ଏକ ଐତିହାସିକ ଘଟଣାକ୍ରମରେ ସ୍ୱାସ୍ଥ୍ୟ କ୍ଷେତ୍ରରେ ଅନ୍ତ୍ୟୋଦୟ ଆଣିବା ପାଇଁ ଦେଶର ପ୍ରତ୍ୟେକ ବ୍ୟକ୍ତିଙ୍କ ନିକଟରେ ସ୍ୱାସ୍ଥ୍ୟସେବା ପହଂଚାଇବାର ଅଙ୍ଗୀକାରବଦ୍ଧତାକୁ ଦୃଷ୍ଟିରେ ରଖି କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଶ୍ରୀ ମନସୁଖ ମାଣ୍ଡଭିୟ ଉତ୍ତର ପୂର୍ବାଞ୍ଚଳ(ଆଇ-ଡ୍ରୋନ) ଆଇସିଏମଆର ଡ୍ରୋନ ଯୋଗେ ଯୋଗାଣ ବ୍ୟବସ୍ଥାର ଶୁଭାରମ୍ଭ କରିଛନ୍ତି । ଏହା ଦ୍ୱାରା ପ୍ରତ୍ୟେକଙ୍କ ନିକଟରେ ଜୀବନ ରକ୍ଷାକାରୀ ଔଷଧ ପହଞ୍ଚାଯାଇପାରିବ ।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟି ସମ୍ପନ୍ନ ନେତୃତ୍ୱକୁ ଧନ୍ୟବାଦ ଦେଇ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଶ୍ରୀ ମାଣ୍ଡଭିୟ କହିଛନ୍ତି ଯେ “ତାଙ୍କର ନେତୃତ୍ୱ ଯୋଗୁ ଦେଶ ଦ୍ରୁତଗତିରେ ଉନ୍ନତି କରି ଚାଲିଛି । ଆଜି ଏକ ଐତିହାସିକ ଦିବସ ଯାହା ବୈଷୟିକ ଜ୍ଞାନ କିପରି ଜୀବନର ଗତିପଥ ସୁଗମ କରିବା  ସହ ସାମାଜିକ ପରିବର୍ତ୍ତନ ଆଣିପାରେ ତାହା ଦର୍ଶାଉଛି ।

ଦେଶବାସୀଙ୍କୁ ଅଭିନନ୍ଦନ ଜଣାଇ ଶ୍ରୀ ମନସୁଖ ମାଣ୍ଡଭିୟ କହିଛନ୍ତି ଯେ “ପ୍ରଥମ ଥର ପାଇଁ ଦକ୍ଷିଣ ଏସିଆରେ ମେକ ଇନ୍ ଇଣ୍ଡିଆ ଡ୍ରୋନର ବ୍ୟବହାର କୋଭିଡ ଟିକା ପରିବହନ ପାଇଁ କରାଯାଇଛି । ମଣିପୁରର ବିଷ୍ଣୁପୁର ଜିଲ୍ଲା ହସପିଟାଲରୁ ଆକାଶମାର୍ଗରେ ୧୫କିଲୋମିଟର ଦୂରତା ଅତିକ୍ରମ କରି ୧୨ରୁ ୧୫ ମିନିଟ୍ ମଧ୍ୟରେ କରାଙ୍ଗ ଦୀପରେ କୋଭିଡ ଟୀକା ପହଞ୍ଚାଇପାରିଛି । ଏହା ଜନସ୍ୱାସ୍ଥ୍ୟ କେନ୍ଦ୍ରର ପ୍ରଶାସନିକ ବ୍ୟବସ୍ଥାକୁ ମଧ୍ୟ ସହଜ କରିପାରିଛି । ଏହି ଦୁଇ ସ୍ଥାନ ମଧ୍ୟରେ ପ୍ରକୃତ ଦୂରତା ହେଉଛି ୨୬କିଲୋମିଟର । ଆଜି (ତା୦୪-୧୦-୨୦୨୧) ଦଶ ଜଣ ହିତାଧିକାରୀ ପ୍ରଥମ ମାତ୍ରା ଓ ଆଠ ଜଣ କୋଭିଡ ଟୀକାର ଦ୍ୱିତୀୟ ମାତ୍ରା ଜନସ୍ୱାସ୍ଥ୍ୟ କେନ୍ଦ୍ରରେ ଗ୍ରହଣ କରିବେ ।

 ସେ ଆହୁରି କହିଛନ୍ତି ଯେ “ଭାରତ ଭୌଗୋଳିକ ବିବିଧତାର ଦେଶ ହୋଇଥିବାରୁ ଡ୍ରୋନ ଯେକୌଣସି ସ୍ଥାନରେ ଆବଶ୍ୟକ ଜିନିଷ ପହଞ୍ଚାଇବା ପାରିବ । ଆମେ ଡ୍ରୋନ ଜରିଆରେ ଗୁରୁତ୍ୱପୂର୍ଣ୍ଣ ଜୀବନରକ୍ଷାକାରୀ ଔଷଧ ପହଁଚାଇବା ସହ ରକ୍ତନମୁନା ମଧ୍ୟ ସଂଗ୍ରହ କରିପାରିବା ।

ଏହି ପ୍ରଯୁକ୍ତିବିଦ୍ୟାର ଉପଯୋଗ ସଂକଟଜନକ ପରିସ୍ଥିତିରେ ମଧ୍ୟ କରାଯାଇପାରିବ । ବିଶେଷକରି ଦୁର୍ଗମ ଅଞ୍ଚଳରେ ଔଷଧପତ୍ର ଯୋଗାଣ କ୍ଷେତ୍ରରେ ଏହା ବେଶ୍ ଉପଯୋଗୀ ହୋଇପାରିବ ।

ଯେପରି ଟିକା ଯୋଗାଣ ଦେଶର ଦୂରଦୂରାନ୍ତ ଓ ଦୁର୍ଗମ ପାର୍ବତ୍ୟାଞ୍ଚଳରେ ଠିକ୍ ଭାବେ କରାଯିବ ସେ ସମ୍ପର୍କରେ ସୂଚନା ଦେଇ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ କହିଥିଲେ ଯେ “ଆମର କୋଭିଡ-୧୯ ଟିକାକରଣ କାର୍ଯ୍ୟକ୍ରମ ଆଶାତୀତ ସଫଳତା ହାସଲ କରିଛି । ମୋର ଦୃଢ ବିଶ୍ୱାସ ଯେ ଏହି ପଦକ୍ଷେପ ଯୋଗୁଁ ଆମେ କୋଭିଡ-୧୯ ଟିକାକରଣର ଶୀର୍ଷ ସ୍ଥାନରେ ପହଞ୍ଚିପାରିବୁ । ଜାତୀୟ କାର୍ଯ୍ୟକ୍ରମରେ ଡ୍ରୋନ ପ୍ରଯୁକ୍ତିଜ୍ଞାନର ଉପଯୋଗ କରାଗଲେ ଅନ୍ୟାନ୍ୟ ଔଷଧପତ୍ର ଓ ଟିକା ମଧ୍ୟ ଯଥା ସମ୍ଭବ ଶୀଘ୍ର ଓ ଅନ୍ୟ ସ୍ଥାନରେ ପହଞ୍ଚାଯାଇପାରିବ ।”

ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ନିରାପଦ ଟିକା ଯୋଗାଣ ସୁରକ୍ଷିତ ଭାବେ ହୋଇପାରିବା ସତ୍ୱେ ଦୁର୍ଗମ ପାର୍ବତ୍ୟାଞ୍ଚଳରେ ଏବେ ମଧ୍ୟ ଏଥିରେ ଅନେକ ଅସୁବିଧା ରହିଛି । ଆଇ-ଡ୍ରୋନ ଏସବୁ ସମସ୍ୟାର ମୁକାବିଲା କରି ମାନବବିହୀନ ବାୟୁଯାନ/ଡ୍ରୋନ ଜରିଆରେ ଦୁର୍ଗମ ଅଞ୍ଚଳରେ ଏହା ପହଞ୍ଚାଇ ପାରିବ । ବର୍ତ୍ତମାନ ଡ୍ରୋନଭିତ୍ତିକ ପରିବହନ ପ୍ରକଳ୍ପ କେବଳ ମଣିପୁର, ନାଗାଲାଣ୍ଡ ଓ କେନ୍ଦ୍ରଶାସିତ ଅଞ୍ଚଳ  ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜରେ ତ୍ୱରାନ୍ୱିତ କରିବାକୁ ଅନୁମତି ମିଳିଛି ।

 ଆଇସିଏମଆର, ଭାରତୀୟ ପ୍ରଯୁକ୍ତି ସଂସ୍ଥାନ କାନପୁର ସହ ମିଶି ଡ୍ରୋନର ଔଷଧ ଓ ଟିକା ପରିବହନ ସାମର୍ଥ୍ୟ ସମ୍ପର୍କରେ ଏକ ଅନୁଧ୍ୟାନ ମଣିପୁର, ନାଗାଲାଣ୍ଡ, ଆଣ୍ଡାମାନ ଓ ନିକୋବର ଦ୍ୱୀପରେ କରାଯାଇଛି । ଏହି ଅନୁଧ୍ୟାନର ବ୍ୟାପକ ସଫଳତାକୁ ଭିତ୍ତିକରି ବେସାମରିକ ବିମାନ ଚଳାଚଳ ମନ୍ତ୍ରଣାଳୟ, ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ କର୍ତ୍ତୃପକ୍ଷ ଡ୍ରୋନ ପରିବହନକୁ ଏସବୁ ଅଞ୍ଚଳରେ ଅନୁମତି ଦେଇଛନ୍ତି ।

ଶ୍ରୀ ମାଣ୍ଡଭିୟା ଏହି ପଦକ୍ଷେପ ଯୋଗୁଁ କେବଳ ଟୀକା ନୁହଁ ବରଂ ଅନ୍ୟାନ୍ୟ ଔଷଧପତ୍ର ଯୋଗାଣ ସମ୍ଭବ ହେବ ବୋଲି ବିଶ୍ୱାସ ପ୍ରକଟ କରିଛନ୍ତି । ଏଥିଯୋଗୁଁ ବର୍ତ୍ତମାନର ଔଷଧ ଯୋଗାଣର ଢାଞ୍ଚା ଗତ ପରିବର୍ତ୍ତନ ଆସିବ ବୋଲି ସେ କହିଛନ୍ତି । ଏହି ପଦକ୍ଷେପ ପାଇଁ ସେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ, ଡିଜିସିଏ, ଭାରତୀୟ ବିମାନଘାଟୀ କର୍ତ୍ତୃପକ୍ଷ ଓ ଆଇସିଏମଆରକୁ ଅଭିନନ୍ଦନ ଜଣାଇଛନ୍ତି ।

ସ୍ୱାସ୍ଥ୍ୟ ଓ ପରିବାର କଲ୍ୟାଣ ସଚିବ ଶ୍ରୀ ରାଜେଶ ଭୂଷଣ, ଆଇସିଏମଆର ମହାନିର୍ଦ୍ଦେଶକ ଡକ୍ଟର ବଳରାମ ଭାର୍ଗବ ଏବଂ ଅନ୍ୟାନ୍ୟ ମନ୍ତ୍ରଣାଳୟ , ଆଇସିଏମଆର ଓ ରାଜ୍ୟ ସରକାରଙ୍କ ବରିଷ୍ଠ ଅଧିକାରୀଗଣ ଏହି ଅବସରରେ ଉପସ୍ଥିତ ଥିଲେ ।

*****

SM / SLP