লৈবাক্কী রিজন পুম্নমক্তগী মখোয়গী থোইদোক-হেন্দোকপা মাইপাকপশিংগীদমক ইনোবেসন (৭), সোসিএল সর্ভিস (৪), স্কোলাস্তিক (১), স্পোর্তস (৮), আর্ত অমসুং কলচর (৬) অমসুং ব্রেভরী (৩) কেতগোরীশিং অসিদগী চহি অসিগী প্রধান মন্ত্রী রাস্ত্রীয় বাল পুরস্কার পীনবা অঙাং ২৯ খনগৎখ্রে। এৱার্দীশিং ওইরিবা নুপামচা ১৫ অমসুং নুপীমচা ১৪ অসি রাজ্য অমসুং য়ু.তি. ২১দগীনি।

লৈবাক অসিদা কোবিদ-১৯গী ফীভমনা মরম ওইরগা ওইহল্লিবা অমুক্তা ওইখ্রিবা ফীভম অসি য়েংলগা নই দিল্লীদা ফিজিকেল ওইবা থৌরম অমা পাঙথোকপা ওইথোকখিদে। অঙাংশিংনা তৌরিবা থোইদোক-হেন্দোকপা থবকশিং তৌরিবা মশক খঙবীনবা অমসুং থৌগৎপীনবা ঙসি নেস্নেল গর্ল চাইল্দ দে নুমিৎ অমসুং আজাদী কা অমৃত মহোৎসবকী শরুক অমা ওইনা ভর্চ্যুএল ওইনা থৌরম অমা পাঙথোকখি। পি.এম.আর.বি.পি. ২০২১ অমসুং ২০২২গী এৱার্দীশিংনা মখোয়গী মমা-মপাশিং অমসুং মখোয় মশাগী জিলাগী মরী লৈনবা দিস্ত্রিক্ত মেজিস্ত্রেৎকা লোয়ননা মখোয়গী দিস্ত্রিক্ত হেদ ক্বাতরশিংদগী থৌরম অসিদা শরুক য়াখি।

থৌরম অদুগী মনুংদা ইকাই খুম্নরবা প্রধান মন্ত্রী শ্রী নরেন্দ্র মোদীনা নেস্নেল ব্লোকচেন প্রোজেক্তকী মখাদা আই.আইতি. কানপুরনা দিবেলপ তৌবা ব্লোক চেন-দ্রিবন তেক্নোলোজী অমা শীজিন্নদুনা পি.এম.আর.বি.পি. ২০২১ অমসুং ২০২২গী ৱিনর ৬১দা দিজিতেল সর্তিফিকেৎশিং পীখি। দিজিতেল সর্তিফিকেৎশিং অসি রিসিপিয়ন্তশিংগী মোবাইল দিভাইসশিংদা ইনস্তোল তৌবা ৱাল্লেৎশিংদা স্তোর তৌই। ব্লোকচেন দ্রিবন তেক্নোলোজী শীজিন্নদুনা পীখিবা দিজিতেল সর্তিফিকেৎশিং অসি ফোর্জ তৌবা য়াদে, মালেম শিনবা থুংনা ভেরিফাইএবল ওই, অখন্ননা দিসক্লোজেবল ওই অমসুং য়ুজর কন্তেন্ততা সেন্সিতিব ওই। এৱার্দীশিংদা সর্তিফিকেৎশিং পীবদা অহানবা ওইনা ব্লোক চেন তেক্নোলোজী শীজিন্নখি।

পি.এম.আর.বি.পি. ২০২২গী এৱার্দীশিংদা লুপা ১,০০,০০০/-গী শেলগী মনা পীখি, হায়রিবা অসি ইকাই খুম্নরবা পি.এম.না থৌরম মনুংদা ৱিনরশিংগী মশাগী একাউন্তশিংদা ওনলাইন ওইনা ত্রান্সফর তৌখি।

