হিমাচল প্রদেশনা ঙসি ঐঙোন্দা প্রধান মন্ত্রী অমা ওইনা খক্তা নত্তনা ইমুং-মনুংগী মীওই অমা ওইনসু চাউথোকচবা পোক্নবগী খুদোংচাবা অমা পীবীখি। হিমাচলনা অপীক-অপীকপা খুদোংচবশিং ফংনবা হোৎনবদা ৱাবা উবা ফংখি অমসুং ঙসিদি হিমাচলনা চাউখৎপগী লমায় অমা ইবা ঐহাক্না উরি। পুম্নমক অসি ইশ্বরগী থৌজালশিং অমসুং হিমাচল সরকারনা মথৌ মশক খঙবা অমসুং হিমাচলগী মীয়াম্না ভাব তাবনা ওইথোকহনখিবনি। ঐহাক্না অমুক হন্না ৱারী শাখিবগী খুদোংচাবা ঐঙোন্দা পীবীখিবা অমসুং মখোয়না ৱাফম কয়া ফোঙদোকপীরকখিবা অদুগীদমক মীওই পুম্নমকপু থাগৎপা ফোঙদোকচরি। ঐহাক্না তীম পুম্বদা থাগৎপা ফোঙদোকচরি। হিমাচলনা তীম অমা ওইনা থবক তৌবনা মাইপাকপা অসি ফংবা ঙমখিবনি। ঐহাক্না ময়ামদা য়াইফ-মঙ্গোল পীজরি!!

হিমাচল প্রদেশকী রাজ্যপাল, শ্রী রাজেন্দ্র আর্লেকর, থৱায় য়াওবা অমসুং মীয়াম্না পাম্নবা মুখ্য মন্ত্রী শ্রী জয়রাম থাকুর, পার্রলিয়ামেন্তদা ঐখোয়গী মরুপ ওইরিবা অমদি ভারতীয় জনতা পার্তীগী নেস্নেল প্রসিদেন্ত, হিমাচলগী মপারীসু ওইরিবা শ্রী জগত প্রকাশ নদ্দা, কেন্দ্রগী মন্ত্রী-মন্দলদা ঐহাক্কী মরুপ ওইরিবা শ্রী অনুরাগ থাকুর, পার্লিয়ামেন্তগী ঐহাক্কী মরুপ ওইরিবা অমসুং হিমাচলগী বি.জে.পি. প্রসিদেন্ত শ্রূ সুরেশ কেশ্যপজী, অতৈ মন্ত্রী, এম.পি. অমসুং এম.এল.এ. পুম্নমক, পঞ্চায়ৎকী মীয়ামগী মীহুৎশিং অমসুং হিমাচলগী ইচিল-ইনাওশিং!

চহি ১০০দা থোকপা খ্বাইদগী চাউবা লাইচৎকী মায়োক্তা লান্থেংনবদা হিমাচল প্রদেশনা চেম্পিয়ন ওইদুনা মাংজিল থারি। হিমাচলনা মাগী ইলিজিবল ওইবা মীয়াম পুম্নমকবপু য়ামদ্রবদা কোরোনাগী তীকাগী দোজ অমা কাপ্পা ঙমখিবা ভারতকী অহানবা রাজ্য ওইরে। মসিতা নত্তনা অনিশুবা দোজ কাপ্পগী মতাংদসু হিমাচলনা মখোয়গী মীশিংগী শরুক অহুম থোকপগী অমা য়ৌশিনবা ঙমখ্রে।

