মুম্বাই/ নই দিল্লী, জুন ৮, ২০২১

এলর্জী লৈবা মীওইশিংনা তিকা থাদোকপা য়াবরা?

মীরোনবী নুপীশিংনা কোবিদ ১৯ তিকা থাদোকপা য়াবরা? খোমজিংলিবী মমাশিংগীনা কমদৌবা?

তিকা থাখ্রবা মতুংদা ঐঙোন্দা এন্তিবোদী মরাং কায়না ফংগদ্রা?

তিকা থাখ্রবা মতুংদা ঈ ফমজিনবগী থৌওংসি তোয়না থোক্কনবরা?

করিগুম্বা ঐ কোবিদ নারবদি নুমিৎ কয়ানিগী মতুংদা তিকা থাবা য়াগদগে?

হায়রিবশিং অসি কোবিদকী তিকাগী মতাংদা মীয়াম্না তোয়না হংগনবা ৱাহং খরনি‍। দোক্তর ভি.কে. পোল, মেম্বর (হকশেল), নিতি আয়োগ অমসুং দোক্তর রন্দীপ গুলেরিয়া, দাইরেক্তর, ওল ইন্দিয়া ইন্সতিত্যুৎ ওফ মেদিকেল সাইন্সেসনা কোবিদ-১৯ তিকাগী মতাঙদা মীয়ামদা লৈরম্বা মখল মখা কয়াগী চিংনবশিং জুন ৬, নোংমাইজিং নুমিত্তা দি.দি. নিউজতা শন্দোকখিবা অখন্নবা থৌরম অমদা কোকহনখি‍।

তশেংবা, অচুম্বা ৱাফমশিং অমসুং ঈ-পাউশিং ফংননবা মখা পাথবিয়ু, অদুগা লায়না অসিদগী ঙাকথোক্তুনা লৈবিয়ু‍। মসিগা লোয়ননা অতৈ ৱাহংশিংসু কেন্দ্রগী হকশেল মন্ত্রালয়গী এফ.এ.ক্যুশিংদা পাউখুম পীরি‍‍। (https://www.mohfw.gov.in/covid_vaccination/vaccination/faqs.html)

এলর্জী লৈবা মীওইশিংনা তিকা থাদোকপা য়াবরা?

দোক্তর পোল: করিগুম্বা মীওই অমনা এলর্জীগী ফীভম লৈরবদি কোবিদ তিকা অসি মেদিকেলগী পাউতাক লৌরবা মতুংদতা কাপকদবনি‍। অদুম ওইনমক লোক থুংবা, উনশাগী এলর্জীগুম্বা ইচম চম্বা এলর্জীশিং ওইরবদি তিকা অসি কাপথোকপদা কনামত্তনা নিংজিং মাংজিংনরোইদবনি‍।

দোক্তর গুলেরিয়া: হান্না এলর্জীকী হিদাক চাবা মীওইশিংনা হিদাক চাবা লেপ্লোইদবনি, মখোয়না তিকা থারবা মতুংদা হান্নগী হিদাক চাং নাইনা চাথগদবনি‍। তিকা থাফম খুদিংদা তিকা থাবদগী থোরকপা এলর্জীশিং মেনেজ তৌনবা মথৌ তাবা থৌরাংশিং থম্লি হায়বসি খঙজিনবসু মরুওই‍। অসুম্না ঐখোয়না হায়নিংবদি করিগুম্বা অদোমদা শাথিবা এলর্জী লৈরবা ফাওবদা অদোম্না হিদাক মখা তানা চাথবিদুনা তিকাসু থাদোকপিগদবনি‍।

মীরোনবী নুপীশিংনা কোবিদ ১৯ তিকা থাদোকপা য়াবরা?

দোক্তর পোল: হৌজিক লৈরিবা ঐখোয়গী চৎন-পথাপশিংগী মতুং ইন্না (মে ১৯, ২০২১গী পি.আই.বি. প্রেস রিলীজ পাবিয়ু -https://pib.gov.in/PressReleasePage.aspx?PRID=1719925 ) মীরোল্লিবী নুপীশিংদা তিকা কাপ্পিরোইদবনি‍। মসিগী মরমদি তিকাগী চাংয়েংশিংগী ফংলিবা দেতাদা য়ুম্ফম ওইদুনা দোক্তরশিং অমসুং সাইন্তিফিক কম্ম্যুনিতীশিংনা মীরোনবী নুপীশিংদা তিকা অসি কাপথোক্নবগী ফীরেপ অমা লৌবা ঙমদবননি‍। অদুম ওইনমক, ভারত লৈঙাক্না ৱাফম অসিগী মতাংদা অনৌবা কাংলোনগী মচাকশিংদা য়ুম্ফম ওইরগা শেংদোরক্লগনি‍।