ইকাই খুম্নরবা প্রধান মন্ত্রীনা পি.এম.আর.বি.পি. ২০২২গী ৱিনরশিংগা লোয়ননা ভর্চ্যুএল ওইনা ৱারী-ৱাতাই শাখি। থৌরম অসিদা কেন্দ্রগী নুপী অমসুং অঙাংগী য়াইফ-থৌরাং মন্ত্রী শ্রীমতি স্মৃতি জুবিন ইরানি অমসুং রাজ্যগী মন্ত্রী দা. মুঞ্জপরা মহেন্দ্রভাইনা শরুক য়াখি।

মধ্য প্রদেশকী ইন্দোরদগী মাস্তর অভি শর্মগা ৱারী-ৱাতাই শাবদা প্রধান মন্ত্রীনা রামায়নগী তোঙান-তোঙানবা হীরমশিংগী মতুং ইন্না শেম্বা মহাক্কী প্রোলিফিক আউতপুৎকী অরোনবা লাইৱা অদুগী মতাংদা হংখি। মাস্তর অভি শর্মনা মসিগী ইথিল অসি লোকদাউন মনুংদা রামায়নগী সিরিএল শন্দোক্নবগী ৱারেপ অদুদগী ফংখি হায়না ফোঙদোকখি। অভিনা মহাক্কী ক্রিএসন অদুদগী কোপ্লেৎ খরা থীখি। প্রধান মন্ত্রীনা মহাক্না অঙাং ওইরিঙৈ মতমদা সুশ্রী উমা ভারতিজীগী মনাক্তা চৎতুনা তাজবা ফংখিবগী থৌদোক অমগী মতাংদা পাউদমখি, প্রোগ্রাম অমদা মহাক্না অচৌবা স্পিরিচ্যুএলগী নুংগী ওইবা ৱাখল্লোন অমসুং লৌশিং অদু উৎখি। মহাক্না হায়খি অসিগুম্বা থোইদোক-হেন্দোক্না ৱাখল মপুং ফাবগী তেলেন্ত অসি পুথোক্লিবা মধ্য প্রদেশকী লৈহাওদা করিগুম্বা অমদি য়াওরি। প্রধান মন্ত্রীনা অভিদা মহাক অসি ইথিল পীরিবা মীওই অমনি অমসুং অচৌবা থবক অমা তৌবদা অঙাং হায়বা লৈতে হায়বা পাউরৌগী খুদম অমা ওইরি হায়না ফোঙদোকখ্রে।

কর্নাতকাগী কুমারি রেমোনা ইভেত্তে পেরৈরাগা ৱারী-ৱাতাই শাবদা প্রধান মন্ত্রীনা মহাক্না ভারতকী ওইবা জগোইদা থৱায় য়াওবগী মতাংদা খন্নখি। মহাক্কী অপাম্বা অসি তুংইন্নবা হোৎনবদা মহাক্না মায়োক্নখিবা অৱাবশিংগী মতাংদা মহাক্না হংখি। মচানুপীগী মঙলানশিং থুংহন্নবা মশাগী অৱাবা ফীভমশিংবু নাথৈদুনা থনমকিবা মহাক্কী মমাপু প্রধান মন্ত্রীনা থাগৎপা ফোঙদোকখি। প্রধান মন্ত্রীনা রেমোনাগী মাইপাকপশিং অসি মহাক্কী চহিগা য়েংনবদা য়াম্না চাউই অমসুং মহাক্কী কলা অসি অচৌবা লৈবাক অসিগী মপাঙ্গল উৎথোক্নবা পাম্বৈ অমনি হায়না হায়খি।

