2022-23ರಲ್ಲಿ ಭಾರತವು 8.0-8.5 ರಷ್ಟು ದೇಶೀಯ ಒಟ್ಟು ಉತ್ಪನ್ನ -ಜಿಡಿಪಿ ವೃದ್ಧಿಗೆ ಸಾಕ್ಷಿಯಾಗಲಿದೆ, ವ್ಯಾಪಕವಾದ ಲಸಿಕೆ ವ್ಯಾಪ್ತಿ, ಪೂರೈಕೆ-ಕಡೆಯ ಸುಧಾರಣೆಗಳ ಲಾಭ ಮತ್ತು ನಿಯಮಗಳ ಸರಳೀಕರಣ, ದೃಢವಾದ ರಫ್ತು ವೃದ್ಧಿ ಮತ್ತು ಬಂಡವಾಳ ವೆಚ್ಚದ ಹೆಚ್ಚಿಸಲು ಹಣಕಾಸು ಪ್ರದೇಶದ ಲಭ್ಯತೆಯಿಂದ ಬೆಂಬಲಿತವಾಗಿದೆ.

ಕೇಂದ್ರ ಹಣಕಾಸು ಮತ್ತು ಸಾಂಸ್ಥಿಕ ವ್ಯವಹಾರಗಳ ಖಾತೆ ಸಚಿವೆ ಶ್ರೀಮತಿ ನಿರ್ಮಲಾ ಸೀತಾರಾಮನ್ ಅವರು ಇಂದು ಸಂಸತ್ತಿನಲ್ಲಿ ಆರ್ಥಿಕ ಸಮೀಕ್ಷೆ 2021-22 ಅನ್ನು ಮಂಡಿಸಿದ್ದು, ಇದು ಮುಂಬರುವ ವರ್ಷಗಳಲ್ಲಿ ಆರ್ಥಿಕ ಪುನಶ್ಚೇತನಕ್ಕೆ ಬೆಂಬಲ ಒದಗಿಸಲು ಖಾಸಗಿ ವಲಯದ ಹೂಡಿಕೆ ಹೆಚ್ಚಳ ಮಾಡಲು ಉತ್ತಮ ಸ್ಥಿತಿ ಇದೆ ಎಂದು ಸಾರಿದೆ. ಮತ್ತಷ್ಟು ದುರ್ಬಲಗೊಳ್ಳುತ್ತಿರುವ ಸಾಂಕ್ರಾಮಿಕದಿಂದಾಗಿ ಆರ್ಥಿಕ ಅಡಚಣೆಗಳ ನಿವಾರಣೆಯಾಗಬಹುದು, ಸಾಮಾನ್ಯ ಮುಂಗಾರು ಇರಲಿದೆ, ಪ್ರಮುಖ ಕೇಂದ್ರೀಯ ಬ್ಯಾಂಕುಗಳಿಂದ ಜಾಗತಿಕ ನಗದು ಹರಿವು ಹಿಂಪಡೆಯುವಿಕೆಯು ವಿಶಾಲವಾಗಿ ಕ್ರಮಬದ್ಧವಾಗಿರುತ್ತದೆ, ತೈಲ ಬೆಲೆಗಳು ಪ್ರತಿ ಬಿಬಿಎಲ್ ಗೆ 70 -75 ಅಮೆರಿಕನ್ ಡಾಲರ್ ವ್ಯಾಪ್ತಿಯಲ್ಲಿರುತ್ತವೆ ಮತ್ತು ಜಾಗತಿಕ ಪೂರೈಕೆ ಸರಪಳಿಯ ಅಡಚಣೆಗಳು ವರ್ಷದ ಅವಧಿಯಲ್ಲಿ ಸ್ಥಿರವಾಗಿ ತಗ್ಗುತ್ತವೆ ಎಂಬ ನಿರೀಕ್ಷೆಯ ಮೇಲೆ 2022-23ರ ವೃದ್ಧಿಯ ಅಂದಾಜು ಮಾಡಲಾಗಿದೆ.‌

ಮೇಲಿನ ಅಂದಾಜನ್ನು ವಾಸ್ತವ ಜಿಡಿಪಿ  2022-23ರಲ್ಲಿ ಅನುಕ್ರಮವಾಗಿ ಶೇ.8.7 ಮತ್ತು ಶೇ.7.5 ವೃದ್ಧಿ ಇರಲಿದೆ ಎಂಬ ವಿಶ್ವ ಬ್ಯಾಂಕ್ ಮತ್ತು ಏಷ್ಯನ್ ಡೆವಲಪ್ಮೆಂಟ್ ಬ್ಯಾಂಕ್‌ ನ ಇತ್ತೀಚಿನ ಮುನ್ಸೂಚನೆಗಳೊಂದಿಗೆ ಹೋಲಿಸಬಹುದು ಎಂದು ಸಮೀಕ್ಷೆ ಹೇಳಿದೆ. 2022ರ ಜನವರಿ 25 ರಂದು ಬಿಡುಗಡೆಯಾದ ಐ.ಎಂ.ಎಫ್.ನ ಇತ್ತೀಚಿನ ವಿಶ್ವ ಆರ್ಥಿಕತೆಯ ಮುನ್ನೋಟ (ಡಬ್ಯುನ್.ಇ.ಓ.) ವೃದ್ಧಿಯ ಅಂದಾಜುಗಳ ಪ್ರಕಾರ, ಭಾರತದ ವಾಸ್ತವ ಜಿಡಿಪಿ 2021-22 ಮತ್ತು 2022-23 ಎರಡರಲ್ಲೂ ಶೇ.9 ಮತ್ತು 2023-24 ರಲ್ಲಿ ಶೇ.7.1ರಷ್ಟು ವೃದ್ಧಿಸುವ ನಿರೀಕ್ಷೆಯಿದೆ. ಈ ಎಲ್ಲಾ ಮೂರು ವರ್ಷಗಳಲ್ಲಿ ಭಾರತವನ್ನು ವಿಶ್ವದ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಪ್ರಮುಖ ಆರ್ಥಿಕತೆ ಎಂದು ಇದು ಅಂದಾಜಿಸುತ್ತದೆ.

