প্রধান মন্ত্রী শ্রী নরেন্দ্র মোদীনা ঙসি কোবিদ-১৯গী মতাঙদা অৱাং-নোংপোক স্তেতশিংগী মুখ্য মন্ত্রীশিংগা ৱারী ৱাতায় শানখ্রে‍। ৱারী ৱাতায় শানবা অদু নগেলেন্দ, ত্রিপুরা, সিক্কিম, মেঘালয়া, মিজোরাম, অরুনাচল প্রদেশ, মনিপুর অমসুং অসামগী মুখ্য মন্ত্রীশিংনা শরুক য়াখি‍। মুখ্য মন্ত্রীশিং অদুনা প্রধান মন্ত্রীবু কোবিদ লাইচৎ থেংননবা মতম চানা থবক লৌখৎখিবগীদমক্তা থাগৎখি‍। অৱাং-নোংপোক স্তেতশিংগীদমক্তা অখন্নবা থৌরাং লৌখৎপিবগীদমক্তসু মখোয়না তৌবিমল খঙবা উৎখি‍। মুখ্য মন্ত্রীশিংখক্তা নত্তনা হোম, দিফেন্স, হকশেলো দোনরগী কেন্দ্র মন্ত্রীশিং অমসুং অতৈ মন্ত্রীশিংসু থৌরমদুদা শরুক য়াখি‍।

মুখ্য মন্ত্রীশিং অদুনা মখোয়গী স্তেতশিংদা লৈরিবা ভেক্সিনেসনগী খোঙজেলশিং অমসুং মনুং হঞ্জিনবা মফমশিংদা ভেক্সিন য়ৌহন্নবা লৌখৎলিবা খোঙথাঙশিংগী মতাঙদা পাউদমখি‍। ভেক্সিন কাপ্নিংদবগী ৱাখল্লোনশিং অমসুং মদুবু লাকশিন্নবা থৌরাংশিংগী মতাঙদসু খন্নখি‍। কোবিদ কেস হেন্না নীংথিনা লাকশিন্নবা মেদিকেলগী মচাক মথুমশিং ফগৎহনবগী অমদি পি.এম. কেয়র্স ফন্দগী খুত্থাঙদা পীরকখিবা ঙাক্লৌশিংগী মতাঙদা পাউদম অমসু মখোয়না পীখি‍। স্তেতশিংদা পোজিতিভিতী রেত হন্থহল্লক্নবা অমদি কেস মশিং হন্থহন্নবা লৌখৎফম থোকপা থবকশিং মতম চানা লৌখৎকনি হায়না মখোয়না থাজবসু পীখি‍।

কেন্দ্রগী গৃহ মন্ত্রীনা অপুনবা নোংমগী থোরকপা কেস মশিং হন্থরক্লিবসিগী মতাঙদা ৱা ঙাঙলদুনা মসিমক্না কোমথোক্নবা অমদি চেকশিন থৌরাং হন্থহন্নবা মরমদি ওইহল্লোইদবনি হায়বা অকনবা চেকশিনৱা থমখি‍। লৈবাকসিগী মফম খরদি হৌজিকসু পোজিতিবিতী রেত ৱাংলি‍‍। তেস্তিং, ত্রেসিং, ত্রেক্কিং অমসুং ভেক্সিনেসনগী মরুওইবগী মতাঙদা ৱাফম থমখি‍।

কেন্দ্রগী হকশেলগী সেক্রেতরীনা লৈবাকসিগী কোবিদ কেসকী চাউরাকপা মশক অমা থমখি অমদি অৱাং-নোংপোক স্তেত খরদা পোজিতিবিভী রেত ৱাংলিবসিগী মতাঙদা খন্নখ‍ি‍। মেদিকেল ওক্সিজেন সপ্লাই হেনগৎহন্নবা লৌখৎলিবা খোঙথাঙশিং অমসুং ভেক্সিন কাপথোকপগী খোঙজেলগী মতাঙদা চাউরাকপা ৱাফমসু থমখি‍।

থৌরমদুদা ৱা ঙাঙলদুনা প্রধান মন্ত্রীনা মীয়াম, হকশেলগী থৌমী অমসুং অৱাং নোংপোক্কী লৈঙাকশিংবু লাইচৎ অসি থেংনবদা মখোয়না পায়খৎলিবা থবকশিং অমসুং স্তেতশিং অসিগী খুদোংচাদ্রবা লৈমায়গী ফীভম মরকসিদা তেস্তিংগী, লায়েংবগী অমদি ভেক্সিনেসনগী মচাক মথুম শেমগৎলিবশিংবু থাগৎখি‍।

প্রধান মন্ত্রীনা দিস্ত্রিক্ত খরদা কেস মশিং হেনগৎলক্লিবা অসিদা নুংনাংবা ফোঙদোক্লদুনা হায়রিবা খুদম চাংদমশিং অসিবু লৌশিন্দুনা মাইক্রো লেভেলদা অকনবা চেকশিন থৌরাং লৌখৎনবা ৱাফম থমখি‍। ফীভম অসি থেংননবগীদমক মাইক্রো কন্তেনমেন্ত প্রোতোকোল শীজিন্ননবা ৱাফমসু থমখি‍। হীরম অসিগী মতাঙদা হৌখিবা চহি অমা মখায়সিদা থেংনরকখিবা অমদি খ্বাইদগী ফবা থৌওংশিং মপুং ফানা শীজিন্নবা ৱাফমসু মহাক্না থমখি‍।

ভাইরস অসিনা থুনা য়াঙনা শক্লোন ওল্লক্লিবা অসি পল্লদুনা প্রধান মন্ত্রীনা ম্যুতেসন থোক্লকপশিং চেকশিন্না য়েংশিন্নবা অমদি ভেরিএন্ত খুদিংমক্কী খোঙ্গুল লীনবা পাউতাক পীখি‍। খঙ-হৈরবশিংনা ম্যুতেসনশিং অমসুং মখোয়গী শাফুগী মরমদা নৈনরি হায়না মহাক্না হায়খি‍। অসিগুম্বা ফীভমসিদা, নাদ্রিঙৈদা ঙাকথোকহৌবা অমসুং লায়েংবা অসি য়াম্না মরুওই হায়না কোবিদকা চুনবা লীচৎ শাজত্তা অকনবা ৱাফম থম্লদুনা মহাক্না ফোঙদোকখি‍। ফিজিকেল দিস্তেন্সিং, মাস্ক, ভেক্সিনগী কান্নবা ময়েক শেংনা খঙলে‍‍। অসুম্না তেস্তিং, ত্রেক্কিং অমসুং লায়েংবগী লাল্লোং অসিসু কান্নরে হায়বা খঙলবা লাল্লোং অমনি হায়বা ৱাফম শ্রী মোদীনা থমখি‍।

লাইচৎ অসিনা তুরিজম অমসুং লল্লোন ইতিক্তা পীরিবা চৈথেংগী মতাঙদা পল্লদুনা প্রধান মন্ত্রীনা হিল স্তেসনশিংদা চেকশিন থৌরাং মতিক চানা লৌখত্তনা মী পুলহন্দনবা ৱাফম থমখি‍। অহুমসুবা ৱেব লাক্ত্রিঙৈদা মীয়াম্না মতম খরা নুংঙাইথোকহৌবা পাম্মী হায়বা ৱাফমবু ককথৎলদুনা অহুমসুবা ৱেব অসি মশানা লাকচগদবা নত্তে হায়বসি খঙজিনবা মথৌ তাই হায়নদা মহাক্না হায়খি‍। ঐখোয়গী পুক্নিংদা লৈগদবা মরুওইবা ৱাফমদি কমদৌনা অহুমসুবা ৱেব অসি থিংগদগে হায়বসিনা ওইগদবনি হায়না মহাক্না ফোঙদোকখি‍। খঙ-হৈরশিংনা চেকশিন্দবা অমদি মী পুনবনা কেস মশিং খঙহেন হেনগৎলকপা য়াবনা মসি তৌদনবা চেকশিৱা থম্লি‍। পুন্দ্রসু য়াবা মতাঙদা মী পুনবা তৌদনবা মহাক্না অকনবা পাউতাক পীখি‍।