মরুপশিং,

হিমাচলগী মীয়াম্না মাইপাকপা অসিনা লৈবাক অসিগী থৌনা হাপখি অমসুং মখোয়দা আত্মনির্ভর ওইবগী কান্নবগী মতাংদা নীংশিংহনখি। মীপুম খুদিংমক্তা ভেক্সিন, লেম্না পীবা ভেক্সিন, মসি ভারত মচা করোর ১৩০গী থাজবা অমসুং বেক্সিনদা আত্মনির্ভে ওইবগী ফলনি। ভারতনা ঙসি নোংমদা ভেক্সিন করোর ১২৫ কাপ্পগী রেকোর্দ অমা থম্লি। ভারতনা ঙসি নোংমদা কাপ্লিবা তীকাগী মশিং অসি লৈবাক কয়াগী অপুনবা মশিংদগী হেল্লি। ভারতকী ভেক্সিনেসন কেম্পেনগী মাইপাকপা অসি ভারত মচা খুদিংমক্না হোৎনবা কনবা অমসুং থৌনা ফবগী অপুনবগী ফলনি। ঐহাক্না, লাল কিলাদগী ৭৫শুবা নীংতম নুমিৎতা ‘সবকা প্রয়াস’কী মতাংদা হায়খিবা অদুগী মমিনি মসি হায়না হায়জনীংই। হিমাচলগী মতুংদা সিক্কিম অমসুং দদ্রা নগর হবেলিনা অহানবা দোজকী চাদা চামা কাপ্পা ঙম্বা ওইখি অমসুং রাজ্য কয়ানা মসি য়ৌবা ঙমগদৌবগী নকশিল্লক্লি। হৌজিক্তি ঐখোয়না অমত্তা ওইনা পুন্না হোৎনদুনা অহানবা দোজ কাপখিবশিং অদুসু অনিশুবা দোজ কাপথোকহন্নবা হোৎনরসি।

ইচিল-ইনাওশিং,

থাজবা থম্বগী শীদা হীদাক অসিনা হিমাচলগী খ্বাইগী খোঙজেল য়াংবা ভেক্সিনেসন কেম্পেনগী হৌরকফম ওইখি। হিমাচলনা মশাগী তৌবা ঙম্বদা, মাগী হেল্থ পর্সনেল অমসুং ভারতকী বিজ্ঞানিকশিংদা থাজবা থমখি। দোক্তরশিং, আশা ৱর্করশিং, অঙ্গনৱাদী ৱর্করশিং, মেদিকেল পর্নেলশিং, ওজাশিং অমসুং অতৈ মরুপ কয়ানা থৱায় য়াওনা হোৎনখিবনা মাইপাকপা অসি ফংবা ঙমখি। হেল্থ সেক্তরগা মরী লৈনবা মীওইশিংনা কন্না হোৎনখি। দোক্তর ওইগেরা, পেরামেদিকেল স্তাফ ওইগেরা, হেল্পর ওইগেরা মসু মীপুম খুদিংমক্না হোৎনবা কনবগী মহৈনি। মসিদা ঐখোয়গী মশিং য়াম্লবা ইচে-ইচলশিংনা অখন্নবা থৌদাং অমা লৌখি। মীকুপ খরগী মমাংদা লম অসিদা থবক তৌরিবা মরুও কয়ানা মখোয়না মায়োক্নখিবা মখল কয়াগী শীংনবশিংগী মতাংদা অৱা-নুংঙাই ময়েক শেংনা ফোঙদোকপীখ্রে। হিমাচলদা ভেক্সিনেসনদা অপনবা পীগদবা খুদোংচাদবা মখল কয়ামরুম লৈ। চিংগী লমদম ওইবনা লোজিস্তিক্সকী ওইবা সমস্যা অমসু মায়োক্নখি। কোরোনাগী ভেক্সিনশিং থম্বা অমসুং পুথোক-পুশিন তৌবা অসিনা হেন্না খুদোংচাদবা ওইখি। অদুবু জয়রামগী সরকারনা শিল-লাংখিবগী মওং, সমস্য অসি কোকহন্নবা হোৎনখিবগী মওং অসি শীংথানীংঙাই ওই। অসুম্না হিমাচলনা ভেক্সিন মাংহনদনা খোঙজেল য়াংনা ভেক্সিনেসন তৌবনা খ্বাইদগী ফরবা পাম্বৈ অমনি খঙখি।