ত্রিপুরাদগী কুমার পুহাবি চক্রবোর্তিগা ৱারী-ৱাতাই শাবদা প্রধান মন্ত্রীনা মহাক্কী কোবিদকা মরী লৈনবা ইনোবেসনগী মতাংদা হংখি। মহাক্না প্রধান মন্ত্রীদা শান্নরোয়শিংগীদমক লৈরিবা মহাক্কী ফিৎনেস এপকী মতাংদসু পাউদমখি। খোঙথাং অসিদা মহাক্না স্কুল, মরুপশিং অমসুং মমা-মপাদগী ফংখিবা মতেংগী মতাংদা প্রধান মন্ত্রীনা হংখি। স্পোর্তসতা মহাক্না মতম কাইথোকপা লোয়ননা ইনোবেতিব এপ অসি দিবেলপ তৌবদা মতম কাইথোকপা অসি করম্না বেলেন্স তৌবগে হায়না হংখি।

বিহারগী ৱেস্ত চম্পারনদগী মাস্তর ধিরাজ কুমারগা ৱারী-ৱাতাই শাবদা প্রধান মন্ত্রীনা মহাক্না মহাক্কী মনাওনুপাপু গুমভিরনা এতেক তৌরকপা মতমদা কনখিবগী থৌদোক অদুগী মতাংদা হংখি। মহাক্কী মনাওনুপা অদু কনবা মতমদা অমসুং হৌজিক মহাক্না ফংলিবা ইকাই খুম্নবা অসিগী মতুংদা মহাক্কী ৱাখলদা করি ফাওবগে হায়না পি.এম.না হংখি। প্রধান মন্ত্রীনা মহাক্কী মথৌনা অমসুং পাইরক্কী লৌশিং লৈবা মতৌবু থাগৎপা ফোঙদোকখি। ধিরাজনা প্রধান মন্ত্রীদা আর্মীগী লান্মী অমা ওইনা লৈবাক অসিবু শেবা তৌবা পাম্মি হায়না ফোঙদোকখি।

পঞ্জবাকী মাস্তর মীধান্স কুমার গুপ্তাগা ৱারী-ৱাতাই শাবদা প্রধান মন্ত্রীনা কোবিদকী সমস্যাশিংগীদমক এপ শেম্বদা মহাক্না মাইপাকখিবা অদুগী মতাংদা হংখি। পি.এম.না মীধান্সকুম্বা অঙাংশিংদা ওন্তপ্রিনোর্শিপ থৌগৎনবা সরকারনা হোৎনরিবশিং অসি মহৈ য়াল্লি অমসুং থবক থীরিবশিংগী মহুৎ থবক পীরিবশিং ওইরক্নবগী মওং অসি হেন্না ময়েক শেংলক্লি হায়না মহাক্না ফাওই হায়না ফোঙদোকখি।

চন্দিগরদগী কুমারি তরুশি গোরগা ৱারী-ৱাতাই শাবদা প্রধান মন্ত্রীনা স্পোর্তস অমসুং মহৈ-মশিংগী মরক্তা বেলেন্স তৌবগী মতাংদা মহাক্কী ৱাখল্লোন অদু ফোঙদোক্নবা হায়খি। তরুশিনা বোক্সর মেরী কোমবু করিগীদমক পাম্লিবনো হায়না প্রধান মন্ত্রীনা হংখি। মহাক্না প্রধান মন্ত্রীদা মেরী কোম পাম্বগী মরম অসি মহাক্না মীথোই-মীহেন ওইন্না হোৎনবা অমসুং শান্নরোয় অমসুং মমা অমা ওইনা বেলেন্স তৌরিবা অসিননি হায়খি। প্রধান মন্ত্রীনা শান্নরোয়শিংদা খুদোংচাবা পুম্নমক ফংহন্নবা অমসুং থাক খুদিংমক্তা মীথোই-মীহেন ওইনবা ৱাখল্লোন পোকহন্নবা সরকারনা হোৎনৈ হায়না ফোঙদোকখ্রে।

