ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି (୨୮.୦୪.୨୦୨୨) ଆସାମର କର୍ବି ଆଙ୍ଗଲଙ୍ଗ୍ ଜିଲ୍ଲାର ଦୀଫୁଠାରେ ଶାନ୍ତି, ଏକତା ଓ ବିକାଶର ରାଲିକୁ ସମ୍ବୋଧନ କରିଛନ୍ତି । ଏହି କାର୍ଯ୍ୟକ୍ରମରେ ସେ ମଧ୍ୟ ଅନେକ ପ୍ରକଳ୍ପର ଶିଳାନ୍ୟାସ କରିଛନ୍ତି । ପ୍ରଧାନମନ୍ତ୍ରୀ ଦୀଫୁଠାରେ ପଶୁ ଚିକିତ୍ସା ମହାବିଦ୍ୟାଳୟ ଓ (ପଶ୍ଚିମ କର୍ବି ଆଙ୍ଗଲଙ୍ଗ)ଠାରେ ସ୍ନାତକ ମହାବିଦ୍ୟାଳୟ ଓ କୋଲଙ୍ଗ୍ (ପଶ୍ଚିମ କର୍ବି ଆଙ୍ଗଲଙ୍ଗ)ରେ କୃଷି ମହାବିଦ୍ୟାଳୟର ମଧ୍ୟ ଶିଳାନ୍ୟାସ କରିଛନ୍ତି ।

୫୦୦କୋଟି ଟଙ୍କାରୁ ଅଧିକ ଏହି ପ୍ରକଳ୍ପଗୁଡିକ ଯୋଗୁଁ ସେ ଅଞ୍ଚଳରେ କୌଶଳ ବିକାଶ ସହ କର୍ମନିଯୁକ୍ତି ମଧ୍ୟ ସୃଷ୍ଟି ହେବ । ପ୍ରଧାନମନ୍ତ୍ରୀ ମଧ୍ୟ ୨୯୫୦ଟି ଅଧିକ ଅମ୍ରିତ ସରୋବର ପାଇଁ ମଧ୍ୟ ଶିଳାନ୍ୟାସ କରିଛନ୍ତି । ରାଜ୍ୟ ପ୍ରାୟ ୧୧୫୦କୋଟିି ଟଙ୍କା ବ୍ୟୟରେ ଏହି ଅମ୍ରିତ ସରୋବରଗୁଡିକର ବିକାଶ କରିବ । ଆସାମ ରାଜ୍ୟପାଳ ଶ୍ରୀ ଜଗଦୀଶ ମୁଖୀ ଓ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ଅନ୍ୟମାନଙ୍କ ମଧ୍ୟରେ ଉପସ୍ଥିତ ଥିଲେ । 

