প্রধানমন্ত্রীগী লোইশঙ
প্রধান মন্ত্রীনা দিল্লীদা পাংথোকপা বেঙ্ক দিপোজিত ইন্স্যুরেন্স প্রোগ্রামদা ৱা ঙাংবা
“হৌখিবা নুমিৎ খরনিদা, দিপোজিতর লাখ ১ হেনবনা চহি কয়াদগী চপ্তুনা লৈরুরবা শেল ফংনখ্রে। শেনফম অসি পুন্না লুপা করোর ১৩০০নি”।
“ঙসিগী অনৌবা ভারতনা শিংনবগী ৱারোইশিন পুরকপা পামি, ঙসিগী ভারতনা শিংনবদগী নাথৈদে”
“লাইরবশিংগী পুক্নিং খঙবা, মিদ্দল ক্লাসকী পুক্নিং খঙবদগী ঐখোয়না গেরেন্তী তৌরবা শেনফম্বু লুপা লাখ ৫দা হেনগৎহনখ্রে”
“মমাংগী মতমশিংদদি, শেল হন্দোকপগী অকক্নবা মতম লৈরমদে, ঐখোয়গী হৌজিক্কী সরকারনা শোইদনা শেল হন্দোকপগী মতম অসি নুমিৎ ৯০দা লেপখ্রে”
“বেঙ্কশিংনা লৈবাক য়াইফ-নুংঙাইবদা অচৌবা থৌদাং য়ারি। বেঙ্কশিং য়াইফনবগীদমক্তা, দিপোজিতরশিংগী শেলশিং তেক্ত কায়দনা থম্বগী চপ মান্নবা তঙাই ফদবা লৈ। ঐখোয়না বেঙ্কশিং কনবা পাম্লবদি, দিপোজিতরশিংবু ঙাক শেন্দুনা থমগদবনি”
“মালেমগী চাউখৎলবা লৈবাক ফাওবনা মখোয়গী মীয়ামদা তেংবাংবদা লুনা থোকপা মতমদা, ভারতনা লৈবাক্কী কাঙলুপ খুদিংগী মীওইশিংদা হকথেংননা য়াম্না থুনা তেংবাংখি”
“জন ধন য়োজনাগী মখাদা হাংদোক্লিবা বেঙ্ক একাউন্ত করোর কয়াগী মনুংদগী তংখায় হেনবদি নুপীশিংগীনি”
Posted On:
12 DEC 2021 1:26PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি নই-দিল্লীদা “দিপোজিতর ফর্স্তঃ লুপা লাখ ৫ ফাওবগী গেরেন্তীদ তাইম বাউন্দ দিপোজিৎ ইন্স্যুরেন্স পেমেন্ত”কী মতাংদা পাংথোকপা থৌরমদা ৱা ঙাংখ্রে। থৌরম অসিদা কেন্দ্রগী শেল-থুম মন্ত্রী, এম.ও.এস. ফাইনান্স অমসুং আর.বি.আই.গী গবর্নরনা শরুক য়াখি। প্রধান মন্ত্রীনা দিপোজিতর খরদা চেক য়েন্থোকখি।
মীতিন অসিদা ৱা ঙাংবদা, প্রধান মন্ত্রীনা দিকেদ কয়াদগী অচৌবা শিংনবা অমা ওইদুনা লাক্লবা অমগী ৱারোইশিন পুথোকপগী থৌওং উবা ফংলিবা ঙসি অসি বেঙ্কিং সেক্তর অমসুং বেঙ্ক একাউন্ত লৈবা লৈবাক মীয়ামগী ওইনা য়াম্না মরু ওইবা নুমিৎ অমনি হায়না ফোংদোকখি। মহাক্না ‘দিপোজিতর ফর্স্ত’ হায়বগী ৱাখল্লোন অসি য়াম্না ৱাহন্থোক লৈবনি হায়না ফোংদোকখি। মমাংগী নুমিৎ খরনিদা, মতম কয়াদগী চপ্তুনা লৈরক্লবা শেনফমশিং দিপোজিতর লাখ ১ হেনবনা ফংনখ্রে অমসুং মসিগী অপুনবা শেনফম অসি লুপা করোর ১৩০০ হেল্লি হায়না শ্রী মোদীনা ফোংদোকখি।
মতম চাবা ৱারোইশিন পুরকপগী থৌওংনা লৈবাক অমনা শিংনবা অমনা অচৌবা শিংনবা ওইরকপদগী কলহৌবা ঙম্মি হায়না প্রধান মন্ত্রীনা ফোংদোকখি। অদুবু, শিংনবশিংদগী নাথৈদুনা চৎপগী হৈনবী অমা লৈদুনা লাক্লি হায়না মহাক্না পাউদমখি। ঙসিগী অনৌবা ভারতনা শিংনবগী ৱারোইশিন পুরকপা পাম্মি অমসুং হোৎনৈ, ঙসিগী ভারতনা শিংনবদগী নাথৈদুনা চেন্দে।
