প্রধানমন্ত্রীগী লোইশঙ
প্রধান মন্ত্রীনা রাজ্যশিংগী সি.এম. অমসুং হাই কোর্তকী চীফ জস্তিসশিংগী অপুনবা কনফরেন্স হৌদোকখ্রে
“নীংতম্বগী চহি ৭৫ মপুং ফারকপনা জুদিসিএরী অমসুং একজেক্যুতিব অনিমক্কী থৌদাংশিংবু লেপ্তনা ময়েক শেংহল্লি। তঙাই ফদবা লৈরকপা খুদিংদা, মসিগী মরী অসিনা লেপ্তনা হোংদুনা লৈবাক্তা অচুম্বা মাইকৈ তাক্লি”
“ইং ২০৪৭কী ভারতকী অপাম্বা পীবা ঙম্নবা ঐখোয়গী জুদিসিএল সীস্তেম্বু মতৌ করম্না মতিক লৈহনসিগে হায়বসি ঐখোয়না ঙসি খ্বাইদগী অহানবা মিৎয়েং চঙগদবা থৌদাংনি”
“অচুম্বা ৱায়েল লায়না ফংবা, খঙজেল থুবা অমসুং মীপুম খুদিংদা ফংহনবা ঙম্বা জুদিসিএল সীস্তেম অমা লৈবা হায়বসিনা ঐখোয়গী অমৃত কালগী মিৎয়েং ওইগদবনি”
“জুদিসিএল সীস্তেমদা তেক্নোলোজী শিজিন্নবা য়াবা অসিবু দিজিতেল ইন্দিয়া মিসনগী চঙদ্রবা য়াদ্রবা শরুক অমনি হায়না সরকারনা খল্লি”
“লৈবাক্কী মীয়াম্না জুদিসিএলগী থৌওংশিংগা মরী লৈনজবা ঙম্নবগীদমক্তা কোর্ত্তা লোকেল লোল খুমাং চাউশিলহনবা হায়বসি য়াম্না মরু ওইবনি”
“লৈবাক অসিদা অন্দর ত্রাইএল অমসুং জেলদা লৈবা ফাদোক মী চাউরাক্না লাখ ৩.৫ লৈ। মসিগুম্বা অয়াম্বা মীওইদি লাইরবা অমসুং অচম্বা ইমুংগী মীওইশিংনি”
“ঐহাক্না মুখ্য মন্ত্রী অমসুং চীফ জস্তিসশিংদা হীরম অসিদা অহানবা মিৎয়েং চঙনবা হায়জনীংই”
Posted On:
30 APR 2022 12:04PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি নই দিল্লীগী বিগ্যান ভবন্দা পাংথোকপা রাজ্যশিংগী সি.এম. অমসুং হাই কোর্তকী চীফ জস্তিসশিংগী অপুনবা কনফরেন্স হৌদোকখ্রে। মহাক্না ঙসিগী থৌরমগী মীতিন অসিদা মহাক্কী ৱারোলসু থমখি। ভারতকী চীফ জস্তিস, এন.ভি. রামন্না, সুপ্রীম কোর্তকী জস্তিস য়ু.য়ু. ললিত, কেন্দ্র মন্ত্রী, শ্রী কিরেন রিজিজু অমসুং প্রোফঃ এস.পি. সিংহ বাঘেল, সুপ্রীম কোর্তকী জজশিং, হাই কোর্তকী চীফ জস্তিস, রাজ্য/য়ু.তি.শিংগী মুখ্য মন্ত্রী অমসুং এল.জি. কয়াসু থৌরম অসিদা শরুক য়াখি।
প্রধান মন্ত্রীনা থৌরম অসিদা ৱা ঙাঙবদা অসুম্না হায়খি, “ঐখোয়গী লৈবাক অসিদা জুদিসিএরীগী থৌদাংদি সংবিধানবু ঙাক শেনবা ওইবা মতমদা, লেজিসলেচরনা মীয়ামগী অপাম্বগী মহুৎ শিল্লি। সংবিধানগী অসিগুম্বা মশা অনিনা খল মান্ননা লৈবনা লৈবাক্কী মথৌ নীংথিনা তৌবা অমসুং মতমগী মনুংদা অচুম্বা ৱায়েল পীবগী পথাপ অমগী থৌরাং য়াৎকনি হায়না থাজবা থম্মি”। নীংতম্বগী চহি ৭৫ মপুং ফারকপনা জুদিসিএরী অমসুং একজেক্যুতিব অনিমক্কী থৌদাংশিংবু লেপ্তনা ময়েক শেংহল্লি। তঙাই ফদবা লৈরকপা খুদিংদা, মসিগী মরী অসিনা লেপ্তনা হোংদুনা লৈবাক্তা অচুম্বা মাইকৈ তাক্লি হায়না মহাক্না হায়খি। কনফরেন্স অসিবু সংবিধানগী নীংথিরবা মতৌগী ময়েক শেংলবা শক্তম্নি হায়রদুনা প্রধান মন্ত্রীনা মহাক্না অহানবদনা মুখ্য মন্ত্রী ওইনা অমসুং হৌজিক্না প্রধান মন্ত্রী ওইনা মতম শাংনদগী কনফরেন্স অসিদা য়াওদুনা লাক্লি হায়না ফোংদোকখি। “ঐহাক অসি কনফরেন্স অসিগী ওইনদি, মওং অমদা, য়াম্না সেনিয়র ওইরবা মীওইনি”, হায়না মহাক্না ফাগী তৌদুনা হায়খি।