মরুপশিং,

জিওগ্রাফিকেল কন্দিসনশিং খুদোংচাদবগা লোইননা মীয়ামগা পাউ ফাওনবা অমসুং মীয়াম্না শরুক য়াবা হায়বা অসি ভেক্সিনেসন মাইপাকহনবদা অচৌবা হীরমশিং ওইখি। হিমাচলদদি চিংগী অকোইবদা লৈরিবা মফমশিংদা লোল অসি পুরা তোঙাল্লি। অয়াম্বনসু খুঙ্গংগী মফম ওইনা তৌই। মসিদা থাজবা হায়বা অসিনা পুন্সিগী মরু ওইবা শরুক অমা ওই। মখোয়গী পুন্সিদা লাইরম্বা-লাইরেম্বীগা শাগোন্নদুনা লৈ। মীকুপ খরগী মমাংদা ইচে অমনা কুল্লু জিলাগী মলানা খুঙ্গংদগী মতাংদা পাউদমবীখি। মলানানা দেমোক্রেসীগী মাইকৈ তাকপদা অমসুং থৌনা পীবদা মরু ওইবা থৌদাং অমা মতম চুপ্পদা লৌদুনা লাকখি। মফম অদুগী তীমনা অখন্নবা কেম্প অমা শাখি, ৱায়র-স্পানগী খুত্থাংদা ভেক্সিনগী বোক্সশিং থাখি অমসুং দেবসমাজকা লোইননা মরী লৈবা মরু ওইবা মীওইশিংগা থাজনবা থমদুনা থবক তৌমিন্নখি। অসিগুম্বা মীয়াম পুন্না শরুক য়াবা অমসুং পব্লিক দাইলোগকী লালোং অসি শিমলাগী দোদরা ক্বার, কাঙ্গরাগী ছোতা-বরা ভঙ্গাল, কিন্নোর, লাহোল-স্পীতি অমসুং পাঙ্গী-ভরমোর অসিগুম্বা মনুং হঞ্জিনবা মফম খুদিংমক্তা কান্নবা ফঙখি।

মরুপশিং,

লাহোল-স্পীতিগুম্বা মনুং হঞ্জিন্না লৈবা জিলাদা ফাওবা, হিমাচলনা অহানবা দোজ চাদা চামা কাপ্পদা মাংজিল থাবা অসিদা ঐহাক্না নুংঙাইবা পোকই। মসি অতল তনল শাদ্রিঙৈ মমাংদা লৈবাক অসিগী লেমহৌরিবা শরুকশিংগী থা কয়া-কয়া ফাওনদনা লৈরমখিবা লমদম অদুনি। হিমাচল প্রদেশনা থাজবা, এজুকেসন অমসুং সাইন্সনা পুন্না করম্না পুন্সিদা অহোংবা পুরকপগে হায়বা হঞ্জিন-হঞ্জিন্না উৎখ্রে। হিমাচলগী মীয়াম্না মখল অমত্তগী তোকঙা, মখল অমত্তগী অরানবা পাউ শন্দোকপা ঙমহনখিদে। লৈবাক অসিগী খুঙ্গংদা লৈরিবা খুন্নাই অসিনা মালেমগী খ্বাইদগী চাউবা অমসুং খোঙজেল য়াংবা ভেক্সিনেসন কেম্পেন অসি করম্না মপাঙ্গল হাপ্পী হায়বা ৱাফম অসিগী খুদম হিমাচলনা ওইরি।

মরুপশিং,

খোঙজেল য়াংনা তীকা থাদোকপনা মশিং য়াম্লবা নহাশিংদা থবক পীনবগী পাম্বৈ অমা ওইরিবা হিমাচলগী তুরিজম ইন্দস্ত্রীদা কান্নবসু পীরগনি। অদুবু নীংশিংগদবদি, ঐখোয়না ভেক্সিন কাপ্লবদি মাস্ক উপ্পা অমসুং গজ অনিগী অরাপ্পা থম্বা অসিদি কাওরোইদবনি। ঐখোয়গী হিমাচলগী মীওইশিংনি, ঐখোয়না উন তাবা লেপখ্রে হায়বা খংই। অদুম ওইনমক ঐখোয়না চৎনবা থোরকপা মতমদা চপ মান্নবা মওংদা চেকশিন্না খোঙ থাংদুনা চৎলি। উন তাবা লেপখ্রবসু ঐখোয়না চেকশিনবা লেপ্তে হায়বা অসি ঐখোয়না খংই। নোং তাখ্রবা মতুংদা, নোং তাবা লেপখ্রবসু, ছাতি থুপচিনখ্রবসু ঐখোয়না চৎপদদি চেকশিন্না চৎলি। মসিগা মান্নবা মওংদা, কোরোনাগী লাইচৎ মতুংদসু চেকশিনবা মথৌ তাবা থৌওংশিংদি ঐখোয়না চেকশিনবা তাই। কোরোনাগী মতমফা হিমাচল প্রদেশতা ৱর্ক ফ্রোম হোম, ৱর্ক ফ্রোম এনীৱেয়র, মসি নহা ওইবা মীওই কয়ানা খ্বাইদগী পাম্নবা দিস্তিনেসন ওইখি। হিমাচলদা লৈরিবা শহরশিং অসি ফেসিলিতীশিং ফগৎলকপা অমসুং ইন্তর্নেত কনেক্তিবিতী হেনগৎলকপদগী চাউনা কান্নবা ফংলি।

