కేంద్ర ఓడరేవులు, షిప్పింగ్ & జలమార్గాల మంత్రి శ్రీ సర్బానంద సోనోవాల్ ఈరోజు మేజర్ పోర్ట్‌లలో పిపిపి ప్రాజెక్ట్‌ల కోసం సవరించిన మోడల్ కన్సెషన్ అగ్రిమెంట్ (ఎంసిఏ) - 2021ని ప్రకటించారు. కొత్త ఎంసీఏ మేజర్ పోర్టుల్లో భవిష్యత్తులో చేపట్టే అన్ని పీపీపీ ప్రాజెక్టులకు, అలాగే ప్రభుత్వం ఇప్పటికే ఆమోదించిన ప్రాజెక్టులకు ఇంకా బిడ్డింగ్ దశలోనే వర్తిస్తుందని ఆయన ఒక ప్రకటనలో తెలిపారు. ప్రస్తుతం వివిధ దశల్లో రూ.56,000 కోట్ల పెట్టుబడితో 80కి పైగా పిపిపి ప్రాజెక్టులు ఉన్నాయని ఆయన తెలియజేశారు. వీటిలో రూ.40,000 కోట్లతో 53 ప్రాజెక్టులు అమలులో ఉండగా, రూ.16,000 కోట్లకు పైగా ఉన్న 27 ప్రాజెక్టులు అమలు దశలో ఉన్నాయి.

అన్ని రంగాల నుండి ఉత్తమ పద్ధతులు మరియు విస్తృతమైన వాటాదారుల సంప్రదింపుల ద్వారా తీసుకోబడిన అనేక మార్పులతో మోడల్ కన్సెషన్ అగ్రిమెంట్ - 2021 (ఎంసిఏ), డెవలపర్‌లు, పెట్టుబడిదారులు మరియు రుణదాతలు మరియు ఓడరేవుల రంగంలోని ఇతర వాటాదారులకు మరింత విశ్వాసాన్ని తెస్తుందని మరియు ఉత్ప్రేరకంగా ఉంటుందని మంత్రి తెలియజేశారు. 2025 ఆర్ధిక సంవత్సరం వరకూ రూ.14,600 కోట్ల కంటే ఎక్కువ 31 ప్రాజెక్టుల పైప్‌లైన్‌ను పిపిపిపై అందజేయాలని పోర్ట్‌లు, షిప్పింగ్ మరియు జలమార్గాల మంత్రిత్వ శాఖ స్పష్టంగా నిర్వచించింది మరియు కొత్త ఎంసిఏ - 2021 వాటాదారుల నుండి ఉత్సాహభరితమైన ప్రతిస్పందనను పొందగలదని ఆశిస్తున్నారు.

మోడల్ కన్సెషన్ అగ్రిమెంట్ (ఎంసిఏ) - 2021లో చేసిన కీలక మార్పుల గురించి మాట్లాడుతూ "చట్టంలో మార్పు లేదా ఊహించని సంఘటనల కారణంగా కార్గోలో మార్పును అందించడం మొదటిసారిగా ప్రవేశపెట్టబడిందని" శ్రీ సోనోవాల్ తెలియజేశారు. గతంలో కూడా బయటి మరియు ఊహించని కారణాల వల్ల, రాయితీ కాలంలో నిర్దిష్ట వస్తువుకు ట్రాఫిక్ తగ్గిందని, తద్వారా టెర్మినల్ యొక్క మొత్తం సాధ్యతపై ప్రభావం పడిందని ఆయన అన్నారు. రాయితీదారుకు వేరే కార్గోను నిర్వహించగల సౌలభ్యం లేదు మరియు నిర్మించిన ఆస్తి సరైన రీతిలో ఉపయోగించబడని పరిస్థితిలో కార్గోలో మార్పును చేపట్టేందుకు ఈ నిబంధన వెసులుబాటును ఇస్తుంది మరియు రాయితీదారుకు ప్రమాదాన్ని తగ్గిస్తుంది అని తెలిపారు.

కొత్త ఎంసిఏ ప్రకారం, మేజర్ పోర్ట్స్‌లోని ప్రైవేట్ టెర్మినల్స్‌కు కార్గో కోసం ప్రైవేట్ పోర్ట్‌లతో పోటీ పడేందుకు వీలు కల్పించే మార్కెట్ పరిస్థితుల ఆధారంగా రాయితీదారులకు వారి సుంకాన్ని నిర్ణయించడానికి సౌలభ్యాన్ని అందించడానికి సదుపాయం కల్పించబడిందని శ్రీ సోనోవాల్ వివరించారు. ఇంకా, రుణదాతలకు ప్రమాదాన్ని తగ్గించడానికి మరియు ప్రాజెక్ట్‌ను మరింత బ్యాంకింగ్ చేయగలిగేలా చేయడానికి, కమర్షియల్ ఆపరేషన్స్ డేట్ (సిఓడి) కంటే ముందు కన్సెషనర్ యొక్క డిఫాల్ట్ ఈవెంట్‌కు పరిహారం అందించడం జోడించబడింది. పనితీరు మరియు పరస్పర ఒప్పందం ఆధారంగా రాయితీ వ్యవధిని పొడిగించే ప్రక్రియను రూపొందించే మరొక నిబంధన ప్రవేశపెట్టబడింది. శ్రీ సోనోవాల్ మాట్లాడుతూ " మొత్తంమీద, రిస్క్‌లను బ్యాలెన్స్ చేస్తూ పబ్లిక్ మరియు ప్రైవేట్ పార్టీ రెండింటి బాధ్యతల విషయంలో మరింత స్పష్టత అందించబడింది" అని తెలిపారు.

పోర్ట్ రంగంలో మొదటి పబ్లిక్ ప్రైవేట్ పార్టనర్‌షిప్ ( పిపిపి) ప్రాజెక్ట్ 1997లో జవహర్ లాల్ నెహ్రూ పోర్ట్ ట్రస్ట్ (జేఎన్‌పిటి) వద్ద ఒక టెర్మినల్ ప్రైవేట్ పార్టీకి ఇవ్వబడినప్పుడు ప్రారంభించబడింది. అప్పటి నుండి దేశంలోని పోర్ట్ సెక్టార్‌లో పిపిపి విధానంలో భారీ పురోగతి ఉంది. పోర్ట్స్ సెక్టార్‌లోని పిపిపి ప్రాజెక్ట్‌లను నియంత్రించే మోడల్ కన్సెషన్ అగ్రిమెంట్ (ఎంసిఏ) మొదటిసారిగా 2008లో ప్రవేశపెట్టబడింది. మరియు వాటాదారుల అభిప్రాయం ఆధారంగా 2018లో సవరించబడింది.

 

***