માહિતી અને પ્રસારણ મંત્રાલયે માહિતી અને પ્રસારણ મંત્રાલયની પત્રકાર કલ્યાણ યોજનાની હાલની માર્ગદર્શિકા પર નજર રાખવા અને તેમાં ફેરફારો માટે યોગ્ય ભલામણો કરવા માટે પ્રસિદ્ધ પત્રકાર અને પ્રસાર ભારતીના સભ્ય શ્રી અશોક કુમાર ટંડનની અધ્યક્ષતામાં દસ સભ્યોની સમિતિની રચના કરી છે. મીડિયા ઇકો સ્પેસમાં થયેલા ઘણા ફેરફારોના પ્રકાશમાં આ નિર્ણયને મહત્વનો ગણવામાં આવે છે, જેમાં કોવિડ-19 ને કારણે મોટી સંખ્યામાં પત્રકારોની ખોટ અને "કાર્યકારી પત્રકારો" ની વ્યાખ્યાનો વ્યાપક આધાર સામેલ છે.

ઘણા વર્ષોથી અસ્તિત્વમાં રહેલી પત્રકાર કલ્યાણ યોજનાને ભવિષ્યના દ્રષ્ટિકોણથી ફરી વિચારવાની અને આ દેશના પત્રકારોના લાભ માટે વ્યાપક કવરેજની જરૂર છે. વ્યવસાયિક, સલામતી, આરોગ્ય અને કાર્યકારી સ્થિતિ કોડ 2020ના અમલીકરણ સાથે, કાર્યકારી પત્રકારોની વ્યાખ્યાને પરંપરાગત અને ડિજિટલ બંને માધ્યમોમાં કામ કરનારાઓને તેના ક્ષેત્રમાં સમાવવા માટે વિસ્તૃત કરવામાં આવી છે. વધુમાં, આ યોજના હેઠળ કલ્યાણ અને લાભ મેળવવાના દ્રષ્ટિકોણથી માન્યતાપ્રાપ્ત અને બિન-માન્યતાપ્રાપ્ત પત્રકારો વચ્ચે સંભવિત સમાનતાને જોવાનું પણ જરૂરી માનવામાં આવ્યું.

માહિતી અને પ્રસારણ મંત્રાલયે તાજેતરના સમયમાં કોવિડ-19ના કારણે કમનસીબે મૃત્યુ પામેલા પત્રકારોના પરિવારોને અનુગ્રહ રાશિ આપવા માટે ખૂબ જ સક્રિય પગલાં લીધાં છે અને 100થી વધુ કેસોમાં પ્રત્યેકને 5 લાખ રૂપિયાની સહાય આપવામાં આવી છે.

સમિતિ બે મહિનાની અંદર સમયબદ્ધ રીતે તેનો અહેવાલ આપે તેવી અપેક્ષા છે. તેની ભલામણો સરકારને પત્રકારોના લાભ માટે નવેસરથી માર્ગદર્શિકા ઘડવામાં સક્ષમ બનાવશે.

શ્રી અશોક કુમાર ટંડનની અધ્યક્ષતાવાળી સમિતિમાં શ્રી સચ્ચિદાનંદ મૂર્તિ, નિવાસી સંપાદક, ધ વીક, શ્રી શેખર ઐયર, ફ્રીલાન્સ જર્નાલિસ્ટ, શ્રી અમિતાભ સિન્હા, ન્યૂઝ 18, શ્રી શિશિર કુમાર સિન્હા, બિઝનેસ લાઇન, શ્રી રવિન્દર કુમાર, વિશેષ સંવાદદાતા, ઝી ન્યુઝ, શ્રી હિતેશ શંકર, સંપાદક, પંચજન્ય, સુશ્રી સ્મૃતિ કાક રામચંદ્રન, હિન્દુસ્તાન ટાઇમ્સ, શ્રી અમિત કુમાર, ટાઇમ્સ નાઉ, શ્રીમતી વસુધા વેણુગોપાલ, ઇકોનોમિક ટાઇમ્સ અને પ્રેસ ઇન્ફર્મેશન બ્યુરોના એડીજી શ્રીમતી કંચન પ્રસાદનો સમાવેશ થાય છે.

SD/GP/BT