ইচিল-ইনাওশিং,

হিমাচল প্রদেশনা কোরোনাগী মতমদসু পুন্সি অমসুং হিংনবগী পাম্বৈদা কনেক্তিবিতীনা পীবা অফবা শাফু অদু ফাওখি। লম্বী-থোং, রেল, এয়র কনেক্তিবিতী নত্ত্রগা ইন্তর্নেৎ কনেক্তিবিতী ওইরবসু ঙসি লৈবাক অসিনা মসিদা খ্বাইদগী মরু ওইবা মীৎয়েং চংলি। প্রধান মন্ত্রী গ্রামীন সরক য়োজনাগী মখাদা ঙসি য়ুম ৮-১০ থাবা মফমশিংসু লম্বী-থোং লৈহনদুনা ফাওনহনখ্রে। হিমাচলগী নেস্নেল হায়ৱেশিং পাকথোক-চাউথোক্লি। তুরিজমনা মপাঙ্গল কনখৎলক্লিবা কনেক্তিবিতীগী কান্নবা হকথেংননা ফংলি, উহৈ-ৱাহৈশিং অমসুং মনা-মশিং পুথোক্লিবা লৌমীশিংদসু কান্নবা ফংহল্লি। ইন্তর্নেতনা খুঙ্গং-খুঙ্গংদা য়ৌরকপনা হিমাচলগী নহা ওইরিবা তেলেন্তশিংনা মখোয়গী নাৎ অমসুং তুরিজমগী লমদা লৈরিবা অনৌবা ওইথোকপা য়াবশিং অসি লৈবাক অমসুং মীরৈবাক্তা য়ৌহনবা ঙম্লি।

ইচিল-ইনাওশিং,

মোদর্ন তেক্নোলোজী, দিজিতেল তেক্নোলোজীগী কান্নবা অসিনা তুংদা লাক্কদৌরিবা মতমশিংদা হিমাচলদা হেন্না কান্নবা ফংহল্লগনি। এজুকেসন অমসুং হেল্থকী লমদা অখন্ননা অচৌবা অহোংবশিং পুরক্লগনি। মসিনা দোক্তরশিং অমসুং ওজাশিংবু অচৌবা হোস্পিতালশিং, অরাপ্পা মফমফা লৈবা স্কুলশিং অমসুং হেল্থ সেন্তরশিংগসু ভর্চ্যুএল ওইনা কনেক্ত তৌহনবা ঙম্লগনি।  

হন্দক্তা লৈবাক অসিনা অতোপ্পা ৱারেপ অমা লৌখি, মসি ঐহাক্না অখন্ননা হিমাচলগী মীয়ামদা পাউদমজনীংই। মসি দ্রোন তেক্নোলোজীগা মরী লৈনবা কাংলোনশিংদা পুরকখিবা অহোংবগী মতাংদনি। হৌজিক মসিগী কাংলোনশিং অসি য়াম্না লায়থোকহনখ্রে। মসিনা হিমাচলদা হকশেলদগী হৌরগা লৌউ-শিংউগুম্বা সেক্তর কয়াদা অনৌবা ওইথোকপা য়াবশিং লৈহল্লগনি: দ্রোন অসি হীদাক-লাংথকশিংগী হোম দেলিভরীদা হৌজিক্তি শীজিন্নবা য়ারগনি, মসি হৈকোলশিংদসু শীজিন্নবা য়ারগনি অমসুং লেন্দ সর্ভেদসু শীজিন্নরি। চিংগী মফমফা লৈরিবা মীয়ামগী পুন্সিদা নীংথিজনা দ্রোন তেক্নোলোজী শীজিন্নবনা অওনবা পুরকপা ঙমগনি হায়বা ঐহাক্না খংই। উমংশিং ঙাকশেন্নবা অমসুং য়োকখৎনবগীদমক হিমাচলফা দ্রোন তেক্নোলোজী অসি চাউনা শীজিন্নবা য়াগনি। কেন্দ্র সরকারনা গভর্নমেন্ত সর্ভিসেসতসু মোদর্ন তেক্নোলোজী য়ারিবা মখৈ শীজিন্ননবা হোৎনরি।

