ঐহাক্কী নুংশিজরবা ইরৈবাকচাশিং,

খুরুমজরি!

১. ভারত্তা অমসুং মপাল লৈবাক্তা লৈরিবা ভারত মচা পুম্নমক্তা ঐহাক্না নীংখা তমখিবা নুমিৎকী য়াইফ-পাউজেল পীবা ফংজবা অসি য়াম্না নুংঙাইবা ৱাফম অমনি! নুমিৎ অসি য়াম্না অখন্নবা ওই মরমদি ভারতনা নীংখা তমখিবগী চহি ৭৫শুরকপগী অহৌবা ওইনা ‘আজাদী কা অমৃত মহোৎসব’ পালন তৌরি। মরু ওইবা থৌরম অসিদা ঐহাক্না ময়াম পুম্নমকপু থমোই শেংনা নুংঙাইবা ফোঙদোকচরি!

২. নীংখা তম্বা নুমিৎ অসি ঐখোয়গী ওইনদি নীংতম্বগী কুহ্মৈ অমনি। মসি নীংতম লান্মীগী চারোনশিং; মশক খঙনবা খরা, মশক খঙনদবা খরনা ওইথোকপা ঙমহনখি। মখোয়না চাউনা কত্থোকখি। ঙসি অদোম অমদি ঐহাক্না নীংতম্না নুংঙাইনা হিংলিবা অসি মখোয়গী থৌনা ফবা থৌদাংশিং অদুনা ঙমহল্লিবনি। অসিগুম্বা শেংলবা থৌনা ফরবা অথৌবশিংবু নীংশিংদুনা ঐহাক্না ইকোক-নোন্না খুরুমজরি।

৩. অতৈ লৈবাক কয়াগুম্না ঐখোয়গী লৈবাকসু লোইলম লৈঙাক্কী মখাদা অরানবা ৱায়েল অমসুং মীওৎ-মীনৈ কয়া মায়োক্নখি। ভারত অসি ময়ামদগী তোপ-তোপ্পা ওইখিবগী মরমদি মহাত্মা গান্ধীনা লুচিংখিবা ঐখোয়গী নীংতম ইহৌ অসি অচুম্বা অমসুং অহিংশাগী ৱাখল্লোন্দা য়ুম্ফম ওইখি। মহাক অমসুং অতৈ লৈবাক অসিগী নীংতম লাম্মী পুম্নমক্না ঐখোয়দা লোইলম লৈঙাক্তগী লৈবাক অসি নীংতম্বা ফংনবতা নত্তনা অমুক হন্না শেমগৎনবা মমল য়াম্লবা ব্ল্যুপ্রিন্ত পীবীরমখি। গান্ধীজীনা ইহৌ অদু ভারতকী চৎনবীশিং অমসুং মীওইবগী ইকাই খুম্নবা অমুক হন্না ফংনবনি। 

৪. ঐখোয়না নীংখা তম্বগী চহি হুম্ফুতরা-মঙাগী খোঙচৎ অসি হৌজিক ঐখোয়না হন্না য়েংলুবদা ঐখোয়না চাউনা খুমাং চাউশিল্লিবা অসি চাউথোকচবা পোক্নবগী মরমশিং ওইরি। গান্ধীজীনা অচুম্বা মাইকৈদা তপ্না অমসুং লেপ্তনা চংশিনবা অসিনা অরানবা মাইকৈদা থুনা চংশিনবদগী হেন্না ফৈ হায়না তাকপীরমখি। চৎনবী মখল কয়া লৈরিবা লমদম ‌ওইরিবা লোইননা খ্বাইদগী চাউবা অমসুং খ্বাইদগী ফজবা দেমোক্রেসী লৈরিবা ভারতকী অঙকপা মতৌ অসি মালেম্না হনগৎনা য়েংনরি।

