনা পুদুনা চৎলি”
“সরকারনা লাইরবশিংগী য়াইফ য়ুম্বাল অমসুং মখোয়দা তঙাই ফদবা খুদোংচাবশিং ফংহন্নবা খ্বাইদগী অহেনবা মিৎয়েং চঙলি”
“য়ৌশিনবদা খুদোংচাদবা মফম অমা হেক্তদা হিংজরিবা লাইরবা, ত্রাইবেলশিংনা অশেংবা ঈশিং ফংবগী হক লৈ”
“ঐখোয়না সরকারগী মনুংদা লৈববু মীয়ামগী সেবা তৌবা ফংবগী খুদোংচাবনি হায়না লৌই”
“ঐখোয়গী অহল-লমনশিংনা থেংনখিবা খুদোংচাদবশিংবু ঐখোয়গী হৌরক্লিবা চারোন-শুরোনশিংনা থেংনহন্দনবা ঐখোয়না খোঙফম চেৎলি”
Posted On:
10 JUN 2022 12:48PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি ‘গুজরাত গৌরব অভিয়ান’ থৌরমদা শরুক য়াখি। নভসারীগী ত্রাইবেলগী মফম, খুদভেলদা পাংথোকপা ‘গুজরাত গৌরব অভিয়ান’ থৌরমগী মনুংদা মহাক্না চাউখৎ-থৌরাংগী তোঙান-তোঙানবা প্রোজেক্ত কয়া শঙ্গাবগা লোয়ননা উরেপ উয়ুংসু তমখি। মসিগী মনুংদা প্রোজেক্ত ৭ শঙ্গাবা, প্রোজেক্ত ১২গী উরেপ উয়ুউং তম্বা অমসুং প্রোজেক্ত ১৪গী ভুমী পুজন তৌবগী থৌওং য়াওখি। প্রোজেক্তশিং অসিনা লমফম অসিগী ৱাতর সপ্লাই ফগৎহনবদা তেংবাংবগা লোয়ননা কন্নেক্তিবিতী ফগৎহনগনি অমসুং পুন্সি মহিংসু হেন্না নুংঙাইহনগনি। গুজরাতকী মুখ্য মন্ত্রী, শ্রী ভুপেন্দ্র ভাই পতেল, কেন্দ্র অমসুং রাজ্যগী মন্ত্রীশিংগা লোয়ননা মীয়ামগী অতোপ্পা মীহুৎ কয়ানা থৌরম অসিদা শরুক য়াখি।
প্রধান মন্ত্রীনা তিল্লিবা মীয়ামদা ৱা ঙাঙবদা ঙসিগী থৌরম মফমদা ত্রাইবেল মীয়াম মশিং য়াম্না তিনবগী মতৌবু পনখি। অসিগুম্বা থৌরম শীনবা-লাঙবনা ত্রাইবেল ইচিল ইনাওশিংবু ঐখোয়না নুংশিনা খনবগী মতৌ তাকই হায়না মহাক্না চাউথোকচবা ফাওখি। ত্রাইবেলশিংগী তৌবা ঙম্বগী মতিক অমসুং ৱাখল চেৎপগী মতৌবু শকখঙলদুনা মহাক্না নভসারী লমদমগী মফমদা ইকায় খুম্নবা উৎখি।
মমাংগী দিকেদ অনিদা খোঙজেল থুবা অমসুং হীরম খুদিংমক মনুং চনবা চাউখৎ-থৌরাং লৈখিবা অমসুং মসিদগী অনৌবা অপাম্বা কয়া থোক্লকখিবসি গুজরাতকী চাউথোকচনীংঙাই ওইবা ৱাফম অমনি। দবল ইঞ্জিন সরকার অসিনা চৎনবী অসিবু তুংলমচত্তা থম্মোই শেংনা পুদুনা চৎলি। ঙসিগী প্রোজেক্তশিংনা সুরত, নভসারী, বলসার অমসুং খা গুজরাতকী তাপী জিলাদা লৈবা মীওইশিংগী পুন্সি মহিং হেন্না ফগৎহল্লগনি হায়না মহাক্না ফোংদোকখি।