ಮೊದಲ ಮುಂಗಡ ಅಂದಾಜುಗಳನ್ನು ಉಲ್ಲೇಖಿಸಿ, ಸಮೀಕ್ಷೆಯು 2020-21ರಲ್ಲಿ ಶೇ 7.3 ರಷ್ಟು ಸಂಕೋಚನದ ನಂತರ, 2021-22 ರಲ್ಲಿ ಭಾರತೀಯ ಆರ್ಥಿಕತೆಯು ವಾಸ್ತವವಾಗಿ ಶೇ 9.2 ರಷ್ಟು ವೃದ್ಧಿಸುತ್ತದೆ ಎಂದು ಅಂದಾಜಿಸಿದೆ ಎಂದು ಹೇಳುತ್ತಿದೆ. ಒಟ್ಟಾರೆಯಾಗಿ ಆರ್ಥಿಕ ಚಟುವಟಿಕೆಯು ಸಾಂಕ್ರಾಮಿಕ-ಪೂರ್ವ ಮಟ್ಟಗಳಲ್ಲಿದ್ದಂತೆ ಚೇತರಿಸಿಕೊಂಡಿದೆ ಎಂದು ಇದು ಸೂಚಿಸುತ್ತದೆ. ಆರೋಗ್ಯದ ಪ್ರಭಾವವು ಹೆಚ್ಚು ತೀವ್ರವಾಗಿದ್ದರೂ ಸಹ, 2020-21ರಲ್ಲಿ ಸಂಪೂರ್ಣ ಲಾಕ್‌ ಡೌನ್ ಹಂತದಲ್ಲಿ ಅನುಭವಿಸಿದ್ದಕ್ಕಿಂತ ಕ್ಯು.1ರಲ್ಲಿನ “ಎರಡನೇ ಅಲೆ”ಯ ಆರ್ಥಿಕ ಪರಿಣಾಮವು ತುಂಬಾ ಚಿಕ್ಕದಾಗಿತ್ತು ಎಂದು ಬಹುತೇಕ ಎಲ್ಲಾ ಸೂಚಕಗಳು ತೋರಿಸಿವೆ.

ವಲಯವಾರು ಅಂಶಗಳ ಬಗ್ಗೆ ವಿವರಿಸಿರುವ ಸಮೀಕ್ಷೆಯು, ಕೃಷಿ ಮತ್ತು ಸಂಬಂಧಿತ ವಲಯಗಳು ಸಾಂಕ್ರಾಮಿಕದಿಂದ ಕನಿಷ್ಠ ಪರಿಣಾಮಕ್ಕೆ ಒಳಗಾಗಿವೆ. ಇದಕ್ಕೆ ಹಿಂದಿನ ವರ್ಷದಲ್ಲಿ ಶೇಕಡಾ 3.6ರಷ್ಟು ಬೆಳವಣಿಗೆ ಕಂಡಿದ್ದ ಈ ವಲಯಗಳು 2021-22ರಲ್ಲಿ ಶೇಕಡಾ 3.9ರಷ್ಟು ಬೆಳವಣಿಗೆ ಹೊಂದುವ ನಿರೀಕ್ಷೆಯಿದೆ ಎಂದು ಹೇಳಿದೆ. ಮುಂಗಾರು ಮತ್ತು ಹಿಂಗಾರು ಬೆಳೆಗಳ ಅಡಿಯಲ್ಲಿ ಬಿತ್ತನೆಯಾದ ಪ್ರದೇಶ ಮತ್ತು ಗೋಧಿ ಹಾಗೂ ಅಕ್ಕಿಯ ಉತ್ಪಾದನೆಯು ವರ್ಷದಿಂದ ವರ್ಷಕ್ಕೆ ಸ್ಥಿರವಾಗಿ ಹೆಚ್ಚುತ್ತಿದೆ. ಪ್ರಸಕ್ತ ವರ್ಷದಲ್ಲಿ, ಮುಂಗಾರು ಋತುವಿನ ಆಹಾರ ಧಾನ್ಯಗಳ ಉತ್ಪಾದನೆಯು 150.5 ದಶಲಕ್ಷ ಟನ್‌ ದಾಖಲೆಯ ಮಟ್ಟ ತಲುಪಬಹುದೆಂದು ಅಂದಾಜಿಸಲಾಗಿದೆ. ಇದಲ್ಲದೆ, ಕೇಂದ್ರದ ಆಹಾರ ಧಾನ್ಯಗಳ ಖರೀದಿಯು ಕನಿಷ್ಠ ಬೆಂಬಲ ಬೆಲೆಗಳನ್ನೂ ಒಳಗೊಂಡಂತೆ 2021-22ರಲ್ಲಿ ನಿರಂತರ ಏರಿಕೆ ಪ್ರವೃತ್ತಿಯನ್ನು ಕಾಯ್ದುಕೊಂಡಿದೆ. ಇದು ರಾಷ್ಟ್ರೀಯ ಆಹಾರ ಭದ್ರತೆ ಮತ್ತು ರೈತರ ಆದಾಯಕ್ಕೆ ಉತ್ತಮ ಬೆಳವಣಿಗೆಯಾಗಿದೆ. ಮುಖ್ಯವಾಗಿ, ಸಾಂಕ್ರಾಮಿಕದ ಅಡೆತಡೆಗಳ ಹೊರತಾಗಿಯೂ ಬೀಜ ಮತ್ತು ರಸಗೊಬ್ಬರಗಳ ಸಕಾಲಿಕ ಪೂರೈಕೆಯನ್ನು ಕಾಯ್ದುಕೊಂಡ ಸರಕಾರದ ನೀತಿಗಳು ಈ ವಲಯದ ಬಲವಾದ ಕಾರ್ಯಕ್ಷಮತೆಗೆ ಬೆಂಬಲ ನೀಡಿವೆ. ಉತ್ತಮ ಮುಂಗಾರು ಮಳೆಯೂ ಇದಕ್ಕೆ ನೆರವಾಗಿದ್ದು, 10 ವರ್ಷಗಳ ಸರಾಸರಿಗಿಂತ ಹೆಚ್ಚಾಗಿರುವ ಜಲಾಶಯದ ಮಟ್ಟವು ಇದನ್ನು ಪ್ರತಿಫಲಿಸಿದೆ.

ಸಮೀಕ್ಷೆಯ ಪ್ರಕಾರ, ಕೈಗಾರಿಕಾ 2020-21ರಲ್ಲಿ ಶೇಕಡಾ 7ರಷ್ಟು ಸಂಕೋಚನಗೊಂಡಿದ್ದ ಕೈಗಾರಿಕಾ ವಲಯವು  ಪ್ರಸಕ್ತ ಆರ್ಥಿಕ ವರ್ಷದಲ್ಲಿ ಶೇಕಡಾ 11.8 ರ ವಿಸ್ತರಣೆ ಮೂಲಕ ಭಾರಿ ಚೇತರಿಕೆಗೆ ಸಾಕ್ಷಿಯಾಗಿದೆ. ಉತ್ಪಾದನೆ, ನಿರ್ಮಾಣ ಮತ್ತು ಗಣಿಗಾರಿಕೆ ಉಪ ವಲಯಗಳು ಅದೇ ಹುರುಪಿನಲ್ಲಿ ಸಾಗಿವೆ. ಮೂಲಭೂತ ಸೇವೆಗಳ ವಲಯವೂ ರಾಷ್ಟ್ರೀಯ ಲಾಕ್‌ಡೌನ್‌ನ ಉತ್ತುಂಗದಲ್ಲಿಯೂ ವಿದ್ಯುತ್ ಮತ್ತು ನೀರು ಪೂರೈಕೆಯಂತಹ ಸೇವೆಗಳನ್ನು ನಿರ್ವಹಿಸಿದ್ದರಿಂದ ಹೆಚ್ಚು ಸದ್ದಿಲ್ಲದ ಬೆಳವಣಿಗೆ ಕಂಡಿದೆ. ಸಮಗ್ರ ಮೌಲ್ಯ ಸೇರ್ಪಡೆ (ಜಿವಿಎ)ಯಲ್ಲಿ ಉದ್ಯಮದ ಪಾಲನ್ನು ಈಗ ಶೇಕಡಾ 28.2 ಎಂದು ಅಂದಾಜಿಸಲಾಗಿದೆ.