মীতিন অদুদা ৱা ঙাংলদুনা প্রধান মন্ত্রীনা লৈবাক অসিনা আজাদী কা অমৃত মহোৎসব পালন তৌবগী মরু ওইবা মতমগী মনুংদা এৱার্দশিং অসি পীরিবা অসি য়েংলগা এৱার্দশিং অসি হেন্না শীংথানীংঙাই ওইরি হায়না ফোঙদোকখ্রে। মহাক্না মসি হৌখিবা মতমদগী ইথিল লৌনবা অমসুং অমৃত কালগী লাক্লিবা চহি ২৫ অসিদা অচৌবা ফলশিং পুরক্নবা ইশাবু কত্থোক্নবা তানফম ওইরে হায়না ফোঙদোকখি। মহাক্না লৈবাক অসিগী ইচানুপীশিংদা নেস্নেল গর্ল চাইল্দ দে নুমিৎনা লাকপদা য়াইফ পাউজেলসু পীখি। প্রধান মন্ত্রীনা নীংতম লানগী মতিক-মঙাল লৈবা পুৱারী অমসুং বিরবালা কনকলতা বরুৱা, খুদিরাম বোস অমসুং রানি গাইদিনল্যুনা শরুক তমখিবা অদুবু নীংশিংখ্রে। “লান্মীশিং অসিনা লৈবাক অসিগী নীংতম্বা অসিবু মখোয়না য়াম্না চহি নৌরিঙৈ মতমদগী মখোয়গী পুন্সিগী পান্দম ওইহনখি অমসুং মসিগীদমক মখোয় মশাবু কত্থোকখি” হায়না প্রধান মন্ত্রীনা ফোঙদোকখি।

নীংতম্বা ফংলবা মতুংগী লানদা অঙাং ওইরিবা লান্মীশিংগী থৌদাং লৌখিবা বালদেব সিংহ অমসুং বসন্ত সিংহবু উনখিবা মমাংগী চহিগী দিৱালিদা জম্মু অমসুং কাশ্মিরগী নোশহরা সেক্তরদা মহাক্না চৎখিবা অদু প্রধান মন্ত্রীনা নীংশিংখি। মখোয়গী পুন্সিগী মতমদা খনবা তৌদনা চহি নৌরিঙৈদা মখোয়না আর্মীগী মতেং পাংখি। অথৌবশিং অসিগী মথৌনা মরিংজেল অদুবু প্রধান মন্ত্রীনা ইকাই খুম্নবা উৎখি।

প্রধান মন্ত্রীনা গুরু গোবিন্দ সিংহজীগী মচানুপাশিংগী মথৌনা অমসুং কত্থোকখিবা অদুগী খুদমশিং পীখি। সাহিবজাদশিংনা থৌনা ফনা কত্থোকখিবা মতম অদুদা মখোয় চহি য়াম্না নৌরি হায়না মহাক্না ফোঙদোকখি। ভারতকী সভ্যতা, কলচর, থাজবা অমসুং লাইনিং-লাইশোনগীদমক গুরু গোবিন্দ সিংহজীগী সাহিবজাদশিংনা কত্থোকখিবা অদু চাংদমনীংঙাই লৈতে। নহারোলশিংদা সাহিবজাদশিং অমসুং মখোয়না কত্থোকখিবা অদুগী মরমদা হেন্না খঙনবা প্রধান মন্ত্রীনা হায়খ্রে।

প্রধান মন্ত্রীনা দিল্লীগী ইন্দিয়া গেৎকী মনাক্তা নেতাজী সুভাস চন্দ্র বোসকী দজিতেল স্তেচ্যু অমা খিনবগী মতাংদা ফোঙদোকখি। “নেতাজীগী – লৈবাক্কী থৌদাংনা অহানবদা পাঙথোকপা হায়বা অসিদগী অচৌবা ইথিক ঐখোয়না ফংখি। নেতাজীদগী ইথিল লৌদুনা ঐখোয়না লৈবাক্কীদমক থৌদাং য়ান্নবা লম্বীদা চংশিনবা তাই”, হায়না শ্রী মোদীনা মখা তাখি।