কোবিদ-১৯ তিকা ময়াম অমা মীরোনবী নুপীশিংদা শীজিন্নবদা অকায়বা লৈতে হায়বা খঙলে; ঐখোয়গী তিকা অনিসিগীসু লম্বী অদু হাংদোরক্লগনি হায়না ঐখোয়না থাজৈ‍। মরুওইনা তিকাশিং অসি তেনখ্রবা মতমগী মনুংদা শেমগৎলকপা মরম্না, মীরোনবী নুপীশিং হৌরকপগী চাংয়েংদা মখোয়গী শাফনবগীদমক য়াওহন্দে হায়বসি খন্থবিদুনা ঐখোয়না মীয়ামদা পুক্নিং ফাথবিনবা নোল্লুকচরি‍।

দোক্তর গুলেরিয়াঃ লৈবাক কয়া অমনা মীরোনবী নুপীশিংগী তিকা থাবা হৌনখ্রে‍। য়ু.এস. এফ.দি.এ.না ফাইজর অমসুং মোদের্না তিকাশিংগী অয়াবা পীখ্রে‍। কোভেক্সিন অমসুং কোবিসিল্দগী দেতাশিংসি থুনা লাক্লগনি; দেতা খরদি হান্ননা ফংলে, অমদি নুমিৎ খরনিসিদা মপুং ফাবা দেতা ঐখোয়না ফংবা ঙম্লগনি অমদি ভারত্তদু মীরোনবী নুপীশিং তিকা থাদোক্নবগী অয়াবা পীরক্লগনি হায়না থাজবা থম্লি‍।

মচা খোমজিংলিবা মমানা কোবিদ-১৯ তিকা থাদোকপা য়াগদ্রা?

দোক্তর পোল: মসিগী মতাংদা মরি মখোঙ শেংলবা চৎন-পথাপ লৈরে, তিকা অসি মচা খোমজিংলিবী মমাশিংদা কাপথোকপদা অকায়বা অমত্তা লৈতে‍। মসিদা কিনিংঙাই মরম লৈতে‍। তিকা থাখ্রবা মতুং খোম পীথকপা লেপ্পা নৎত্রগা ঙাইহাক কান্নহনবগী মথৌ তাদে‍।

 (https://pib.gov.in/PressReleasePage.aspx?PRID=1719925),

তিকা থাখ্রবা মতুংদা ঐঙোন্দা এন্তিবোদী মরাং কায়না ফংগদ্রা?

দোক্তর গুলেরিয়া: তিকাশিংগী ময়াই অসি মখোয়না পুথোকপা এন্তিবোদীশিংগী মশিংনা লেপ্লোইদবনি হায়বসি ঐখোয়না খঙজিনবা মরু ওই‍। তিকাশিংনা মওং কয়াদা ঙাকথোকই – খুদম ওইনা এন্তিবোদী, সেল-মেদিএতেদ ইম্ম্যুনিতী অমসুং মেমোরী সেলশিংগী (মহিক চঙলক্লবা মতমদা এন্তিবোদী হেন্না পুথোক্লিবা) খুত্থাঙদা ঙাকথোকই‍। মসিগীসু মথক্তা মসিগী ময়াইগী মহৈশিং অসি খেন্নবা মওংগী চাংয়েংশিং ওইনা থিজিনবদা ফংলকপশিংদুখক্তদা য়ুম্ফম ওইবনি‍।

হৌজিক ফাওবদা ফংলিবা দেতাশিংনা তিকা খুদিংমক্কী ময়াই – কোভেক্সিন, কোবিসিল্দ নৎত্রগা স্পুত্নিক ৫ ওইরবসু – হাইরপ হাইরপ লোইনা মান্নৈ‍। মরম অসিনা তিকা অসি ওইনা কাপ্পু, মসি ওইনা কাপ্পু হায়বনচিংবা ৱাফম ঐখোয়না হায়রোইদবনি, অদোমগী মফমদুদা অমা হেক্তা ফংলিবা তিকা অদু অদোম অমসুং অদোমগী ইমুং মনুংশিগী শাফনবগীদমক কাপথোকপিয়ু‍।

দোক্তর পোল: কনাগুম্বা মীওই খরনা তিকা কাপথোক্লুবা মতুংদা এন্তিবোদী চাংয়েং তৌনবগীদমক খনবগুম তৌই‍। অদুবু এন্তিবোদী খক্তনা মীওই অমগী ইম্ম্যুনিতী উৎপা নত্তে হায়বা ৱাফমসি খন্থরগা অদুগুম্বা চাংয়েংদু তৌবগী মথৌ তাদে‍। মসিগী মরমদি, ঐখোয়না তিকা অমা ফংলবা মতমদা তি-সেল নৎত্রগা মেমোরী সেলশিং অসিদা অকক্নবা মওংগী অহোংবশিং লাকই, মখোয় হেন্না মপাঙ্গল কনখৎলকই অমদি মহিক থেংনবা ঙম্বগী মপাঙ্গল হেনগৎলকই‍। তি-সেলশিং অসি বোন মেরোদা ফংবা মরম্না এন্তিবোদী চাংয়েংদা ফংবা ঙমদে‍। মরম অসিনা ঐখোয়না হায়জগদবদি তিকা থাদ্রিঙৈ নৎত্রগা থাখ্রবা মতুংদা এন্তিবোদী চাংয়েং তৌনিংবগী ৱাখল থাদোকপিয়ু, অফংবা তিকা অমা কাপথোকপিয়ু, দোজ অনিমক মতম চপ চানা কাপথোকপিয়ু অমদি কোবিদকা চুনবা লীচৎশিং ইনবিয়ু হায়বসিনি‍। অদুগা অদোম করিগুম্বদা কোবিদ-১৯ নাখ্রবদি অদোমদা তিকাগী মথৌ তাররোই হায়বা অরানবা ৱাখল্লোনসিসু থম্লোইদবনি‍।