নুংশিজরবা ইরৈবাকচাশিং,

৫. হন্দক্তা লোইশিনখিবা তোকিও ওলিম্পিক্সতা ঐখোয়গী শান্নরোইশিংনা মখোয়গী শীংথানীংঙাই ওইবা পর্ফোর্মেন্সশিংগা লোইননা লৈবাক অসিগী মীংচৎ পুরকখি। ওলিম্পিক্সতা ভারতনা শরুক য়ারকপা চহি ১২১ অসিদা হন্দক্না মেদল মশিং খ্বাইদগী য়াম্না লৌবা ঙমখি। অপনবা কয়া মায়োক্নদুনা ঐখোয়গী ইচানুপীশিংনা শান্নবুংদা মালেমগী থাক্কী মাইপাকপা পুরকখি।  শান্ন-খোৎনবগা লোইননা পুন্সিগী হীরম পুম্নমক্তা নুপীশিংনা শরুক য়াদুনা অমসুং মাইপাকপা পুরক্তুনা চাউনা অহোংবশিং পুরক্লি। হায়র এজুকেসনগী ওইবা ইন্সতিত্যুসনশিংদগী আর্মদ ফোর্সেস্তা, লেবোরেতোরীশিংদগী শান্নবুংশিংদা ঐখোয়গী ইচানুপীশিংনা শরুক য়ারি।  ঐখোয়গী ইচানুপীশিংনা মাইপাকপা অসিদা ঐহাক্না তুংলমচৎকী চাউখৎলবা ভারত অমা উবা ফংই। ঐহাক্না মমা-মপা খুদিংমক্তা অসিগুম্বা আশা লৈরবী ইচানুপীশিং অসিগী ইমুং-মনুংশিংদগী তমশিন্নবা অমসুং মখোয়গী মচানুপীশিংদা চাউখৎপা পুরক্নবগী লমশিং থীদুনা চংহন্নবগী খুদোংচাবশিং পীবীনবা হায়জরি।

৬. মমাং চহিগুম্না চহি অসিদসু লাইচৎনা মরম ওইদুনা নীংখা তম্বা নুমিৎ পালন তৌবগী চাং অসি হন্থরকপা য়াই অদুবু ঐখোয়গী থমোইদদি মতম চুপ্পদা অদুমক হরাও-নুংঙাইবনা থনদুনা লৈগনি। লাইচৎ অসিগী মশিংদি হন্থরক্লে অদুবু কোরোনাভাইরসতি হৌজিক ফাওবা চৎখিদ্রি। চহি অসিদা অমুক হন্না শন্দোকখিবনা শোকহনখিবশিং অসিদগী ঐখোয় থোরকপা ঙমদ্রি। মমাং চহিদা ঐখোয় পুম্নমক্না থোইদোক-হেন্দোক্না হোৎনদুনা লাইনা শন্দোকপা অসি লাকশিনবদা মাই পাকখি। অতেনবা মতমগী মনুংদা ঐখোয়গী বিজ্ঞানিকশিংনা ভেক্সিনশিং পুথোকখি। মরম অসিনা চহি অসি হৌরকপদা ঐখোয়না পুৱারীগী খ্বাইদগী চাউবা ভেক্সিনেসন এক্সর্সাইজ হৌদোকপদা আশাগী মঙাল উনবগী মরম ওইখি। অদুবু অনৌবা ভেরিএন্তশিং অমসুং অতৈ থোরক্কনি খল্লুদবা মরমশিংদগী ঐখোয়না শাথিবা অনিশুবা ৱেব অমগী চৈথেং ফংখি। পুন্সি কয়া কনবা ঙমহৌদবা অমসুং অমুক্তা থোকখিদ্রিবা খুদোংথিবা অসিদা মীওই কয়া অমনা চাউনা অৱা চৈথেং ফংখিবা অসিদা ঐহাক্না তশেংনা নুংঙাইতবা পোকখি। অৱাবা তারবা ইমুং-মনুংশিংদা ঐহাক্না অৱাবা ফোঙদোকচবা মতমদা চপ মান্নবা ইন্তেন্সিতীদা ঐহাক্না লৈবাক পুম্বগী মহুৎ শিন্দুনা ফোঙদোকচরি।

৭. তমথিবা শক উদবা য়েক্নবা অসিগী মায়োক্তা সাইন্সনা শীংথানীংঙাই ওইবা খোঙজেলদা লান্থেংনরি। লৈখিদবশিংদগী কনবা ঙমখিবশিংনা মশিং হেন্না য়াম্বা অসিনা ঐখোয়বু থেমজিল্লি। অনিশুবা ৱেব অসিগী মপাঙ্গল শোন্থরকপা উবা ফংনবা শীংনবশিং মায়োক্নবদা অমত্তা ওইনা লেপখিবা অসিনা ঐখোয়দা মতেং ওইখি। অমুক হন্না, অনিশুবা ৱেবকী চৈথেং অসি লাকশিন্নবা ঐখোয়গী কোরোনা ৱারিয়রশিং, দোক্তরশিং, নর্সশিং অমসুং হেল্থ ৱর্করশিং, এদমিনিস্ত্রেতরশিং অমসুং অতৈশিংনা থৱাই খুপাক্তা হাপতুনা থেংনখি।

৮. অনিশুবা ৱেব অসিনা ঐখোয়গী পব্লিক হেল্থকিয়র ইনফ্রাস্ত্রকচর  অসিদা চৈথেং পীখি। তশেংবদি, অসিগুম্বা অচৌবা খুদোংথিবা অসি চাউখৎলবা ইকোনোমীশিংদা ফাওবা থেংনবা ঙম্বা ইনফ্রাস্ত্রকচর লৈতে।  অৱাৎপশিং অসি মেনখৎনবা লানগুম্বা থবক পাইখৎখি। লুচিংবশিংনা শীংনবা অসি মায়োক য়াখি অমসুং সরকারনা হোৎনখিবশিং অদুদা রাজ্যশিং, প্রাইবেৎ সেক্তর হেল্থকিয়র ফেসিলিতীশিং, সিবিল সোসাইতী অমসুং অতৈনা পাইখৎপা থৌরাংশিংনা মতেং পাংশিনখি। অখন্নবা মিসন অসিদা মপাল লৈবাকশিংনা তঙাই ফদবশিং পুকচেল শেংনা পীবীরকখি, ভারত্তা পীরকখিবা অদুগুম্না ঐখোয়নসু লৈবাক কয়াদা হীদাক-লাংথক, ইক্বিপমেন্ত অমসুং ভেক্সিনশিং মতেং পাংখি। মতেং পীবীরকখিবা মালেম অসিদা লৈরিবা মুরুপশিংদা ঐহাক্না তৌবীমল খঙবা উৎচরি।

৯. খোঙথাংশিং অসিনা মরম ওইরগা লৈবাক অসিনা মহৌশাগী ফীভমদা হঞ্জিলকপা মানবা মওং অমদা লৈবা ঙম্লিবনি। করিগুম্বা ঐখোয়না পরা নীংথিনা তমহৌরবদি হন্দক্তি হেন্না চেকশিনবগী মতম ইরে হায়বা খঙবা থোকই। ঐখোয়না চেকশিনবা ৱাৎপা তৌরোইদবনি। ভেক্সিন অসি সাইন্সনা ঐখোয়দা পীবীবা খ্বাইদগী অফবা ঙাকশেল অমনি। ঐখোয়গী লৈবাক্তা চত্থরিবা মালেমগী খ্বাইদগী চাউবা ভেক্সিনেসন কেম্পেন অসিগী মখাদা হৌজিক ফাওবদা প্রজা করোর ৫০ হেন্না তীকা থাদোকপা ঙমখ্রে। হৌজিক ফাওবা তীকা থাদোক্ত্রিবা তীকা থাদোকপা য়ারবা প্রজা পুম্নমক্তা অথুবদা তীকা থাদোক্নবা অমসুং অতৈদসু ইথিল পীবীনবা ঐহাক্না হায়জরি।

নুংশিজরবা ইরৈবাকচাশিং,

১০. লাইচৎ অসিনা শেন্মীৎলোন্দা পীখিবা শাফু অসি হকশেলদা পীখিবা শাফু অদুগুম্না শাথিবা ওইখি। সরকার অসিনা লোৱর মিদল ক্লাসশিং অমসুং লায়রবশিং লোইননা স্মোল অমসুং মীদিয়ম ইন্দস্ত্রীশিংগীদমক্তা ৱাখি। লোকদাউন অমসুং চত্থোক-চৎশিন্দা অথিংবশিং লৈখিবনা মরম ওইরগা অৱাবা মায়োক্নখিবা শিন্মীশিং অমসুং ইমপ্লোয়রশিংগী অৱাবসু উখি। মখোয়গী অৱাবা অদু উরদুনা সরকারনা মমাং চহিদা তেংবাং পীবগী থৌরাং মথং-মথং পাইখৎখি। চহি অসিদসু সরকারনা মে অমসুং জুনদা মীওই করোর ৮০রোমদা চেং-হৱাই য়েন্থোকখি। কান্নবা অসি দিৱালী ফাওবা শাংদোকখি। মসিগী মথক্তা সরকারনা কোবিদনা শোকহল্লবা সেক্তরশিং মপাঙ্গল হাপ্নবা লুপা করোর লাখ ৬কা লিশিং ২৮গী অনৌবা স্তিম্যুলস পেকেজ অমা লাউথোকখি। মরু ওইনা নুংঙাইবা ৱাফমদি চহি অমা অসিদা মেদিকেল ফেসিলিতীশিংগীদমক্তা লুপা করোর লিশিং ২৩গা ২২০গী শেনফম চাদিং তৌখি।

১১. ভারতকী খুঙ্গংদা মরু ওইনা লৌউ-শিংউগী সেক্তর অসি অৱাবা পুম্নমক থেংনদুনা মখা চত্থরিবা অসিদা নুংঙাইবা পোকই। কানপুর দেহাৎ জিলাগী ঐহাক্কী হৌরকফম খুঙ্গং ওইরিবা পরোঙ্খদা হন্দক চৎলুবদা খুঙ্গংগী মফমশিংদা লৈরিবা মীয়ামগী পুন্সি ফগৎহন্নবা ইনফ্রাস্ত্রকচর ফগৎহল্লম্বা উবা ফংবদা ঐহাক্না য়াম্না নুংঙাইবা পোকখি। মমাংঙৈগা য়েংনবদা শহর অমসুং খুঙ্গংগী মরক্তা লৈরম্বা খেন্নবাশিং অদু য়াম্না হন্থরে। ভারত অসি খুঙ্গংনা নম্বনা মসিদা চাউখৎপা পুরকপদা থিন্থবা তৌরোইদবনি। মরম অসিনা প্রধান মন্ত্রী কিসান সম্মান নিধি য়াওনা অখন্নবা কেম্পেনশিং ঐখোয়গী লৌমীশিংগী য়াইফনবা পাইখৎলি।

