ঙসি অঙনবদা প্রধান মন্ত্রী শ্রী নরেন্দ্র মোদীনা ভর্চুয়েল্লী ওইনা অফগানিস্তানগী জি২০ এক্সত্রাওর্দিনরী সম্মিত্তা শারুক য়াখি৷ মীফম অসি হৌজিক হৌজিক জি২০ প্রসিদেন্সী পাইরিবা ইতালীনা কৌখি অমদি ইতালিয়ন প্রধান মন্ত্রী শ্রী মারিও দ্রঘিনা থৌবুরেল ওইখি৷ হ্যুমেনিতরিয়নগী ফিভমশিং; তেরোরিজমগা মরী লৈননা য়েংশিননিংঙাই ওইবশিং; অমসুং অফগানিস্তানদা লৈরিবা মীওইবগী হকশিংগা মরী লৈনবা ইসুশিং মীফম অসিদা খন্ন-নৈনখি৷

মহাক্কী ৱারোলশিংদা, অফগানিস্তানগী হৌজিক হৌজিক লৈরিবা ফিভম অসি য়েংশিন্নবা মীফম কৌখিবদা ইতালিয়ন জি২০ প্রসিদেন্সীগী ইনিসিয়েতিব অদুবু প্রধান মন্ত্রীনা তরাম্না ওকখি৷ ভারত অমসুং অফগানিস্তান প্রজাগী মরক্তা চহি চা কয়াদগী লৈরক্লিবা মরীশিং অদু মহাক্না পনখি৷ হৌখিবা চহি খুজিং অনি হেনবদা, অফগানিস্তানদা লৈরিবা নহা অমদি নুপীশিংগী কেপাসিতী শেমগৎনবা অমদি সোসিয়ো-ইকোনোমিক দিবেলপমেন্ত হেন্না পুরক্নবা ভারতনা হোৎনখ্রে হায়না প্রধান মন্ত্রীনা পনখি৷ দিবেলপমেন্ত প্রোজেক্ত ৫০০ হেন্না ভারতনা অফগানিস্তানদা চৎনহনখ্রে হায়না মহাক্না নিংশিংখি৷

অফগানগী প্রজানা ভারতপু মরুপ-মপাং ওইনা য়াম্না নুংশি হায়না প্রধান মন্ত্রীনা ফোংদোকখি৷ অফগানগী প্রজানা চাবা ফংদবগী অমদি মালন্যুত্রিসনগী অৱাবা চৈথেং মাইয়োক্নরিবা অৱাবা ভারত মচা খুদিংমক্নসু ফাওরি হায়না মহাক্না ফোংদোকখি৷ মালেমগী কম্ম্যুনিতীনা অফগানিস্তানদা অথুবা মতমদা মীওইবগী ওইবা মতেং লেপ্প-লৈতনা পাংবগী তঙাই ফদবা লৈরে হায়না মহাক্না ফোংদোকখি৷

রিজনেল্লী নত্রগা গ্লোবেল্লী ওইনা, অফগানগী তেরিতোরী অসি রেদিকেলাইজেসন অমসুং তেরোরিজমগী সোর্স অমা ওইহন্দনবগী তঙাই ফদবা লৈ হায়নসু প্রধান মন্ত্রীনা ফোংদোকখি৷ মফম অসিদা দ্রগশিং, খুৎশু-খুৎলাইশিং ললোল্লিবা, রেদিকেলাইজেসন অমসুং তেরোরিজমগী মাইয়োক্তা ঐখোয়না খুৎশম্নদুনা হেন্না পাঙ্গল লৈনা লান্থেংনবগী তঙাই ফদবা লৈ হায়না মহাক্না ফোংদোকখি৷

হৌখিবা চহি ২০গী সোসিয়ো-ইকোনোমিক গেনশিং অসি ঙাক-শেন্নবা অমসুং রেদিকেল আইদিওলোজী শন্দোকপা থিংনবগীদমক, প্রধান মন্ত্রীনা নুপীশিং অমদি মাইনোরিতীশিং য়াওনা অফগানিস্তানদা ইনক্লুসিব ওইবা শাসন অমা লৈহন্নবা হায়জখ্রে৷ অফগানিস্তানদা য়ুনাইতেদ নেসন্সকী য়াম্না মরু ওইবা থৌদাং অদুগীদমক মহাক্না সপোর্ত পীখি অমদি অফগানিস্তানদা য়ু.এন. সেক্যুরিতী কাউন্সিল রিজোলুসন ২৫৯৩দা য়াওরিবা মেসেজশিংগীদমক জি২০ সপোর্ত মখাতানা পীনবা হায়খ্রে৷ মালেমগী কম্ম্যুনিতীনা অমতা ওইনা পুনশিন্দুনা হোৎনদ্রবদি অফগানিস্তানগী ফিভমদা ঐখোয়না পাম্লিবা অহোংবা অদু পুরক্নবা হোৎনবদা অরুবা অমা ওইগনি হায়না প্রধান মন্ত্রীনা হায়খ্রে৷

*****