ভারতকী উপ-রাস্ত্রপতিনা শ্রী এম. ভেঙ্কায়া নাইদুনা ঙসি কোবিদ-১৯ লায়চৎ অসিবু লান্থেংননবা দি.আর.দি.ও.গী লেব অমা ওইরিবা, দি.আই.পি.এ.এস.(দিফেন্স ইন্সতিত্যুৎ ওফ ফিজিওলোজী এন্দ এলাইদ সাইন্সেস)কী সাইন্তিস্তশিং অমসুং ফ্রন্তলাইন ৱার্করশিংনা লৌরিবা থৌদাং অসিদা থাগৎপা ফোংদোকখ্রে অমসুং তুংদা অসিগুম্বা লায়চৎ অমনা থোকহলকপা য়াবা অমাং-অতাশিং লান্থেংনবগীদমক হেন্না কনবা রিসর্স চৎথনবা পাউতাক পীখ্রে।  

চাওরাক্না দি.আই.পি.এ.এস.দগী সাইন্তিস্ত অমসুং তেক্নিসিয়ন ২৫রোম উপ-রাস্ত্রপতিনা উপ-রাস্ত্রপতি নিবাস্তা বার্তোন তৌখি। দি.আর.দি.ও.গী চেয়রমেন, দাঃ জি. সতীশ রেদ্দীশু মখোয়গী মরক্তা শরুক য়াখি।
মখোয়গা উনরদুনা শ্রী নাইদুনা হায়খি মদুদি লায়চৎ অসিনা অমুক্তা থোকখিদ্রিবা মওংদা হেলথ ক্রাইসিস ওইহল্লি অমসুং মালেম পুম্বদা পুন্সি অমসুং পুন্সি মহিংদা শাথিনা শোকহল্লি। কোবিদ-১৯গী লায়েং অমসুং শিল-লাংনবা মখল কয়াগী পোত্থোকশিং শেমগৎ শাগৎলিবা দি.আই.পি.এ.এস. অমসুং দি.আর.দি.ও.গী লেবশিংবু থাগৎপা ফোংদোক্লদুনা মহাক্না হায় মদুদি এস.এ.আর.এস.-সি.ও.ভি.-২গী অনৌবা ভেরিএন্ত থোক্লকপা অসিদা, তুংদা লাক্কদবা অমাং-অতা কয়াদগী লাকশিন্নবা হোৎনবা অসি য়াম্না মরু ওইরি।  
দাঃ জি. সতীশ রেদ্দীনা কোবিদ-১৯গী লায়েং অমসুং শিল-লাংনবা দি.আর.দি.ও.গী লেবনা মখল কয়াগী পোত্থোকশিং শেমগৎ শাগৎলিবা মরমদা উপ-রাস্ত্রপতিদা পাউদমখি। মহাক্না উপ-রাস্ত্রপতিবু সাইন্তিস্ত অমসুং তেক্নিসিয়নশিং বার্তোন তৌবিখিবা অমসুং মহাক্কী ৱাখল মখোয়দা ফোংদোকপগীদমক থাগৎপা ফোংদোকখি।

দি.আই.পি.এ.এস.কী দাইরেক্তর, দাঃ রজিব বার্শনীশু শরুক য়াখি।

*****