কেন্দ্ৰীয় গৃহ পৰিক্ৰমা মন্ত্ৰী আৰু সহযোগিতা মন্ত্ৰী শ্ৰী অমিত শ্বাহে কাইলৈ ভিডিঅ’ কনফাৰেন্সিঙৰ জৰিয়তে মণিপুৰৰ মুখ্যমন্ত্ৰী শ্ৰী নংথমবাম বিৰেন সিং, কেন্দ্ৰীয় জনজাতি পৰিক্ৰমা মন্ত্ৰী শ্ৰী অৰ্জুন মুণ্ডা আৰু আন-আন বিশিষ্ট ব্যক্তিসকলৰ উপস্থিতিত ইম্ফল পূবৰ চিটি কনভেনশ্যন চেণ্টাৰত তামেংলং জিলাৰ লুৱাংকাও গাঁৱত ৰাণী গাইডিনলিউ জনজাতীয় স্বাধীনতা সংগ্ৰামী সংগ্ৰহালয় স্থাপনৰ বাবে আধাৰশিলা স্থাপন কৰিব।

ভাৰত চৰকাৰৰ জনজাতি পৰিক্ৰমা মন্ত্ৰালয়ে আনুমানিক ১৫ কোটি টকা ব্যয় সাপেক্ষে এই প্ৰকল্পটোত অনুমোদন জনাইছে। ৰাজ্যিক কেবিনেটে প্ৰখ্যাত স্বাধীনতা সংগ্ৰামী ৰাণী গাইডিনলিউৰ জন্মস্থান তামেংলং জিলাৰ লুৱাংকাও গাঁৱত সংগ্ৰহালয়টো স্থাপন আৰু সংগ্ৰহালয়টোৰ নাম ৰাণী গাইডিনলিউ জনজাতীয় স্বাধীনতা সংগ্ৰামী সংগ্ৰহালয় হিচাপে নামকৰণৰ সিদ্ধান্ত গ্ৰহণ কৰিছিল। জনজাতীয় পৰিক্ৰমা মন্ত্ৰালয়ে ১৫ নৱেম্বৰৰপৰা প্ৰধানমন্ত্ৰী শ্ৰী নৰেন্দ্ৰ মোদীয়ে জনজাতীয় গৌৰৱ দিৱস হিচাপে শুভাৰম্ভ কৰা ইয়াৰ আজাদী কা অমৃত মহোৎসৱ সপ্তাহ উদযাপন কৰি আছে।

ৰাণী গাইডিনলিউৰ জন্ম হৈছিল ১৯১৫ ৰ ২৬ জানুৱাৰীত লুৱাংকাও গাঁৱত যি এতিয়া মণিপুৰ ৰাজ্যৰ তামেংলং জিলাৰ অন্তৰ্গত তাওচেম মহকুমাত অৱস্থিত। ১৩ বছৰ বয়সতে তেওঁ জাদোনাঙৰ সংস্পৰ্শলৈ আহে আৰু তেওঁৰ সামাজিক, ধৰ্মীয় আৰু ৰাজনৈতিক আন্দোলনত তেওঁৰ সহযোগী হৈ পৰে। আনুমানিক ১৯২৬ বা ১৯২৭ ত জাদোনাঙৰ সৈতে চাৰি বছৰীয়া ঘনিষ্ঠতাই তেওঁক ব্ৰিটিছৰ বিৰুদ্ধে যুঁজাৰু হ'বলৈ উদ্বুদ্ধ কৰিছিল। জাদোনাঙক মৃত্যুদণ্ডৰ পিছত গাইডিনলিউৱে আন্দোলনটোৰ নেতৃত্ব গ্ৰহণ কৰে। জাদোনাঙৰ শ্বহীদবৰণৰ পিছত গাইডিনলিউৱে ব্ৰিটিছৰ বিৰুদ্ধে তীব্ৰতৰ বিদ্ৰোহ আৰম্ভ কৰে যাৰ বাবে তেওঁক ব্ৰিটিছে ১৪ বছৰৰ কাৰাদণ্ড বিহে আৰু অৱশেষত ১৯৪৭ ত মুক্তি লাভ কৰিছিল।

ব্ৰিটিছৰ বিৰুদ্ধে সংগ্ৰামত গ্ৰহণ কৰা ভূমিকাক স্বীকৃতি প্ৰদানেৰে জনসাধাৰণে তেওঁক "ৰাণী" বুলি মাতিবলৈ আৰম্ভ কৰিছিল। ভাৰতে স্বাধীনতা লাভৰ পিছত তেওঁক তুৰা কাৰাগাৰৰপৰা মুকলি কৰা হৈছিল। ৰাণী গাইডিনলিউৰ ১৯৯৩ ৰ ১৭ ফেব্ৰুৱাৰীত জন্মস্থান লুৱাংকাওত দেহাৱসান ঘটে।

তেওঁক ১৯৭২ ত তাম্ৰপত্ৰ, ১৯৮২ ত পদ্মভূষণ, ১৯৮৩ ত বিবেকানন্দ সেৱা সন্মান, ১৯৯১ ত স্ত্ৰী শক্তি পুৰস্কাৰ আৰু ১৯৯৬ ত মৰণোত্তৰভাৱে ভগৱান বিৰছা মুণ্ডা পুৰস্কাৰ প্ৰদান কৰা হৈছিল। ভাৰত চৰকাৰে ১৯৯৬ ত ৰাণী গাইডিনলিউৰ এটি স্মাৰক ডাকটিকট জাৰি কৰিছিল। ২০১৫ ত তেওঁৰ জন্ম শতবাৰ্ষিকী উদযাপন অনুষ্ঠান উপলক্ষে ভাৰতৰ প্ৰধানমন্ত্ৰীয়ে এশটকীয়া মুদ্ৰা আৰু পাঁচ টকীয়া প্ৰচলন মুদ্ৰা মুকলি কৰে। ভাৰতীয় উপকূলৰক্ষী বাহিনীয়ে ২০১৬ ৰ ১৯ অক্টোবৰত "আইচিজিএছ ৰাণী গাইডিনলিউ" নামৰ এখনি ফাষ্ট পেট্ৰ'ল জাহাজৰ চলাচল আৰম্ভ কৰিছিল।

মণিপুৰৰ পৰ্যটন ক্ষেত্ৰত যথেষ্ট সম্ভাৱনা আছে আৰু এই প্ৰকল্পই পৰ্যটনৰ অধিক বিকাশৰে ৰাজ্যখনৰ আৰ্থ-সামাজিক উন্নয়ন ত্বৰান্বিত কৰিব।

***

NB/UD/SB