সেক্তর অমা হেক্তদা পোলিসী অমসুং থৌরাংশিংনা নহারোলদা মরু ওইবা মীৎয়েং থম্লি হায়না প্রধান মন্ত্রীনা ফোঙদোকখি। আত্মনির্ভর ভারতকী জন অন্দোলনগ অমসুং মোদর্ন ইনফ্রাস্ত্রকচর শেমগৎপগা লোয়ননা স্তার্ত অপ ইন্দিয়া, স্তেন্দ অপ ইন্দিয়া, দিজিতেল ইন্দিয়া, মেক ইন ইন্দিয়া অসিগুম্বা থৌরাংশিং অসি মহাক্না পনখি। মহাক্না মসি ভারত অমসুং মপালদা অনৌবা তাঙ্কক অসিবু লমজিংলিবা ভারতকী নহারোলগী খোঙজেলগা চান্না চৎলি হায়খি। প্রধান মন্ত্রীনা ভারতনা ইনোবেসন অমসুং স্তার্ত-অপকী লমদা মতিক-ময়াই হেনগৎলক্লিবা অসিগী মতাংদা ফোঙদোকখি। অচৌবা গ্লোবেল কম্পনীশিংবু ভারতকী নহা ওইরিবা সি.ই.ও.শিংনা লমজিংলিবা অসিদা জাতিনা চাউথোকচবা পোকই হায়না মহাক্না ফপঙদোকখি। “ঙসি স্তার্তঅপকী লমদা ভারতকী নহারোলশিংনা মীথোই-মীহেন ওইবা ঐখোয়না উবা ফংবদা চাউথোকচবা পোকই। ভারতকী নহারোলশিংনা ইনোবেৎ তৌবা অমসুং লৈবাক অসিবু মাংদা পুখৎপা উবা ফংবদা ঐখোয়না চাউথোকচবা পোকই”, হায়না প্রধান মন্ত্রীনা ফোঙদোকখ্রে।

মমাংদা ইচানুপীশিং চংবা য়ারমদবা মফমশিং ঙসি ইচানুপীশিংনা অঙকপশিং তৌবা ঙম্লে। মসি ইনোবেৎ তৌবদগী তুংহনবা তৌদবা অনৌবা ভারত অদুনি, ঙসি থৌনা ফবা অমসুং অখাং কনবনা ভারতকী হোলমার্ক ওইরি।

ভারতকী অঙাংশিংনা ভেক্সিনেসন প্রোগ্রামদা মখোয়গী মতমগা চুনবা অমসুং সাইন্তিফিক ওইবা মওং-মতৌ অদু উৎখি হায়না প্রধান মন্ত্রীনা থাগৎখ্রে। জনুৱারী ৩দগী শুপ্নগী নুমিৎ ২০দা অঙাং মিলিয়ন ৪০ হেনবনা কোরোনা ভেক্সিন কাপখি। স্বচ্ছ ভারত আভিয়ান্দা মখোয়না লুচিংখিবা অদুগীদমক মহাক্না মখোয়বুসু থাগৎকি। প্রধান মন্ত্রীনা মখোয়দা ভোকেল ফোর লোকেলগী এম্বেসেদর অমা ওইনবা অমসুং আত্মনির্ভর ভারতকী কেম্পেনবু লমজিংনবা অপীল তৌখি।

পি.এম.আর.বি.পি., ২০২২গী এৱার্দীশিংগী লিস্ত মখাদা পীরি:

প্রধান মন্ত্রী রাস্ত্রীয় বাল পুরস্কার-২০২২গী এৱার্দীশিং

পি.এম.আর.বি.পি.-২০২২গী এৱার্দীশিংগী অকুপ্পা মরোলগী লিঙ্ক মখাদা পীরি:

প্রধান মন্ত্রী রাস্ত্রীয় বাল পুরস্কার ২০২২ - এৱার্দীশিং - য়্যুত্যুব

*******