প্রধানমন্ত্রীগী লোইশঙ
প্রধান মন্ত্রীনা স্তার্ত-অপশিংগা ৱারী শাখ্রে
স্তার্ত-অপশিংনা পি.এম.গী মমাংদা হীরম তরুক্কী প্রজেন্তেসন পীখি
“স্তার্ত-অপকী কলচরবু লৈবাক্কী মনুং হঞ্জিনবা মফম খুদিংদা য়ৌহন্নবগীদমক্তা জনুৱারী ১৬পু নেস্নেল স্তার্ত-অপ দে হায়না পাংথোকপগী ৱারেপ লৌখ্রে”
“সরকারনা হোৎনরিবশিংগী পান্দম অহুমঃ অহানবা, ওন্তোপ্রিনর্শিপ অমসুং ইন্নোভেসনবু সরকারগী কাঙলোন অমসুং ব্যুরোক্রেতিক সাইলোশিংদগী মনীং তমহনবা; অনিশুবা, ইন্নোভেসন খুমাং চাউশিলহন্নবা ইন্সতিত্যুসনগী মেকানিজম শেমগৎপা; অহুমশুবা, হৌগৎলক্লিবা ইন্নোভেতর অমসুং ওন্তোপ্রিনরশিংবু হকথেংননা লমজীংবা”
“ঐখোয়গী স্তার্ত-অপশিংনা হান্নগী চৎনবী কয়া শেমদোরক্লি। মরম অসিনা, ঐহাক্না স্তার্ত-অপশিংনা অনৌবা ভারতকী য়াংলেন শরু ওইরগনি হায়না থাজবা থম্মি”
“লৈবাক অসিদা মমাংগী চহিদা য়ুনিকোর্ন ৪২ থোক্লকখি। লুপা করোর লিশিং কয়াগী ভেল্যু লৈবা কম্পেনীশিং অসিনা মরোমদোম লেপচবা অমসুং মশাদা থাজবা ভারতকী মগুন তাক্লি”
“ঙসিদি, ভারতনা য়ুনিকোর্ন মশিংনা ১০০ য়ৌনবা মাং থানা চঙশিল্লি। ভারতকী স্তার্ত-অপকী সনাগী য়ুগ অসি হৌজিক হৌরক্লে হায়না ঐহাক্না থাজৈ”
“অদোমগী মঙলানবু লোকেল খক্তগী ওইহনগনু, মালেমগী থাক্তা ওইহল্লু। মন্ত্রা অসি নীংশ
Posted On:
15 JAN 2022 1:24PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি স্তার্ত-অপশিংগা ভিদিও কনফরেন্সিংগী খুত্থাংদা ৱারী শাখ্রে। স্তার্ত-অপশিংনা প্রধান মন্ত্রীদা হীরম তরুক, মিং ওইনা পল্লবদা মরাদগী হৌগৎলকপা; দি.এন.এ. শেমদোকপা; লোকেদগী গ্লোবেল ফাওবা; তুংগী মতমগী তেক্নোলোজী; মেন্যুফেকচরিংদা শৌগত্তুন খ্বাইদগী হেনবা ওইবা অমসুং তুং কোইনা চাউখৎপগী ফিভম লৈহনবা, অসিগী মতাংদা প্রজেন্তেসন পীখি। হায়রিবা প্রজেন্তেসন অসিগীদমক্তা স্তার্ত-অপ ১৫০বু থবক পাংথোকপা কাঙলুপ ৬ থোক্না খায়দোকখি। হীরম খুদিংদা স্তার্ত-অপ অনিগী মীহুৎশিং লৈখি অমসুং মখোয়না হায়রিবা হীরমদুগীদমক্তা খনগৎলবা স্তার্ত-অপশিংগী মহুৎ শিন্দুনা ৱাফম থমখি।
স্তার্ত-অপশিংগী মীহুৎশিংনা মখোয়গী ৱাখল্লোন ফোংদোক্নবা অসিগুম্বা প্লেৎফোর্ম পীবগীদমক্তা প্রধান মন্ত্রীবু থাগৎখি অমসুং স্তার্ত-অপকীদমক্তা মহাক্না থম্লিবা মিৎয়েং অমসুং মদুবু শৌগৎপগীদমক্তসু মহাকপু থাগৎখি। মখোয়না অতোপ্পা থৌওং কয়াগী মরক্তগী লৌউ-শিংউবগী দেতা খোমজিনবগী পাক চাউরবা মেকানিজম; ভারতপু এগ্রি ব্যুজিনেসকী পাম্নরবা হব অমা ওইহনবা; তেক্নোলোজী শিজিন্নদুনা হেল্থকেয়র ফগৎহনবা; মেন্তেল হেল্থকী শিংনবশিং থেংনবা; ভর্চুএল তুরগুম্বা অনৌবা থৌওংগী খুত্থাংদা ত্রাভেল অমসুং তুরিজম খুমাং চাউখৎহনবা; এদ-তেক অমসুং থবক মশক খঙদোকপা; স্পেস সেক্তর; দিজিতেল কম্মর্সকা ওফলাইন রিতেল মার্কেতকা মরী লৈনহনবা; পোত্থোক পুথোকপগী থৌওং হেন্না ফগৎহনবা; দিফেন্স এক্সপোর্ত; গ্রীন সস্তেনেবল পোত্থোক অমসুং তুং কোইনা চৎকদবা ত্রান্সপোর্তকী থৌওংশিংবু খুমাং চাউশিলহনবগী হীরম য়াওনা তোঙানবা সেক্তরশিং মতাংদা মখোয়গী ৱাখল্লোন অমসুং ইনপুৎ কয়া পীখি।
থৌরম অসিদা মীওইশিংগা লোয়ননা কেন্দ্রগী মন্ত্রী, শ্রী পিয়ুশ গোয়ল, দাঃ মনশুখ মন্দাবিয়া, শ্রী অশ্বিনি বৈস্নো, শ্রী সর্বানন্দা সোনোৱাল, শ্রী পর্শোত্তম রুপালা, শ্রী জি. কিশন রেদ্দী, শ্রী পাশুপতি কুমার পারস, দাঃ জিতেন্দ্র সিংহ, শ্রী সোম প্রকাশসু শরুক য়াখি।
প্রজেন্তেসন পীখ্রবা তুংদা, প্রধান মন্ত্রীনা স্তার্ত-অপ ইন্দিয়া ইন্নোভেসন ৱীক শিন-লাঙলিবা অসি হৌজিক্কী নীংতম্বগী অমৃত মতমগী চহি অসিগী ওইনা য়াম্না হেন্না মরু ওই অমসুং মসিগী মরমদি ভারতনা নীংতম্বগী চহি ১০০ শুরকপা মতমদা স্তার্ত-অপকী থৌদাংনা মরু ওইবা হেনগৎলক্কদবা অসিননি হায়না ফোংদোকখি। “ঐহাক্না স্তার্ত-অপকী মালেমদা ভারতকী ফিরালবু ৱাংনা পাইহল্লিবা লৈবাক্কী স্তার্ত-অপ খুদিং অমসুং অনৌবা থৌওং পাংথোক্লিবা নহাশিংবু থাগৎলি। অসিগুম্বা স্তার্ত-অপকী কলচরবু লৈবাক্কী মনুং হঞ্জিনবা মফম খুদিংদা য়ৌহন্নবগীদমক্তা জনুৱারী ১৬পু নেস্নেল স্তার্ত-অপ দে হায়না পাংথোকপগী ৱারেপ লৌখ্রে”, হায়না প্রধান মন্ত্রীনা পাউদমখি।
প্রধান মন্ত্রীনা হৌজিক্কী দিকেদ অসিবু ভারতকী ‘তেকেদ’ হায়না কৌবগী মরম নীংশিংলদুনা ইন্নোভেসন, ওন্তোপ্রিনর্শিপ অমসুং স্তার্ত-অপ ইকোসীস্তেম্বু মপাঙ্গল হেন্না লৈহন্নবগীদমক্তা হৌজিক্কী দিকেদ অসিদা সরকারনা পুরক্লিবা চাউরবা অহোংবশিংগী হীরম অহুম ফোংদোকখি। অহানবা, ওন্তোপ্রিনর্শিপ অমসুং ইন্নোভেসনবু সরকারগী কাঙলোন অমসুং ব্যুরোক্রেতিক সাইলোশিংদগী মনীং তমহনবা; অনিশুবা, ইন্নোভেসন খুমাং চাউশিলহন্নবা ইন্সতিত্যুসনগী মেকানিজম শেমগৎপা; অহুমশুবা, নৌনা হৌগৎলক্লিবা ইন্নোভেতর অমসুং ওন্তোপ্রিনরশিংবু হকথেংননা লমজীংবা। হায়রিবশিং অসিগী শরুক অমা ওইনা, প্রধান মন্ত্রীনা স্তার্ত-অপ ইন্দিয়া অমসুং স্তেন্দ-অপ ইন্দিয়াগুম্বা প্রোগ্রামশিংগী মতাংদসু পনখি। ‘এঞ্জেল তেক্স’কী শিংনবশিং লৌথোকপা, তেক্সকী থৌওংশিংবু লায়থোকহনবা, সরকারগী ফন্দিং তৌনবা শীনবা, লেবরগী আইন ৯ অমসুং ইনভাইরনমেন্তকী আইন ৩গী মশানা সর্তিফিকেসন তৌবা য়াহনবা অমসুং কাঙলোন লিশিং ২৫ হেনববু লৌথোকপগী থৌওংশিংনা হায়রিবা খোঙথাংশিং অসিদা তেংবাংবা হেল্লি। গবর্নমেন্ত ই-মার্কেতপ্লেস (জি.ই.এম.) প্লেৎফোর্মদা স্তার্ত-অপশিংবু য়াওহনবা অসিনা স্তার্ত-অপশিংনা সরকারদা সর্ভিসেস কয়া পীবগী থৌওংদসু তেংবাংলি।
প্রধান মন্ত্রীনা সরকারনা হোৎনরিবা খুদিংমক অসি মহৈরোশিংবু অঙাং ওইরিঙৈদগী হৌনা অনৌবা থৌওং পাংথোকপদা পুক্নিং চিংশিনবগী থৌওং শীন্দুনা লৈবাক অসিদা ইন্নোভেসনবু ইন্সতিত্যুসন অমগুম ওইহন্নবনি হায়না ফোংদোকখি। অতল তিঙ্করিং লেব ৯০০০ হেনবনা অঙাংশিংদা মখোয়গী স্কুলশিংদা অনৌবা থৌওং পাংথোকপা অমসুং অনৌবা ৱাখল্লোন্দা মখা তানা থবক পাংথোকপগী খুদোংচাবা পীরি। দ্রোনগী অনৌবা কাঙলোন ওরো নত্ত্রগা স্পেসকী অনৌবা পোলিসী ওইরো, সরকারনা মিৎয়েং চঙলিবা অসিদি নহা কয়া অমদা য়ারিবমখৈ ইন্নোভেসন তৌনবা খুদোংচাবা পীবনি হায়না মহাক্না মখা তাখি। ঐখোয়গী সরকারনা আই.পি.আর. রেজিস্ত্রেসনগা মরী লৈনবা কাঙলোন অমসু লায়থোকহল্লে হায়না মহাক্না মখা তানা ফোংদোকখি।
ইন্নোভেসন তৌরে হায়বা তাক্লিবা ইন্দিকেতর মশিং য়াম্না হেনগৎলকপবুসু প্রধান মন্ত্রীনা শকখঙখি। ইং ২০১৩-১৪গী মনুংদা পেতেন্ত ৪০০গী অয়াবা পীখি অমসুং মমাংগী চহিমক্তদা পেতেন্ত লিশিং ২৮ হেনবগী অয়াবসু পীখি হায়না পাউদমখি। ইং ২০১৩-১৪দা ত্রেদমার্ক ৭০০০ হেনবা রেজিস্তর তৌখি অমসুং ইং ২০২০-২১দনা ত্রেদমার্ক লাখ ২.৫ হেনবসু রেজিস্তর তৌখি। ইং ২০১৩-১৪দা কোপীরাইত ৪০০০ খক্তগী অয়াবা পীখিবা মতমদা মমাংগী চহিগী অপুনবা মশিংনা ১৬০০০ হেনখি। ভারতনা ইন্নোভেসনগীদমক্তা চত্থরিবা কেম্পেন অসিনা মরম ওইদুনা গ্লোবেল ইন্নোভেসন ইন্দেক্সতা ভারতনা ৮১শুবা থাক্তা লৈরম্বদগী ফগৎলক্তুনা হৌজিক লৈরিবা ৪৬শুবা থাক্তা লৈবা ঙমহনখি হায়না প্রধান মন্ত্রীনা হায়খি।
ভারতকী স্তার্ত-অপশিংনা তোঙানবা ইন্দস্ত্রী ৫৫গা লোয়ননা থবক তৌরি অমসুং স্তার্ত-অপকী মশিংনা চহি মঙাগী মমাংদা ৫০০ খক লৈরম্বদগী হেনগৎলক্তুনা ঙসিদি লিশিং ৬০ হেন্না লৈরে হায়না শ্রী মোদীনা পাউদমখি। প্রধান মন্ত্রীনা অসুম্না হায়খি, “ঐখোয়গী স্তার্ত-অপশিংনা হান্নগী চৎনবী কয়া শেমদোরক্লি। মরম অসিনা, ঐহাক্না স্তার্ত-অপশিংনা অনৌবা ভারতকী য়াংলেন শরু ওইরগনি হায়না থাজবা থম্মি”। লৈবাক অসিদা মমাংগী চহিদা য়ুনিকোর্ন ৪২ থোক্লকখি অমসুং লুপা করোর লিশিং কয়াগী ভেল্যু লৈবা কম্পেনীশিং অসিনা মরোমদোম লেপচবা অমসুং মশাদা থাজবা ভারতকী মগুন তাক্লি হায়না প্রধান মন্ত্রীনা ফোংদোকখি। “ঙসিদি, ভারতনা য়ুনিকোর্ন মশিংনা ১০০ য়ৌনবা মাং থানা চঙশিল্লি। ভারতকী স্তার্ত-অপকী সনাগী য়ুগ অসি হৌজিক হৌরক্লে হায়না ঐহাক্না থাজৈ”, হায়না মহাক্না মখা তানা ফোংদোকখি।
চাউখৎ-খোঙথাং অমসুং লম-লমগী জেন্দরগী মরক্তা খেন্না লৈবগী শিংনবশিংবু মাইয়োক্নবদা ওন্তোপ্রিনর্শিপ্না মীয়াম্বু মপাঙ্গল হাপ্পগী থৌদাং লৌরিবা অসিগী মরু ওইববু প্রধান মন্ত্রীনা শকখঙখি। মহাক্না হায়খিবদা, ঙসিদি, লৈবাক্কী জিলা ৬২৫ খুদিংগী য়ামদ্রবদা স্তার্ত-অপ অমমমদি লৈরে অমসুং অপুনবা স্তার্ত-অপকী তংখাইদি তাইয়র ২ অমসুং ৩গী শহরশিংদগীনি হায়বা ৱাফম পনখি। মসিনা লাইরবা ইমুংদগী থোক্লকপা ৱাখল্লোনশিংবু কারবারদা ওন্থোক্লি অমসুং নহা ওইরিবা ভারত মচা লাখ কায়না থবক ফংলি।
শ্রী মোদীনা ভারতকী দাইভর্সিতীবু খ্বাইদগী মরু ওইবা মপাঙ্গল ওইবগা লোয়ননা ভারতপু মালেমদা শক্তাক্লিবা অসিগী খ্বাইদগী মরু ওইবা অমত্তা ঙাইরবা শক্তম্নি হায়না প্রধান মন্ত্রীনা ফোংদোকখি। ভারতকী য়ুনিকোর্ন অমসুং স্তার্ত-অপশিংনা অসিগুম্বা দাইভর্সিতী অসিগী পাউজেল শন্দোক্লি হায়খি। ভারতকী স্তার্ত-অপ অমনা মালেমগী অতোপ্পা লৈবাক অমদা য়াম্না লায়না য়ৌবা ঙম্মি হায়না প্রধান মন্ত্রীনা ফোংদোকখি। মরম অদুনা “অদোমগী মঙলানবু লোকেল খক্তগী ওইহনগনু, মালেমগী থাক্তা ওইহল্লু। মন্ত্রা অসি নীংশিংউ” হায়না মহাক্না ইন্নোভেতরশিংগী মবুক্নিং থৌগৎখি।
স্তার্ত-অপ ইকোসীস্তেম্না মরু ওইবা থৌদাং লৌবা য়াবা হীরম কয়া অমা প্রধান মন্ত্রীনা হৌদোকখি। পি.এম. গতিশক্তি নেস্নেল মাস্তর প্লানগী অহেনবা মফম অসি ই.ভি. চার্জিং ইনফ্রাস্ত্রকচরগীদমক্তা শিজিন্নবা য়াগনি হায়না মহাক্না হায়খি। মসিগা মান্নবা ওইনা, দিফেন্স পোত্থোক, চিপ শাবগী হীরম কয়ানা তোঙানবা খুদোংচাবা কয়া পীগনি। মহাক্না দ্রোন সেক্তরগী মতাংদা পল্লদুনা অনৌবা দ্রোন পোলিসী পুথোকখ্রবা তুংদা ইনভেস্তর কয়ানা দ্রোন স্তার্ত-অপশিংদা ইনভেস্ত তৌনরি হায়না মহাক্না ফোংদোকখি। আর্মী, নেভী অমসুং এয়র ফোর্সনা দ্রোন স্তার্ত-অপশিংদা লুপা করোর ৫০০ হেনবগী ওর্দর পীখ্রবনি। অর্বান প্লান্নিংগী ওইনসু, প্রধান মন্ত্রীনা ‘ৱাক তু ৱর্ক্কী ৱাখল্লোন’, অমত্তা ওইনা পুন্সিল্লবা ইন্দস্ত্রীএল ইস্তেত অমসুং স্মার্ত মোবিলিতীবু খুদোংচাবা লৌবা য়াবা হীরমশিংনি হায়না পনখি।
ঙসিগী মিলেমিএলশিং (২১শুবা চহি-চা অসিদা মপুং মরৈ ফারক্লিবা নহাশিং) অসিনা মখোয়গী ইমুং মনুংবু য়াইফহন্নবা অমসুং লৈবাকপু মরোমদোম লেপ্পা ঙমহনগদবা ঙাক্লৌ ওইরিবনি হায়না প্রধান মন্ত্রীনা ফোংদোকখি। “খুঙ্গংগী শেন্মিৎলোন্দগীনা ইন্দস্ত্রী ৪.০ ফাওবগী ওইনা, ঐখোয়গী তঙাইফবা অমসুং তৌবা ঙম্বগী মতিক অসি মপান নাইদে। তুংগী মতমগী তেক্নোলোজীগা মরী লৈনবশিংদা থিজিন হুমজিনবা অমসুং চাউখৎ-থৌরাংগী থবক পায়খৎপনা ঐখোয়গী সরকারগী ঙসিগী মিৎয়েংনি”, হায়না মহাক্না হায়খি।
প্রধান মন্ত্রীনা তুংগী মতমদা ওইথোকপা য়াবশিংগী মতাংদা পল্লদুনা হৌজিক ফাওবগী ওইনা ঐখোয়গী অপুনবা মীশিংগী শরুক তংখায়তমক ওনলাইন ওইরি, মরম অদুনা তুংগী মতমদা ওইথোকপা য়াবশিংগী মপান নাইদে হায়রদুনা মহাক্না স্তার্ত-অপশিংনা খুঙ্গংদসু য়ৌশিনসি হায়না তকশিনখি। “মোবাইল ইন্তর্নেত, ব্রোদবেন্দ কন্নেক্তিবিতী নত্ত্রগা ফিজিকেল কন্নেক্তিবিতী ওইসনু, খুঙ্গংগী অপাম্বশিং হেনগৎলক্লি অমসুং খুঙ্গং অমসুং সেমি-অর্বান মফমশিংনা চাউখৎপা অমসুং পাকথোক চাউথোকপগী অনৌবা ইপোম লাকপা ঙাইরি”, হায়না মহাক্না মখা তানা ফোংদোকখি।
প্রধান মন্ত্রীনা হৌজিক্কী মতমসি ইন্নোভেসনগী অনৌবা য়ুগনি, হায়বদি ৱাখল্লোন, ইন্দস্ত্রী অমসুং ইনভেস্তমেন্ত অমসুং মখোয়গী লেবর, ইন্তর্প্রাইস, মরল-মথুম শাগৎপা অমসুং থবক লৈহনবা অসি ভারতকীদমক্তা ওইগদবনি হায়না স্তার্ত-অপশিংদা হায়খি। “ঐহাক্না অদোমগীদমক্তা লেপ্লি, সরকারনা অদোমগীদমক্তা লেপ্লি অমসুং লৈবাক পুম্বনা অদোমগীদমক্তা লেপ্লি”, হায়রদুনা মহাক্কী ৱারোল লোইশিনখি।
*****
(Release ID: 1790156)
Visitor Counter : 220
Read this release in:
Odia
,
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Tamil
,
Telugu
,
Kannada
,
Malayalam