ইচিল-ইনাওশিং,

ঙসিদি হিমাচল অসি খোঙজেল য়াংনা চাউখৎপগী লম্বীদা চংশিল্লি। অদুবু ঙসি হিমাচলদা মহৌশাগী ওইবা খুদোংথিবশিংনা অচৌবা শীংনবা অমা ওইরক্লি। হৌখিবা মতমদা লাইবকথিবা থৌদোক কয়াদা মরুপ কয়াগী পুন্সি মাংখি। মসিগীদমক ঐখোয়না সাইন্তিফিক সোল্যুসনশিং তম্না খোঙজেল য়াংনবা চংশিনবা তাই, লেন্দস্লাইদশিংগী মতাংদা ঙন্না ৱার্নিং পীবা ঙম্বা সিস্তেমগা মরী লৈনবা রিসর্চ থৌগৎপা তাই। মসিতা নত্তনা চিংগী মফমশিং ওইবগী মথৌ তাবশিং অদু য়েংলগা ঐখোয়না কনস্ত্রক্সনগা মরী লৈনবা তেক্নোলোজীদা অনৌবা ইনোভেসনশিং পুথোক্নবা ঐখোয়গী নহারোলশিংবু ইথিল পীবা তাই।

মরুপশিং,

খুঙ্গংশিং অমসুং কম্ম্যুনিতী অসি কান্নরবা ফলশিংনা করম্না শম্নহনবা ঙম্বগী হায়বগী অচৌবা খুদম ৱাতর লাইফ মিসন্না ওইরি। মতম অমদা ওইথোক্লোই হায়না খল্লম্বা হিমাচলগী মফমশিংদা ঙসিদি তোতি ঈশিং য়ৌহনবা ঙম্লে। ফোরেস্ত রেসোর্সশিংগী মতাংদসু চপ মান্নবা থৌশিল অসি পাইখৎপা য়াগনি। মসিদা খুঙ্গংশিংদা লৈরিবা সেল্ফ-হেল্প গ্রুপশিংগী ঐখোয়গী ইচে-ইচলশিংনা শরুক য়াবা হেনগৎহনবা য়াগনি। মরু ওইনা হিমাচলগী উমংশিংদা কান্নরবা পাম্বী, সলাদ, মনা-মশিং কয়া লৈ, মসিবু পাম্নবা লেপ্তনা হেনগৎলক্লি। সাইন্তিফিক ওইবা মওং অমদা ঐখোয়গী লৌশিং লৈবা ইচে-ইচলশিংনা লন অসি হেনগৎহনবা য়াগনি। হৌজিক্তি ঐখোয়গী ইচে-ইচলশিংনা ই-কম্মর্সকী খুত্থাংদা অনীবা লম্বী কয়া ফংলি। ওগস্ত ১৫দা, ঐহাক্না লাল কিলাদগী এস.ঐচ.জি.শিংগীদমক্তা কেন্দ্র সরকারনা অখন্নবা ওনলাইন প্লেৎফোর্ম অমা শেম্লগনি হায়না ঐহাক্না ফোঙদোকখি। মসিগী খুত্থাংদা, ঐখোয়গী ইচে-ইচলশিংনা মখোয়গী পোত্থোকশিং অদু লৈবাক অসিদা অমদি মালেমদা য়োনবা ঙম্লগনি। হিমাচলগী ইচে-ইচলশিংনা সেম, কোমলা, কিন্নো, চেংগুম, খামেন অশিনবী, অসিগুম্বা অতৈ পোত্থোক কয়া লৈবাক অসিগী কাচিন-কোয়া শিনবা থুংনা য়ৌহনবা ঙম্লগনি। কেন্দ্র সরকারনা লুপা করোর লাখ ১গী অখন্নবা এগ্রি-ইনফ্রাস্ত্রকচর ফন্দ অমসু থমখ্রে। ইচে-ইচলশিংনা সেল্ফ-হেল্প গ্রুপশিং, ফার্মর্স ‘প্রদ্যুসর্স’ এসোসিএসনশিংদা য়াওবা ওইরবসু মখোয়না ফন্দ অসিগী মতেংনা মখোয়না লৈরিবা খুল অদুগী মনাক্তা কোল্দ স্তোরেজ নত্ত্রগা ফুদ প্রোসেসিং য়ুনিৎশিং হাংবা য়াগনি। মসিনা মখোয়গী উহৈ অমসুং মনা-মশিং অদু থম্নবগীদমক্তা অতোপ্পদা মীপাল তাংবগী মথৌ তাহল্লরোই। মসিদগী হিমাচলগী হোৎনবা কনবা লৌমীশিং অমসুং হৈ-লৈ থারিবশিংদা চাউনা কান্নবা পীগনি হায়না ঐহাক্না থাজৈ।