ಸಾಂಕ್ರಾಮಿಕದಿಂದ ಸೇವಾ ವಲಯವು ಹೆಚ್ಚು ಹಾನಿಗೊಳಗಾಗಿದೆ, ವಿಶೇಷವಾಗಿ ಮಾನವ ಸಂಪರ್ಕವನ್ನು ಒಳಗೊಂಡಿರುವ ವಿಭಾಗಗಳು ಹೆಚ್ಚು ಹಾನಿಗೆ ಗುರಿಯಾಗಿವೆ ಎಂದು ಸಮೀಕ್ಷೆ ಹೇಳಿದೆ. ಕಳೆದ ವರ್ಷದ ಶೇಕಡಾ 8.4 ಸಂಕೋಚನಗೊಂಡಿದ್ದ ಈ ವಲಯವು ಪ್ರಸಕ್ತ ಆರ್ಥಿಕ ವರ್ಷದಲ್ಲಿ ಶೇಕಡಾ 8.2 ರಷ್ಟು ಬೆಳವಣಿಗೆ ಕಾಣಲಿದೆ ಎಂದು ಅಂದಾಜಿಸಲಾಗಿದೆ. ವಿವಿಧ ಉಪವಲಯಗಳ ಕಾರ್ಯಕ್ಷಮತೆಯಲ್ಲೂ ವ್ಯಾಪಕ ಅಡಚಣೆ ಉಂಟಾಗಿತ್ತು ಎಂಬುದು ಗಮನಾರ್ಹ. ಹಣಕಾಸು/ರಿಯಲ್ ಎಸ್ಟೇಟ್ ಮತ್ತು ಸಾರ್ವಜನಿಕ ಆಡಳಿತ ವಿಭಾಗಗಳು ಈಗ ಕೋವಿಡ್ ಪೂರ್ವ ಮಟ್ಟಕ್ಕಿಂತ ಉತ್ತಮವಾಗಿವೆ. ಆದಾಗ್ಯೂ, ಪ್ರವಾಸ, ವ್ಯಾಪಾರ ಮತ್ತು ಹೋಟೆಲ್‌ಗಳಂತಹ ವಿಭಾಗಗಳು ಇನ್ನೂ ಸಂಪೂರ್ಣವಾಗಿ ಚೇತರಿಸಿಕೊಂಡಿಲ್ಲ. ಪ್ರವಾಸೋದ್ಯಮದಿಂದ ಆದಾಯವು ತೀವ್ರವಾಗಿ ಕುಸಿದಿದ್ದರೂ ಸಾಫ್ಟ್‌ವೇರ್ ಮತ್ತು ಐಟಿ ಆಧಾರಿತ ಸೇವೆಗಳ ರಫ್ತುಗಳಲ್ಲಿ ಏರಿಕೆ ಕಂಡು ಬಂದಿದೆ.

ಸಮೀಕ್ಷೆಯ ಪ್ರಕಾರ 2021-22ರಲ್ಲಿ ಒಟ್ಟು ಅನುಭೋಗ ಶೇಕಡಾ 7.0ರಷ್ಟು ಬೆಳವಣಿಗೆಯಾಗಿದೆ. ಆದರೆ, ಕಳೆದ ಬಾರಿಯಂತೆ ಈ ಬಾರಿಯೂ ಇದರಲ್ಲಿ ಸರಕಾರದ ಕೊಡುಗೆ ಗರಿಷ್ಠವಾಗಿದೆ ಎಂದು ಸಮೀಕ್ಷೆ ಹೇಳಿದೆ. ಸಾಂಕ್ರಾಮಿಕ ಪೂರ್ವ ಮಟ್ಟವನ್ನು ಮೀರಿ ಸರಕಾರದ ಅನುಭೋಗವು ಶೇಕಡಾ 7.6ರ ದರದಲ್ಲಿ ಪ್ರಬಲವಾಗಿ ಬೆಳೆಯುತ್ತದೆ ಎಂದು ಅಂದಾಜಿಸಲಾಗಿದೆ. ಸಾಂಕ್ರಾಮಿಕ ಪೂರ್ವ ಮಟ್ಟಟ್ಟಕ್ಕೆ ಹೋಲಿಸಿದರೆ ಶೇಕಡಾ 97ರಷ್ಟು ಚೇತರಿಕೆಯ ಮೂಲಕ ಖಾಸಗಿ ಅನುಭೋಗ ಪ್ರಮಾಣವೂ ಮನಾರ್ಹವಾಗಿ ಸುಧಾರಿಸಿದೆ ಎಂದು ಅಂದಾಜಿಸಲಾಗಿದೆ. ಲಸಿಕೆಯ ವ್ಯಾಪ್ತಿ ಹೆಚ್ಚಿದಷ್ಟೂ ಮತ್ತು ಆರ್ಥಿಕ ಚಟುವಟಿಕೆ ತ್ವರಿತವಾಗಿ ಸಹಜ ಸ್ಥಿತಿಗೆ ಬಂದಷ್ಟೂ ಈ ಅನುಭೋಗದ ಪ್ರಮಾಣದಲ್ಲಿ ಮತ್ತಷ್ಟು ಚೇತರಿಕೆಗೆ ದಾರಿಯಾಗಲಿದೆ.