গুজরাতকী মীয়াম্না মহাকপু চহি ৮গী মমাংদা দিল্লীদা থাখিববু প্রধান মন্ত্রীনা নীংশিংখি। মমাংগী চহি ৮দা, মহাক্না হায়খি, সরকারনা মীয়ামগী অনৌবা কাংলুপ অমসুং লমদম কয়াবু চাউখৎ-থৌরাং অমসুং অনীংবা অপাম্বা কয়াগা মরী লৈনহনখি। লাইরবা, শোত্থরবা, মীরাইবীরবা, ত্রাইবেল, নুপী অমসুং অৱাবা নংগনবা মীওইশিংনা নোংমগী তঙাই ফদবশিং খক ফংনবা মখোয়গী মপুন্সি পুম্বা লেনখিবগী মতম অমা লৈরম্ববু মহাক্না মীয়ামদা নীংশিংহনখি। মমাংগী মতমদা, মখোয়গী চাউখৎ-থৌরাংদা সরকারনা মিৎয়েং অমত্তা চঙবীরমদে। লৈত-লাইরবা মীয়াম অমসুং লমদমশিংদা খুদোংচাবা অমত্তা পীবীরমদে। মমাংগী চহি ৮দা, সবকা সাথ, সবকা বিকাসকী মন্ত্রা ইন্দুনা মহাক্কী সরকারনা লাইরবশিংগী য়াইফ য়ুম্বাল অমসুং মখোয়দা তঙাই ফদবা খুদোংচাবশিং ফংহন্নবা খ্বাইদগী অহেনবা মিৎয়েং চঙখি হায়না মহাক্না হায়খি। মহাক্না মখা তারদুনা, হৌজিক্তি সরকারনা য়াইফ য়ুম্বাল স্কিমশিংগী ১০০% সেচ্যুরেসনগী খুত্থাংদা লাইরবশিংগী মপাঙ্গলবু ১০০%গী চাংদা হেনগৎহন্নবা থবক পায়খৎলি হায়খি। প্রধান মন্ত্রীনা থৌরমগী ফম্বাক্তা কাদ্রিঙৈদা ত্রাইবেল খুন্নাইগী বেনিফিশরীশিংগা ৱারী শাখি। মীয়াম অমসুং বেনিফিশরীগা পাউ ফাওনবনা চাউখৎ-থৌরাংদা শৌগৎপগী থৌওংদা অনৌবা খোঙজেল হাপ্পি হায়না ফোংদোকখি।
প্রধান মন্ত্রীনা গুজরাতীদা ৱা ঙাঙলদুনা মহাক্কা লোকেলগী মীয়ামগা মতম শাংবদগী মরী লৈনরক্লিবা অসিবু নৌহৌননা পনখি। মহাক্না মফমসিদা থবক তৌরিঙৈদা লোকেলগী মীয়ামশিংনা মহাকপু নুংশিবীবা অমসুং তরাম্না ওকপীখিবশিংবু নীংশিংখি। “অদোমগী মীনুংশি অমসুং থৌজালনা ঐহাক্কী পাঙ্গলনি”, হায়না পুক্নিং নুংশিবগী মমি তারবা প্রধান মন্ত্রীনা ফোংদোকখি। ত্রাইবেল খুন্নাইগী অঙাংশিংনা খুদোংচাবা পুম্নমক ফংগদবনি হায়রদুনা মখোয়গী লু-নানবা, লৌশিং, তাশিন-খোমজিনবা অমসুং লিচৎ-শাজৎকী মগুনশিংবুসু পনখি। মহাক্না ত্রাইবেল মীয়ামগী মরক্তা লৈরিবা খুন্নাই অমা ওইনা হিংমিন্নবা অমসুং অকোয়বগী ফিভম ঙাক-শেনবগী মগুনগী মতাংদা ৱাফম কয়া থমখি। ত্রাইবেল লমদমশিংদা ঈশিং শোইদনা ফংহন্নবা মহাক্না হোৎনরিবশিংগী মতাংদসু মহাক্না পাউদমখি। ঙসিগী লুপা করোর লিশিং ৩ হেনবগী প্রোজেক্তশিং অসিদি ঈশিংগী তেঙ্কী শঙ্গাবগী থৌরম ফাওবনা পাউ-চেগী হেদলাইন্দা থল্লম্বা মতমগা চাংদম্নবদা য়াম্না খেন্নরে হায়না