প্রধান মন্ত্রীনা বেঙ্ক দিপোজিতরশিংগী ইন্স্যুরেন্স পীবগী পথাপকী চৎনবী অসি ভারত্তা ইং ৬০গী মতমদগী চৎনবা হৌরকখিবনি হায়না পাউদমখি। হান্নগী মতমদদি, বেঙ্কতা থম্বা অপুনবা শেলগী মনুংদগী শুপ্নগী লুপা লিশিং ৫০ ফাওবগী শেনফমদি গেরেন্তীদ ওই। মদুদগী শেনফম অসি লাখ ১দা হেনগৎখি। মসিনা হায়বদি, করিগুম্বা বেঙ্ক অদু মথৌ তৌবা ঙমদদুনা লুপ্লবদি, দিপোজিতরশিংনা লুপা লাখ ১ ফাওবগী শেনফম খক ফংবা য়াই হায়বনি। অদুগা শেনফম অসি ফংবগী অকক্নবা নুমিৎ মশিংসু লৈরমদে। “লাইরবশিংগী পুক্নিং খঙবা, মিদ্দল ক্লাসকী পুক্নিং খঙবদগী ঐখোয়না গেরেন্তী তৌরবা শেনফম্বু লুপা লাখ ৫দা হেনগৎহনখ্রে”, হায়না প্রধান মন্ত্রীনা ফোংদোকখি। অতোপ্পা শিংনবা অমনা আইন্দা অনৌবা কাংলোন হাপচিন্দুনা শেমজিনখি। “মমাংগী মতমশিংদদি, শেল হন্দোকপগী অকক্নবা মতম লৈরমদে, ঐখোয়গী হৌজিক্কী সরকারনা শোইদনা শেল হন্দোকপগী মতম অসি নুমিৎ ৯০দা, হায়বদি থা ৩দা, লেপখ্রে। মসিনা হায়বদি, করিগুম্বা বেঙ্ক অমনা লুপখিবা মতমদা, দিপোজিতরশিংনা মখোয়গী শেলশিং অদু নুমিৎ ৯০গী মনুংদা ফংগনি হায়বনি”, হায়না মহাক্না হায়খি।
প্রধান মন্ত্রীনা বেঙ্কশিংনা লৈবাক্কী য়াইফ-নুংঙাইবদা অচৌবা থৌদাং য়াই হায়না ফোংদোকখি। বেঙ্কশিং য়াইফনবগীদমক্তা, দিপোজিতরশিংগী শেলশিং তেক্ত কায়দনা থম্বগী চপ মান্নবা তঙাই ফদবা লৈ। ঐখোয়না বেঙ্কশিং কনবা পাম্লবদি, দিপোজিতরশিংবু ঙাক শেন্দুনা থমগদবনি।
অপীকপা পব্লিক সেক্তর বেঙ্কশিংনা চহি কয়া অসিদা অচৌবা বেঙ্কশিংগা পুন্সিন্নবা মতমদা মখোয়গী মপাঙ্গল, মতিক অমসুং নুং-পান ফাওনা উবগী মগুন অসি হীরম খুদিংমক্তা ফগৎপা হেল্লি হায়না প্রধান মন্ত্রীনা ফোংদোকখি। আর.বি.আই.না কো-ওপরেতিব বেঙ্কশিং য়েংশিনবা মতমদা বেঙ্কশিং অসিদা মীচম দিপোজিতরশিংনা থাজবা থম্বা হেনগৎলি হায়না মহাক্না ফোংদোকখি।
শিংনবশিং অসি বেক একাউন্ত খক্তগী নত্তে, খ্বাইদগী মনুং হঞ্জিনবা মফমশিংদা বেঙ্ককী সেবা য়ৌহনবা অসিসু অমা ওই হায়না প্রধান মন্ত্রীনা ফোংদোকখি। বেঙ্ক ব্রাঞ্চ অমগী খুদোংচাবা নত্ত্রগা বেঙ্ককা পাউ ফাওনবগী খুদোংচাবা অসি ঙসিদি লৈবাক্কী খুঙ্গং অয়াম্বা খুদিংগী কিলোমীতর ৫গী অরাপ্পগী মনুংদা লৈরে অমসুং ফংলে। ভারতকী মীচম নাগ্রিক অমনা মফম-মতম অমা হেক্তদগী নোংমগী পুং ২৪গী মনুংদা দিজিতেলগী খুত্থাংদা খ্বাইদগী পীকপা ত্রাঞ্জেক্সন ফাওবা পাংথোকপা ঙম্লে হায়না মহাক্না মখা তাখি। চহি ১০০গী মনুংদা থোকপা