প্রধান মন্ত্রীনা কনফরেন্স অসিগী তোন শেম্লদুনা অসুম্না হায়খি, “ইং ২০৪৭তা লৈবাক অসিনা নীংতম্বগী চহি ১০০ মপুং ফারগনি অমসুং মসিদা ঐখোয়না করম্বা মখলগী জুদিসিএল সীস্তেম উবা পাম্বগে? ইং ২০৪৭কী ভারতকী অপাম্বা পীবা ঙম্নবা ঐখোয়গী জুদিসিএল সীস্তেম্বু মতৌ করম্না মতিক লৈহনসিগে হায়বসি ঐখোয়না ঙসি খ্বাইদগী অহানবা মিৎয়েং চঙগদবা থৌদাংনি”। “অচুম্বা ৱায়েল লায়না ফংবা, খঙজেল থুবা অমসুং মীপুম খুদিংদা ফংহনবা ঙম্বা জুদিসিএল সীস্তেম অমা লৈবা হায়বসিনা ঐখোয়গী অমৃত কালগী মিৎয়েং ওইগদবনি”, হায়না মহাক্না মখা তাখি।
অচুম্বা ৱায়েল পীবদা মতম চঙবা হন্থহন্নবা সরকারনা হোৎনরিবা অমসুং জুদিসিএলগী মপাঙ্গলগা লোয়ননা জুদিসিএল ইনফ্রাস্ত্রকচর হেন্না ফগৎহন্নবা সরকারনা মিৎয়েং চঙলিবা অসিবুসু প্রধান মন্ত্রীনা পনখি। কেস মেনেজমেন্তকীদমক্তা আই.সি.তি. শিজিন্নরে অমসুং জুদিসিএরীগী তোঙানবা থাকশিংদা অহাঙবা লৈবশিংবুসু মেন্নবা কন্না হোৎনরি হায়না মহাক্না হায়খি।
প্রধান মন্ত্রীনা জুদিসিএলগী থবকশিংগা মরী লৈনবা গবর্নেন্সতা তেক্নোলোজী শিজিন্নবগী মহাক্কী পান্দম্বু অমুক হন্না নীংশিংখি। জুদিসিএল সীস্তেমদা তেক্নোলোজী শিজিন্নবা য়াবা অসিবু দিজিতেল ইন্দিয়া মিসনগী চঙদ্রবা য়াদ্রবা শরুক অমনি হায়না ভারত সরকারনা খল্লি হায়না মহাক্না ফোংদোকখি। থৌওং অসিবু মখা তানা চত্থনবগীদমক্তা মহাক্না মুখ্য মন্ত্রী অমসুং হাই কোর্তশিংগী চীফ জস্তিসশিংগী মফমদা থমখি। ই-কোর্ত প্রোজেক্ত অসিসু ঙসিদি মিসন মোদতা থবক পায়খৎপা হৌরে হায়না মহাক্না হায়খি। শহর মচা অমসুং খুঙ্গং ফাওবদা দিজিতেল ত্রাঞ্জেক্সনশিং পাক শন্না পাংথোরক্তুনা পথাপ অসিনা মায় পাক্লকপবু মহাক্না খুদম ওইনা পনখি। মমাংগী চহিদা মালেমদা পাংথোকখিবা দিজিতেল ত্রাঞ্জেক্সন পুম্নমক্কী শরুক ৪০%দি ভারত্তা পাংথোকখি হায়না প্রধান মন্ত্রীনা পাউদমখি। তেক্নোলোজী শিজিন্নবগী মতাংদা প্রধান মন্ত্রীনা মখা তারদুনা, হৌজিক্কান্দি ব্লোক-চেন, ইলেক্ত্রোনিক দিস্কবরী, সাইবর্সেক্যুরিতী, রোবোতিক্স, এ.আই. অমসুং বাইও-ইথিক্স অসি লৈবাক কয়া অমগী লো-য়ুনিভর্সিতীশিংদা তাক্নরে হায়না ফোংদোকখি। “লিগেল এজুকেসনবু ঐখোয়গী লৈবাক্তসু অসিগুম্বা মালেমগী থাক্কী মতুং ইলহনবা হায়বসি ঐখোয় পুম্নমক্কী থৌদাংনি”, হায়না মহাক্না মখা তাখি।