মহাক্না ফোংদোকখি। চাউখৎ থৌরাং অমসুং য়াইফ য়ুম্বালগী প্রোজেক্ত কয়া লেপ্তনা পায়খৎপগী থৌওংনা মহাক্কী লৈঙাক্কী শরুক ওইনা মতম কয়াদগী ওইদুনা লাক্লি অমসুং মীয়ামগী য়াইফ য়ুম্বাল অমদি গরীব কলয়ানগী পান্দম লৈবা প্রোজেক্তশিং অসিদি মীখল য়েংদুনা পাংথোকপা নত্তে হায়না মহাক্না ফোংদোকখি। য়ৌশিনবদা খুদোংচাদবা মফম অমা হেক্তদা হিংজরিবা লাইরবা, ত্রাইবেলশিংনা অশেংবা ঈশিং ফংবগী হক লৈ, মরম অদুনা অসিগুম্লবা চাউরবা প্রোজেক্তশিং পায়খৎলিবনি হায়রদুনা প্রোজেক্তশিংবু মতম চানা লোইশিন্নবা থবক পায়খৎপগী চৎনবীদা অচৌবা অহোংবা অমা লৈরক্তুনা, প্রোজেক্ত অমগী উরেপ উয়ুং তম্বা অমসুং শঙ্গাবগী থৌওংবু মান্নবা মতম অমত্তদা মহাক মশামক্না পাংথোকপনা প্রধান মন্ত্রীগী অখন্নবা শক্তাক অমা ওইদুনা লাক্লি হায়না মহাক্না মখা তাখি। “ঐখোয়না সরকারগী মনুংদা লৈববু মীয়ামগী সেবা তৌবা ফংবগী খুদোংচাবনি হায়না লৌই”, হায়না মহাক্না মরু ওইনা ফোংদোকখি। ঐখোয়গী অহল-লমনশিংনা থেংনখিবা খুদোংচাদবশিংবু ঐখোয়গী হৌরক্লিবা চারোন-শুরোনশিংনা থেংনহন্দনবা ঐখোয়না খোঙফম চেৎলি। মরম অদুনা, স্কিমশিং অসিনা অশেংবা ঈশিং, মীপুম খুদিংগী মগুন লৈবা এজুকেসন ফংবগুম্বা তঙাই ফদবা খুদোংচাবশিং শোইদনা ফংহল্লিবনি হায়না মহাক্না হায়খি। লমদম অমদা সাইন্স স্কুল অমা ফাওবা লৈরমদবা মতমগা য়েংনরুবা মতমদা হৌজিক্কী মতমদদি অনৌবা মেদিকেল কোলেজ অমসুং য়ুনিভর্সিতী লৈরক্লি হায়না মহাক্না হায়খি। ইনফ্রাস্ত্রকচর, এজুকেসন, ব্যুজিনেস, কন্নেক্তিবিতীগা মরী লৈনবা স্কিমশিংনা মরম ওইরগা মনুং হঞ্জিনবা মফমশিংগী পুন্সি মহিংদা অহোংবা কয়া লাক্লিবনি। মহাক্না দাং জিলা অমসুং খা গুজরাতপু নেচরেল ফার্মিংদা মায় ওনশিনবগীদমক্তা থাগৎপা ফোংদোকখি। মেদিকেল অমসুং ইঞ্জিনিয়রিং ফাওবা য়াওনা তেক্নিকেল কোর্স কয়াবু মমালোন্দা তম্বীবনা ও.বি.সি. অমসুং ত্রাইবেল অঙাংশিংগী খুদোংচাবা কয়া হাংদোক্কনি হায়না মহাক্না হায়খি। মহাক্না রাজ্য সরকারবু বন বন্ধু য়োজনাগী অনৌবা ফেজপু থবক ওইনা পায়খৎপগী থাগৎপা ফোংদোকখি। ঐখোয়না হোলিস্তিক, ইনক্লুসিব অমসুং ইকুইতেবল দিভেলপমেন্তকী মাইকৈদা থবক তৌরি হায়না প্রধান মন্ত্রীনা হায়খি।
প্রধান মন্ত্রীনা তাপী, নবসারী অমসুং সুরত জিলাগী মীয়ামগীদমক্তা লুপা করোর ৯৬১গী শেনফমগী ৱাতর সপ্লাই প্রোজেক্ত ১৩গী ভুমী পুজন পাংথোকখি। মহাক্না লুপা করোর ৫৪২ চঙনা শাগদবা অমসুং লমদমসিগী মীয়ামদা শেল চঙদবা অমসুং মগুন লৈবা মেদিকেল কেয়র পীগদবা নভসারী জিলাগী মেদিকেল কোলেজ অমগী ভুমী পুজন্সু পাংথোকখি।
প্রধান মন্ত্রীনা মধুবন দামদা য়ুম্ফম ওইদুনা লুপা করোর ৫৮৬ চঙবা শাবা অস্তোল রিজনেল ৱাতর সপ্লাই প্রোজেক্ত শঙ্গাখি। মসিনা ৱাতর সপ্লাই ইঞ্জিনিয়রিংগী স্কিলগী খুদম ওইবা য়াবা থৌওং অমনি। মসিদা নত্তনা, লুপা করোর ১৬৩ চঙবা শেনফমগী ‘নল সে জল’ প্রোজেক্তসু প্রধান মন্ত্রীনা শঙ্গাখি। প্রোজেক্তশিং অসিনা সুরত, নবসারী, বলসার অমসুং তাপী জিলাগী মীয়ামদা তেক্ত-কায়দবা অমসুং কোন্নবা চাংগী ঈশিং পীগনি।
প্রধান মন্ত্রীনা তাপী জিলাগী মীয়ামদা মৈ পীগদবা লুপা করোর ৮৫ চঙনা শাবা বিরপুর ব্যারা সবস্তেসনসু শঙ্গাখি। ৱেস্তৱাতর ত্রিতমেন্ত তৌবা য়াহনগদবা লুপা করোর ২০ চঙবা অমসুং এম.এল.দি. ১৪গী কেপাসিতী লৈবা সিৱেজ ত্রিতমেন্ত প্লান্ত অমসু মহাক্না বলসার জিলাগী ভাপী শহরগীদমক্তা শঙ্গাখি। লুপা করোর ২১গী শেনফম হেন্না চঙনা নবসারীদা শাবা সরকারগী ক্বার্তরসু প্রধান মন্ত্রীনা শঙ্গাখি। মহাক্না পিপ্লাইদেবী – জুনের – চিচভিহির – পিপালদহারদগী হৌদুনা শাবা শোরোক অমসুং দাংদা শারিবা স্কুল বিলদিং অমসু শঙ্গাখি, হায়রিবশিং অসি অমমমদা লুপা করোর ১২ চঙনা শেমগৎ-শাগৎখিবনি।
প্রধান মন্ত্রীনা সুরত, নবসারী, বলসার অমসুং তাপী জিলাগী মীয়ামদা অশেংবা থক্নবা ঈশিং পীনবগীদমক্তা লুপা করোর ৫৪৯ চঙনা শাগদবা ৱাতর সপ্লাই প্রোজেক্ত ৮গী উরেপ উয়ুং তমখি। নবসারী জিলাদা লুপা করোর ৩৩ চঙনা শাগদবা খেরগাম অমসুং পিপালখেদ শম্নহনগদবা অপাকপা শোরোক অমগী উরেপ উয়ুংসু প্রধান মন্ত্রীনা তমখি। মসি নত্তবা, লেন মরিগী অতোপ্পা শোরোক অমসু সুপা ফাওদুনা নবসারী অমসুং বার্দোলীগী মরক্তা চাউরাক্না লুপা করোর ২৭ চঙনা শাগনি। প্রধান মন্ত্রীনা জিলা পঞ্চায়ত ভবন শাবা অমসুং ধাংদা লৈবা রোল্লর ক্রাশ বেরিয়র পীনবা অমসুং শেমজিন-শাজিনবগীদমক্তা মথংশিৎনা লুপা করোর চাউরাক্না ২৮ অমসুং ১০ চঙগদবগী উরেপ উয়ুংসু তমখি।
***
(Release ID: 1832872)
Visitor Counter : 151
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Malayalam