ಸಮೀಕ್ಷೆಯ ಪ್ರಕಾರ, ʻಒಟ್ಟು ಸ್ಥಿರ ಬಂಡವಾಳ ರಚನೆʼ(ಜಿಎಫ್‌ಸಿಎಫ್) ಮೂಲಕ ಅಳೆಯಲಾಗುವ ಹೂಡಿಕೆಯು 2021-22ರಲ್ಲಿ ಶೇಕಡಾ 15 ರಷ್ಟು ಸದೃಢ ಬೆಳವಣಿಗೆಯನ್ನು ಕಾಣಲಿದ್ದು, ಸಂಪೂರ್ಣ ಚೇತರಿಕೆಯೊಂದಿಗೆ ಸಾಂಕ್ರಾಮಿಕ ಪೂರ್ವದ ಮಟ್ಟವನ್ನು ತಲುಪುವ ನಿರೀಕ್ಷೆಯಿದೆ. ʻಕ್ಯಾಪೆಕ್ಸ್ʼ ಮತ್ತು ಮೂಲಸೌಕರ್ಯ ವೆಚ್ಚಗಳ ಮೂಲಕ ಬೆಳವಣಿಗೆಯ ಆವರ್ತನ ಚಕ್ರವನ್ನು ವೇಗಗೊಳಿಸುವ ಸರಕಾರದ ನೀತಿಯು ಆರ್ಥಿಕತೆಯಲ್ಲಿ ಬಂಡವಾಳ ರಚನೆಯನ್ನು ಹೆಚ್ಚಿಸಿದೆ. ಆ ಮೂಲಕ 2021-22ರಲ್ಲಿ ಹೂಡಿಕೆ ಅನುಪಾತವು ಜಿಡಿಪಿಯ ಸುಮಾರು ಶೇಕಡಾ 29.6ಕ್ಕೆ ಹೆಚ್ಚಳವಾಗಿದೆ. ಇದು ಕಳೆದ ಏಳು ವರ್ಷಗಳಲ್ಲೇ ಅತ್ಯಧಿಕವೆನಿಸಿದೆ. ಖಾಸಗಿ ಹೂಡಿಕೆಯ ಚೇತರಿಕೆಯು ಇನ್ನೂ ನಿರಾಶಾದಾಯಕ ಮಟ್ಟದಲ್ಲಿದ್ದರೂ ಭಾರತವು ಬಲವಾದ ಹೂಡಿಕೆಗೆ ಸಜ್ಜಾಗಿದೆ ಎಂದು ಸೂಚಿಸುವ ಅನೇಕ ಸಂಕೇತಗಳನ್ನು ಸಮೀಕ್ಷೆ ಒಳಗೊಂಡಿದೆ. ಸದೃಢ ಮತ್ತು ಸ್ವಚ್ಛಗೊಂಡ ಬ್ಯಾಂಕಿಂಗ್ ವಲಯವು ಖಾಸಗಿ ಹೂಡಿಕೆಯನ್ನು ಸಮರ್ಪಕವಾಗಿ ಬೆಂಬಲಿಸಲು ಸಿದ್ಧವಾಗಿದೆ.

ರಫ್ತು ಮತ್ತು ಆಮದುಗಳ ವಿಷಯವನ್ನು ಹೇಳುವುದಾದರೆ, 2021-22ರ ಸಾಲಿನಲ್ಲಿ ಇದುವರೆಗೂ ಭಾರತದ ಸರಕು ಮತ್ತು ಸೇವೆಗಳ ರಫ್ತು ಅಸಾಧಾರಣ ಮಟ್ಟದಲ್ಲಿ ಬಲವರ್ಧನೆಗೊಂಡಿದೆ ಎಂದು ಸಮೀಕ್ಷೆ ಹೇಳುತ್ತದೆ. ಅನೇಕ ಸಾಂಕ್ರಾಮಿಕ ಸಂಬಂಧಿತ ಜಾಗತಿಕ ಪೂರೈಕೆ ನಿರ್ಬಂಧಗಳ ಹೊರತಾಗಿಯೂ, 2021-22ರಲ್ಲಿ ಸತತ ಎಂಟು ತಿಂಗಳುಗಳಿಂದ ಸರಕುಗಳ ರಫ್ತು 30 ಶತಕೋಟಿ ಅಮೆರಿಕನ್‌ ಡಾಲರ್‌ಗಿಂತ ಹೆಚ್ಚಾಗಿದೆ. ವೃತ್ತಿಪರ ಮತ್ತು ನಿರ್ವಹಣಾ ಸಲಹಾ ಸೇವೆಗಳು, ಆಡಿಯೋ ವಿಶುವಲ್ ಮತ್ತು ಸಂಬಂಧಿತ ಸೇವೆಗಳು, ಸರಕು ಸಾರಿಗೆ ಸೇವೆಗಳು, ದೂರಸಂಪರ್ಕ, ಕಂಪ್ಯೂಟರ್ ಮತ್ತು ಮಾಹಿತಿ ಸೇವೆಗಳಿಂದ ಪ್ರೇರಿತವಾದ ನಿವ್ವಳ ಸೇವೆಗಳ ರಫ್ತುಗಳು ಸಹ ತೀವ್ರವಾಗಿ ಏರಿಕೆಯಾಗಿವೆ. ಬೇಡಿಕೆಯ ದೃಷ್ಟಿಕೋನದಿಂದ, 2021-22 ರಲ್ಲಿ ಭಾರತದ ಒಟ್ಟು ರಫ್ತುಗಳು ಸಾಂಕ್ರಾಮಿಕ ಪೂರ್ವ ಮಟ್ಟವನ್ನು ಮೀರಿ ಶೇಕಡಾ 16.5 ರಷ್ಟು ಬೆಳವಣಿಗೆಯನ್ನು ಸಾಧಿಸಬಹುದೆಂದು ನಿರೀಕ್ಷಿಸಲಾಗಿದೆ. ದೇಶೀಯ ಬೇಡಿಕೆಯ ಪುನಶ್ಚೇತನ ಹಾಗೂ ಆಮದಿತ ಕಚ್ಛಾವಸ್ತು ಮತ್ತು ಲೋಹಗಳ ಬೆಲೆಯಲ್ಲಿ ನಿರಂತರ ಏರಿಕೆಯೊಂದಿಗೆ ಆಮದಿನಲ್ಲೂ ಬಲವಾದ ಚೇತರಿಕೆ ಕಂಡುಬಂದಿದೆ. 2021-22ರಲ್ಲಿ ಆಮದು ಪ್ರಮಾಣ ಸಾಂಕ್ರಾಮಿಕ ಪೂರ್ವ ಮಟ್ಟವನ್ನು ಮೀರಿ ಶೇ.29.4ರಷ್ಟು ಬೆಳವಣಿಗೆಯಾಗಬಹುದೆಂದು ನಿರೀಕ್ಷಿಸಲಾಗಿದೆ. ಪರಿಣಾಮವಾಗಿ, 2020-21ರ ಇದೇ ಅವಧಿಯಲ್ಲಿದ್ದ ಹೆಚ್ಚುವರಿ ರಫ್ತಿಗೆ ಹೋಲಿಸಿದರೆ, 2021-22ರ ಮೊದಲಾರ್ಧದಲ್ಲಿ ಭಾರತದ ನಿವ್ವಳ ರಫ್ತು ಕಡಿಮೆಯಾಗಿದೆ. ಆದರೆ ಚಾಲ್ತಿ ಖಾತೆ ಕೊರತೆಯು ನಿರ್ವಹಿಸಬಹುದಾದ ಮಿತಿಯಲ್ಲೇ ಉಳಿಯುವ ನಿರೀಕ್ಷೆಯಿದೆ.

ಇದಲ್ಲದೆ, ಜಾಗತಿಕ ಸಾಂಕ್ರಾಮಿಕದಿಂದಾಗಿ ಉಂಟಾದ ಎಲ್ಲಾ ಅಡೆತಡೆಗಳ ಹೊರತಾಗಿಯೂ, ಕಳೆದ ಎರಡು ವರ್ಷಗಳಲ್ಲಿ ಭಾರತದ ಪಾವತಿಗಳ  ಬಾಕಿಯು ಹೆಚ್ಚುವರಿಯಾಗಿ ಉಳಿದಿದೆ ಎಂದು ಸಮೀಕ್ಷೆಯು ಹೇಳಿದೆ. ಇದು 31 ಡಿಸೆಂಬರ್ 2021 ರಂದು 634 ಶತಕೋಟಿ ಡಾಲರ್‌ನಷ್ಟು ವಿದೇಶಿ ವಿನಿಮಯ ಮೀಸಲು ಸಂಗ್ರಹಿಸಲು ಭಾರತೀಯ ರಿಸರ್ವ್ ಬ್ಯಾಂಕ್‌ಗೆ ಅವಕಾಶ ಮಾಡಿಕೊಟ್ಟಿತು. ಇದು 13.2 ತಿಂಗಳ ಆಮದುಗಳ ಮೌಲ್ಯಕ್ಕೆ ಸಮಾನವಾಗಿದೆ ಮತ್ತು ದೇಶದ ಬಾಹ್ಯ ಸಾಲಕ್ಕಿಂತ ಹೆಚ್ಚಿನದಾಗಿದೆ.