লৈবাক্কী মীয়াম্না জুদিসিএলগী থৌওংশিংগা মরী লৈনজবা ঙম্নবগীদমক্তা অমসুং পথাপ অসিদা মখোয়না থম্লিবা থাজবা হেনগৎলক্নবা কোর্ত্তা লোকেল লোল খুমাং চাউশিলহনবা হায়বসি য়াম্না মরু ওইবনি হায়না প্রধান মন্ত্রীনা হায়খি। অসিগুম্বা থৌওং অসিনা মীয়ামগী জুদিসিএলগী থৌওংগী হকপুসু মসিনা মপাঙ্গল কনখৎহনগনি হায়না মহাক্না ফোংদোকখি। তেক্নিকেল এজুকেসন্দসু লোকেল লোলদা তাকপী তম্বীনবা পুক্নিং থৌগৎলি হায়না মহাক্না ফোংদোকখি।
প্রধান মন্ত্রীনা আইনগী য়াম্না লুবা মতৌ চেনবা অমসুং চৎনরক্তবা লাকপগী থৌওংগী মতাংদা হায়খি। সরকারনা ইং ২০১৫দা মতমগা চুনদ্রবা আইন ১৮০০ মশক খঙদোকখি অমসুং মসিগী মনুংদগী আইন ১৪৫০দি হন্দোকখ্রে হায়না মহাক্না হায়খি। অসিগুম্বা আইন ৭৫ খকপু রাজ্যশিংনা হন্দোকখ্রে হায়না পল্লদুনা মহাক্না অসুম্না হায়খি, “অদোমগী রাজ্যগী মীয়ামগী হক অমসুং পুন্সি মহিংদা লায়থোকহন্নবা, হায়রিবা মাইকৈ অসিদা চপ চাবা থবক পাংথোকপীয়ু হায়না ঐহাক্না মুখ্য মন্ত্রীশিংগী মফমদা থম্লি”।
জুদিসিএল রিফোর্ম হায়বসি পোলিসীগী ৱাফমখক নত্তে হায়না প্রধান মন্ত্রীনা কন্না ফোংদোকখি। মসিদা মীওইবগী অপাম-পামদ য়াওরি অমসুং ৱা খন্নবা খুদিংদা মসিনা খ্বাইদগী মরু ওইনা লৌফম থোকই। লৈবাক অসিদা অন্দর ত্রাইএল অমসুং জেলদা লৈবা ফাদোক মী চাউরাক্না লাখ ৩.৫ লৈ। মসিগুম্বা অয়াম্বা মীওইদি লাইরবা অমসুং অচম্বা ইমুংগী মীওইশিংনি হায়না মহাক্না পাউদমখি। জিলা খুদিংগী ওইনা, জিলাগী জজনা লুচিংবা কম্মিতী অমা লৈ অমসুং মসি লৈরিবসি কেসশিং অসিবু য়েংশিনবা য়ানবনি অমসুং অসিগুম্বা ফাদোক-মীশিংবু য়ারিবমখৈ বেলদা থাদোকপা য়াহন্নবনি। “ঐহাক্না মুখ্য মন্ত্রী অমসুং চীফ জস্তিসশিংনা মীওইবগী অপাম-পামদ অমসুং আইনগী কাঙলোন্দা য়ুম্ফম ওইদুনা হীরম অসিদা অহানবা মিৎয়েং চঙনবা হায়জনীংই”, হায়না মহাক্না মখা তাখি।
পন্দুনা লৈবা কেসশিং লোইশিন্নবগীদমক্তা ৱারী ৱাতাই শাদুনা ৱারোইশিন পুরকপগী থৌওং অসি, লোকেলগী থাক্তনা মরু ওইনা, য়াম্না মরু ওইবা খুৎলায়/পাম্বৈ অমনি হায়না প্রধান মন্ত্রীনা হায়খি। ঐখোয়গী খুন্নাই অসিদা অসিগুম্না ৱারী শারগা ৱারোইশিন পুরকপগী চহি লিশিং কয়াদগী হেন্না চৎনরক্লবা চৎনবী অয়া লৈ। মীওই মশেলদা য়ানবা পুরকপা, মীওই মশেলনা শরুক য়ামিন্নবা হায়বসিনা অচুম্বা ৱায়েল পীবগী মীওইবগী লেঙদ্রবা ৱাখল্লোন অমনি হায়না মহাক্না হায়খি। অসিগুম্বা ৱাখল্লোন অসিগা লোয়ননা, প্রধান মন্ত্রীনা হায়খিবদা, সরকারনা মেদিএসন বিলবু পার্লিয়ামেন্ততা অম্ব্রেল্লা লেজিসলেসন ওইনা হৌদোকখ্রে। “ঐখোয়গী লিগেলগী ইনাক খুল্লবা এক্সপেরিএন্স অসিগা লোয়ননা, ঐখোয়না মেদিএসনগী লমদা মালেমগী লুচিংবা ওইবা য়াগনি। ঐখোয়না মালেমদা মসিগী মোদেল অমা পীবা য়াগনি”, হায়না মহাক্না হায়খি।
****
(Release ID: 1821585)
Visitor Counter : 199
Read this release in:
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam