প্রধানমন্ত্রীগী লোইশঙ
পি.এম.না আই.আই.তি. কানপুরগী ৫৪শুবা কনভোকেসনগী থৌরমদা শরুক য়াখ্রে অমসুং ব্লোকচেন-বেজ দিজিতেল দিগ্রী লোঞ্চ তৌখ্রে
“লৈবাক অসিগী অমৃত কালগুম্না চপ মান্নবা মওংদা মসি অদোমগী পুন্সিগী অমৃত কালনি”
“ঙসি লৈবাক অসিগী ৱাখল্লোন অমসুং ফিরেপ অসি অদোমগা চপ মান্নৈ। মমাংদা করিগুম্বা থবক অমা অপাম্বা য়াওদনা পাঙথোক্লম্বা তারবসু ঙসিদি এক্সন অমসুং রিজল্ত ওরিয়েন্তেদ ওইবা ৱাখল্লোন পোক্লে।”
“লৈবাক অসিনা মতম কয়া অমা মাংহনখ্রে। মরক্তা মীরোন অনি হৌখ্রে অদুনা ঐখোয়না মীকুম অনি ফাওবা মঙহন্নবগী মতম লৈত্রে”
“করিগুম্বা ঐহাক অসি ঙাইঙমদবা মালবসু মসিগী মরমদি ঐহাক্না নখোয়দা চপ মান্নবা মওংদা আত্মনির্ভর ভারত ওইহন্নবা ঙাইঙমদবা পোকহনবা পাম্মি। কনাগুম্বা অমত্তদা মীপাল তাংদনবা, মপুং ফানা নীংখা তম্বা ফংনবা আত্মনির্ভর ভারত অসিনা য়ুম্ফম ওইরি”
“করিগুম্বা অদোম্না শীংনবশিং মায়োক্নবা পাম্লবদি অদোম্না শাদানবা ওইগনি অমসুং শীংনবা অদুনা অদোম্না তান্নগদবা অদু ওইগনি”
“নুংঙাইবা অমদি মীনুংশি উৎপগী মতাংদা পাসৱার্দ অমত্তা থমগনু অমসুং পুন্সিবু পেন্থোক্না হিংঙু”
Posted On:
28 DEC 2021 1:18PM by PIB Imphal
প্রধান মন্ত্রী শ্রী নরেন্দ্র মোদীনা ঙসি আই.আই.তি. কানপুরগী ৫৪শুবা কভোকেসনগী থৌরমদা শরুক য়াখ্রে অমসুং ইন-হাউস ব্লোকচেন-দ্রিবন তেক্নোলোজীগী খুত্থাংদা দিজিতেল দিগ্রীশিং পীখ্রে।
ইন্সতিত্যুত অসিগী মহৈরোয়শিং অমসুং ফেকল্তীশিংদা ৱা ঙাংবদা প্রধান মন্ত্রীনা ঙসি অসি কানপুরগী ওইনা য়াম্না ফবা নুমিৎ অমনি মরমদি শহর অসিনা মেত্রো ফেসিলিতী অমা ফংলি অমদি মহৈরোয়শিং পাস তৌবগী মওংদা কানপুরনা মালেমদা মমল য়াম্লবা খুদোল অমা পীরি হায়না ফোঙদোকখ্রে। মশক নাইরবা ইন্সতিত্যুসন অসিদা তম্লিবা মহৈরোয়শিংগী খোঙচৎকী মতাংদা ৱা ঙাংলদুনা প্রধান মন্ত্রীনা হায়খি আই.আই.তি. কানপুরদা মিং চল্লকপা অমসুং তম্বা লোইবা অসিগী মরক্তা “অদোম্না ইশাদা অচৌবা অহোংবা অমা শোইদনা ফাওরমগনি। মফম অসিদা লাক্ত্রিঙৈ মমাংদা অদোম্না শক উদবা অমগী অকিবা নত্ত্রগা শক উদবা অদু খঙনীংবা পোক্লমগনি, হৌজিক্তি অদোম্না মালেম পুম্বা এক্সপ্লোর তৌনবগী থৌনা অদোমদাআ লৈরে। শক উদবা অদুগী খঙনীংবা পোক্লম্বা অদু হৌজিক্তি লৈত্রে। হৌজিক্তি খ্বাইদগী অফবা অদু ফংনবা হোৎনবা অমসুং মালেম পুম্ববু খুদম চনবা ঙম্নবা মঙলান ওইনা মঙলে”, হায়না মহাক্না ফোঙদোকখ্রে।
