କରୋନା ମହାମାରୀ ସଂକ୍ରମଣ ଯୋଗୁଁ ଭାରତ ସରକାର ଗତବର୍ଷ ସବୁ ବିଦେଶୀଙ୍କୁ ଦିଆଯାଇଥିବା ‘ଭିସା’କୁ ଅସ୍ଥାୟୀଭାବେ ରଦ୍ଦ କରିଥିଲେ । ସେହିଭଳି ସଂକ୍ରମଣ ରୋକିବାକୁ ସରକାର ଆନ୍ତର୍ଜାତିକ ଯାତ୍ରା ଓ ଭ୍ରମଣ ଉପରେ ବିଭିନ୍ନ ପ୍ରକାର କଟକଣା ଲାଗୁ କରିଥିଲେ । ପରେ କରୋନା ସଂକ୍ରମଣର ପରିବର୍ତ୍ତିତ ସ୍ଥିତିକୁ ଦେଖି କେନ୍ଦ୍ର ସରକାର ପର୍ଯ୍ୟଟନ ବ୍ୟତୀତ ଅନ୍ୟ କାମ ପାଇଁ  ବିଦେଶୀଙ୍କୁ ଭାରତ ଆସିବାକୁ ଭିସା ପ୍ରଦାନ ନିୟମରେ କିଛି ପରିବର୍ତ୍ତନ କରିଥିଲେ । ନୂଆ ନୀତି ଅନୁସାରେ ନିଲମ୍ବିତ ଅଣପର୍ଯ୍ୟଟକ ଭିସାକୁ କୋହଳ କରାଯାଇଥିଲା । ସମ୍ପୃକ୍ତ ବିଦେଶୀ ନୂଆ ବ୍ୟବସ୍ଥାରେ ଭାରତ ଆସି ନିର୍ଦ୍ଧାରିତ ସମୟ ପାଇଁ ଭାରତରେ ରହିବା ସୁବିଧା ପାଇଥିଲେ।

ତେବେ ବିଭିନ୍ନ ରାଜ୍ୟ ସରକାର, ପର୍ଯ୍ୟଟନ ଉଦ୍ୟୋଗ ଓ ବିଭିନ୍ନ ସମ୍ପୃକ୍ତ ସଂସ୍ଥା ବିଦେଶୀ ପର୍ଯ୍ୟଟକମାନଙ୍କୁ ଟୁରିଷ୍ଟ ଭିସା ପ୍ରଦାନ କରିବାକୁ ସ୍ୱରାଷ୍ଟ୍ର ମନ୍ତ୍ରଣାଳୟର ଅନୁମତି ଲୋଡିଥିଲେ । ସେମାନଙ୍କ ଆବେଦନକୁ ବିଚାରକୁ ନେଇ ସ୍ୱରାଷ୍ଟ୍ର ମନ୍ତ୍ରଣାଳୟ ଏହି କଟକଣା କୋହଳ କରିବାକୁ ନିଷ୍ପତ୍ତି ନେଇଛି । ଏଥିପାଇଁ ସ୍ୱରାଷ୍ଟ୍ର ମନ୍ତ୍ରଣାଳୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ଏବଂ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ସହିତ ଆବଶ୍ୟକ ପରାମର୍ଶ କରି ଏହି ପଦକ୍ଷେପ ଗ୍ରହଣ କରିଛି ।

ନୂତନ ନିଷ୍ପତ୍ତି ଅନୁସାରେ ଚାଟର୍ଡ ଫ୍ଲାଇଟରରେ ଭାରତ ଆସିବାକୁ ଆଗ୍ରହୀ ବିଦେଶୀ ପର୍ଯ୍ୟଟକଙ୍କୁ ଚଳିତମାସ (ଅକ୍ଟୋବର) ୧୫ରୁ ସାନି ଭିସା ପ୍ରଦାନ କରାଯିବ । ଯେଉଁ ପର୍ଯ୍ୟଟକମାନେ ଅନ୍ୟ ବିମାନ ବା ମାଧ୍ୟମରେ ଆସିବେ ସେମାନଙ୍କୁ ନଭେମ୍ବର ୧୫ଠାରୁ ପ୍ରବେଶ ଅନୁମତି ମିଳିବ ଏବଂ ଏଥିପାଇଁ ମଧ୍ୟ ସ୍ୱରାଷ୍ଟ୍ର ମନ୍ତ୍ରଣାଳୟ ସାନି ପର୍ଯ୍ୟଟକ ଭିସା ପ୍ରଦାନ କରିବ । ସମ୍ପୃକ୍ତ ବିଦେଶୀ ପର୍ଯ୍ୟଟକ, ବିମାନ କର୍ମଚାରୀ ଓ ଅନ୍ୟାନ୍ୟ ସମ୍ପୃକ୍ତ ପକ୍ଷଙ୍କୁ ଭାରତରେ ପହଞ୍ଚିବା ସ୍ଥାନ ଓ ରହଣି ସ୍ଥାନରେ ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଜାରି କୋଭିଡ ନିୟମ ତଥା କଟକଣାକୁ ମାନିବାକୁ ହେବ ।

ଏହି ପଦକ୍ଷେପ ସହ ଭାରତରରେ ସମସ୍ତ ପ୍ରକାର ଆନ୍ତର୍ଜାତିକ ଯାତ୍ରୀଙ୍କ ପ୍ରବେଶ ଓ ରହଣି ସଂକ୍ରାନ୍ତ ନୀତିକୁ ଅଧିକ କୋହଳ କରାଯାଇଛି । କରୋନା ସଂକ୍ରମଣର ସ୍ଥିତିରେ ଆସିଥିବା ଉନ୍ନତିକୁ ବିଚାରକୁ ନେଇ ସରକାର ଏହି ପଦକ୍ଷେପ ଗ୍ରହଣ କରିଛନ୍ତି ।

****

TKM