এক্সিলেন্সীশিং,

খুরুমজরি

মীফম অসিদা মালেমগী খ্বাইদগী চাউবা প্রজাতন্ত্রবু মশক তাকপা ফংজবা অসিদা ঐহাক্না চাউথোকচবা পোকই। প্রজাতন্ত্রগী ওইবা ৱাখল্লোন অসি ঐখোয়গী সভ্যতাগী চৎনবীগী মরু ওইবা শরুক অমনি। লিচ্ছবি অমসুং শাক্য অসিগুম্বা মীহুৎ খন্দুনা রিপব্লিক ওইনা শহর-রাজ্যশিং ভারত্তা চহু ২৫০০গী মমাংদগী লৈরম্মি। চপ মান্নবা প্রজাতন্ত্রগী ওইবা ৱাখল্লোন অসি ১০শুবা চহিচাগী “উত্তরামেরুর” ইনস্ক্রিপসনদা উবা ফংখি, মসিদা প্রজাতন্ত্রদা শরুক য়ান্নবগী প্রিন্সিপলশিং অদু ইদুনা থম্লমখি। মসিগী প্রজাতন্ত্রগী ৱাখল্লোন অমসুং চৎনবী অসিনা অরিবা মতমগী ভারতবু খ্বাইদগী নুংঙাই য়াইফবশিংগী মরক্তা অমা ওইহনলমখি। চহিচা কয়া লোইলম লৈঙাক্কী মখাদা লৈরবসু ভারত মীয়ামগী প্রজাতন্ত্রগী ৱাখল্লোন অদুদি খক নমথবা ঙমখিদে। মসি ভারতকী নীংখা তম্লবা মতমদা অমুক নীংথিনা মশক উৎলকখি অমসুং হৌখিবা চহি ৭৫ অসিদা প্রজাতন্ত্র চৎপা লৈবাক অমা শেমগৎপা ঙম্বগী তোপ-তোপ্পা ৱারী অমা ওইহনখি।

মসি হীরম পুম্নমক্তা অমুক্তা থোকখিদ্রিবা মওংদা সোসিও-ইকনোমিক ইনক্লুজন পুরকপগী ৱারী অমনি মসি হকশেল, মহৈ-মশিং অমসুং মীওইবগী য়াইফনবা ৱাখলনা লাম্বা ফংদবা চাং অমদা লেপ্তনা ফগৎহল্লকপগী ৱারী অমনি। ভারতকী ৱারী অসিনা মালেমদা ময়েক শেংবা পাউজেল অমা পীরি। মদুদি প্রজাতন্ত্রনা অনীংবা থুংহনবা ঙম্মি, মদুদি প্রজাতন্ত্রনা অনীংবা থুংহনখি, অমসুং মদুদি প্রজাতন্ত্রনা মখা তানা অনীংবা থুংহনখিগনি।

এক্সিলেন্সীশিং,

দল কয়াগী মীখলশিং, মনীং তম্বা জুদিসিয়রী, অমসুং অপনবা পীদবা মীদিয়া অসিগুম্বা স্ত্রকচরেলগী ওইবা ফীচরশিং – অসি প্রজাতন্ত্রগী মরু ওইবা খুৎলাইশিংনি। অদুম ওইনমক প্রজাতন্ত্রগী মপুং ওইবা মপাঙ্গল অদুদি ঐখোয়গী প্রজাশিং অমসুং ঐখোয়গী খুন্নাইশিংদা লৈজরিবা ৱাখল্লোন অমসুং চৎনবী অসিদা য়াওরি। প্রজাতন্ত্র হায়বা অসি মীয়ামগী, মীয়াম্না খনবা, মীয়ামগী য়াইফনবা হায়বা খক্তা নত্তা মসিদা মীয়ামগা লোয়ননা, মীয়ামগী মরক্তা হায়বা অসিসু ওইরি।

এক্সিলেন্সীশিং,

মালেমদা লৈরিবা তোঙান-তোঙানবা শরুকশিংনা প্রজাতন্ত্রগী ওইবা চাউখৎ-থৌরাংগী তোঙান-তোঙানবা লম্বেলশিংদা চৎলি। অমনা অমদগী ঐখোয়না তমশিনবা য়াবা কয়া অমা লৈ। ঐখোয়গী প্রজাতন্ত্রগী চৎনবা অমসুং সিস্তেম অসিদা লেপ্তনা ফগৎহনবা ঐখোয় পুম্নমক্না মথৌ তাই। অমসুং, ঐখোয়না ইনক্লুজন, ত্রান্সপরেন্সী হ্যুমেন দিগ্নিতী, রেস্পোন্সিব গ্রিভান্স রিদ্রেসেল অমসুং শক্তি দিসেন্ত্রেলাইজেসন তৌবা অমসি মখা তানা ফগৎহনবা মথৌ তাই।

হীরম অসিদা ঙসিগী মীতিন অসিনা প্রজাতন্ত্র চৎপা লৈবাকশিংগী মরক্তা মখা তানা কোওপরেসন পীনবা হেনগৎহন্নবা মতাং চারবা ফম্পাক অমা পীরি। ভারতনা ফ্রী এন্দ ফিয়র ওইবা মীখলশিং পাঙথোকপগী খঙহৈবা অমসুং ইন্নোভেতিব ওইবা দিজিতেল সোল্যুসনশিংগী খুত্থাংদা লৈঙাক্কী লম পুম্নমক্তা ত্রান্সপরেন্সী হেনগৎনবগী মতাংদা সিয়র তৌজবদা নুংঙাইবা পোকই। ঐখোয়না সোসিএল মীদিয়া অমসুং ক্রিপ্তো-করেন্সীশিং অসিগুম্বা অনৌবা তেক্নোলোজীশিং অসি প্রকাতন্ত্র নমথবগী মহুৎ মসিদা শক্তি পীবদা শীজিন্নবা য়ান্নবা অমত্তা ওইনা মালেমগী ওইবা কাংলোনশিং শেম্বা মথৌসু তাই।

এক্সিলেন্সীশিং,

পুন্না থবক তৌমিন্নদুনা প্রজাতন্ত্র চৎপা লৈবাকশিংনা ঐখোয়গী প্রজাশিংগী অনীংবা অপাম্বশিং থুংহনবা অমসুং মীওইবা খুন্নাইগী লৈরিবা প্রজাতন্ত্রগী ৱাখল্লোন অসি পালন তৌবা ঙমগনি। অফবা খোঙথাং অসিদা প্রজাতন্ত্র চৎপা লৈবাকশিংদা য়াওশিন্নবা ভারতনা শেম শাদুনা লৈজরি।

থাগৎচরি। হন্না-হন্না থাগৎচরি!

****