কানপুরগী পুৱারী অমদি খুন্নাইগী লৈজরিবা লেগেসী অসি পল্লদুনা প্রধান মন্ত্রীনা হায়খি কানপুর অসি ভারতকী মখল কয়ানা থনবা শহর খরগী মনুংদা অমনি। “সত্তী চৌরা ঘাত্তগী মসারী পাসী ফাওবা, নানা সাহেবতগী বতুকেশ্বর দত্ত ফাওবা, ঐখোয়না শহর অসিদা চৎপা মতমদা ঐখোয়না হৌখ্রবা মতমগী নীংথিরবশিং অদু উবা ফংজবা অমসুং নীংতম ইহৌদা কত্থোকখিবশিং অদুগী নীংথিজবা অদু শোকপা ফংজবগুম্না ফাওই”, হায়না প্রধান মন্ত্রীনা নীংশিংখি।
প্রধান মন্ত্রীনা পাস তৌরিবা মহৈরোয়শিংদা মখোয়গী পুন্সিগী হৌজিক লৈরিবা তাঙ্কক অসিগী মরু ওইবা অদুগী মতাংদা থমখি। মহাক্না ইং কুমজা ১৯৩০গী মতম অদু পল্লদুনা শন্দোক্না তাকখি। “মতম অদুদা চহি ২০-২৫ শুরবা নহা ওইরিবা নুপামচাশিং অদুনা ইং কুমজা ১৯৪৭ ফাওবা শীংথানীংঙাই ওইবা খোঙচৎ অমা থেংনখি, নীংতম্বা ফংবগী মাইপাকপা। মদু মখোয়গী পুন্সিশিংগী খ্বাইদগী অথোইবা তাঙ্কক ওইখি। ঙসি অদোম্নসু অদুগুম্বা সনাগী চহিচা অদুদা খোঙ থাংজিল্লি। লৈবাক অসিগী হৌজিক অমৃত কাল ওইরিবা অসিগুম্না চপ মান্নবা মওংদা অদোমগী পুন্সিগীসু মসি অমৃত কালনি”, হায়না মহাক্না ফোঙদোকখি।
কানপুর আই.আই.তি.গী মাইপাকখিবশিংগী মতাংদা পল্লদুনা প্রধান মন্ত্রীনা ঙসিগী প্রোফেস্নেলশিংদা হৌজিক মতমগী তেক্নোলোজীগী ওইরিবা ফীভম অসিনা পীরিবা ওইথোকপা য়াবশিংগী মতাংদা শন্দোক্না হায়খি। এ.আই., ইনর্জী, ক্লাইমেৎ সোল্যুসনশিং, হেল্থ সোল্যুসনশিং অমদি দিজাস্তর মেনেজমেন্তদা লৈরিবা তেক্নোলোজী অসিগুম্বা লমশিংদা লৈরিবা হীরম অদু পল্লদুনা প্রধান মন্ত্রীনা হায়খি, “মসি অদোমগী থৌদাংশিং খক্তা নত্তে মসিদি লৈবাক ফবদগী অদোম্না থুংহনগদবা মীরোন কয়াগী মঙলানশিং অদুনি। তানফম অসি অচৌবা পান্দমশিং থম্নবা অমসুং মখোয়বু ফংনবা অঙম্বা শক্তি শীজিন্নদুনা হোৎনবগী মতমনি।”
২১শুবা চহিচা অসি মপুং ফানা তেক্নোলোজীদা য়ুম্ফম ওই হায়না প্রধান মন্ত্রীনা অকনবা ৱাফম থমখি। দিকেদ অসিদসু তেক্নোলোজীনা তোঙান-তোঙানবা লমশিংদা খুদম চনবা হেনগৎলক্লি। হৌজিক্তি নাকল অমরোমদা তেক্নোলোজী য়াওদ্রবদি পুন্সি অসি মপুং ফাররোই। মহাক্না মহৈরোয়শিংনা পুন্সিগী অমদি তেক্নোলোজীগী অথোই-অহেন তান্নরিবা চহিচা অসিদা শোইদনা মাং থাদুনা থোরক্নবা মখোয়দা য়াইফ-পাউজেল পীখ্রে। প্রধান মন্ত্রীনা মহৈরোয়শিংদা মহাক্না নেস্নেল মুদকী রীদিং তৌবা অদুগী মতাংদা পাউদমখি। মহাক্না হায়খি, “ঙসি, লৈবাক অসিগী ফিরেপ অসি অদোমগী ফিরেপকা চপ মান্নৈ। মমাংদা করিগুম্বা থবক অমা অপাম্বা য়াওদনা পাঙথোক্লম্বা তারবসু ঙসিদি এক্সন অমসুং রিজল্ত ওরিয়েন্তেদ ওইবা ৱাখল্লোন পোক্লে। মমাংদা সমস্যাশিং থেংনদনবা চেন্নবা হোৎনরম্বা তারবসু ঙসিদি সমস্যাশিং অদুগী ৱারোইশিন পুরক্নবা অচেৎবা ফিরেপ লৈরে।”
প্রধান মন্ত্রী নীংতমখিবগী চহি ২৫শুরকপা মতমদগী হৌনা লৈবাক অসি শেমগৎনবা শীজিন্নবা য়াবা মতম কয়া মাংহনখিবদা নীংঙমদবা পোকখি। “লৈবাক অসিনা নীংখা তম্বা চহি ২৫ শুরকপা মতমদা ঐখোয় ইশানা মরোমদোম লেপচবা ঙম্নবা থবক কয়া তৌফম থোকপনি। হৌজিক্তি মদু থেংলে, লৈবাক অসিনা মতম কয়া অমা মাংহনখ্রে। মরক্তা মীরোন ২ হৌখ্রে অদুনা ঐখোয়না মীকুম ২ ফাওবা মঙহনবা য়াদ্রে”, হায়না মহাক্না ফোঙদোকখি।
প্রধান মন্ত্রীনা হায়খি মহাক্কী মওং অসি ঙাইঙমদবা মালবসু মসিগী মরমদি মহাক্না পাস তৌরিবা মহৈরোয়শিং অসি “চপ মান্নবা মওংদা আত্মনির্ভর ভারত ওইহন্নবা ঙাইঙমদবা পোকহনবা পাম্মি। কনাগুম্বা অমত্তদা মীপাল তাংদনবা, মপুং ফানা নীংখা তম্নবা আত্মনির্ভর ভারত অসি তঙাই ফদে।” স্বামি বিবেকানন্দনা হায়খি – লৈবাক খুদিংমক্না পীগদবা পাউজেল অমা লৈ, থুংহনগদবা পান্দম অমা লৈ, য়ৌগদবা পন্থুংফম অমা লৈ। করিগুম্বা ঐখোয়না আত্মনির্ভর ওইদ্রবদি ঐখোয়গী লৈবাক অসিনা মাগী পান্দমশিং অদু করম্না থুংহনবা ঙমগনি, মাগী পন্থুংফম অদু করম্না য়ৌগনি হায়না প্রধান মন্ত্রীনা পানখি।
প্রধান মন্ত্রীনা হায়খি অতল ইন্নোভেসন মিসন, পি.এম. রিসর্চ ফেল্লোশিপস অমসুং নেস্নেল এজুকেসন পোলিসী অসিগুম্বা থৌরাংশিং অসিগা লোয়ননা অনৌবা ফীভম অমসুং অনৌবা খুদোংচাবশিং শেমগৎলি। ইজ ওফ দুইং বিজিনেস ফগৎহনবা অমসুং পোলিসীদা অপনবা পীরম্বশিং লৌথোকখিবগী ফলশিং ময়েক শেংনা উবা ফংলে। প্রধান মন্ত্রীনা ভারতনা নীংখা তমখিবগী চহি ৭৫শুরকপা অসিদা য়ুনিকোর্ন ৭৫ হেন্না লৈরে, স্তার্ত-অপ ৫০,০০০ হেন্না লৈরে হায়না ফোঙদোকখি। মসিগী মনুংদা ১০,০০০দা হৌখিবা থা ৬ অসিদা খক্তা শেমখিবনি। ঙসি ভারতনা মালেমগী অনিশুবা খ্বাইদগী চাউবা স্তার্ত-অপ হব ওইরে। আই.আই.তি.শিংগী নহাশিংনা স্তার্ত-অপ কয়া হৌদোকখ্রে। প্রধান মন্ত্রীনা মহৈরোয়শিং অসিনা মালেমগী ওইনা লৈবাক অসিনা লৈরিবা থাক অসিদা শরুক তম্নবগী অপাম্বা ফোঙদোকখি। মহাক্না হায়খি “করম্বা ভারত মচানা ভারতকী কম্পনীশিং অমসুং ভারতকী প্রদক্তশিং অসি গ্লোবেল ওইহনবা পাম্লোইদগে। আই.আই.তি.শিংনা খঙবা, মফম অসিদা লৈরিবা তেলেন্ত অসিনা মফম অসিগী প্রোফেসরশিংনা কন্না হোৎনরিভবা অসি খঙই, আই.আই.তি.শিং অসিনা শোইদনা থবক তৌরক্কনি হায়না ঐহাক্না থাজৈ।”
প্রধান মন্ত্রীনা মহৈরোয়শিংদা শীংনবা মায়োক্নবগী মহুৎ নুংঙাইথোকপা ওইনা খল্লোইদবনি হায়না পাউতাক পীখি। মরম অসিনা প্রধান মন্ত্রীনা হায়খি, “অদোম্না পাম্লবসু পামদ্রবসু পুন্সিদা শীংনবশিং অদুমক থেংনগনি। মখোয়দগী নাথৈদুনা চেনবা মীওইশিংনা মখোয়গী ভিক্তিমশিং ওইগনি। অদুবু করিগুম্বা অদোম্না শীংনবশিং মায়োক্নবা পাম্লবদি অদোম্না শাদানবা ওইগনি অমসুং শীংনবা অদুনা অদোম্না তান্নগদবা অদু ওইগনি।”
লনাইগী ওইবা ৱারোল থম্লদুনা প্রধান মন্ত্রীনা মহৈরোয়শিংদা মখোয় মশাদা সেন্সিতিবিতী, ক্যুরিওসিতী, ইমেজিনেসন অমসুং ক্রিএতিবিতী হিংহন্দুনা থম্নবা পাউতাক পীখি অমসুং মখোয়দা পুন্সিগী নন-তেক ওইবা হীরমশিংগী মতাংদসু খঙনবা হায়খি। “নুংঙাইবা অমদি মীনুংশি উৎপগী মতাংদা পাসৱার্দ অমত্তা থমগনু অমসুং পুন্সিবু পেন্থোক্না হিংঙু” হায়না মহাক্না ফোঙদোকখি।
***
(Release ID: 1785811)
Visitor Counter : 201
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam