ସଡକ ପରିବହନ ଓ ରାଜପଥ ମନ୍ତ୍ରଣାଳୟ
ସ୍ୱୀକୃତିପ୍ରାପ୍ତ ଚାଳକ ପ୍ରଶିକ୍ଷଣ କେନ୍ଦ୍ର ପାଇଁ ସଡକ ପରିବହନ ଓ ରାଜପଥ ମନ୍ତ୍ରଣାଳୟର ଅଧିନିୟମ ବିଜ୍ଞପ୍ତି ଜାରି
ଜୁଲାଇ ୧,୨୦୨୧ରୁ ଲାଗୁ ହେବ ନୂଆ ନିୟମ
Posted On:
11 JUN 2021 2:10PM by PIB Bhubaneshwar
ସଡକ ପରିବହନ ଓ ରାଜପଥ ମନ୍ତ୍ରଣାଳୟ (ଏମଓଆରଟିଏଚ) ଏକ ବିଜ୍ଞପ୍ତି ଜାରି କରି ସ୍ୱୀକୃତିପ୍ରାପ୍ତ ଚାଳକ ପ୍ରଶିକ୍ଷଣ କେନ୍ଦ୍ର ପାଇଁ ବାଧ୍ୟତାମୂଳକ ନିୟମ ସମ୍ପର୍କରେ ଅବଗତ କରାଇଛନ୍ତି । ଏହି ନିୟମଗୁଡିକ ଜୁଲାଇ ୧,୨୦୨୧ରୁ ଲାଗୁ ହେବ । ଏହାଦ୍ୱାରା ଏସବୁ କେନ୍ଦ୍ରରେ ନାମ ଲେଖାଉଥିବା ଶିକ୍ଷାର୍ଥୀମାନେ ଉଚିତ ପ୍ରଶିକ୍ଷଣ ଓ ଜ୍ଞାନ ପାଇପାରିବେ । ସ୍ୱୀକୃତିପ୍ରାପ୍ତ ଚାଳକ ପ୍ରଶିକ୍ଷଣ କେନ୍ଦ୍ରଗୁଡିକର ପ୍ରମୁଖ ବୈଶିଷ୍ଟ୍ୟ ହେଲା:-
୧. ଶିକ୍ଷାର୍ଥୀମାନଙ୍କୁ ଉଚ୍ଚ ଗୁଣବତ୍ତା ସମ୍ପନ୍ନ ପ୍ରଶିକ୍ଷଣ ପ୍ରଦାନ ପାଇଁ ପ୍ରଶିକ୍ଷଣ କେନ୍ଦ୍ରଗୁଡିକରେ ସିମୁଲେଟର ଓ ସ୍ୱତନ୍ତ୍ର ଡ୍ରାଇଭିଂ ଟେଷ୍ଟ ଟ୍ରାକ ରହିଥିବ ।
୨ ମୋଟରଯାନ ଅଧିନିୟମ, ୧୯୮୮ ଅନୁଯାୟୀ ଆବଶ୍ୟକତା ଅନୁସାରେ ଏହି କେନ୍ଦ୍ରଗୁଡିକରେ ଉପଚାରାତ୍ମକ ଓ ରିଫ୍ରେଶର ପାଠ୍ୟକ୍ରମ ଉପଲବ୍ଧ ହେବ ।
୩. ସ୍ୱୀକୃତିପ୍ରାପ୍ତ ପ୍ରଶିକ୍ଷଣ କେନ୍ଦ୍ରରୁ ସଫଳତାର ସହ ଉତ୍ତୀର୍ଣ୍ଣ ଶିକ୍ଷାର୍ଥୀମାନେ ଡ୍ରାଇଭିଂ ଲାଇସେନ୍ସ ଆବେଦନ କରିବା ବେଳେ ଡ୍ରାଇଭିଂ ଟେଷ୍ଟ ଦେବାରୁ ଛାଡ ପାଇବେ । ଏବେ ଆଞ୍ଚଳିକ ପରିବହନ କାର୍ଯ୍ୟାଳୟ (ଆରଟିଓ) ଦ୍ୱାରା ଡ୍ରାଇଭିଂ ଟେଷ୍ଟ ନିଆଯାଉଛି । ସ୍ୱୀକୃତିପ୍ରାପ୍ତ ଚାଳକ ପ୍ରଶିକ୍ଷଣ କେନ୍ଦ୍ରରୁ ତାଲିମ ନେବା ପରେ ସହଜରେ ଡ୍ରାଇଭିଂ ଲାଇସେନ୍ସ ମିଳିପାରିବ ।
୪. ଏହି କେନ୍ଦ୍ରଗୁଡିକ ବଜାର ଆବଶ୍ୟକତାକୁ ଭିତ୍ତି କରି ପ୍ରଶିକ୍ଷଣ ଦେଇପାରିବେ ।
ଭାରତୀୟ ସଡକ ପରିବହନ କ୍ଷେତ୍ରରେ ଦକ୍ଷ ଡ୍ରାଇଭରଙ୍କ ଅଭାବ ପ୍ରମୁଖ ସମସ୍ୟା ପାଲଟିଛି । ଏହାସହିତ ଚାଳକମାନେ ସଡକ ନିୟମ ଜାଣି ନଥିବାରୁ ବହୁ ଦୁର୍ଘଟଣା ଘଟୁଛି । ମୋଟର ଯାନ (ସଂଶୋଧିତ) ଅଧିନିୟମ ୨୦୧୯ର ଧାରା ୮ ଅନୁଯାୟୀ କେନ୍ଦ୍ର ସରକାର ଚାଳକ ପ୍ରଶିକ୍ଷଣ କେନ୍ଦ୍ରର ସ୍ୱୀକୃତି ସମ୍ପର୍କରେ ନିୟମ ପ୍ରଣୟନ କରିବାକୁ ଅଧିକାରପ୍ରାପ୍ତ ।
SR
(Release ID: 1726299)
Visitor Counter : 295