ଏହି ଅବସରରେ ଉଦ୍‌ବୋଧନ ଦେଇ ପ୍ରଧାନମନ୍ତ୍ରୀ କର୍ବି ଆଙ୍ଗଲଙ୍ଗଙ୍କ ଜନସାଧାରଣଙ୍କୁ ଉଚ୍ଛ୍ୱସିତ ସମ୍ବର୍ଦ୍ଧନା ନିମନ୍ତେ ଧନ୍ୟବାଦ ଜ୍ଞାପନ କରିଥିଲେ । ସେ ଆଜାଦୀ କା ଅମ୍ରିତ ମହୋତ୍ସବ ସହ ସଂଯୋଗ ବଶତଃ ଆସାମର ମହାନ ସୁପୁତ୍ର ଲଚିତ ବରୋଫୁକନଙ୍କ ୪୦୦ତମ ବାର୍ଷିକୀ ଏକାଠି ପଡୁଥିବାର ଦର୍ଶାଇଥିଲେ । ‘ଲଚିତ ବରୋଫୁକନଙ୍କ ଜୀବନ ଦେଶପ୍ରେମ ଓ ରାଷ୍ଟ୍ରଶକ୍ତିର ଉତ୍ସାହ । ମୁଁ କବି ଆଙ୍ଗଲଙ୍ଗବାଦୀ ଆସାମର ଏହି ମହାନ୍ ବୀରଙ୍କୁ ଅଭିବାଦନ ଜଣାଉଛି” ବୋଲି ପ୍ରଧାନମନ୍ତ୍ରୀ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଦ୍ୱୈତ ଇଞ୍ଜିନଯୁକ୍ତ ସରକାର ସବ୍‌କା ସାଥ, ସବକା ବିକାଶ, ସବ୍‌କା ବିଶ୍ୱାସ ଓ ସବ୍‌କା ପ୍ର୍ରୟାସର ଉତ୍ସାହସହ କାର୍ଯ୍ୟ କରୁଛି । “ଆଜି ଏହି ସଂକଳ୍ପ କର୍ବି ଆଙ୍ଗଲଙ୍ଗ ମାଟିରେ ପୁଣି ଜାଗ୍ରତ ହୋଇଉଠିଛି । ସ୍ଥାୟୀ ଶାନ୍ତି ଓ ଆସାମର ଦୃଢ ବିକାଶ ନିମନ୍ତେ ଯେଉଁ ରାଜିନାମା ସାକ୍ଷରିତ ହୋଇଥିଲା ତାହା ଦୃତଗତିରେ କାର୍ଯ୍ୟକାରୀ ହେଉଛି” ବୋଲି ସେ କହିଥିଲେ ।

୨୬୦୦ରୁ ଅଧିକ ସରୋବର ନିର୍ମାଣ କାର୍ଯ୍ୟ ଚାଲିଛି ବୋଲି ପ୍ରଧାନମନ୍ତ୍ରୀ ମୋଦି କହିଥିଲେ । ଏହି ପ୍ରକଳ୍ପ ସମ୍ପୂର୍ଣ୍ଣରୂପେ ଜନସାଧାରଣଙ୍କ ସହଯୋଗରେ ନିର୍ମିତ ହେଉଛି ।

ଆଦିବାସୀ ଗୋଷ୍ଠୀଙ୍କ ମଧ୍ୟରେ ଏହି ସରୋବରର ଉତ୍କୃଷ୍ଟ ପରମ୍ପରା ରହିଛି ବୋଲି ସେ ସ୍ୱୀକାର କରିଥିଲେ । ଏହି ସରୋବରଗୁଡିକ କେବଳ ଗ୍ରାମ ପାଇଁ ଜଳଭଣ୍ଡାର କାର୍ଯ୍ୟ କରିବ ନାହିଁ ବରଂ ଆୟର ଉତ୍ସ ହେବ ବୋଲି ସେ ଆଶାପ୍ରକଟ କରିଥିଲେ ।