খ্বাইদগী চাউবা অৱাবা মতমদা ভারতকী বেঙ্ককী পথাপ্পু নীংথিজনা অমসুং অয়েৎপা লৈতনা মথৌ তৌহনবা ঙম্বদা তেংবাংবা অসিগুম্বা শেমদোকপগী থৌওং কয়া লৈরে হায়না প্রধান মন্ত্রীনা ফোংদোকখি। “মালেমগী চাউখৎলবা লৈবাক ফাওবনা মখোয়গী মীয়ামদা তেংবাংবদা লুনা থোকপা মতমদা, ভারতনা লৈবাক্কী কাঙলুপ খুদিংগী মীওইশিংদা হকথেংননা য়াম্না থুনা তেংবাংখি”, হায়না মহাক্না মখা তাখি।
হৌখিবা চহি খরদা পায়খৎখিবা খোঙথাংশিংনা ইন্স্যুরেন্স, বেঙ্ক লোন অমসুং শেল-থুমগী ওইনা মপাঙ্গল হাপ্পগী থৌওংগুম্বা খুদোংচাবা কয়াবু লাইরবা, নুপী, লম্বীদা দুকান ফম্বা অমসুং অপীকপা লৌমীগুম্বা অসিগুম্বা কান্নবা ফংবগী হান্না মতিক চারমদবা মীওই কয়াদা য়ৌহনবা ঙম্লে হায়না প্রধান মন্ত্রীনা ফোংদোকখি। মমাংগী মতমদদি, বেঙ্কিং অসি লৈবাক্কী নুপীশিংদা পাম্বৈ অমত্তদা ফংলমদবনি। থৌওং অসিদা মহাক্কী সরকারনা খ্বাইদগী অহানবা মিৎয়েং চঙখি হায়না ফোংদোকখি। জন ধন য়োজনাগী মখাদা হাংদোক্লিবা বেঙ্ক একাউন্ত করোর কয়াগী মনুংদগী তংখায় হেনবদি নুপীশিংগীনি। “মসিগী বেঙ্ক একাউন্তশিং অসিনা নুপীশিংবু শেন্মিৎলোনগী হীরমদা মপাঙ্গল হাপ্পগী থৌওংদা শাফু পীবগী মতৌ অসি ঐখোয়না হন্দক পাংথোকখিবা নেস্নেল ফেমিলী হেল্থ সর্ভেদা উবা ফংলে”, হায়না মহাক্না হায়খি।
দিপোজিৎ ইন্স্যুরেন্সনা শেল তুংশিনবা, লেঙদবা, করেন্ত, রিকরিং দিপোজিৎনচিংবা শেল হাপচিনবা হীরম খুদিংমক কোনগনি। রাজ্য/য়ুনিয়ন তেরিতোরীশিংদা মথৌ তৌরিবা রাজ্য, কেন্দ্র অমসুং প্রাইমরী কো-ওপরেতিব বেঙ্ক বেঙ্কশিংদা শেল হাপচিনবশিংসু মসিগী মুংদা কোনগনি। মশক থোকপা অহোংবা পুরক্কদবা শেমদোকপগী থৌওং অসিদা বেঙ্ক দিপোজিৎ ইন্স্যুরেন্স অসি লুপা লাখ ১দগী লুপা ৫দা হেনগৎখ্রে।
বেঙ্ক অমদা বেঙ্কতা শেল হাপচিনবা মীওই অমগী লুপা লাখ ৫গী দিপোজিৎ ইন্স্যুরেন্স কভরেজ লৈদুনা, মমাংগী শেনবা চহি লোইরকপদা নীংথিনা ঙাক-শেল্লবা একাউন্ত মশিংনা বেঙ্ককী অপুনবা একাউন্ত মশিংদগী মালেমগী বেঞ্চমার্ক ওইরিবা ৮০%গা চাংদম্নবদা ৯৮.১% ওইখি।
ইন্তেরিম পেমেন্তকী অহানবা শরুক অসি দিপোজিৎ ইন্স্যুরেন্স অমসুং ক্রেদিৎ গেরেন্তী কোর্পোরেসন্না আর.বি.আই.না অথিংবা থম্লিবা অর্বান কো-ওপরেতিব বেঙ্ক ১৬কী দিপীজিতরশিংদগী লাকপা ক্লেমগী মতুং ইন্না হন্দক্তা থাদোকখ্রে। লুপা লাখ ১গী মথক্তা শেল হাপচিনবা মীওইশিংগী ক্লেমগী মতুং ইন্না মখোয়গী অতোপ্পা বেঙ্ক একাউন্ততা লুপা করোর ১৩০০ হেনবা শেনফমশিং থাদোকখ্রে।
***
(Release ID: 1780686)
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam