পুম্নমকপু খুরুমজরী! লৌউ-শিংউ অমসুং লৌমীগী য়াইফ য়ুম্বালগী কেন্দ্র মন্ত্রী, শ্রী নরেন্দ্র সিংহ তোমারজী, ছতিসগরগী মুখ্য মন্ত্রী, শ্রী ভুপেশ বাঘেলজী, ঐহাক্কী কেবিনেৎকী মরুপশিং, শ্রী পুরুশোত্তম রুপালাজী, শ্রী কাইলাশ চৌধরীজী, শ্রীমতি সোভাজী, ছতিসগরগী হান্নগী মুখ্য মন্ত্রী, শ্রী রমন সিংহজী, ছতিসগর স্তেৎ এসেমব্লী ওপোজিসনগী লুচিংবা, শ্রী ধরম লাল কাউশিকজী, এগ্রিকলচর এজুকেসনগা মরী লৈনবা ভি.সি., দাইরেক্তর, সাইন্তিফিক কলীগশিং অমসুং ঐহাক্কী লৌমী ইচিল ইনাওশিং!

ঘাঘ অমসুং ভদ্দ্রিগী লৌউবগী পাউরৌশিং অসি অৱাং-ভারতকী মফম স্বাইদা য়াম্না মমিং চৎলি। চহি চা কয়াগী মমাংদা ঘাঘনা অসুম্না হায়রম্মিঃ

“জেতী গহিরা জোতে খেৎ,

পরে বিজ, ফল তেতে দেৎ”।

মসিনা হায়রিবদি, লবুকপু লুনা তৌরিমখৈ, মরুনা লুনা তাশিন্দুনা লৌরোক্কী চাং য়াম্না হেনগনি হায়বনি। পাউরৌ অসি চহি চা লিরবা ভারতকী লৌউবগী থৌওংদগী লৌথোকপনি। মসিনা ভারতকী লৌউ-শিংউবনা কয়া য়াম্না সাইন্তিফিক ওইরম্বগে হায়বা তাক্লি। লৌউবা অমসুং সাইন্সকী অরুবা মরী লৈনবা হায়বসি ২১শুবা চহি চাগী ভারতকী য়াম্না মরু ওইবনি। ঙসিদি, হীরম অসিগী মতাংদা খোংথাং অমা থাংজিনলি। থৌওংসিং অসিবু লৈবাক্কী লৌমীশিংদা শিন্নরি। অপিকপা লৌমীশিংগী পুন্সি মহিংদা অহোংবা পুরকপগী ৱাখলগা লোয়ননা, মসিগী চাউরবা খুদোলপোৎ অসিবু ঐহাক্না অপিকপা লৌমীশিংগী খুয়াখাদা থমদুনা শিন্নজরি। ঙসিদি, মহৈ-মরোং মখল ৩৫ পুথোক্লে। ঙসিদি, রাইপুরদা নেস্নেল ইন্সতিত্যুৎ ওব বাইওতিক স্ত্রেস মেনেজেমেন্তসু শঙ্গারে। এগ্রিকলচর য়ুনিভর্সিতী মরিদা গ্রীন কেম্পস মনাসু পীরে। লৈবাক্কী লৌমী অমসুং এগ্রিকলচর সাইন্তিস্তশিং, ঐহাক্না পুম্নমকপু থাগৎচরি।

মরুপশিং,

হৌখিবা চহি ৬-৭তগী হৌনা, সাইন্স অমসুং তেক্নোলোজী শিজিন্নদুনা লৌউ-শিংউগা মরী লৈনবা শিংনবা কয়াগী ৱারোইশিন পুরক্নবা হোৎনবদা অহানবা মিৎয়েং চঙদুনা লাক্লি। ঐখোয়না হেন্না মচি লৈবা মরু, অইং-অশা হোলক্লিবা অসিবু মুন্না খন্নদুনা অনৌবা ফিভমগা চান্নবগী থৌওংশিংদা অহেনবা মিৎয়েং চঙলি। চহি খরা অসিদা, অসিগুম্বা মরুগী মখল ১৩০০ হেন্না পুথোকখ্রে। মসিগী পরিং অসিদা, ঙসিসু লৈবাক্কী লৌমীশিংদা মরু মখল ৩৫ অমগসু খুৎশিন্নরি। ঐখোয়গী সাইন্তিস্তশিংনা পুথোকপা মসিগী মরু অমসুং মখলশিং অসিনা লৌউববু অইং-অশা হোংলক্লিবা অসিদগী লাকপা চৈথেংশিংদগী ঙাকথোকপদা অমসুং মেলন্যুত্রিসন ফ্রী ইন্দিয়া কেম্পেন্দা তেংবাংগনি। মসিগী অনৌবা মখলশিং অসিনা অইং-অশাগী নোংদম নাইদবা থেংনবা ঙম্বতা নত্তনা, মচি লৈবসু য়াম্না হেনল্লি। মখলশিং অসিদগী খরদি ঈশিং য়াম্না লৈতবা মফম, মহৈ-মরোং খরদি অরুবা লাইনাদগী ঙাকথোকই অমসুং খরা অমনা য়াম্না থুন্না মুল্লি, অদুগা খরা অমনা ব্রেকিশ ঈশিং খক্তদা হৌই। মখলশিং অসি লৈবাক্কী অইং-অশাগী ফিভম কয়াবু খন্নরবা মতুংদা শাবনি। লৈবাক অসিনা ছতিসগরগী নেস্নেল ইন্সতিত্যুৎ ওফ বাইওতিক স্ত্রেস মেনেজমেন্তকী মওংদা লৈবাক্কী অনৌবা ইন্সতিত্যুৎ অমা ফংজরে। ইস্নতিত্যুসন অসিনা সাইন্তিফিক ওইবা ঙাক্লৌ পীদুনা অইং-অশা হোংবা অমসুং অতোপ্পা ফিভম কয়াদগী ওইরক্লিবা শিংনবশিং থেংনবদা তেংবাংগনি। মফম অসিদা ত্রেনিং তৌগদবা নহা ওইরিবা মীওইশিংনা সাইন্তিফিক্কী ৱাখল্লোন চেনবা সাইন্তিস্ত ওইরগনি। মফম অসিদগী থোক্লক্কদৌরিবা ৱারোইশিনশিংনা লৈবাক্কী এগ্রিকলচর অমসুং লৌমীশিংগী চাগাবু মতিক চানা হেনগৎহল্লগনি।

মরুপশিং,

ঐখোয়গী লৈবাক্কী য়াম্লবা মহৈ-মরোংগী শরুক অমদি তিন-কাঙশিংনা অমাঙ-অতা থোকহল্লি হায়বসি ঐখোয় খুদিংনা খঙনরবনি। মসিনা লৌমীশিংদসু য়াম্না মাঙজহল্লি। মমাংগী চহিমক্তদসু, কোরোনাগা লান্থেংনরিঙৈ মনুংদা, কৌজেং শঙ্গু কয়ানা রাজ্য কয়াদা লান্দাখিবগী থৌওং ঐখোয়না উনখি। মসি লেপহন্নবা অমসুং লৌমীশিংবু অমাঙ-অতা থোকপা কয়াদগী কন্নবা য়াম্না কন্না হোৎনবা তাখি। ইন্সতিত্যুৎ অনৌবা অসিগী থৌদাং য়াম্না চাউনা লৈ হায়বা ঐহাক্না নীংথিনা খঙই অমসুং মফমসিদা থবক তৌরিবা সাইন্তিস্তশিংনা লৈবাক্কী অপাম্বগী মতুং ইন্না মথৌ পাংথোক্কনি হায়বা ঐহাক্না থাজবা থম্লি।

মরুপশিং,

এগ্রিকলচরবু মপুং ওইনা ঙাক্লৌ পীবা মতমদা, মসিনা থুনা চাউখৎকনি। লৌমীশিংগী লম ঙাকথোক্নবা, সোইল হেল্থ কার্দ করোর ১১বু তোঙানবা তাঙ্ককশিংদা পীথোকখ্রে। মসিগী মহৈ ওইনা, লৌমীশিংদা কান্নবা কয়া ফংখি। হৌজিক্তি, লৌমীশিংনা মখোয়গী লমশিংদা পাংথোকপা য়াবা অকক্নবা থৌওং, লম অদুগী কান্নফম, লৌরোক হেন্না থোক্কদবা মহৈ-মরোং, তিনহাৎ হিদাক, তঙাই ফদবা হারগী চাং অমসুং মখোইগী লমগী হকশেল পুম্নমক খঙনরে। মসিনা চাদিংদা হন্থহনবতা নত্তনা, লৌরোকসু হেনগৎহল্লে। মান্নবা ওইনা, ঐখোয়না য়ুরিয়া নীম কোতিং তৌববু ১০০%গী চাংদা পাংথোক্তুনা কম্পোস্তকী মতাংদা মিৎয়েং চঙবসু য়েংশিনখি। লৌমীশিংদা ঈশিং শোইদনা ফংহন্নবা ঐখোয়না ইরিগেসন প্রোজেক্ত কয়া হৌদোকখি। দিকেদ কয়াদগী পন্দুনা লৈরক্লবা ইরিগেসন প্রোজেক্ত কয়াদা য়াম্লবা শেনফম কায়থদুনা অসিগুম্বা প্রোজেক্ত ১০০ লোইশিন্নবা থবক পায়খৎপা হৌদুনা ঐখোয়না লৌমীশিংদা ঈশিং ফংহন্নবা হোৎনরি। মসিগা মান্নবা ওইনা, ঈশিং কন্নবগীদমক্তা লৌমীশিংনা মাইক্রো ইরিগেসন অমসুং স্প্রিঙ্কলর শিজিন্ননবা শেলগী তেংবাংসু পীখি। লৌমীশিংদা মখোয়গী লৌরোকপু তিন-কাঙদগী ঙাকথোক্নবা অমসুং লৌরোক হেংৎহন্নবা অনৌবা মখলগী মরু কয়াসু ফংহনখি। লৌমীশিংনা লৌউ-শিংউ তৌবগা লোয়ননা মৈসু পুথোকহন্নবগীদমক্তা মখোয়গীদমক্তা পি.এম. কুসুম কেম্পেন্সু চলায়রি। মসিনা মখোয়গী তঙাই ফদবশিং ফংহনবতা নত্তনা মৈ পীথোকপসু ঙমহল্লি। লৌমী লাখ কয়াদা সোলর পমপসু য়েন্থোকখ্রে। ঙসিদি, ক্লাইমেৎকী মতাংসি অসি মালেম খুদিংনা ৱানরবা থৌওং অমা ওইরে। ছতিসগরগী মুখ্য মন্ত্রীনসু মহৌশাগী অমাঙ-অতা থোকপা অমসুং অইং-অশা হোংবদগী থোক্লকপা খুদোংচাদবা কয়াগী মতাংদা হৌজিক্তসু কুপ্না তাকপীখ্রে। লৌমীশিংবু লেন-তাবা অমসুং অতোপ্পা খুদোংচাদবশিংদগী ঙাকথোক্নবা অমসুং অমাঙ-অতা থোক্লকপা মতমদা মখোয়দা মাঙজদনবা হান্নবা চৎনরম্বা কাংলোন কয়া অমদা অহোংবা পুরক্লি। পি.এম. ফসল বিমা য়োজনানা মসিগী শিংনবশিং অসি য়েংশিন্দুনা লৌমীশিংদা কান্নবা অমসুং সেক্যুরিতী কয়া পীরি। য়োজনা অসিদা ঐখোয়না পুরক্লিবা অহোংবশিংনা লৌমীশিংগী লুপা করোর লাখ অমরোমগী ক্লেম লোইশিনবদা তেংবাংখ্রে। অসিগুম্বা ইরাং মরকসিদা লৌমীশিংগী ফুরিৎখাওদা লুপা করোর লাখ কয়া চঙখ্রবনি।

মরুপশিং,

এম.এস.পি. হেনগৎপদা নত্তনা, ঐখোয়না লৌমীগী পোত্থোক লৈশিনবগী থোউওংসু ফগৎহন্দুনা লৌমীশিংদা খ্বাইদগী হেন্না কান্নবা পীনবা হোৎনরি। লৌমীশিংদগী রবি কুমদা গেহু মেত্রিক তোন লাখ ৪৩০ হেনবা লৈশিনখি অমসুং মখোয়দা লুপা করোর ৮৫,০০০ হেন্না পীখি। কোরোনা মরক্তসু গেহু লৈবগী মফমশিংগী মশিংসু শরুক অহুম হেনগৎখি। মসিদা নত্তনা, হৱাই অমসুং থাউ থোকপা মরু লৈফমসু শরুক অহুম হেনগৎখি। কিসান সম্মান নিধীগী মখাদা লৌমী করোর ১১ হেনবগী বেঙ্ক একাউন্তশিংদা চাউরাকপা লুপা করোর লাখ ১.৬০ হাপখ্রে, মসিগী মনুংদগী অয়াম্বদি অপিকপা লৌমীশিংদা অমসুং মখোয়গী তঙাই ফদবশিং থেংনননবনি। ঐখোয়গী লৈবাক্কী লৌমী ১০গী মনুংদা ৮দি লম পিক্না লৌ উজবা অপিকপা লৌমীশিংনি। মসিগী মরক্তগী, কোরোনাগী মনুংদা লুপা করোর লাক্ষ ১ হেনবদি মখোয়দা পীখি। লৌমীশিংনা তেক্নোলোজী শিজিন্ননবদা তেংবাংনবা বেঙ্কিং প্রোসেসকী খুদোংচাবশিং ফংহনখি। ঙসিদি, লৌমীশিংনা ৱেদরগা মরী লৈনবা ই-পাউশিং ফংলি। লৌমী করোর ২ হেনবদা কিসান ক্রেদিৎ কার্দ পীবগী কেম্পেন অমসু হন্দক্তা পায়খৎখ্রে। ঙা-য়োকপা অমসুং দাইরী সেক্তরদা থবক তৌবা লৌমীশিংসু কে.সি.সি.গা মরী লৈনহনখ্রে। লৌউবগী কৈথেলবু ই-নামগী মখাদা শমদুনা অমসুং হৌজিক লৈরিবা লৌউ-শিংউগী কৈথেলশিংবু মতমগা চান্নহন্দুনা ফার্মর প্রোদ্যুসর ওর্গনাইজেসন ১০,০০০ হেন্না শেমগৎপগী থবক-থৌরমশিংসু খোঙজেল য়াঙশিল্লক্লি। মমাংগী চহি ৬-৭তা লৌমীশিংগীদমক্তা পায়খৎখিবা থবকশিংনা লাক্কদৌরিবা চহি ২৫দা লৈবাক্কী ওইবা পান্দম ফংনবা থবকশিংগী অচেৎপা য়ুম্ফম অমা থোল্লে। লৈবাক অসিনা চহি ২৫গী মতুংদা নীংতম্বগী চহি ১০০ মপুং ফারকপগী হরাও-তয়াম্বা ফোংদোক্কনি। হৌজিকসু ঐখোয়না লৈবাক্না নীংতম্বগী ৭৫শুবা চহিগী পালন তৌরি। মরু অমসুং পোত্থোকশিং য়োনবগা মরী লৈনবা থবকশিংনা ভারতনা শেন্মিৎলোনগী মরু ওইবা শক্তি অমা ওইহন্নবা লম্বী য়াৎলি।

মরুপশিং,

লৌউ-শিংউবা হায়বসি রাজ্যগী ওইবা হীরম অমনি অমসুং হীরম অসিগী রাজ্যগী ৱাফম্নি অমসুং মসিদা ভারত সরকারনা ফাওবা অয়েৎপা পীবা য়াদে হায়না ফাওবা ইদুনা লৈরবনি হায়বসি ঐখোয় খুদিংনা খঙনরবা ৱাফম্নি। ঐহাক্না গুজরাতকী মুখ্য মন্ত্রী ওইনা থৌ পুরম্বা মতমদসু হীরম অসি নীংথিনা খঙলবনি। রাজ্যগী তোপ-তোপ্পা থৌদাং লৈ অমসুং ঐহাক্না মুখ্য মন্ত্রী অমা ওইনা মখোয়শিংদুবু মঙফাওনহনগদবনি। ঐহাক্না গুজরাতকী মুখ্য মন্ত্রী ওইরিঙৈদা লৌউবগী পথাপ, মরী লৈনবা থৌশিল-থৌরাং অমসুং মসিনা লৌউবদা পীবা চৈথেংশিং নীংথিজনা থেংনখ্রবনি। ঐহাক্না ঐহাক্কী মতমদা গুজরাত্তা করি থবক পায়খৎখি হায়বগী মতাংদা শ্রী নরেন্দ্র সিংহ তোমারজীনা নীংথিনা তাকপীখ্রে। গুজরাত্তা লৌউবগী পথাপ্তা শুপ্নগী মহৈ-মরোং খরতমক থাবগী চৎনবী অমা লৈরম্মি। গুজরাতকী মফম অয়াম্বদা ঈশিং ফংদবদগী লৌমীশিংনা লৌউবা তোক্নরম্মবনি। ঐখোয়না মতমদুদা মন্ত্রা অমগা লোয়ননা লৌমীশিংবু ঐখোয়গা লোয়নদুনা থবক মখা চত্থরম্মি, অদুগা মন্ত্রা অদুদি – ফিভম অসি হোঙফম থোকই অমসুং ঐখোয়না পুন্না মসিবু হোংহনগদবনি। মতমদুমক্তদসু, ঐখোয়না সাইন্স অমসুং মোদর্ন তেক্নোলোজীবু পাক শন্না শিজিন্নবা হৌখ্রবনি। ঙসিদি, লৈবাক্কী লৌউ-শিংউ অমসুং হোর্তিকলচরদা গুজরাতনা চাউরবা মফম অমা কল্লি। হৌজিক্তি, গুজরাত্তা চহি চুপ্পা লৌ উনরি। কুৎচকুম্বা মফমদা ঐখোয়না হান্না খল্লুদবা উহৈ অমসুং মনা-মশিং থানরি। হৌজিক্তি, মফম অসিদগী পুথোকপা লৌউ-শিংউগী পোত্থোকশিং মীরমদা থাদোক্লে।