ପ୍ରଧାନମନ୍ତ୍ରୀ କହିôତଲେ ଯେ ୨୦୧୪ ମସିହା ପରଠାରୁ ଉତ୍ତର ପୂର୍ବାଞ୍ଚଳରେ ଅଭାବ ଅସୁବିଧା ହ୍ରାସ ପାଇବା ସହ ବିକାଶ ହେଉଛି । ଆଜି ଯଦି କେହି ଆସାମର ଆଦିବାସୀ ଅଂଚଳକୁ ଆସେ ବା ଉତ୍ତର-ପୂର୍ବାଞ୍ଚଳର ଅନ୍ୟ ରାଜ୍ୟକୁ ଯାଏ ସେ ମଧ୍ୟ ପରିବର୍ତ୍ତିତ ପରିସ୍ଥିତିର ପ୍ରଶଂସା କରିବ ବୋଲି ସେ କହିଥିଲେ । ଗତବର୍ଷ କର୍ବି ଆଙ୍ଗଲଙ୍ଗରେ ଅନେକ ସଂଗଠନ କିପରି ଶାନ୍ତି ଓ ବିକାଶ ପ୍ରକ୍ରିୟାରେ ଭାଗ ନେଇଥିଲେ ତା’ର ସ୍ମୃତିଚାରଣ କରିଥିଲେ । ୨୦୨୦ର ବଡୋ ରାଜିନାମା ମଧ୍ୟ ସ୍ଥାୟୀ ଶାନ୍ତିର ବାଟ ଖୋଲିଲା । ସେହିପରି ଏନଆଇଏଫଟି ମଧ୍ୟ ତ୍ରିପୁରାରେ ଶାନ୍ତିର ପଦକ୍ଷେପ ନେଇଛି । ଦୀର୍ଘ ଅଢେଇ ଦଶନ୍ଧିର ବ୍ରୁରିଆଙ୍ଗ ସମସ୍ୟାର ମଧ୍ୟ ସମାଧାନ ହୋଇଛି ବୋଲି ପ୍ରଧାନମନ୍ତ୍ରୀ କହିଥିଲେ । ପ୍ରଧାନମନ୍ତ୍ରୀ ଆହୁରି କହିଥିଲେ ଯେ ଦୀର୍ଘଦିନ ଧରି ସଶସ୍ତ୍ର ସେନା ସ୍ୱତନ୍ତ୍ର କ୍ଷମତା ଆଇନ (ଏଏଫଏସପିଏ) ଉତ୍ତର ପୂର୍ବାଞ୍ଚଳର ଅନେକ ରାଜ୍ୟରେ ଲାଗୁ ହୋଇଥିଲା । ମାତ୍ର ଉତ୍ତର ପୂର୍ବାଂଚଳର ଅଧିକାଂଶ ସ୍ଥାନ ଶାନ୍ତି ଓ ଆଇନ ଶୃଙ୍ଖଳା ପରିସ୍ଥିତିରେ ଉନ୍ନତି ଯୋଗୁ ଗତ ଆଠବର୍ଷ ମଧ୍ୟରେ ଅନେକ ସ୍ଥାନରୁ ଏଏଫଏସପିଏକୁ ପ୍ରତ୍ୟାହାର କରି ନିଆଯାଇଛି” ବୋଲି ପ୍ରଧାନମନ୍ତ୍ରୀ କହିଥିଲେ । ସବ୍‌କା ସାଥ, ସବ୍‌କା ବିକାଶର ଉତ୍ସାହ ସହ ସୀମା ସମସ୍ୟାର ସମାଧାନ ପାଇଁ ମଧ୍ୟ ପ୍ରୟାସ ହେଉଥିବା ପ୍ରଧାନମନ୍ତ୍ରୀ କହିଥିଲେ ।” ଆସାମ ଓ ମେଘାଳୟ ମଧ୍ୟରେ ହୋଇଥିବା ରାଜିନାମା ଅନ୍ୟାନ୍ୟ ସମସ୍ୟା ସମାଧାନ ଦିଗରେ ଥିବା ବାଟ କଡାଇବ । ଏହା ସମ୍ପୂର୍ଣ୍ଣ ଅଞ୍ଚଳର ବିକାଶ ଆକାଂକ୍ଷା ପୂରଣ ଦିଗରେ ଶୀଘ୍ର କାର୍ଯ୍ୟ କରିବ ବୋଲି ପ୍ରଧାନମନ୍ତ୍ରୀ କହିଥିଲେ । 

ଆଦିବାସୀ ସମାଜର ସମୃଦ୍ଧ ସାଂସ୍କୃତିକ ଐତିହ୍ୟ ସମ୍ପର୍କରେ ପ୍ରଧାନମନ୍ତ୍ରୀ କହିଥିଲେ ଯେ “ ଆଦିବାସୀ ସମାଜର ସଂସ୍କୃତି, ଏହାର ଭାଷା, ଖାଦ୍ୟ, କଳା, ହସ୍ତତନ୍ତ ସମସ୍ତ ହେଉଛି ଭାରତର ଐତିହ୍ୟ । ଆସାମ ଏ ଦିଗରେ ଆହୁରି ସମୃଦ୍ଧ । ଏହି ସାଂସ୍କୃତିକ ଐତହ୍ୟ ଭାରତକୁ ଯୋଡେ, ଏକ ଭାରତ, ଶ୍ରେଷ୍ଠ ଭାରତର ଭାବନାକୁ ଆହୁରି ମଜବୁତ କରେ ।”