প্রধান মন্ত্রীনা কেন্দ্র লৈঙাক্কী ‘পুম্নমক্কী ভেক্সিন-পুম্নমক্তা লেম্না’ হায়বা কেম্পেন অসিদা অৱাং নোংপোক্কীসু চপ চানা মরুওই অমদি ঐখোয়না ভেক্সিনেসনগী থৌওং য়াঙশিনহনবা মথৌ তাই হায়না হায়খি‍। ভেক্সিনগা মরী লৈননা লান্না থাজনবা ৱাফমশিং কোকহন্নবা অমদি মীয়াম থোকহল্লক্নবা খুন্নাইগী, মহৈ মশিংগী ইন্সতিত্যুসনশিং, মশক নাইবা মীওইশিং অমসুং লাইনিংগা মরী লৈনবা লূপশিংগী মতেং লৌনবা প্রধান মন্ত্রীনা হায়খি‍। ভাইরস অসি শন্দোরকপা য়াই হায়না খনবা মফমশিংদা ভেক্সিনেসনগী থবক য়াঙ্খৎহন্নবা মহাক্না হায়খি‍।

মন্ত্রী মন্দলনা হক্দক্তা অয়াবা পীখ্রবা তেস্তিং অমসুং ত্রীতমেন্তকী মচাক মথুমশিং ফগৎহন্না লুপা করোর ২৩০০০গী পেকেজকী মতাঙদা পল্লদুনা পেকেজ অসিনা অৱাং নোংপোক্তা হকশেলগী মচাক মথুমশিং কনখৎহনবদা মতেং ওইরগনি হায়না প্রধান মন্ত্রীনা হায়খি‍। মসিনা অৱাং নোংপোক্তা তেস্তিং, দাইগ্নোস্তিক, জিনোম সিক্বেন্সিংগী খোঙজেল য়াঙখৎহল্লগনি‍। অৱাং-নোংপোক্তা ফমুং মশিং, ওক্সিজেন ফেসিলিতীশিং অমসুং অঙাঙ লায়েংবগী মচাক মথুমশিংগী মশিং থুনা হেনগৎহনবগী তঙাই ফদবা ৱাফম প্রধান মন্ত্রীনা থমখি‍। লৈবাকসিদা পি.এম.-কেয়র্সকী খুত্থাঙদা ওক্সিজেন প্লান্ত চা কয়া লিংখৎলি অমদি অৱাং-নোংপোক্তসু প্লান্ত ১৫০রোম শরুক থুংলি‍। প্রধান মন্ত্রীনা মুখ্য মন্ত্রীশিংদা হায়রিবা প্লান্তশিং অসি থুনা য়াঙনা লোইশিন্নবা ৱাফম থমখি‍।

প্রধান মন্ত্রীনা অৱাং-নোংপোকগী জিওগ্রাফিগী ফীভমগী মতুং ইন্না মতম খরগা ওইবা লায়েংশঙশিং লিংখৎপগী মথৌ তাবা ৱাফম থমখি‍। তু ব্লোক লেভেলগী লায়েংশঙশিংদা লাক্কদৌরিবা ওক্সিজেন প্লান্তশিং, আই.সি.য়ু. ৱার্দশিং, অনৌবা মেছিনশিং অসিগী মেনপৱার মথৌ তাগদবা মরম্না ত্রেন তৌরবা মেনপৱার শেম শাদুনা থম্নবা ৱাফমসু মহাক্না থমখি‍। কেন্দ্র লৈঙাক্কী মায়কৈদগী পাংবা য়াবা তেংবাং পাংগনি হায়না মহাক্না হায়খি‍।

লৈবাকসিদা নোংমদা তেস্ত লাখ ২০গী চাংদা তৌরি হায়না পল্লদুনা প্রধান মন্ত্রীনা হেন্না শোকহল্লবা দিস্ত্রিক্তশিংদা তেস্তিংগী মচাক মথুমশিং ফগৎহনবগী মথৌ তাবশিংগী মতাঙদা পনখি‍। রেন্দম তেস্তিংগা লোয়ননা এগ্রেসব তেস্তিংসু মথৌ তাই হায়না মহাক্না হায়খি‍। পুন্না হোৎনমিন্নবনা মহিক অসি শন্দোরকপা লাকশিনবা ঙমগনি হায়না প্রধান মন্ত্রীনা থাজবা ফোঙদোকখি‍।

****