ইচিল ইনাওশিং,

পোত্থোক পুথোকপা খক্তদা মিৎয়েং থমদে, কোল্দ চেনগী চাউরবা নেৎৱর্ক অমসু গুজরাত শিনবা থুংনা লিংখৎলে। মসিগী মহৈ ওইনা, লৌউ-শিংউগী ওইথোকপা য়াবা মতিকসু পাকথোক-চাউথোক্লে অমসুং লৌউ-শিংউগা মরী লৈনবা হীরম কয়াদা থবক কয়া অমসু পীবা ঙম্লে। মুখ্য মন্ত্রী অমা ওইনা, মসিদি ঐহাক্না রাজ্যগীদমক্তা তৌগদবা থৌদাংনি অমসুং মসিবু পাংথোক্নবা ঐহাক্না কন্না হোৎনখি।

ইচিল ইনাওশিং,

হৌজিক্কী নীং-তম্বা ফংলবা মতম অসিদা লৌউ-শিংউদা লাক্লিবা অসিগুম্বা অহোংবশিং অসি হেন্না চাউথোকহনবগী মথৌ তারে। অইং-অশা হোংবনা লৌউ-শিংউবতা নত্তনা ঐখোয়গী ইকোসীস্তেম অপুনবদসু য়াম্না চাউনা শিংনবা অমা ওইরিবনি। মসিনা ঐখোয়গী ঙা পুথোকপা, শা-শলগী হকশেল অমসুং পোত্থোক পুথোকপদসু য়াম্না শোকহল্লি। মসিগী মহৈ ওইনা, লৌমী অমসুং ঙা য়োকপশিংনা য়াম্না মাঙজবা তাই। অইং-অশা হোংলকপনা অনৌবা মখলগী তিন, লাইনা অমসুং লাইচৎ কয়া থোকহন্দুনা মীওইবা অমসুং শা-শলগী হকশেলদসু চাউরবা শিংনবা অমা ওইহল্লক্লি অমসুং মহৈ-মরোংদসু অকায়বা কয়া পীরি। ফিভম অসিনা মনুং হুৎনা থিজিন হুমজিনবগী তঙাই ফদবা লৈহল্লে। সাইন্স, সরকার অমসুং খুন্নাইনা পুন্না হোৎনমিন্নবা মতমদা মফবা মহৈ ফঙবা ঙমগনি। লৌমী অমসুং সাইন্তিস্তশিংনা অসিগুম্না মওংদা খুৎশম্নবনা লৈবাক্না অনৌবা শিংনবা কয়া থেংনবা ঙম্বগী মপাঙ্গল হেনগৎহনগনি। সাইন্সতা য়ুম্ফম ওইবা অসিগুম্বা জিলাগী থাক্তা চত্থবা লৌউ-শিংউবগী মোদেলনা লৌউববু হেন্না প্রোফেস্নেল ওইহনবগা লোয়ননা শেন্দোংসু য়াম্না লৈহনগনি। ঙসি হৌদোক্লিবা কেম্পেন অসিদা অইং-অশা হোংবগী ফিভমগা লান্থেংনবা ঙম্নবা তেক্নোলোজী অমসুং মেকানিজম শিজিন্নবদা পুক্নিং থৌগৎপগী মান্নবা ইথিল য়াওরি।

ইচিল ইনাওশিং,

তাঞ্জা অসি ঐখোয়না তঙাই ফদবশিংদা হঞ্জিল্লকপা অমসুং তুংলমচৎকীদমক্তা খোঙশানবগী মরক্তা মান্নবা খল পুরকপগী চপ চাবা মতমনি। ঐহাক্না তঙাই ফদবশিংদা হঞ্জিল্লকপা হায়বসিদা ঐহাক্না ফোংদোক্লিবদি হৌজিক মতমগী শিংনবশিংদগী ঙাকথোকপগী মওং চেনবা ঐখোয়গী নাৎকী ওইবা লৌউ-শিংউগী চৎনবীগী মপাঙ্গল অদুবুনি। ঐখোয়না নাৎকী থৌওং শিজিন্নদুনা লৌ উদুনা, শা-উচেক লোইদুনা অমসুং ঙা য়োক্তুনা লাক্লি। মসিদগী হেন্দোক্তুনা, চপ মান্নবা লৌফমদা মখল কয়াগী মহৈ-মরোং থাদুনসু লাক্লি। হায়বদি, ঐখোয়গী লৌউবগী চৎনবী অসি হান্নদি মলতি কলচর ওইরম্মি, অদুবু মতমগী মতুং ইন্না মোনোকলচরদা তপা হোংলকখি। খেৎনবা ফিভমশিংনা মরম ওইদুনা, লৌমীশিংনা চপ মান্নবা মহৈ-মরোং থাবা হৌরকখি। ঐখোয় পুন্না মসিগী ফিভম অসিদা অহোংবা পুরকপা তাবনি। অইং-অশা হোংবগী শিংনবশিংনা হেনগৎলকপা মতমদা, ঐখোয়না ঐখোয়গী থবকশিংগী খোঙজেল য়াঙখৎহনগদবনি। মমাংগী চহি খরা অসিদা, ঐখোয়না লৌমীশিংগী চাগা হেনগৎহন্নবগীদমক্তা ঐহাক্না পনখ্রিবা থৌওংশিংগী পুক্নিং থৌগত্তুনা লাকখি। মহৈ-মরোং খক্তদগী শেল তানবগী চৎনবীদগী ৱাংমা লান্থোক্তুনা, মখোয়বু ভেল্যু এদিসন তৌনবা অমসুং লৌউবগী অতোপ্পা থৌওংশিং পায়খৎনবা পুক্নিং থৌগৎলি। অপিকপা লৌমীশিংনা হায়রিবশিং অসিগী য়াম্না তঙাই ফদবা লৈ অমসুং ঐখোয়না অপিকপা লৌমীনা ৮০%গী শরুক ওইবা লৌমীশিংদা থৌওং অসিগা মরী লৈননা অহেনবা মিৎয়েং চঙলি। শা-উচেক লোইবগা লোয়ননা, খোই য়োকপা, লবুকশিংদা সোলর পাৱর পুথোকপা, অরেম্বদগী লন্দা ওন্থোকপা – হায়বদি, ইথানোল, বাইও ফুএলগুম্বা পাংথোকপা য়াবা অতোপ্পা থৌওং কয়াগী খুদোংচাবসু লৌমীশিংদা য়ৌহল্লি। ছতিসগরগী লৌমীশিং য়াওনা, লৈবাক্কী লৌমীশিংনা থৌওংশিং অসি খোঙজেল য়াঙনা শিজিন্নবা হৌনরকপসিদা ঐহাক্না য়াম্না নুংঙাইবা ফাওজৈ। মখোয়না লৌউবগা লোয়ননা অতোপ্পা থৌওং অনি নত্ত্রগা মরিদা থবক হৌদুনা মখোয়গী থবক-থৌরম চাউথোক্নরি।

মরুপশিং,

মফম মফমগী অইং-অশাগী ফিভমগী মতুং ইন্না মহৈ-মরোং পুথোকপা অসি ঐখোয়গী নাৎকী ওইবা লৌউবগী থৌওংগী মপাঙ্গল অমনি। ইকঙ থোকপা মতমদা, অখন্নবা মখলগী মহৈ-মরোং পুথোক্লি। ঈচাউ নত্ত্রগা উন কা হেন্না তাবগী ফিভম থোকপা মতমদা, তোঙানবা মখলগী মহৈ-মরোং থানরি। কুমগী মহৈ-মরোংশিং, মরু ওইনা য়াম্না কান্নবা ওইরিবা অপৌবা সিরিএল মিল্লেৎ, কয়াগী ন্যুত্রিস্নেল ভেল্যুসু য়াম্না ৱাংই। অখঙ-অহৈশিংনা ঐখোয়গী হকশেল ফহল্লু হায়। হৌজিক মতমগী পুন্সি মহিংগী মখা পোন্দুনা লাক্লিবা তোঙানবা মখলগী লাইনাশিংনা মরম ওইদুনা, মসিগী মিল্লেৎশিং পাম্নবগী চাং য়াম্না ৱাংনা হেনগৎলক্লি।

ঐগী লৌমী ইচিল ইনাওশিং,

ভারতকী হোৎনজমন্দগী য়ুনাইতেদ নেসন্সনা ইং ২০২৩বু মালেমগী মিল্লেৎকী চহি হায়না লাউথোকখ্রে তাবদা অদোম্না য়াম্না নুংঙাইবা ফাওগনি। মসিনা মিল্লেৎ অমসুং ঐখোয়গী সিরিএল থাবগী ঐখোয়গী চৎনবীবু মালেমগী থাক্তা শক্তাকপা অমসুং অনৌবা কৈথেল খঙদোক্নবা ঐখোয়গী ওইনা য়াম্না চাউরবা খুদোংচাবা অমনি। অদুবু, মসিগীদমক্তা ঐখোয়না ঙসিদগী হৌনা কন্না হোৎনবগী মথৌ তাই। ঙসিগী থৌরম অসিদা, ঐহাক্না লৈবাক্কী সোসিএল অমসুং এজুকেস্নেল ওর্গনাইজেসন খুদিংদা মিল্লেৎকা মরী লৈনবা চিঞ্জাক্কী কুমহৈ পাংথোকপা, মিল্লেৎ শিজিন্নদুনা তোঙান-তোঙানবা চিঞ্জাক শেম্বগী চাংয়েংনবা পাংথোক্নবা হায়নীংই। মসিগী মরমদি, ঐখোয়না পান্দমসিবু ইং ২০২৩দা মালেমদা পুথোকপা পাম্লবদি, ঐখোয়না অনৌবা থৌওং পাংথোক্তুনা মীপুম খুদিংদা মসিগী মতাংদা খঙবা হেনগৎহনগদবনি।

মরুপশিং,

সাইন্স অমসুং রিসর্চতগী ফংবা ৱারোইশিনগা লোয়ননা ঐখোয়না মিল্লেৎ অমসুং অতোপ্পা হৱাই-চেংৱাই পুথোকপা অসি য়াম্না তঙাই ফদবনি। মসি পাংথোকপগী মরমদি, হায়রিবশিং অসি তোঙানবা তঙাই ফদবগী মতুং ইন্না লৈবাক্কী তোঙানবা মফমশিংদা থাবা য়াগদবা অসিননি। ঐখোয়না ঙসি পুথোক্লিবা তোঙানবা মখলগী মহৈ-মরোং অসিদা হায়রিবা থৌওং অসিগী মমি খরা তাবা ফংগনি। লৈবাক্কী তোঙানবা মফম ১৫০ হেনবদা, লোকেল কন্দিসনগী মখা পোনবা লৌউ-শিংউবগী থোউওং কয়াগী মতাংদা এক্সপরিমেন্ত পাংথোক্লি হায়না ঐহাক্কী মফমদা পাউদমলক্লি।

মরুপশিং,

ঐখোয়গী লৌউবগী নাৎকী থৌওংগা লোয়ননা, তুংলমচৎকীদমক্তা খোঙশানবা হায়বসিসু চপা মান্ননা মরু ওই। ঐখোয়না তুংলমচৎকীদমক্তা খন্নবা মতমদা, মতমগা চান্নবা তেক্নোলোজী অমসুং লৌউবগী অনৌবা খুৎশু খুৎলায়না মসিগী ময়ায়দা লৈগনি। ভারতকী লৌউবগী খুৎলায় খুমাং চাউশিলহন্নবা থবক থৌরমশিংগী ঙসিদি মহৈ উবা ফংলে। তুংলমচত্তি স্মার্ত ওইবা মেছিন অমসুং খুৎলায়গীনি। লৈবাক অসিদা খ্বাইদগী অহানবা ওইনা, খুঙ্গংগী লনথুমগী চা-চাং শেম্বদা দ্রোন শিজিন্নবা উবা ফংলে। লৌউ-শিংউদসু মতমগা চান্নবা দ্রোন অমসুং সেন্সর শিজিন্নবসু হৌজিক হেনগৎফম থোক্লে। মসিনা লৌউ-শিংউগী মগুন লৈবা দেতা খোম্বদা ঐখোয়দা য়াম্না তেংবাংগনি। মসিনা লৌউবদা থেংনবা শিংনবা কয়াগী হৌজিক্কী ওইবা ৱারোইশিন পীবদসু তেংবাংগনি। দ্রোন শিজিন্নবগী খ্বাইদগী নৌবা পোলিসীনা হীরম অসিগী মতাংদা য়াম্না কান্নবা অমা ওইরক্লগনি।

মরুপশিং,

লৌ-লোকপদ্গী হৌদুনা পোত্থোক য়োনবা ফাওবগী অপুনবা ইকোসীস্তেম্বু ঐখয়না মতমগা চান্নহ্নদুনা লৈহনগদবনি। আর্তিফিসিএল ইন্তেল্লিজেন্স, দেতা এনালাইতিক্স অমসুং ব্লোক চেন তেক্নোলোজীনা দিমান্দ অমসুং সপ্লাইগা মরী লৈনবা শিংনবা কয়া থেংনবদা য়াম্না কান্নগনি। ঐখোয়না তেক্নোলোজীবু খুঙ্গংশিংদা য়ৌহনবা ঙম্বা অসিগুম্বা অনৌবা থৌওং অমসুং স্তার্ত-অপ্সহিংবু পুক্নিং থৌগৎকদবনি। লৈবাক্কী লৌমী খুদিংমক, মরু ওইনা অপিকপা লৌমীশিং, হায়রিবা খুৎলায় অমসুং তেক্নোলোজী শিজিন্নরগদি, এগ্রিকলচর শেক্তরদা অচৌবা অওনবা অমা পুরকপা ঙমগনি। লৌমীশিংদা অহোঙবা মমলদা মতমগা চান্নবা তেক্নোলোজী ফংহল্লিবা স্তার্ত-অপশিংগীসু মসি য়াম্না য়াম্না চাউবা খুদোংচাবা অমনি। ঐহাক্না লৈবাক্কী নহা খুদিংমক্না মসিগী খুদোংচাব লৌসি হায়না হায়জনীংই।