ପ୍ରଧାନମନ୍ତ୍ରୀ ଆହୁରି କହିଥିଲେ ଯେ ଆଜାଦୀର ଅମ୍ରିତକାଳରେ ମଧ୍ୟ କର୍ବି ଆଙ୍ଗଲଙ୍ଗ ଏକ ନୂତନ ଶାନ୍ତି ଓ ବିକାଶ ଭବିଷ୍ୟତ ଆଡକୁ ଆଗେଇ ଚାଲିଛି । ଏଠାରୁ ଆମେ ଆଉ ଏକ ପଛକୁ ଫେରିବା ନାହିଁ । ଆଗାମୀ ବର୍ଷଗୁଡିକରେ ଆମେ ମିଳିମିଶି ବିକାଶ ପଥରେ ଅଗ୍ରସର ହେବା ଯାହାକି ପୂର୍ବ ଦଶନ୍ଧିଗୁଡିକରେ ଆମେ ହାସଲ କରିପାରି ନ ଥିଲୁ । ପ୍ରଧାନମନ୍ତ୍ରୀ ଆସାମ ଓ ସେ ଅଞ୍ଚଳର ଅନ୍ୟାନ୍ୟ ରାଜ୍ୟଗୁଡିକୁ କେନ୍ଦ୍ରୀୟ ଯୋଜନାମାନ ସେବା ଓ ଉତ୍ସର୍ଗ ମନୋଭାବ ନେଇ ତ୍ୱରାନ୍ୱିତ କରିଥିବାରୁ ପ୍ରଶଂସା କରିଥିଲେ । ଏତେ ସଂଖ୍ୟାରେ ମହିଳା ଯୋଗଦେଇଥିବାରୁ ସେ ଧନ୍ୟବାଦ ଦେବା ସହ ମହିଳାମାନଙ୍କ ମର୍ଯ୍ୟାଦା ବୃଦ୍ଧି ପାଇଁ ସମସ୍ତ ପଦକ୍ଷେପ ସରକାର ନେବେ ବୋଲି କହିଥିଲେ । 

ପ୍ରଧାନମନ୍ତ୍ରୀ ଆସାମବାସୀଙ୍କୁ ପ୍ରତିଶ୍ରୁତି ଦେଇ କହିଥିଲେ ଯେ ସେ ସେମାନଙ୍କ ସ୍ନେହ ଓ ପ୍ରେମକୁ ସୁଧ ସହ ଫେରାଇ ଅଞ୍ଚଳର ସର୍ବାଙ୍ଗୀନ ବିକାଶ ପାଇଁ ନିଜକୁ ପୁନଃ ଉତ୍ସର୍ଗ କରିବେ ।

ସେ ଅଞ୍ଚଳର ଶାନ୍ତି ଓ ବିକାଶ ନିମନ୍ତେ ପ୍ରଧାନମନ୍ତ୍ରୀଙ୍କ ଅଟଳ ଅଙ୍ଗୀକାର ବଦ୍ଧତା ନିକଟରେ ଭାରତ ସରକାର ଓ କର୍ବି ଆଙ୍ଗଲଙ୍ଗର ଛଅଟି ଉଗ୍ରବାଦୀ ସଂଗଠନ ସହିତ ସ୍ୱାକ୍ଷର ହୋଇଥିବା ବୁଝାମଣାପତ୍ର ପ୍ରଦର୍ଶିତ ହୋଇଛି। ଏହି ବୁଝାମଣାପତ୍ର ସେହି ଅଞ୍ଚଳରେ ଏକ ନୂତନ ଶାନ୍ତି ଯୁଗର ସୂଚନା ଦେଉଛି ।

*****

SM/SLP