صدر جمہوریہ ہند جناب رام ناتھ کووند نے آج وگیان بھون، نئی دہلی میں رہائش اور شہری امور کی وزارت (MoHUA) کی طرف سے سوچھ بھارت مشن-اربن 2.0 کے حصے کے طور پر منعقد ’سوچھ امرت مہوتسو‘ میں ہندوستان کے صاف ستھرے شہروں کے ایوارڈ یافتگان کو مبارکباد پیش کی۔ ایوارڈ کی تقریب، جو سوچھ بھارت مشن (شہری) کے مختلف اقدامات کے تحت قصبوں/شہروں، ریاستوں اور مرکز زیر انتظام علاقوں کے ذریعے صفائی کے لیے کیے گئے اچھے کاموں کو تسلیم کرنے کے لیے منعقد کی گئی تھی – یعنی، سوچھ سرویکشن 2021، صفائی متر سرکشا چیلنج، اور شہروں کے لیے کوڑے سے پاک ستارہ درجہ بندی کے لیے سرٹیفیکیشنز – اس میں دن بھر مختلف زمروں کے تحت 300 سے زیادہ ایوارڈ دیے گئے۔

مسلسل پانچویں سال اندور کو سوچھ سرویکشن کے تحت ہندوستان کے سب سے صاف ستھرے شہر کا خطاب دیا گیا، جب کہ سورت اور وجے واڑہ ’1 لاکھ سے زیادہ آبادی‘ کے زمرے میں بالترتیب دوسرے اور تیسرے نمبر پر رہے۔ ’1 لاکھ سے کم‘ کی آبادی کے زمرے میں، ویٹا، لونا والا اور ساسواد نے، جو سبھی مہاراشٹر سے ہیں، بالترتیب پہلا، دوسرا اور تیسرا مقام حاصل کیا۔ وارانسی ’بہترین گنگا ٹاؤن‘ کے طور پر ابھرا جبکہ احمد آباد چھاؤنی نے ’انڈیا کی صاف ستھری چھاؤنی‘ کا خطاب جیتا، اس کے بعد میرٹھ چھاؤنی اور دہلی چھاؤنی کا نمبر آتا ہے۔

ریاستی ایوارڈز میں، چھتیس گڑھ، مسلسل تیسرے سال ”100 سے زیادہ شہری مقامی اداروں“ کے زمرے میں ’صاف ستھری ریاست‘ کے طور پر ابھرا ہے جبکہ جھارکھنڈ نے دوسری بار ”100 سے کم“ میں سب سے صاف ریاست کا ایوارڈ جیتا ہے۔

تقریب سے خطاب کرتے ہوئے صدر جمہوریہ نے کہا کہ اس سال سوچھ سرویکشن ایوارڈز کی خاص اہمیت ہے کیونکہ ہم ’آزادی کا امرت مہوتسو‘ منا رہے ہیں۔ انھوں نے کہا کہ کووڈ کی وبا کے دوران بھی صفائی دوست اور صفائی کارکنوں نے مسلسل اپنی خدمات پیش کی ہیں۔ انھوں نے کہا کہ حکومت اس بات کو یقینی بنانے کے لیے پرعزم ہے کہ صفائی ستھرائی کے غیر محفوظ طریقوں کی وجہ سے کسی بھی صفائی کارکن کی زندگی خطرے میں نہ پڑے۔ صدر مملکت نے کہا کہ شہروں کو صاف ستھرا رکھنے کے لیے سالڈ ویسٹ کا مؤثر انتظام ضروری ہے۔ انھوں نے زور دیا کہ ماحولیات کا تحفظ ہندوستان کے روایتی طرز زندگی کا ایک لازمی حصہ رہا ہے۔ آج پوری دنیا ماحولیاتی تحفظ پر زور دے رہی ہے جس میں وسائل کو کم کرنے، دوبارہ استعمال کرنے اور ری سائیکل کرنے پر توجہ دی جا رہی ہے۔

رہائش اور شہری امور کے مرکزی وزیر جناب ہردیپ سنگھ پوری نے اس موقع پر بات کرتے ہوئے کہا کہ SBM-U کے تحت حاصل کردہ کامیابیاں بے مثال اجتماعی کوششوں کا نتیجہ ہیں۔ انھوں نے کہا کہ آج اس مشن نے ایک عوامی تحریک کی شکل اختیار کر لی ہے – ایک حقیقی ’جن آندولن‘۔ یہ سوچھ سرویکشن کی بڑے پیمانے پر ترقی سے بھی ظاہر ہوتا ہے جو 2016 میں پائلٹ پروگرام کے طور پر 73 شہروں میں شروع ہوا تھا، اور آج دنیا کا سب سے بڑا شہری صفائی سروے ہے۔ انھوں نے کہا کہ اگلے چند سال ہمہ گیر صفائی پر توجہ مرکوز کرنے کے لیے وقف ہوں گے۔

جناب ہردیپ سنگھ پوری اور جناب کوشل کشور، رہائش اور شہری امور کے وزیر مملکت نے چھتیس گڑھ اور سکم کے وزرائے اعلیٰ اور جزائر انڈمان اور نکوبار کے لیفٹیننٹ گورنر سمیت دیگر معززین کی موجودگی میں ایوارڈ یافتہ شہروں اور ریاستوں کو مبارکباد دی۔

سالوں کے دوران، سوچھ سرویکشن (SS) شہری منظر نامے کو تبدیل کرنے کے لیے ایک مؤثر ذریعہ کے طور پر ابھرا ہے۔ کووڈ-19 کی طرف سے درپیش زمینی چیلنجوں کے باوجود، 2,000 سے زیادہ تشخیص کاروں کی ایک ٹیم نے 28 دنوں کے ریکارڈ وقت میں 65,000 سے زیادہ وارڈوں کا دورہ کیا۔ مہاراشٹر نے کامیابی کے ساتھ کل 92 ایوارڈ حاصل کیے ہیں، جو اس سال کے سرویکشن میں کسی بھی ریاست کے لیے سب سے زیادہ ہے، اس کے بعد چھتیس گڑھ نے 67 ایوارڈ حاصل کیے ہیں۔ اس کے علاوہ، سوچھ سرویکشن 2021 کے تحت متعارف کرائے گئے ایک نئے کارکردگی زمرے میں، پانچ شہروں - اندور، سورت، نوی ممبئی، نئی دہلی میونسپل کونسل اور تروپتی کو ’دویا‘ (پلاٹینم) کے طور پر درجہ بند کیا گیا۔

آج کے پروگرام کا دوسرا سیشن صفائی متروں کے لیے وقف تھا۔ اس سیشن میں پہلی مرتبہ صفائی متر سرکشا چیلنج کے تحت سرفہرست تعمیل کنندگان کو تسلیم کیا گیا جس میں اندور، نوی ممبئی، نیلور اور دیوس نے نمایاں اعزاز حاصل کیا۔ پچھلے ایک سال میں، صفائی متر سرکشا چیلنج شہری ہندوستان میں ’مین ہول سے مشین ہول‘ انقلاب کو آگے بڑھانے میں کامیاب رہا ہے۔

ایس بی ایم-یو 2.0 کے تحت کوڑے سے پاک ہندوستان کے وژن کو کوڑے سے پاک شہروں کے اسٹار ریٹنگ پروٹوکول کے تحت 3-ستارہ اور 5-ستارہ درجہ بندی والے شہروں کے نتائج کا اعلان کرکے مزید تقویت ملی۔ کل 9 شہر - اندور، سورت، نئی دہلی میونسپل کونسل، نوی ممبئی، امبیکاپور، میسورو، نوئیڈا، وجے واڑہ اور پٹن- کو 5 اسٹار شہروں کے طور پر درجہ بند کیا گیا ہے جبکہ 143 شہروں کو 3 اسٹار کے طور پر درجہ بند کیا گیا ہے۔

جشن کے جذبے کو صدر جمہوریہ ہند کی طرف سے ”ہر دھڑکن سوچھ بھارت کی – سوچھ بھارت مشن-اربن 2.0“ کے عنوان سے ایک گیت کی ریلیز کے ذریعے مزید تقویت ملی۔ یہ گانا سوچھتا تحریک کی روح کی عکاسی کرتا ہے اور سوچھتا سفر میں تمام شہریوں، خاص کر بچوں، نوجوانوں اور بزرگ شہریوں کے عزم کو سلام پیش کرتا ہے۔ گانے کا لنک یہ ہے:

https://www.youtube.com/watch?v=CY_ejy6ifwE

سوچھ بھارت مشن-اربن 2.0، جو 1 اکتوبر 2021 کو شروع کیا گیا تھا، سب کے لیے صفائی کی سہولیات تک مکمل رسائی کو یقینی بنانے پر توجہ مرکوز کرے گا۔ ٹیکنالوجی نے گزشتہ سات سالوں میں SBM-U کے سفر کے تحت نتائج حاصل کرنے میں اہم کردار ادا کیا ہے۔ اس ڈجیٹل سفر میں ایک بڑی چھلانگ لگاتے ہوئے، وزارت نے نئے سرے سے تیار کردہ سوچھ بھارت مشن-اربن 2.0 ویب سائٹ اور مربوط MIS پورٹل ’سوچھاتم‘ کا آغاز کیا ہے۔

اس طرح ، سوچھ امرت مہوتسو سوچھ بھارت مشن-اربن کے پچھلے سات سالوں میں شہروں کی کامیابیوں کا جشن اور شہروں اور شہریوں کی طرف سے سوچھ بھارت مشن-اربن 2.0 کے ذریعے سوچھتا کے اگلے مرحلے میں نئے جوش کے ساتھ آگے بڑھنے کا عہد تھا۔

تفصیلی نتائج، رپورٹس اور ریلیز سوچھ بھارت مشن –اربن پر دستیاب ہیں: https://www.ss2021.in/#/home

تقریب کی ویب کاسٹ سوچھ بھارت اربن یوٹیوب چینل پر دستیاب ہے۔

                                               **************

ش ح۔ ف ش ع- ف ک   

U: 13071