মরুপশিং,

আজাদী কা অমৃতকী মতম অসিদা ঐহাক্না হিমাচলগী লৌমীশিংদা ৱাফম অমগা হায়জবা পাম্মি। লাক্কদৌরিবা চহি ২৫ অসিদা, ঐখোয়না হিমাচলগী লৌউ-শিংউবু অমুক হন্না organic ওইহন্নবা হোৎনবা ঙমগদ্রা? তপ্না-তপ্না ঐখোয়গী লৈপাকপু কেমিকেলশিং য়াওহনদনবা ঐখোয়না হোৎনবা তাই। তুংলমচৎতা অফবা লৈহাও চেনবা লৈবাক ওইনবা অমসুং ঐখোয়গী ইচাশিংগী হকচাং ফনা থম্নবা মাইকৈদা ঐখোয়না চংশিনবা তাই। ঐহাক্না হিমাচলগী তৌবা ঙম্বা মতিক-ময়াইদা থাজবা থম্মি। হিমাচলগী নহাশিংগী শক্তিদা থাজবা থম্মি। মতৌ অসুম্না হিমাচলগী নহারোলনা ঙমখৈ ঙাকশেনবা মাংজিল থাবা ঙমগনি, মসিগা মান্নবা মওংদা লৈপাক লৈহাও ঙাকশেনবদা ঐখোয়গী হিমাচলগী খুঙ্গং খুদিংমক, লৌমী খুদিংমক্না মাংজিল থাদুনা থৌদাং লৌগনি। হিমাচলনা ওইথোকপা ঙমদবা অদু ওইথোকহন্নবা অদোমগী আইদেন্তিতী মপাঙ্গল কনখৎহন্নবা মখা তানা হোৎনগনি, মসি হায়বগা লোইননা ঐহাক্না ময়ামদা অমুক হন্না নুংঙাইবা ফোঙদোকচরি। ভেক্সিনেসনগী পান্দম মপুং ফান ফংবা ঙম্বা লৈবাক অসিগী অহানবা রাজ্য হিমাচলনা ওইবদা য়াইফ-পাউজেল পীজরি। ঙসি ঐখোয়না লৈবাকমচাশিংদা কোরোনাদগী চেকশিন্না লৈনবা অমুক হন্না হায়জরি। হৌজিক ফাওবদা ভেক্সিন দোজ করোর ৭০রোম কাপ্পা ঙমখ্রে। লৈবাক শিনবা থুংবদগী দোক্তরশিং, নর্সশিং, অঙ্গনৱাদি-আশাগী ইচে-ইচলশিং, লোকেল এদমিনিস্ত্রেসন, ভেক্সিন মেন্যুফেকচর তৌরিবা কম্পনীশিং অমসুং ভারতকী বিজ্ঞানিকশিংগী থৌদাং চৌনা লৌখি। খোঙজেল য়াংনা ভেক্সিন কাপ্লি, অদুবু ঐখোয়না চেকশিনবা ৱাৎপা তৌরোইদবনি অমসুং ঐহাক্না মন্ত্র অসি দে ১দগী হৌদুনা শোন্দুনা লাক্লি। ঐখোয়না “হীদাকসু চেকশিনবসু” হায়বা মন্ত্র অসি কাউফদে। অমুক হন্না ঐহাক্না হিমাচলগী মীয়ামদা য়াইফ-পাউজেল পীজরি। হন্না-হন্না থাগৎচরি!

*****