১২. খোঙথাংশিং অসি আত্মনির্ভর ভারতকী মঙলানগা পুন্না চৎমিন্নরি। শেন্মীৎলোনগী লৈজরিবা কেপাসিতী অসিদা থাজবা থমদুনা সরকারনা ঙাকশেল, হকশেল, সিবিল এভিএসন, পাৱর অমসুং অতৈ সেক্তরশিং চাউথোকহল্লি। অকোইবদা শোকহন্দবা, ইনর্জীগী রিন্যুএবল সোর্সশিং, মরু ওইনা সোলর পাৱর থৌগৎনবা সরকারগী অনৌবা থৌরাংশিং অসি মালেম্না থাগৎবরকখি। করিগুম্বা ইজ ওফ দুইং বিজিনেস ফগৎলক্লবদি মসিনা পুম্নমক্কী ওইনা ইজ ওফ লিবিংদা অফবা শাফু অমা পীগনি। মসিগী মথক্তা মীয়ামগী য়াইফনবগীদমক্তা অখন্নবা মীৎয়েং চংলি। খুদম ওইনা, লুপা করোর ৭০,০০০গী ক্রেদিৎ লিঙ্ক সবসিদী স্কীমগী মখাদা মশাগী ওইবা য়ুম অমা লৈনবগী মঙলান অদু মঙফাওনহল্লি। এগ্রিকলচরেল মার্কেতিং রিফোর্মশিং মথং-মথং পুরকপনা ঐখোয়গী “অন্নদাতা’ লৌমীশিংবু শক্তি পীরগনি অমসুং মখোয়গী পোত্থোক্তা মমল হেন্না ফংহনবদা মতেং পাংলগনি। মসি ভারত মচা খুদিংমক্কী পোতেন্সিএল পুথোকপা ঙম্নবা সরকারনা লৌখৎখিবা থৌরাং খরা অদুনি।

নুংশিজরবা ইরৈবাকচাশিং,

১৩. জম্মু কশ্মিরদা অনৌবা মঙাল অমা লাক্লি। দেমোক্রেসী অমসুং রুল ওফ লোদা থাজবা থম্বা স্তেকহোল্দর পুম্নমক্কা খন্ন-নৈনবগী থৌওং পাইখৎপা হৌখ্রে। ঐহাক্না মীয়ামদা মরু ওইনা জম্মু কশ্মিরগী নহারোলশিংদা খুদোংচাবা অসি লৌদুনা দেমোক্রেতিক ইন্সতিত্যুসনশিংগী খুত্থাংদা মখোয়গী অনীংবশিং থুংহন্নবা হোৎনৌ হায়না হায়জরি।

১৪. হীরম পুম্নমক্তা খুমাং চাউশিল্লকপগা লোইননা ভারতনা মালেমগী ফম্পাক্তা কল্লিবা থাক অসি ৱাংখৎলক্লি মরমদি তোঙান-তোঙানবা মরু ওইবা মল্তিলেতরেল ফোরমশিং লোইননা তোঙান-তোঙানবা লৈবাকশিংগী লৈরিবা বাইলেতরেলগী ওইবা মরীশিং পুনশিন্নবা ঐখোয়না শরুক য়ারিবা অসিদা মসিগী মমি তারি।

নুংশিজরবা ইরৈবাকচাশিং,

১৫. ভারতনা চহি ৭৫গী মমাংদা নীংখা তম্বা ফংখিবা মতমদা থাজগন্দবা মীওই কয়াগী ৱাখল্লোন্দা ভারত্তা কুইনা দেমোক্রেসী লৈবা ঙম্লোই হায়না খনখি। অরিবা মতমদগী হৌনা দেমোক্রেসীগী মরা অসি ঐখোয়গী লৈবাক্তা মরা তাখ্রে হায়বা মখোয়না খঙবা ৱাৎখি অমসুং হৌজিক্কী মতম অসিদসু খেন্নবা থমদনা মপুং-মরৈ ফারবা মীওই পুম্নমক্তা ভোৎ থাদবগী হক পীবদা ভারতনা নোংচুপ থংবা লৈবাক কয়াদগী মাংজিল থারি।  মসি পুথোকপীরম্বা শিংনা মীয়ামগী লৌশিংদা মখোয়না থাজবা থমখি অমসুং ‘ৱি, দি পপল ওফ ইন্দিয়া’ অসিনা ভারত অসি মপাঙ্গল লৈবা দেমোক্রেসী অমা ওইহল্লি।