মরুপশিং,

নীংতম্বা ফংবগী পুৱারী ওইরবা মতম অসিদা, ঐখোয়না লৌউবগা মরী লৈনবা মতমগা চান্নবা সাইন্সপু খুঙ্গং খুদিংদা য়ৌহনগদবনি। অনৌবা এজুকেসন পোলিসীদসু হীরম অসিগী মতাংদা খঙথাং কয়া লৌখৎখ্রবনি। লৌউ-শিংউগা মরী লৈনবা রিসর্চ অমসুং তেক্নোলোজীবু মিদ্দল স্কুলগী থাক ফাওবগী কঋকল্লমগী মনুং চলহন্নবা ঐখোয়না হৌজিক্তগী হৌনা হোৎনগদবনি। ঐখোয়গী মহৈরোইশিংনা স্কুলগী থাক্তগী হৌনা লৌউ-শিংউবু মখোয়গী কেরিয়র ওইনা খন্ননবা শেম শাজবগী খুদোংচাবা পীগদবনি।

মরুপশিং,

ঙসি ঐখোয়না হৌদোক্লিবা কেম্পেন অসিবু মীয়ামগী ইহৌ ওইহন্নবা ঐখোয় খুদিংনা শরুক য়াগদবনি। কেম্পেন অসিনা লৈবাকপু মেলন্যুত্রিসন্দগী নীংতমহন্নবা হৌজিক চত্থরিবা নেস্নেল ন্যুত্রিসন মিসনবুসু মপাঙ্গল হাপকনি। স্কুলশিংদা তম্লিবা লাইরবা মহৈরোইশিংদা ফোর্তিফাইদ তৌরবা চেঙ খক্তমক পীজগদবনি হায়না সরকারনা ৱারেপ লৌখিবসু লৈরবনি। হন্দক্তসু, ঐহাক্না ওলিম্পিক্সতা মীথোই মীহেনলক্লবশিংদা মেলন্যুত্রিসনগী মতাংদা মীয়ামদা খঙহন্নবা হায়খ্রবনি। ঐহাক্না শান্নরোইশিংদা মথংগী চহি ১-২দা য়ামদ্রবদা স্কুল ৭৫দা চৎনবা, ন্যুত্রিসন, স্পোর্ত অমসুং ফিজিকেল এক্সর্সাইস্কী মতাংদা মহৈরোইশিংগা ৱারী শানবা হায়রি। ঙসি, ঐহাক্না একাদমিসিয়ন, এগ্রিকলচর সাইন্তিস্ত অমসুং ইন্সতিত্যুসনশিংদা নীংতম্বগী অমৃত মহোৎসবকী পান্দম থম্নবা হায়জরি। মীওই অমনা খুঙ্গং ৭৫ লৌশিন্দুনা অহোংবা পুরক্নবা নুমিৎ ৭৫নিগী কেম্পেন পায়খৎপা য়াই, নত্ত্রগা স্কুল ৭৫দা এৱিয়র্নেস কেম্পেন চত্থদুনা স্কুলশিংদা অখন্নবা থবক অমমম পীবা য়াই। অসিগুম্বা কেম্পেন অসি ইশাগী নত্ত্রগা ইন্সতিত্যুসনগী থাক্তা লৈবাক্কী জিলা খুদিংদগী পাংথোকপা য়াই। লৌমীশিংদা অনৌবা মহৈ-মরোং, ফোর্তিফাই তৌরবা মরু অমসুং অইং-অশা হোংবদগী ঙাকথোকপগী মতাংদা খঙহনবা য়াই। অসিগুম্বা মরূ ওইবা খোংথাংশিংনা ৱেদরগী হোংবা নাইবা ফিভমদগী লৈবাক্কী লৌউ-শিংউবগী থৌওংবু ঙাকথোকপা য়াই অমসুং লৌমীশিংবু নুংঙাই য়াইফনা লৈহন্দুনা লৈবাক্কী হকশেলসু ঙাক শেন্দুনা থম্বা ঙমহল্লি। ঐহাক্না অনৌবা মহৈ-মরোং মখলগীদমক্তা অমসুং অনৌবা রিসর্চ ইন্সতিত্যুৎকীদমক্তা লৌমী মরুপ খুদিংবু থাগৎচরি। সাইন্তিফিক ওইবা পথাপ, সাইন্তিফিক ওইবা ৱাখল্লোন অমসুং থৌওং খক্তনা শিংনবা কয়া থেংনবা ঙম্নবা খ্বাইদগী ফবা ৱারোইশিন পীবা ঙম্বনিনা ঙসি মনা ফংখ্রবা য়ুনিভর্সিতীশিংদা য়াইফ পাউজেল পীজরি।

পুম্নমকপু হন্না হন্না থাগৎচরি!!!

দিস্ক্লেমরঃ মসিদি পি.এম.গী ৱারোলগী শম্লপ্পা ৱাহন্থোক্নি। অশেংবা ৱারোলদি হিন্দিদা থমখিবনি।

***