তিকা থাখ্রবা মতুংদা ঈ ফমজিনবগী থৌওংসি তোয়না থোক্কনবরা?

দোক্তর পোল: অসিগুম্বা খুদোংথিবা ফীভম খরা, মরুওইনা এস্ত্রা-জেনেকা তিকাদা থেংনৈ‍। হায়রিবা খুদোংথিবা ফীভম অসি য়ুরোপ্তা মখোয়গী নহা ওইরিবা মীওই খরদা মখোয়গী পুন্সি মহিং, হকচাং অমসুং পারী পুরীগী মওং মতৌনা মরম ওইরগা থেংনৈ‍। অদুবু ঐনা অদোমগী মফমদা থমজনিংবদি ঐখোয়না হায়রিবা দেতা অসি মওং চুম্না ভারত্তা থিজিল্লে অমদি অসিগুম্বা ঈ ফমজিনবগী থৌদোংশিং অসি মফমসিদা থোক্তবগুম্বনি – হায়বদি কনাগুম্বা মীওই অমনা মসিদা পাখৎনিংঙাই মথৌ তাদে হায়বনি‍। য়ুরোবপিয়ন লৈবাকশিংদা হায়রিবা খুদোংথিবা ফীভম অসি ঐখোয়গী লৈবাক্তা থেংনরিবসিগী শরুক ৩০ হেন্না থেংনৈ‍।

দোক্তর গুলেরিয়া: মমাঙদসু সর্জরী মতুংদা ঈ ফমজিনবগী থৌদোকশিং অসি য়ু.এস. অমসুং য়ুরোপিয়ন মীওইশিংগা চাংদম্নবদা ভারত্তনা হন্থনা থোকপগী ৱাফমশিং লৈখ্রে‍। তিকানা থোকহনবা থ্রোম্বোসিস নৎত্রগা থ্রোম্বোসাইতোপেনিয়া হায়না খঙনবা সাইদ ইফেক্ত অসি ভারত্তা য়াম্না তাঙনা থোকই, য়ুরোপ্তা থোকখিবদগী মীশিং য়াম্না হন্থনা থোকপা থেংনৈ‍। মরম অসিনা মসিদা করিসু কিনিংঙাই লৈতে‍। মসিগী লায়েংসু লৈ অমদি ঙন্না খঙহৌরবদি লায়েং পথাপ অসি শীজিন্নবা য়াই‍।

করিগুম্বা ঐ কোবিদ নারবদি নুমিৎ কয়ানিগী মতুংদা তিকা থাবা য়াগদগে?

দোক্তর গুলেরিয়া: খ্বাইদগী নৌবা চৎন-পথাপনা ময়েক শেংনা তাক্লিবদি কোবিদ-১৯ নাখ্রবা মীওইনা ফগৎলক্লবা মতুং থা অহুমগী মতুংদা তিকা অসি কাপথোকপা য়াই‍। অসুম্না তৌবনা হকচাঙদা হেন্না কনবা ইম্ম্যুনিতী শেমগৎপদা মতেং ওইগনি অমদি তিকাগী ময়াইসু হেন্না ফবা ওইগনি‍। (https://pib.gov.in/PressReleasePage.aspx?PRID=1719925).

এক্সপর্ত অনিমক – দোক্তর পোল অমসুং দোক্তর গুলেরিয়া অনিমক্না ঐখোয়না শীজিন্নরিবা তিকা অনিমক ভারত্তা হৌজিক ফাওবদা ফংলিবা ম্যুতেন্ত মখল খুদিংমক্তা কান্নবা উৎলি হায়না ফোঙদোকখি‍। তিকা অসি কাপ্লবা মতুংদা ঐখোয়গী ইম্ম্যুন সিস্তেম অসি শোন্থরকই অমদি তিকা কাপ্লুরবা মতুংদা মী শিরক্কনি হায়বা ৱাফমশিং সোসিএল মিদিয়াদা শন্দোরক্লিবা ৱাফমশিং অসিবু মখোয়না অরানবা অমদি য়ুম্ফম য়াওদবা ৱাফম্নি হায়রদুনা হায়রিবশিং অসি খুঙ্গঙ অমদি মনুং হঞ্জিনবা মফমশিংদা লৈবা মীওইশিংনা লান্না থাজনবা ৱাফমশিংনি হায়না ফোঙদোকখি‍।

***