১৬. ঐখোয়না পার্লিয়ামেন্তরী দেমোক্রেসীগী সিস্তেম চৎনহনখি। মরম অসিনা ঐখোয়গী পার্লিয়ামেন্ত অসি ঐখোয়গী দেমোক্রেসীগী লাইশঙ ওইরি মসিদা ঐখোয়গী মীয়ামগী য়াইফনবা ঐখোয়না খন্ননবা, দিবেৎ তৌনবা অমসুং সমস্যাশিংগী ৱারেপ  লৌনবা খ্বাইদগী অৱাংবা থাক্কী ফম্পাক অমা ঐখোয়দা পীরি। ঐখোয়গী পার্লিয়ামেন্ত অসি অনৌবা বিল্দিং অমদা অথুবদা হোংজিনগদবা অসিদা ভারত মচা পুম্নমক্না চাউথোকচফম থোকই। মসি ঐখোয়গী ৱাখল্লোন অসিগা চান্নবা পাউখুম ওইরগনি; কন্তেম্পোরারী ৱর্ল্দ অসিগা লোইননা চৎমিন্নবগা লোইননা মসিনা ঐখোয়গী লেগেসী অসি ইকাই খুম্নহল্লগনি। হেন্না সিম্বোলিক ওইরিবদি অনৌবা বিল্দিং অসি নীংখা তমখিবগী ৭৫শুবা কুনওনগী চহিদা মসি শঙ্গাগদৌরিবা অসিনি।

১৭. অখন্নবা চহি অসি নীংশিংনীংঙাই ওইহৌনবা সরকারনা থৌরাং কয়া প্লান তৌখি অমসুং মখোয়গী মনুংদা খ্বাইদগী নুংঙাইরিবা অদুদি গগনয়ান মিসন অসিনা ওইরি। ইন্দিয়া এয়র ফোর্সকী পাইলোতশিংনা মপাল লৈবাক্তা ত্রেনিং তৌরি। মখোয়না শুন্দ্রংদা পাইবা মতমদা ভারতা মেন্দ স্পেস মিসন অমা পাঙথোক্কদবা গৃহ অসিগী মরিশুবা লৈবাক ওইরগনি। ঐখোয়গী পান্দমশিং থুংহন্নবা হোৎনবা মতমদা ঐখোয়না অপনবা অমত্তা লৈহনদে।

১৮. ঐখোয়না লম অসিদা খোঙ থাংজিন্দ্রিঙৈদা ঐখোয়গীদমক্তা নিংতম্বা পুরকখিবা মীওইশিং অদুনা মংজরম্বা মংলানশিং অদু মংফাওনহন্নবা ঐখোয়না তৌগদবা কয়া লৈরি হায়বা খংই। হায়রিবা মংলানশিং অদু ঐখোয়গী কন্সতিত্যুসন্না ৱাহৈ মরি: জস্তিস, লিবর্তী, ইক্যুলিতী অমসুং ফেতর্নিতী হায়না ময়েক শেংনা তাক্লি। ঐখোয়না মান্নদবনা থল্লবা মালেম অসিদা ইক্যেলিতী পুরক্নবা, জস্তিস লৈত্রবা ফীভমশিং অসিদা জস্তিস পুরক্নবা হোৎনগদবনি। শেন্মীৎলোন অমসুং অকোইবগী ফীভমগী জস্তিস য়াওনা জস্তিস অসি মখল কয়াগী কোনোতেসনশিং য়াওরি। মাংলোমদা চংশিনগদবা লম্বেল অসি অরাইবা নত্তে। ঐখোয়না অহোংবা অমসুং অওনবা কয়ামরুম থেংনবা তাই, অদুবু ঐখোয়গী চাংদমনীংঙাংই লৈত্রবা লমজিং লমতাক কয়ামরুম লৈরি। মসি তোঙান তোঙানবা সোর্স চহিচা কয়াগী মমাংদা তুংগী উবা ঙম্বা মীওইশিং, মুনী ঋষিশিং অমসুং মতম অসিগী লুচিংবা কয়াদগী লাকপনি। “য়ুনিতী ইন দাইভর্সিতী” হায়বা ৱাখল্লোন অসিগা লোইননা ঐখোয়না লৈবাক অমা ওইনা অচু্ম্বা লম্বেলদা চৎলি।

