ইকায়খুম্নরবা প্রধান মন্ত্রীগী লুচিং মখাদা জম্মু-কাস্মিরগী রাজনিতি দলশিংগী লুচিংবশিংগা মীফম অমা হৌজিক্তা লোইখিবা ঙাইরি। মসি জম্মু-কাস্মিরদা দিমোক্রেসী মপুঙ ফাহন্নবা অমদি মপাঙ্গল কলহন্নবা য়াম্না কান্নরবা থৌরাং অমা ওইখি। মীফম অদু য়াম্না চীং লেম্বা ম‌ওংদা পাঙথোকখি। শরুক য়াখিবা খুদিংমক্না ভারতকী দিমোক্রেসী অমদি ভারতকী সংবিধানবু মপুঙ ফানা ইন্নবা ৱাফম ফোঙদোক্নখি।

লুচিংবশিংদুগী মফমদা গৃহ মন্ত্রীনা জম্মু-কাস্মিরগী ফগৎলক্লিবা ফীভমগী মতাঙদা পাউদমখি।

প্রধান মন্ত্রীনা পার্তী খুদিংমক্কী ৱাফমশিং অমদি পাউতাকশিং পুক্নিং চঙনা তারদুনা মীয়ামগী মীহুৎ খুদিংমক্না মখোয়গী পুক্নিং ৱাখলদা লৈরিবশিং অখাকপা লৈতনা তম্লকপগীদমক্তা থাগৎখি‍। প্রধান মন্ত্রীনা মীফম অদুদা মরুওইবা হীরম অনিদা মীৎয়েঙ থমখি‍। ঐখোয় খুদিংমক্না জম্মু-কাস্মিরদা দিমোক্রেসীবু গ্রাসরুত্তা পুরক্নবা হোৎনগদবনি হায়না মহাক্না হায়খি‍। অনিসুবদা, জম্মু-কাস্মিরদা হীরম খুদিংদা চাউখৎপা পুরক্কদবনি অমদি চাউখৎপগী ফীভম মফম খুদিং অমদি ফুরুপ খুদিংদা য়ৌহনগদবনি হায়বসিনি‍। মতেং পাংনবা অমদি মীয়াম হুপ্না শরুক য়ামিন্নবগী ফীভম অমা লৈহনফম থোকই হায়নসু ফোঙদোকখি‍।

ইকায়খুম্নরবা প্রধান মন্ত্রীনা জম্মু-কাস্মিরদা পঞ্চায়তি রাজ অমসুং অতৈ লোকেল বোদীশিংগী মীখল মায় পাক্না পাঙথোকখ্রে হায়বা ৱাফম থমখি‍। ফীভম খুদিংমক্তা ফগৎলক্লি‍। মীখল পাঙথোকখ্রবা মতুংদা লুপা করোর ১২,০০০রোম পঞ্চায়তশিংদা য়ৌখ্রে‍। মসিনা খুঙ্গঙশিংদা চাউখৎ লমজেল য়াঙ্খৎহল্লে‍ হায়না মহাক্না ফোঙদোকখি‍।

প্রধাম মন্ত্রীনা হায়খিবদা ঐখোয়না জম্মু-কাস্মিরদা দিমোক্রেসীগী থৌওংগী মথঙগী মরুওইবা খোঙথাঙ ওইরিবা এসেমব্লী মীখললোমদা অমুক মায় ওনশিনবা মথৌ তাই‍। এসেমব্লীদা লমদম খুদিংমক্কী, কাঙলুপ খুদিংমক্কী মীহুৎ মতিক চানা লৈহন্নবগীদমক দিলিমিতেসনগী থবক খুৎলৈ থুনা লোইশিনবা মথৌ তাই‍। দলিতশিং, চাউখৎবা ৱাৎলিবা অমদি ত্রাইবেল মফমশিংদা লৈবা মীওইশিংগী মীহুৎ মতিক চানা য়াওহনবা মরুওই‍।

মীফম অদুদা দিলিমিতেসনগী থবকসিদা মীপুম খুদিংমক্না শরুক য়াননবগী মতাঙদা মচা খায়না খন্নখি‍। মীফমদুদা শরুক য়াখিবা পার্তী পুম্নমক্না থবক্তুদা শরুক য়ানবা য়ানখি‍।

প্রধান মন্ত্রীনা জম্মু-কাস্মিরবু ইং-চীকপা অমদি নুংঙাই য়াইফবা ফীভম পুরক্নবগীদমক স্তেকহোল্দর পুম্নমক্না তেংবাংননবা ৱাফম ফোঙদোকখি‍। জম্মু-কাস্মির হিংসাগী তমথিরবা ফীভম অমদগী থোরক্তুনা মরা চেৎপা ফীভমগী মায়কৈদা লাক্লি‍। জম্মু-কাস্মিরগী মীয়াম মরক্তা অনৌবা মঙলান অমদি অনৌবা থাজবা অমা ময়োল চোংলক্লি হায়না মহাক্না হায়খি‍।

পি.এম.না হায়খিবদা থাজবা অসি মপাঙ্গল কনখৎহন্নবা ঐখোয় অহিং নুংথিল নাইদনা থবক তৌবা অমদি পুন্না হোৎনমিন্নবা মথৌ তাই‍। ঙসিগী মীফম অসি জম্মু-কাস্মিরদা দিমোক্রেসী মপাঙ্গল কনখৎহন্নবা অমদি চাউখৎপা অমসুং নুংঙাই য়াইফবা পুরক্নবগী মরুওইবা খোঙথাঙ অমনি‍। ঐনা রাজনিতি দল খুদিংমকপু ঙসিগী মীফমসি শরুক য়াবিবগীদমক্তা থাগৎচরি‍।

থাগৎচরি‍।

দিসক্লেমর: মসি চাউরাকপা ৱাহন্থোক পীবনি‍। অশেংবা ৱারোলদি হিন্দিদা পীখিবনি‍।

>>>>>>>>>>