ಮುಂದುವರಿದ ಮತ್ತು ಉದಯೋನ್ಮುಖ ಆರ್ಥಿಕತೆಗಳಲ್ಲಿ ಹಣದುಬ್ಬರವು ಜಾಗತಿಕ ಸಮಸ್ಯೆಯಾಗಿ ಮತ್ತೆ ಕಾಣಿಸಿಕೊಂಡಿದೆ ಎಂದು ಸಮೀಕ್ಷೆಯು ಗಮನಿಸುತ್ತದೆ. ಇಂಧನ ಬೆಲೆಗಳು, ಆಹಾರೇತರ ಸರಕುಗಳು, ಇನ್‌ಪುಟ್ ಬೆಲೆಗಳು, ಜಾಗತಿಕ ಪೂರೈಕೆ ಸರಪಳಿಗಳ ಅಡೆತಡೆಗಳು ಮತ್ತು ಏರುತ್ತಿರುವ ಸರಕು ವೆಚ್ಚಗಳು ವರ್ಷದಲ್ಲಿ ಜಾಗತಿಕ ಹಣದುಬ್ಬರವನ್ನು ಪ್ರಚೋದಿಸಿದವು. ಭಾರತದಲ್ಲಿ, ಗ್ರಾಹಕ ಬೆಲೆ ಸೂಚ್ಯಂಕ (ಸಿಪಿಐ) ಹಣದುಬ್ಬರವು 2021-22 (ಏಪ್ರಿಲ್-ಡಿಸೆಂಬರ್) 2020-21 ರ ಅನುಗುಣವಾದ ಅವಧಿಯಲ್ಲಿ ಶೇಕಡಾ 6.6 ರಿಂದ ಶೇಕಡಾ 5.2ಕ್ಕೆ ಕಡಿಮೆಯಾಗಿದೆ. ಇದು ಡಿಸೆಂಬರ್ 2021 ರಲ್ಲಿ ಶೇಕಡಾ 5.6 (ವರ್ಷದಿಂದ ವರ್ಷಕ್ಕೆ) ಆಗಿತ್ತು, ಇದು ಸಹಿಸಿಕೊಳ್ಳುವ (ಟಾಲರೆನ್ಸ್ ಬ್ಯಾಂಡ್‌) ಮಿತಿಯಲ್ಲಿದೆ. 2021-22ರಲ್ಲಿ ಚಿಲ್ಲರೆ ಹಣದುಬ್ಬರ ಕುಸಿತವು ಆಹಾರ ಹಣದುಬ್ಬರವನ್ನು ಸರಾಗಗೊಳಿಸುವ ಮೂಲಕ ಕಾರಣವಾಯಿತು. ಸಗಟು ಬೆಲೆ ಹಣದುಬ್ಬರ (ಡಬ್ಲ್ಯುಪಿಐ), ಆದಾಗ್ಯೂ, ಎರಡಂಕಿಗಳಲ್ಲಿ ನಡೆಯುತ್ತಿದೆ.

ಆರ್ಥಿಕತೆಗೆ ನೀಡಲಾದ ಹಣಕಾಸಿನ ಬೆಂಬಲ ಮತ್ತು ಆರೋಗ್ಯ ಪ್ರತಿಕ್ರಿಯೆಯು 2020-21ರಲ್ಲಿ ವಿತ್ತೀಯ ಕೊರತೆ ಮತ್ತು ಸರ್ಕಾರದ ಸಾಲವನ್ನು ಹೆಚ್ಚಿಸಲು ಕಾರಣವಾಯಿತು ಎಂದು ಸಮೀಕ್ಷೆ ಹೇಳುತ್ತದೆ. ಆದಾಗ್ಯೂ, ಇದುವರೆಗೆ 2021-22ರಲ್ಲಿ ಸರ್ಕಾರದ ಆದಾಯದಲ್ಲಿ ಬಲವಾದ ಮರುಕಳಿಸುವಿಕೆ ಕಂಡುಬಂದಿದೆ. 2021 ರ ಏಪ್ರಿಲ್-ನವೆಂಬರ್ ಅವಧಿಯಲ್ಲಿ ಕೇಂದ್ರ ಸರ್ಕಾರದ ಆದಾಯ ಸ್ವೀಕೃತಿಗಳು ಶೇಕಡಾ 67.2 ರಷ್ಟು (ವರ್ಷದಿಂದ ವರ್ಷಕ್ಕೆ) ಏರಿಕೆಯಾಗಿದೆ, ಇದು ತಾತ್ಕಾಲಿಕ ವಾಸ್ತವಿಕತೆಗಳಿಗಿಂತ 2021-22 ಬಜೆಟ್ ಅಂದಾಜುಗಳಲ್ಲಿ 9.6 ಶೇಕಡಾ ನಿರೀಕ್ಷಿತ ಬೆಳವಣಿಗೆಗೆ ವಿರುದ್ಧವಾಗಿದೆ. ತೆರಿಗೆ ಸಂಗ್ರಹಣೆಯು ನೇರ ಮತ್ತು ಪರೋಕ್ಷ ತೆರಿಗೆಗಳೆರಡಕ್ಕೂ ಉತ್ತೇಜಕವಾಗಿದೆ ಮತ್ತು ಒಟ್ಟು ಮಾಸಿಕ ಜಿಎಸ್‌ಟಿ ಸಂಗ್ರಹಣೆಗಳು ಜುಲೈ 2021 ರಿಂದ ಸತತವಾಗಿ 1 ಲಕ್ಷ ಕೋಟಿ ರೂಪಾಯಿಗಳನ್ನು ದಾಟಿದೆ.

ಸುಸ್ಥಿರ ಆದಾಯ ಸಂಗ್ರಹಣೆ ಮತ್ತು ಭಾರತ ಸರ್ಕಾರದ ಉದ್ದೇಶಿತ ವೆಚ್ಚ ನೀತಿಯ ಖಾತೆಯಲ್ಲಿ, ಏಪ್ರಿಲ್-ನವೆಂಬರ್ 2021 ರ ವಿತ್ತೀಯ ಕೊರತೆಯು ಬಜೆಟ್ ಅಂದಾಜುಗಳ (ಬಿಇ) ಶೇಕಡಾ 46.2ರಷ್ವನ್ನು ಹೊಂದಿದೆ, ಇದು ಸುಮಾರು ಮೂರನೇ ಒಂದು ಭಾಗವಾಗಿದೆ. ಹಿಂದಿನ ಎರಡು ವರ್ಷಗಳ ಅದೇ ಅವಧಿಯಲ್ಲಿ ಪ್ರಮಾಣವು ತಲುಪಿದೆ (ಏಪ್ರಿಲ್-ನವೆಂಬರ್ 2020 ರಲ್ಲಿ 135.1% ಬಿಇ ಮತ್ತು ಏಪ್ರಿಲ್-ನವೆಂಬರ್ 2019 ರಲ್ಲಿ ಬಿಇನ 114.8%).

ಆರ್ಥಿಕ ವಲಯವು ಪ್ರಕ್ಷುಬ್ಧ ಸಮಯದಲ್ಲಿ ಯಾವಾಗಲೂ ಒತ್ತಡದ ಸಂಭವನೀಯ ಕ್ಷೇತ್ರವಾಗಿದೆ ಎನ್ನುವುದನ್ನು ಸಮೀಕ್ಷೆಯು ಗಮನಸೆಳೆದಿದೆ. ಆದಾಗ್ಯೂ, ಭಾರತದ ಬಂಡವಾಳ ಮಾರುಕಟ್ಟೆಗಳು ಅಸಾಧಾರಣವಾಗಿ ಉತ್ತಮವಾಗಿ ಕಾರ್ಯನಿರ್ವಹಿಸಿವೆ ಮತ್ತು ಭಾರತೀಯ ಕಂಪನಿಗಳ ಅಪಾಯದ ಬಂಡವಾಳದ ದಾಖಲೆಯ ಕ್ರೋಢೀಕರಣಕ್ಕೆ ಅವಕಾಶ ಮಾಡಿಕೊಟ್ಟಿವೆ. ಅಕ್ಟೋಬರ್ 18, 2021 ರಂದು ಸೆನ್ಸೆಕ್ಸ್ ಮತ್ತು ನಿಫ್ಟಿ ತನ್ನ ಗರಿಷ್ಠ ಮಟ್ಟವನ್ನು 61,766 ಮತ್ತು 18,477 ಕ್ಕೆ ಮುಟ್ಟಿತು. 2021 ರ ಏಪ್ರಿಲ್-ನವೆಂಬರ್‌ನಲ್ಲಿ 75 ಐಪಿಒ ಸಮಸ್ಯೆಗಳ ಮೂಲಕ 89,066 ಕೋಟಿ ರೂಪಾಯಿಗಳನ್ನು ಸಂಗ್ರಹಿಸಲಾಗಿದೆ, ಇದು ಕಳೆದ ದಶಕದಲ್ಲಿ ಯಾವುದೇ ವರ್ಷಕ್ಕಿಂತ ಹೆಚ್ಚು. ಇದಲ್ಲದೆ, ಬ್ಯಾಂಕಿಂಗ್ ವ್ಯವಸ್ಥೆಯು ಉತ್ತಮ ಬಂಡವಾಳವನ್ನು ಹೊಂದಿದೆ ಮತ್ತು ಎನ್‌ಪಿಎ ಗಳು ರಚನಾತ್ಮಕವಾಗಿ ಕುಸಿದಿದೆ. 2018-19 ರಿಂದ ಶೆಡ್ಯೂಲ್ಡ್ ಕಮರ್ಷಿಯಲ್ ಬ್ಯಾಂಕ್‌ಗಳ (ಎಸ್‌ಸಿಬಿ) ಗ್ರಾಸ್ ನಾನ್-ಪರ್ಫಾರ್ಮಿಂಗ್ ಅಡ್ವಾನ್ಸಸ್ (ಜಿಎನ್‌ಪಿಎ) ಅನುಪಾತ (ಅಂದರೆ ಜಿಎನ್‌ಪಿಎ ಗಳ ಒಟ್ಟು ಮುಂಗಡಗಳ ಶೇಕಡಾವಾರು) ಮತ್ತು ನಿವ್ವಳ ನಾನ್-ಪರ್ಫಾರ್ಮಿಂಗ್ ಮುಂಗಡಗಳ (NNPA) ಅನುಪಾತವು 2018-19 ರಿಂದ ಕುಸಿಯುತ್ತಲೇ ಇದೆ. ಎಸ್‌ಸಿಬಿ  ಗಳ ಜಿಎನ್‌ಪಿಎ ಅನುಪಾತವು ಸೆಪ್ಟೆಂಬರ್ 2020 ರ ಅಂತ್ಯದ ವೇಳೆಗೆ ಶೇಕಡಾ 7.5 ರಿಂದ 2021 ರ ಸೆಪ್ಟೆಂಬರ್ ಅಂತ್ಯದ ವೇಳೆಗೆ ಶೇಕಡ 6.9ರಷ್ಟು ಕಡಿಮೆಯಾಗಿದೆ.

ಭಾರತದ ಆರ್ಥಿಕ ಪ್ರತಿಕ್ರಿಯೆಯ ಮತ್ತೊಂದು ವಿಶಿಷ್ಟ ಲಕ್ಷಣವಾಗಿರುವ ಸಮೀಕ್ಷೆಯು ಬೇಡಿಕೆ ನಿರ್ವಹಣೆಯ ಮೇಲೆ ಸಂಪೂರ್ಣ ಅವಲಂಬನೆಯ ಬದಲಿಗೆ ಪೂರೈಕೆ ಕಡೆಯ  ಸುಧಾರಣೆಗಳ ಮೇಲೆ ಒತ್ತು ನೀಡಿದೆ. ಈ ಪೂರೈಕೆ ಕಡೆಯ ಸುಧಾರಣೆಗಳು ಹಲವಾರು ವಲಯಗಳ ಅನಿಯಂತ್ರಣ, ಪ್ರಕ್ರಿಯೆಗಳ ಸರಳೀಕರಣ, 'ಹಿಂದಿನ ತೆರಿಗೆ'ಯಂತಹ ಹಳೆಯ ಸಮಸ್ಯೆಗಳನ್ನು ತೆಗೆದುಹಾಕುವುದು, ಖಾಸಗೀಕರಣ, ಉತ್ಪಾದನಾ ಜೋಡಿತ   ಪ್ರೋತ್ಸಾಹ ಮುಂತಾದವುಗಳನ್ನು ಒಳಗೊಂಡಿವೆ. ಭವಿಷ್ಯದ ಬೆಳವಣಿಗೆಗೆ ಮೂಲಸೌಕರ್ಯ ಸಾಮರ್ಥ್ಯವನ್ನು ಸೃಷ್ಟಿಸುವುದರಿಂದ ಸರ್ಕಾರದಿಂದ ಬಂಡವಾಳ ವೆಚ್ಚದಲ್ಲಿ ತೀಕ್ಷ್ಣವಾದ ಹೆಚ್ಚಳವನ್ನು ಬೇಡಿಕೆ ಮತ್ತು ಪೂರೈಕೆಯಲ್ಲಿ  ಕಾಣಬಹುದು.