১৯. ভারতকী অখন্নবা হেরিতেজদগী লাক্লিবা মসিগী তুংগী ৱাখল্লোন অসিনা চহিচা অসিদা ঐখোয়দা মতেং পাংবতা নত্তনা মালেম পুম্বদা মতেং পাংলগনি। হৌজিক মতমগী ইন্দস্ত্রিএল সিভিলাইজেসন মীওইবা জাতীদা অচৌবা খুদোংথীবা কয়া মাইয়োক্নহল্লি। সমুদ্রগী ইমাই ৱাংখৎলকপা, গ্লেসিয়র শৌদোরকপা অমসুং তেম্পরেচর ৱাংখৎলকপগা লোইননা অইং-অশা হোংলকপা অসি ঐখোয়গী পুন্সি মহিংগী শরক অমা ওইরক্লে। ভারতনা পেরিস ক্লাইমেৎ এগ্রিমেন্ত ঙাকপদা নত্তনা লৈবাক অসিনা অইং-অশা ঙাক্নবা হোৎনবগী মথক্তা থবক কয়ামরুম পাইখৎতুনা ভারতনা চাওথোকচবা পোক্লি। অদুম ওইনমক মালেম অসিনা অচৌবা অহোংবা মথৌ তারি। মসিনা মরম ওইরগা বেদ অমসুং উপনিসদশিংগী অইবশিংবা শেমগৎলম্বা, রামায়ন অমসুং মহাভারত্তা ফোঙদোকলম্বা, ভগৱান মহাভির, ভগৱান বুদ্ধ অমসুং গুরু নানক্না তাকপীরম্বা, মহাত্মা গান্ধীনা হিংলম্বা পুন্সি মহিংদা মমি তারিবা ভারতকী লৌশিংগী পুকৈ অসিদা মালেম অসিনা লেপ্পা লৈতনা মীয়েং চংলক্লিবনি।    

২০. মহৌশাগী লোইননা হিংনবা হোৎনগদবনি হায়রদুনা গান্ধীজীনা হায়বীরম্মি মদুদি নহাক্না তুরেলশিং, চিংশাংশিং, উচেকশিং অমসুং শাশিংগা লোইননা মরী অমা শেমগৎপা মতমদা নঙোন্দা মহৌশানা অরোনবা কয়ামরুম তাকপীরক্কনি। মসিগী গান্ধীজীগী পাউজেল অসি ইন্নবা অমসুং ঐখোয়না হিংলিবা লমদম অসিগী য়াইফনবগীদমক কত্থোক্নবা ফীরেপ লৌরসি।

২১. লৈবাক নিংবা অমসুং কত্থোকপগী থৌনা অদুনা ঐখোয়গী নিংতম লান্মীশিংনা খ্বাইদগী মরুওইনা লৌখি। মখোয়না মশাগী খন্দনা মখল কয়াগী খুদোংথীবশিং মায়োক্নখি। মসি ঐহাক্না কোরোনাগী অৱাবা তাংফম অদুদা মীওই লাখ কয়ানা মীওইবা জাতীগীদমক মশাগী খন্দবা থৌনা অদুগা লোইননা অতোপ্পা কয়াবু কন্নবা মশিং লাকঙমদ্রবা খুদোংথীবা কয়া মায়োক্নখিবা অদুদা উবা ফংখি। হায়রিবা কোবিদ ৱারিয়র্স পুম্নমক অদুবু ঐহাক্না হন্না হন্না থাগৎপা ফোঙদোকচরি। মখোয়গী মরক্তা কয়া অমনা কোবিদ-১৯না মরম ওইদুনা থৱাই থাখি। ঐহাক্না মখোয়গী মফমদা ইকাই খুম্বা উৎচরি। 

২২. হন্দকপা পাংথোকখিবা ‘কার্গিল বিজয় দিৱস’কী থৌরমদা ঐহাক্না লদাখতা লৈবা ‘কার্গিল ৱার মেমোরিএল - দ্রাস’তা চৎতুনা ঐখোয়গী থৌনা ফরবা লান্মীশিংদা ইকাই খুম্নবা উৎপা পামখি। অদুবু নোং-চিংগী ফীভম ফত্তবনা মরম ওইরগা হায়রিবা নীংশিং খুভম অদুদা য়ৌবা ঙমখিদে। হায়রিবা নুমিৎ অদুদা বারামুল্লাদা লৈবা ‘দ্রেগ্গর ৱার মেমোরিএল’দা ঐখোয়গী থৌনা ফরবা লান্মীশিংদা ইকাই খুম্নবা উৎখি। হায়রিবা মেমোরিএল অসি মথৌ পাংথোক্লিঙৈদা থৱাইনা পোন্থা পীখিবা লান্মীশিং অদুগী নীংশিংবা ওইনা শাখিবনি। হায়রিবা থৌনা ফরবা লান্মী লান্মীশিং অদুগী মথৌনা অমসুং কত্থোকপা অদুবু থাগৎপা ফোঙদোক্লৈদা ঐহাক্না ৱার মেমোরিএল অদুদা ইরম্বা “মেরা হর কাম, দেশ কে নাম” হায়বদি ঐহাক্না পাংথোক্লিবা থবক খুদিংমক ঐলাক অসিগীনি হায়বা মোত্তো অদু থেংনখি। 

ঐখোয় পুম্নমক্না মসিগী মোত্তো অসি মন্ত্র অমা ওইনা লৌদুনা থৱাই য়াওনা অমসুং মপুংফানা কত্থোকপগা লোইননা লৈবাক অসিগী চাউখৎ থৌরাংগী থবক পাইখৎকদবনি। লৈবাক অমসুং সমাজ অসিগী য়াইফনবা ৱাখল্লোন্না মাংজিল থারগা চাউখৎপগী লম্বেলদা ভারত অসি মাংলোমদা পুনবা ঐখোয় পুম্নমক পুনশিল্লসি। 

ঐহাক্কী নুংশিজরবা ইরৈবাকচাশিং

২৩. ঐহাক্না ঐখোয়গী নীংতম্ববু ঙাকপীরিবা, মথৌ তারকপা মতমদা থৌনা ফনা অমসুং হরাও-হরাওনা থৱাই ফাওবা থাবা ঙম্লিবা আর্মদ ফোর্সেসকী মেম্বরশিংদা অখন্ননা য়াইফ-পাউজেল পীজরি। ঐহাক্না মপাল লৈবাক্তা লৈদুনা ইমা লৈবাক অসিবু মশক তাক্লিবা ভারতকী মীরমদা লৈরিবা ইচিল ইনাওশিংদা য়াইফ-পাউজেল পীজরি। 

২৪. ভারতকী ৭৫শুবা নীংখা তম্বা নুমিৎনা লাকপদা ঐহাক্না অমুক্কসু হন্না পূক্নমকপু থাগৎপা ফোঙদোকচরি। মসিগী কুমওন অসি পংথোক্লদুনা ঐখোয়না নীংখা তম্বগী চহি ১০০ শুবগী পালন তৌবা মতমদা ২০৪৭গী শক্তি লৈরবা, নুংঙাই য়াইফরবা অমসুং শান্তী লৈরবা ভারত অমগী মংলান অমা ঐহাক্কী ৱাখলদা শাগৎচরি। 

২৫. ঐখোয়গী মীয়াম্না কোবিদ লাইচৎ অসিনা থোকহল্লিবা খুদোংচাদবা ময়াম অসিদগী ফগৎলক্তুনা হরাও তয়াম্বা অমসুং নুংঙাই য়াইফবা লম্বী অমদা মাংলোমদা চংশিন্নবা ঐহাক্না থৌনিজরি।

অমুক্কা হন্না, পুম্নমকপু হন্না হন্না য়াইফ-পাউজেল পীজরি!

থাগৎচরি,

জয় হিন্দ!

*****