ಭಾರತದ ಪೂರೈಕೆ ಕಾರ್ಯತಂತ್ರದಲ್ಲಿ ಎರಡು ಸಾಮಾನ್ಯ ವಿಷಯಗಳಿವೆ: (1) ಕೋವಿಡ್‌ ನಂತರದ ಜಗತ್ತಿನ ದೀರ್ಘಾವಧಿಯ ಅನಿರೀಕ್ಷಿತತೆಯನ್ನು ಎದುರಿಸಲು ನಮ್ಯತೆ ಮತ್ತು ನಾವೀನ್ಯತೆಯನ್ನು ಸುಧಾರಿಸುವ ಸುಧಾರಣೆಗಳು. ಇದು ಮಾರುಕಟ್ಟೆ ಸುಧಾರಣೆಗಳನ್ನು ಒಳಗೊಂಡಿದೆ; ಬಾಹ್ಯಾಕಾಶ, ಡ್ರೋನ್‌ಗಳು, ಜಿಯೋಸ್ಪೇಷಿಯಲ್‌ ಮ್ಯಾಪಿಂಗ್‌, ವ್ಯಾಪಾರ ಹಣಕಾಸು, ಅಪವರ್ತನಗಳಂತಹ ವಲಯಗಳ ನಿಯಂತ್ರಣವನ್ನು ತೆಗೆದುಹಾಕುವುದು; ಸರ್ಕಾರಿ ಸಂಗ್ರಹಣೆಯಲ್ಲಿ ಮತ್ತು ದೂರಸಂಪರ್ಕ ವಲಯದಲ್ಲಿರುವಂತಹ ಪ್ರಕ್ರಿಯೆ ಸುಧಾರಣೆಗಳು ಸೇರಿವೆ.

ಹಿಂದೆ ಇದ್ದ ತೆರಿಗೆ ಪದ್ಧತಿಯ ಸಮಸ್ಯೆಗಳನ್ನು ತೆರವುಗೊಳಿಸುವುದು; ಖಾಸಗೀಕರಣ ಮತ್ತು ಹಣಗಳಿಕೆ, ಭೌತಿಕ ಮೂಲಸೌಕರ್ಯಗಳ ಸೃಷ್ಟಿ, ಇತ್ಯಾದಿ. (2) ಭಾರತೀಯ ಆರ್ಥಿಕತೆಯ ಕ್ಷಮತೆಯನ್ನು ಸುಧಾರಿಸುವ ಗುರಿಯನ್ನು ಹೊಂದಿರುವ ಸುಧಾರಣೆಗಳು. ಇವುಗಳು ಹವಾಮಾನ/ಪರಿಸರ ಸಂಬಂಧಿತ ನೀತಿಗಳಿಂದ ಹಿಡಿದು; ಸಾಮಾಜಿಕ ಮೂಲಸೌಕರ್ಯಗಳ ಆದ್ಯತೆಗಳಾದ ನೀರು, ಶೌಚಾಲಯಗಳು, ಮೂಲ ವಸತಿ, ಬಡವರಿಗೆ ವಿಮೆ ಮುಂತಾದವುಗಳನ್ನು ಸಾರ್ವಜನಿಕರಿಗೆ ಒದಗಿಸುವುದು; ಆತ್ಮನಿರ್ಭರ ಭಾರತ್‌ ಅಡಿಯಲ್ಲಿ ಪ್ರಮುಖ ಕೈಗಾರಿಕೆಗಳಿಗೆ ಬೆಂಬಲ; ವಿದೇಶಿ ವ್ಯಾಪಾರ ಒಪ್ಪಂದಗಳಲ್ಲಿ ಪರಸ್ಪರ ಸಂಬಂಧದ ಮೇಲೆ ಬಲವಾದ ಒತ್ತು ನೀಡುವುದು, ಇತ್ಯಾದಿ.

ಆರ್ಥಿಕ ಸಮೀಕ್ಷೆಯ ಮೂಲಕ ಚರ್ಚಿಸಲಾದ ಪ್ರಮುಖ ವಿಷಯವೆಂದರೆ ‘ಪ್ರಕ್ರಿಯೆ ಸುಧಾರಣೆಗಳು’. ಅನಿಯಂತ್ರಣ ಮತ್ತು ಪ್ರಕ್ರಿಯೆ ಸುಧಾರಣೆಗಳ ನಡುವೆ ವ್ಯತ್ಯಾಸವನ್ನು ಕಂಡುಹಿಡಿಯುವುದು ಮುಖ್ಯವಾಗಿದೆ. ಮೊದಲನೆಯದು ನಿರ್ದಿಷ್ಟ ಚಟುವಟಿಕೆಯಿಂದ ಸರ್ಕಾರದ ಪಾತ್ರವನ್ನು ಕಡಿಮೆ ಮಾಡಲು ಅಥವಾ ತೆಗೆದುಹಾಕಲು ಸಂಬಂಧಿಸಿದೆ. ಇದಕ್ಕೆ ವ್ಯತಿರಿಕ್ತವಾಗಿ, ಎರಡನೆಯದು ಸ್ಥೂಲವಾಗಿ ಪ್ರಕ್ರಿಯೆಯ ಸರಳೀಕರಣ ಮತ್ತು ಸುಗಮಗೊಳಿಸುವಿಕೆಗೆ ಸಂಬಂಧಿಸಿದೆ, ಅಂತೆಯೇ ಸೌಲಭ್ಯ ಒದಗಿಸುವ ಅಥವಾ ನಿಯಂತ್ರಕನಂತಹ ಸರ್ಕಾರದ ಉಪಸ್ಥಿತಿಯು ಅವಶ್ಯಕವಾಗಿದೆ.

ಕೋವಿಡ್‌-19 ಸಾಂಕ್ರಾಮಿಕದ ಕಾರಣದಿಂದಾಗಿ ಕಳೆದ ಎರಡು ವರ್ಷಗಳಲ್ಲಿ ವಿಶ್ವ ಆರ್ಥಿಕತೆಗೆ ಧಕ್ಕೆ ಒದಗಿದ್ದನ್ನು ಸಮೀಕ್ಷೆಯು ಬಿಂಬಿಸುತ್ತದೆ. ಸೋಂಕಿನ ಪುನರಾವರ್ತಿತ ಅಲೆಗಳು, ಪೂರೈಕೆ-ಸರಪಳಿ ಅಡೆತಡೆಗಳು ಮತ್ತು ಇತ್ತೀಚೆಗೆ ಜಾಗತಿಕ ಹಣದುಬ್ಬರವು ನೀತಿ-ನಿರ್ಮಾಣಕ್ಕಾಗಿ ವಿಶೇಷವಾಗಿ ಸವಾಲಿನ ಸಮಯವನ್ನು ಸೃಷ್ಟಿಸಿದೆ. ಈ ಸವಾಲುಗಳನ್ನು ಎದುರಿಸಿದ ಭಾರತ ಸರ್ಕಾರವು ‘ಬಾರ್ಬೆಲ್‌ ಸ್ಟ್ರಾಟಜಿ’ ಯನ್ನು ಆರಿಸಿಕೊಂಡಿತು. ಅದು ಸುರಕ್ಷ ತಾ ಜಾಲಗಳ ಮೂಲಕ  ಸಮಾಜದ ದುರ್ಬಲ ವರ್ಗಗಳು ಮತ್ತು ವ್ಯಾಪಾರ ವಲಯದ ಮೇಲೆ ಈ ದುಷ್ಪರಿಣಾಮದ ಪ್ರಭಾವವನ್ನು ತಗ್ಗಿಸುವಂತಹುದು. ಇದು ಮಧ್ಯಮ-ಅವಧಿಯ ಬೇಡಿಕೆಯನ್ನು ಮರಳಿ ನಿರ್ಮಿಸಲು ಮೂಲಸೌಕರ್ಯಗಳ ಮೇಲಿನ ಬಂಡವಾಳದ ವೆಚ್ಚದಲ್ಲಿ ಗಮನಾರ್ಹ ಹೆಚ್ಚಳದ ಮೂಲಕ ಮತ್ತು ನಿರಂತರ ದೀರ್ಘಾವಧಿಯ ವಿಸ್ತರಣೆಗೆ ಆರ್ಥಿಕತೆಯನ್ನು ಸಿದ್ಧಪಡಿಸಲು ಆಕ್ರಮಣಕಾರಿಯಾಗಿ ಅಳವಡಿಸಲಾದ ಪೂರೈಕೆ-ಬದಿಯ ಕ್ರಮಗಳಾದವು. ಈ ಹೊಂದಿಕೊಳ್ಳುವ ಮತ್ತು ಬಹು-ಪದರದ ವಿಧಾನವು ನೈಜ-ಸಮಯದ ಡೇಟಾದ ಮೇಲ್ವಿಚಾರಣೆಯನ್ನು ಆಧರಿಸಿದೆ.

ಸಾಂಕ್ರಾಮಿಕ ರೋಗವು ಉಲ್ಬಣಗೊಂಡಾಗಿನಿಂದ ಅಪಾಯದಿಂದ ಪಾರು ಮಾಡುವ ಮತ್ತು ಬೆಳವಣಿಗೆಗೆ ಪೂರಕವಾದ ಕ್ರಮಗಳನ್ನು ಕೈಗೊಂಡಿದ್ದರ ಕುರಿತು ಸಮೀಕ್ಷೆಯು ತಿಳಿಸುತ್ತದೆ. ಆದರೆ ಹೆಚ್ಚುವರಿ ದ್ರವ್ಯತೆಯ ಮಧ್ಯಮ ಅವಧಿಯ ಸ್ಥಾನಾಂತರವನ್ನು  ತಪ್ಪಿಸಲು ಎಚ್ಚರಿಕೆಯಿಂದ ನಿಯಂತ್ರಿಸಲಾಗುತ್ತದೆ. ಸುರಕ್ಷತಾ ಜಾಲದ ಪ್ರಮುಖ ಅಂಶವೆಂದರೆ ಸಾಮಾನ್ಯವಾಗಿ ಹಾಗು ನಿರ್ದಿಷ್ಟವಾಗಿ ಎಂಎಸ್‌ಎಂಇಗಳಿಗೆ ಹಣಕಾಸಿನ ಬೆಂಬಲಕ್ಕೆ ಅವಕಾಶ ಒದಗಿಸಲು ಸರ್ಕಾರದ ಭದ್ರತಾ ಕ್ರಮಗಳು. ಕಳೆದ ಎರಡು ವರ್ಷಗಳಲ್ಲಿ, ಸರ್ಕಾರವು ಆರ್ಥಿಕತೆಯ ಆಧಾರವಾಗಿರುವ ಅಂಶಗಳನ್ನು  ಅಳೆಯಲು ಸಾರ್ವಜನಿಕ ಮತ್ತು ಖಾಸಗಿ ಮೂಲಗಳಿಂದ ಉದ್ಯಮ, ಸೇವೆಗಳು, ಜಾಗತಿಕ ಪ್ರವೃತ್ತಿಗಳು, ಮ್ಯಾಕ್ರೋ-ಸ್ಟೆಬಿಲಿಟಿ ಸೂಚಕಗಳು ಮತ್ತು ಹಲವಾರು ಇತರ ಚಟುವಟಿಕೆಗಳನ್ನು  ನೈಜ-ಸಮಯದ ಆಧಾರದಲ್ಲಿ ಪ್ರತಿನಿಧಿಸುವ ಎಂಭತ್ತು ಹೆಚ್ಚಿನ ಆವರ್ತನ ಸೂಚಕಗಳನ್ನು (ಎಚ್‌ಎಫ್‌ಐಗಳು) ಹತೋಟಿಗೆ ತಂದಿವೆ. ಈ ಎಚ್‌ಎಫ್‌ಐಗಳು ನೀತಿ ನಿರೂಪಕರಿಗೆ ಜಲಪಾತದ ಚೌಕಟ್ಟಿನ ಪೂರ್ವ-ನಿರ್ಧರಿತ ಪ್ರತಿಕ್ರಿಯೆಗಳ ಮೇಲೆ ಅವಲಂಬಿತವಾಗುವುದಕ್ಕಿಂತ ಹೆಚ್ಚಾಗಿ ವಿಕಸನಗೊಳ್ಳುತ್ತಿರುವ ಪರಿಸ್ಥಿತಿಗೆ ತಮ್ಮ ಪ್ರತಿಕ್ರಿಯೆಯನ್ನು ಹೊಂದಿಸಲು ಸಹಾಯ ಮಾಡಿತು, ಇದು ಭಾರತ ಮತ್ತು ಪ್ರಪಂಚದ ಹೆಚ್ಚಿನ ಭಾಗಗಳಲ್ಲಿನೀತಿಯನ್ನು ರೂಪಿಸಲು ಸಾಂಪ್ರದಾಯಿಕ ವಿಧಾನವಾಗಿದೆ.

ಕೊನೆಯಲ್ಲಿ, ಒಟ್ಟಾರೆ ಸಮೀಕ್ಷೆಯು ಆಶವಾದವನ್ನು ಬಿಂಬಿಸುತ್ತದೆ. ಸ್ಥೂಲ-ಆರ್ಥಿಕ ಸ್ಥಿರತೆಯ ಸೂಚಕಗಳು ಭಾರತೀಯ ಆರ್ಥಿಕತೆಯು 2022-23ರ ಸವಾಲುಗಳನ್ನು ಎದುರಿಸಲು ಸಾಧ್ಯವಾಗುವಂತಹ ಉತ್ತಮ ಸ್ಥಾನದಲ್ಲಿದೆ ಹಾಗು ಭಾರತೀಯ ಆರ್ಥಿಕತೆಯು ಉತ್ತಮ ಸ್ಥಿತಿಯಲ್ಲಿರಲು ಅದರ ವಿಶಿಷ್ಟ ಪ್ರತಿಕ್ರಿಯೆ ತಂತ್ರವೂ  ಒಂದು ಕಾರಣವಾಗಿದೆ.

***